Lir. 12

Wele alaanga Aburamu

1 # Bikh. 7.2-3; Baeb. 11.8 Wele Omunyali Owa Bioosi aboolela Aburamu ali, “Rura mu sibala siowo, ne mu balebe bowo, ne munju eya raraao, mala oche mu sibala nisio kane khwekesie. 2Ne ndakhukhola obe ekholo emboofu. Ndakhuelesia chikhabi mala khole lisina liowo lifumikhane, nio obe owe chikhabi. 3#Bakal. 3.8 Ndabiita chikhabi abo bakhubiita ewe chikhabi, ne ndalaama abo bakhulaama ewe. Mala khubirira mwiwe bibala bioosi bie khu liloba bilabiitwa chikhabi#12.3 bibala bioosi bie khu liloba bilabiitwa chikhabi: namwe bibala bioosi bikhasabe ese mbibiite chikhabi nga ne ekhubiitile ewe..”

4Nio Aburamu acha nga Wele Omunyali Owa Bioosi aaba ne amubooleele. Luti aacha ne naye. Aburamu arura Harani ne ali ne bukhulu bwe kimiiko kamakhumi saba na kiraano. 5Aburamu abukula Sarai omukhasi wewe, ne Luti omwana owa wandaaye, ne kimiaandu kiabwe kioosi nikio baaba ne banyoolile, ne nasioobi nibo banyoola mu Harani, mala barakikha lukeendo lwe khucha mu sibala sia Kanaani.

Nga boola mu sibala sia Kanaani, 6Aburamu engilamo mala acha ola abuundu atakatifu e kumurongooro kumuboofu kwe More mu Shekemu. Mu biise ebio Bakanaani baaba mu sibala esio. 7#Bikh. 7.5; Bakal. 3.16 Wele Omunyali Owa Bioosi abonekhela Aburamu mala amuboolela ali, “Ndielesia lisaaye liowo sibala sino.” Nio Aburamu ombakhilayo Wele Omunyali Owa Bioosi, owaba ne amubonekheele, alutare. 8Khukhwama abwenao aacha mu sibala sie bikulu ebukwe wa Beteli, mala ombakha liiema liewe akari wa Beteli, lubeka lwe mumbo ne lukoba lwa Ai, ebukwe. Ne, abweneo ombakhila Wele Omunyali Owa Bioosi alutare mala amwesaaya. 9Mala Aburamu acha kumukhono kwe siafubo owa Kanaani.

Aburamu ne ali mu Misiri

10Enjala yaba mu sibala sia Kanaani, mala yaba engali lukali. Nio Aburamu ekha acha mu sibala sia Misiri amenyekhoyo khulwe siise. 11Nga aaba ne ali siimbi khukhwingila mu Misiri, aboolela Sarai, omukhasi wewe ali, “Manyile ndi ewe oli omukhasi owe lukoondo lulayi, 12Nga Bamisiri ne kane bakhubone kane balome bali, ‘Lola omukhasi wewe,’ balanjira ese mala bakhulekhe ewe omenye. 13#Lir. 20.2; 26.7 Baboolele oli ewe oli omukooko wase, nio okile bambukule bulayi bakhanjira tawe.” 14Nga Aburamu engila mu Misiri, Bamisiri babona bali omukhasi wewe ali owe lukoondo lulayi. 15Bakhulu be mu bwami bwa Farao owa Misiri babona Sarai mala bamufumia khu Farao. Sarai abukulwa ayilwa munju yo mwami. 16Mala Sarai akila Farao akholela Aburamu kamalayi. Aburamu aaba ne kamakheese, chikhaafu, chipunda chiseecha ne chikhasi, banasioobi be siseecha nende be siikhasi ne chingamia.

17Ne kakhali Wele Omunyali Owa Bioosi areera lufu lubi lukali khu Farao nende be lichipi liewe sikila mukha Aburamu. 18Nio Farao alaanga Aburamu amureeba ali, “Siina nisio ukholeele sino? Siina sikila ne okhambooleele oli, Sarai ali omukhasi wowo? 19Siina sikila ne wambooleele oli ali omukooko wowo, mala wakila namubukula abe omukhasi wase? Nono, omukhasi wowo niyooyu mu bukule mala oche.” 20Nio Farao arakho bakholi bewe, baroongie Aburamu alala no mukhasi wewe, nende buli siindu nisio aaba nasio.

वर्तमान में चयनित:

Lir. 12: LUBUKUSU

हाइलाइट

कॉपी