Lir. 16

Hakari ne Ishimaeli

1Sarai, omukhasi owa Aburamu, se amusaalila babaana tawe. Ne Sarai aaba ne nasioobi, omukhaana Mumisiri, owalaangwa bali Hakari. 2Mala Sarai aboolela Aburamu ali, “Wele Omunyali Owa Bioosi ayikhiingilila ese khusaala babaana. Khowiile khu nasioobi wase nio wakana khola ndio nanyoolela babaana khu niye.” Aburamu afukiilila kamakhuwa ka Sarai. 3Enyuma wa Aburamu khumenya mu sibala sia Kanaani kimiiko ekhumi, Sarai, omukhasi wewe, abukula Hakari, nasioobi wewe, omukhaana Mumisiri, mala amua Aburamu, omuseecha wewe, abe omukhasi wewe. 4Nio Aburamu akona naye mala aesia. Ne nga Hakari abona ali aesiisie, alekelesia Sarai.

5Nio Sarai aboolela Aburamu ali, “Bubi nibwo kholelwe bukhoya bwaaba khwiwe! Nakhua nasioobi wase, ne khukhwama nga ne amanyile ali ali nda, andekeleesie ese. Wele Omunyali Owa Bioosi akhoya akhalaka akari wase ne nawe!”

6Ne kakhali Aburamu aboolela Sarai ali, “Lola, nasioobi wowo ali mu bunyali bwowo, mukhole nga ne wenya.” Nio Sarai amunaania mala omukhaana oyo amwilukha.

7Malaika owa Wele Omunyali Owa Bioosi anyoola Hakari asebele mu sichiimi, amuyila kucha Shuri. 8Malaika areeba ali, “Hakari, nasioobi owa Sarai, wama wae ne olikho ocha waena?” Hakari akobosia ali, “Ndikho nilukha omukhaaye Sarai.”

9Malaika owa Wele Omunyali Owa Bioosi amuboolela ali, “Kobola wo mukhaaye wowo mala weboombie.” 10Malaika owa Wele Omunyali Owa Bioosi amuboolela lundi ali, “Ndakucha lisaaye liowo libe likali, liikhabalikha tawe.” 11“Lola waesiisie, ne olasaala omwana owe sisoleeli, mala olimutiuukha oli Ishimaeli, sikila Wele Omunyali Owa Bioosi auliile lilila lie khunaanisibwa khwowo. 12Ne omwana wowo aliba nga epunda eye mundaa, aliba omusiku owa buli mundu, ne buli mundu aliba omusiku wewe, ne aliiyaula khu balebe bewe amenye yeng'ene.”

13Nio Hakari alaanga lisina lia Wele Omunyali Owa Bioosi owalomaloma ne naye ali, “Ewe oli Wele oobona,” sikila ereeba ali, “Ese naboone Wele mala enyuma we khumubona naramire omulamu?” 14Khwako esebele yalaangwa bali Beeri-lahai-roi, eli akari wa Kadeshi ne Bereti. 15#Bakal. 4.22 Hakari asaalila Aburamu omwana owe sisoleeli mala Aburamu amutiuukha ali Ishimaeli. 16Aburamu aaba ne bukhulu bwe kimiiko kamakhumi munaane ne sita nga Hakari ne amusaalila Ishimaeli.

वर्तमान में चयनित:

Lir. 16: LUBUKUSU

हाइलाइट

कॉपी