Malko 3
3
Yesu wapozya ntu wino walemala ikasa
(Mt 12:9-14; Lk 6:6-11)
1Aingila kaili un-ng'anda yi Leesa, na kuwo pali untu wali nikasa lyalemala. 2Nga yannolekesha ndi akumposha uwanda wa Sabato, kuti yakamsongelele. 3Nga wannena untu wino walemala ikasa, waati: “Imilila pakasi.” 4Wayatondosya, waati: “Chili ningo uwanda wa Sabato ukuchita ifisipe nanti ukuchita iviipe? Kufyusha mweso naanti ukuumola?” Yatusha chele. 5Nga wayakundwile amaso konsi kuno yali uku chilakali, alola chikonko uku wukomu wa myenso yao, anena untu wiyo, ati: “Olola ikasa lyako!” Nawe walyolola ikasa lyaakwe, lyawi puma kaili. 6Pao kwene yantina aFaliseo nga yafwaanga yamba ponga na antu yi Yelodi, ifyakuti yamumole.
Yesu ni fiwa viipe
7Yesu na alondeshi yaakwe yaya kuli yemba. Iumba ikulu lifuma ku Galilea linnondela, niumba linina lifuma ku Yudea, 8nuku Yelusalemu nu ku Idumea nu ku Yodani mbalama zilye nu ku mbali ya Tilo na Sidoni yaile kunali, iumba ikulu. Pano yapulika amaswi yaakwe yano wachitanga. 9Wanena alondeshi yaakwe ukuti uwato unono wikale apipi nawe, kuno iumba lya antu litamfyenenkesha. 10Kuno waposishe ainji, chaleka alwale yoshi yamfyenenkesha, kuti yannemeleme. 11Ni myenso ya chiwa, chila pano yannola, ipona pansi panali, ilila, iti: “Wewe uli Mwana wi Leesa.” 12Nga ayilesha nkani, kuti itammanyisha konsi.
Yesu wasolola alondeshi ikumi na yaili
(Mt 10:1-4; Lk 6:12-16)
13Nga kwela um-mwamba, awita yano akasime unkola, yaya kunali. 14Wawika antu ikumi na yaili, angi yali ponga nawe, nu kuyatuma ukusunda. 15Kaili yawe na maka ya kutisya imyenzo yi chiwa. 16Wayawika ikumi na yaili; na Simoni wampa izina li Petlo. 17Na Yakobo, umwana wi Sebedeo, na Yoane, unnina wi Yakobo, ayapa isina lyi Boanega, alikuti: Ana ya nunkumo. 18Na Andelea na Filipo, Batolomeo na Mateo na Toma na Yakobo, mwana wi Alifeo, na Tadeo na Simoni mKananeo, 19na Yuda Iskaliote, wino wamfimile.
Yesu na Beelsebuli
(Mt 12:22-32; Lk 11:14-23; 12:10)
20Nga wingila un-ng'anda. Iumba lya antu likongana kaili, kufika nakola yapotwa nu kulya ichulya; kutali fwasi. 21Nga a luko lwakwe pano yapulika fiyo, yafumile ukuyunnema. Kuno yatangi: “Watapena.” 22Nga yakaandika yaile ukufuma uku Yelusalemu, yalanda, yaati: “Ali na Beelsebuli, na ku wikolo wa viwa aluwinga iviwa.” 23Nga ayita kunali, ayanena uku milumbe, ati: “Ichiwa chingawinga ichiwa chinina wuli? 24Nga ndu wene waipalunkanya wonga, uwene ungashala wimilile? 25Ndu luko lwaipalunkanya longa, uluko lu lutangi ushale lwimilile 26Ni Shetani ndi waatina onga, waupalula, kutangi kushala chimwi kaili, leelo chinsila. 27Kusi untu wino angingila un-ng'anda ya ntu wa maka nu kutola ifintu vyaakwe, mpaka atangula anyepe uwa maka, apano angatola ivya ng'anda. 28uMwenemo ndumunena: amaifyo yoshi antu yalwelelwa, ni misuli yao yino yalusula kuli Leesa. 29Leelo untu wacha wasula Mweso Nswefu, atalwelelwa manda ti. Leelo aluwa ni yifyo lya manda ti.” 30Kuno yaatile: “Ali ni chiwa.”
Yesu na a luko lwakwe
(Mt 12:46-50; Lk 8:19-21)
31Nga nyina nanina yiza, yimilila apanzi, yatuma untu kumwita. 32Niumba lyalile likala, lyannisishe, yanena, yaati: “Lola, nyoko na nyonko yala panzi. Yalukusita.” 33Nawe wayanena, waati: “Mama na chane ayani?” 34Walolekesha yano yatensi yannisha konsi konsi, waati: “Lolini, mama na chane. 35Kuno untu wensi uwacha wachita fino Leesa akasime, wiyo ali uwachane nu nsiche wane na mama wane.”
वर्तमान में चयनित:
Malko 3: FNT1988
हाइलाइट
शेयर
कॉपी
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
