YOHANA 2
2
Eshiselelo mwitookho lia Kana
1Olunyuma lwetsinyanga tsibili, eshiselelo shialiho mwitookho lia Kana mulukongo lwa Galilaya. Naye nyinamwana Yesu yali naliho. 2Yesu yali nalanjilwe halala nabeechibe mushiselelo eshio. 3Ne olwa idivai yali niyihwele, nyinamwana Yesu yetsa namuboolela ari, “Babula idivai.”
4Naye Yesu nakalusia naboola ari, “Mama, shiokhoyile okhumboolela eliekhola ta, eshise shianje shishili okhuula.”
5Nyina Yesu naboolela abakhalabani abo ari, “Mukhole liosi liosi liamuboolela.”
6Ne tsisiongo tsisasaba tsiali nitsiliho, ne buli indala yali eyinyala okhwitsulamwo amatsi amatepe kabili noho kataru. Tsiali nitsirenjekhweho khulwa omulukha okwa Abayahudi, okwokhwisiiya. 7Yesu naboolela abakhalabani abo ari, “Mwitsusie tsisiongo tsino amaatsi.” Nibetsusiamwo tsiosi okhuula khululika. 8Mana nababoolela ari, “Tayekhwo amaatsi ako muyilile ousinjiliile lisabo.” Mana nibamuyilila amaatsi ako, 9akali nikakalukhaane nikekholile idivai, natsaamakhwo. Naye shiyamanya ewa idivai eyo yali niyirulile tawe, nebutswa abakhalabani abali nibatayile amaatsi ako bali nibamanyile. Kho omusinjilili oyo nalanga omwene eshiselelo, 10ne namuboolela ari, “Buli mundu aranjililanga okhurenjekha idivai indayi, ne olwa abacheni baba nibamalile okhunywa inyinji, olunyuma abareerera eyilali indayi muno tawe. Nebutswa iwe obiishile idivai indayi okhuula bulano!”
11Yesu yakhola eshilolelo shiambeli shiakamakana eshio mwitookho lia Kana mu Galilaya, nalolesilia habwene yaho oluyalilwe, nabo abeechibe nibamusuubilila.
12 #
Mat. 4:13
Olunyuma lwako, Yesu nende nyinamwana, halala nabaana babwe nende abeechibe, batsia Kaperinaumu nibamenyayo tsinyanga tsinduutu.
Yesu yenjila muhekalu
(Mat. 21:12-13; Mrk. 11:15-17; Luka 19:45-46)
13 #
Okhur. 12:1-27
Ne inyanga yelisabo lia Pasaka lia Abayahudi, yali niyili ahambi okhuula, kho Yesu natsia Yerusalemu. 14Ne muhekalu omwo, yanyoolamwo abandu nibakusinjia tsing'ombe, amakondi nende amakuuku, yanyoolamwo khandi abokhufunjia amapesa boosi nibekhaalemwo nibakholanga obukhala bwabwe. 15Mana nakaasia omusharati kwetsikhoba, nabaloonda boosi halala nende amakondi netsing'ombe tsiabwe okhurula muhekalu, nasalaasia amapesa akabokhufunjia abo, khandi nafumamia tsimesa tsiabwe. 16Khandi yahalabila abandu bakusinjia amakuuku abo nababoolela ari, “Rusie muno ebindu bino! Shimulakhola inzu ya Papa okhuba eyokhukholelamwo obukhala tawe!” 17#Tsits. 69:9Abeechibe nibetsulila akahandikwa shinga olwa kaboolanga kari, “Nyasaye, obuheeli bwanje khunzuyo, busambanga mwisie shinga omulilo.”
18Kho abandi khu Abayahudi nibamureeba bari, “Neshilolelo shiina eshiamakana, shionyala okhukhola khulwa okhumanyia mbu, Nyasaye yakhuhelesia iwe obunyali bwokhukhola akokholile ako?”
19 #
Mat. 26:61; 27:40; Mrk. 14:58; 15:29 Naye Yesu nabakalusia ari, “Likulule Ihekalu yino, nasi ndalachiumbakha khandi mutsinyanga tsitaru.”
20Kho Abayahudi nibamuboolela bari, “Ihekalu yino yombakhwa khulwemiyika amakhumi kane nachisasaba, nawe oboolanga mbu, onyala okhuchiumbakha khandi khutsinyanga tsitaru tsionyene?”
21Nebutswa Ihekalu eya Yesu yali naboolangakhwo, kwali omubilikwe. 22Kho olwa yali nalamusiibwe okhurula mukhufwa, abeechibe nibetsulila shinga olwa yali naboolile amakhuwa ako, nibasuubila Amahandiko nende aka Yesu yali naboolile.
Yesu yamanya akali mumioyo chiabandu
23Ne olwa Yesu yali nali Yerusalemu mutsinyanga tsielisabo lia Pasaka, abandu abanji basuubilila muye olwa balola akamakana kayakhola. 24Nebutswa Yesu shiyali nabasuubilile ta, shichila yali niyabamanya boosi pe. 25Kata shiyayenyakhwo mbu, omundu yesi yesi amurumbulile akali mubandu abo ta, shichila ye omwene yali namanyile akali mumioyo chiabwe.
वर्तमान में चयनित:
YOHANA 2: OLUDC
हाइलाइट
शेयर
कॉपी
Want to have your highlights saved across all your devices? Sign up or sign in
