Lir. 18

Wele Omunyali Owa Bioosi alaka Aburahamu omwana

1Wele Omunyali Owa Bioosi abonekhela Aburahamu a mikhoonge kia Mamure, nga aaba ne ekhaale a muliango kwe liiema liewe kumuumu ne kurafue. 2#Baeb. 13.2 Asuta chimoni abona babaandu bataru bemile ebweeni wewe. Nga ababona arura muliango mwe liiema atima acha khubakaanila. Enama bubweeni bwetiila asi, 3mala ababoolela ali, “Baami base, naaba nefukiililwe mumoni chenywe, nemusiima mukhabira busa khu mukholi wenywe tawe. 4Kameechi matiiti kari kareerwekho musaabe bikele bienywe mala muolelekho a murongooro ano, 5ne nja khureera kumukaati, muliekho nio mubire, sikila mwechile wo mukholi wenywe.”

Nio bamuboolela bali, “Khola nga olomile.”

6Aburahamu acha khangu mu liiema khu Sara mala amuboolela ali, “Khola khangu bufu bunosie bikelo bitaru, okaande mala upe kimikaati.” 7Mala Aburahamu atima khangu sie tuuli abukula emoosi ekhomefu lundi endayi akiia omukholi wewe akhola khangu khukibaaka. 8Aburahamu abukula kamafura ke kamabeele ne kamabeele ne chinyama aelesia bakeni bewe mala abemao mu murongooro nga baaba ne balia.

9Bamureeba bali, “Omukhasi wowo Sara ali waena?”

Abakobosia ali, “Ali mu liiema.”

10 # Bar. 9.9 Ne mulala khu nibo aloma ali, “Ekhakobole kumwiiko kukwiicha siise nga sino siri mala Sara omukhasi wowo akhanyoole omwana owe sisoleeli.”

Sara aaba enyuma wewe, amuliango kwe liiema arekereesie. 11Nono Aburahamu ne Sara baba bakofuule lukali, ne Sara aaba ayakama khukhwikhebukha. 12#1 Pet. 3.6 Nio Sara achekha mala aloma busa yeng'ene ali, “Ese nakofuule, ne omuseecha wase yesi akofuule nyala neulila khuba no museecha ku?”

13Wele Omunyali Owa Bioosi areeba Aburahamu ali, “Siina sikila Sara ne achekha ne khuloma ali, ‘Ese ng'ali nyala khusaala omwana nga ne ngofuule ndi ku?’ 14#Lk. 1.37 Siindu siliio sili siaandalafu khu Wele Omunyali Owa Bioosi ku? Kumwiiko kukwiicha siise nga sino siri ekhakobole mala Sara akhasaale omwana owe sisoleeli.”

15Nio Sara ekaana ali, “Se njekhile tawe.” Sikila buuri bwamuaamba. Wele Omunyali Owa Bioosi amukobosia ali, “Tawe ochekhile.”

Aburahamu asabila Sodomu

16Nio babaandu abo barekukha bacha lubeka lwa Sodomu, Aburahamu acha ne nabo khubaroongia. 17Wele Omunyali Owa Bioosi aloma ali, “Nyala nakisa Aburahamu nisio ndi siimbi khukhola ku? 18Ne lisaaye liewe licha khuba ekholo emboofu lundi eye kamaani, ne khubirira mu niye bibala bioosi bie khu sibala bilibiitwa chikhabi? 19Tawe, sikila namuroboore niye alakiliisie babaana bewe, nende be nju yewe enyuma wewe, barie Wele Omunyali Owa Bioosi ne khukhola buluungi ne bung'ali nio Wele Omunyali Owa Bioosi akholele Aburahamu nga ne amusuubiisie.”

20Wele Omunyali Owa Bioosi aloma ali, “Sikila bililo khu Sodomu ne Komora biabeele bikali ne bubwoni bwabwe buli bubi lukali, 21ndikho nikhayo mbone, ne kali bali niko bakholile kali bulayi bwene nga bililo nibio ndereerwe namwe ne kakhali kario tawe, ndamanya.”

22Nio bayuukha khukhwama ao barakikha khucha Sodomu, ne kakhali Aburahamu aaba asiili ebweeni wa Wele Omunyali Owa Bioosi. 23Aburahamu eseenda siimbi mala areeba ali, “Olikho ng'ali ocha khubunia omuluungi no mumayaanu? 24Kaaba bali baliyo baluungi kamakhumi karaano mu lukoba, se olalekha khubunia lukoba sikila baluungi kamakhumi karaano balimo abo ta ku? 25Likhuwa lie khukhwira omuluungi no mumayaanu likhakhubamo tawe! Omuluungi akhaba busa nga omumayaanu tawe. Lilieneli likhakhubamo tawe. Omukhalaki owe sibala se akhoyela khukhola kali ng'ali ta ku?”

26Nio Wele Omunyali Owa Bioosi akobosia ali, “Nanyoola mu Sodomu baluungi kamakhumi karaano ndalekha lukoba lwoosi sikila nibo.”

27Aburahamu akobosia ali, “Sikila nabeele omunyindaafu lukali khulomaloma khu Wele Omunyali Owa Bioosi, akhaba ne ndi busa lipukhuulu lundi likokhe. 28Nono baaba ne bakhali kamakhumi karaano tawe, ne kakhali bali kamakhumi kane na baraano? Olabunia lukoba sikila baramiirekho baraano nio boole kamakhumi karaano?”

29Wele Omunyali Owa Bioosi amuboolela ali, “Se mbunia lukoba baaba ne balimo baluungi kamakhumi kane na baraano tawe.”

30Aburahamu aloma lundi ali, “Nosiima Wele Omunyali Owa Bioosi okhaambwa lirima tawe, ndakhureebakho lundi, ne kaaba bali banyoolekhanamo kamakhumi kataru bong'ene?” Akobosia ali, “Nanyoolamo kamakhumi kataru se mbunia lukoba tawe.”

31Aburahamu aloma ali, “Nosiima umbeele khuchiililila khulomaloma khu Wele Omunyali Owa Bioosi. Ne banyoolekhanamo kamakhumi kabili?” Akobosia ali, “Sikila kamakhumi kabili, se endabunia lukoba tawe.”

32Aburahamu aloma ali, “Nosiima Wele Omunyali Owa Bioosi okhaambwa lirima tawe, ndalomaloma busa luno lulala lwong'ene. Banyoolekhanamo ekhumi bong'ene?”

Akobosia ali, “Sikila ekhumi, se ndalubunia tawe.” 33Nga Wele Omunyali Owa Bioosi ne amala khulomaloma ne Aburahamu, arekukha, mala Aburahamu akobola engo.

वर्तमान में चयनित:

Lir. 18: LUBUKUSU

हाइलाइट

कॉपी