MAK 2

I Jisas mo vakahiki na tangaloi sarosaro

(Mat 9.1-8; Luk 5.17-26)

1A raniki he rusa tea koroa, i Jisas mo mulemai taliku vaki Kavaneam, vae a roro mo vitiana kwara aia na vanua. 2A tangaloi u rusa ramo vanamai tabulutaki, vae a tanotano u tikei vohoki lakwara, kwara diko te vaki lo matakihala, tikei, u kukwere kina tangaloi. Hikani i Jisas mo toko heretuvaki na leo lakwara. 3Lo taro hi a tangaloi ramo vanamai vaki maia, rau kwali na tangaloi sarosaro katukwale a tarabehina rau mate. Aira kaivati ramo kwalia. 4Vae rahe soro lai te maia vaki mai Jisas huri na vao. Vae ramo kakwohi na mahigwa na ingwa* hivoulu, vovohi na mahao hi i Jisas mo tu eia. Ramo kakwohia mo rovo, vunu ramo tiraki na tangaloi hi tegetano mana herena hi mo ngwalulu luna. 5Vae Jisas mo tagai na noga hauhuriana, mo kwaha mana tangaloi sarosaro hi mo viti lakwae kwara, “Natugu. I nau nu domidomi koro na nomu hatiana, u rovo ba.” #Luk 7.48

6Hikani a tangaloi* kikikila na Uliuli* Kokona ratuaki rau hugu takwahini ramo toko domi lolo domiga kwara, 7“?Kworohokinia a tangaloi hika mo kwahakwaha hati vovohi God hokinia hi? A tangaloi nehe domidomi koro lai te hatiana. I God kehekeheki u vai lai.” #Sam 103.3; Aes 43.25; 1 Sione 1.9

8Vae i Jisas u kikilai na domiga vakatukwale, mo kwaha maira mo viti kwara, “?Kworoho tulu mo toko dikoki lolo domimiu hokinia hi, huri na kinau aira vano hi? #Mat 16.8 9?Aia makive u magemu? ?Na viti lakwa na tangaloi hi a tarabehina rau mate kwara, ‘I nau nu domidomi koro na nomu hatiana, u rovo ba,’ diko na viti ‘Maraka, ko lai heremu, ko lakao’? 10Vae na vosangi lakwakamu tulu ne kikilai kwara i nau, a Natu* na Tangaloi, a nogu huirana eia lo varamana kwara na domidomi koro na hatiana nona tangaloi.” Vunu mo kwaha mana tangaloi sarosaro hi 11mo viti kwara, “Na viti lakwako, ko maraka ko kwali heremu, ko mule vaki tatamu.”

12A tangaloi hi mo maraka mo kwali na herena, mo lakao lo nakoga. Vae rau idila vohoki, ramo kaluhaki God, ramo viti kwara, “Kehe toko taga te kinau hokinia hi tuai.” #Mat 9.33

I Jisas mo kware i Livae

(Mat 9.9-13; Luk 5.27-32)

13I Jisas mo mule taliku vaki lo Kwai* Tokatoka Lakua Galili*. Doluaki na vao ramo vanamai vaki maia, mo tinakaki mo huhuira. 14Vunu mo maraka mo lakao, mo tagai Livae i natu i Alveas, u hugu lo nona tanotano na tau mane*, a takis nona kavman. I Jisas mo kwaha maia mo viti kwara, “Ko huriau.”

I Livae mo maraka, mo huria. #a Mat 8.22; 19.21; Mak 10.21; Luk 9.59; 18.22; Sione 1.43; 21.19,22; b Mat 4.20,22

15Vunu takuni tiua hi i Jisas u kanikani lolo ingwa i Livae. A tangaloi* na vilevile mane, a takis nona kavman, mana tangaloi* vaivai hati tavalavarea u rusa ramo huri i Jisas, vae ratuaki rau hugu mai Jisas mana nona ngwalagelo ramo kanikani maira. 16A tangaloi* kikikila na Uliuli* Kokona ratuaki mana Varisi* maira, ramo tagai Jisas kwara u kanikani mana tangaloi vaivai hati tavalavarea mana tangaloi na vilevile takis nona kavman, ramo uduhuri kina nona ngwalagelo ramo viti kwara, “?Kworohokinia mo kanikani mana tangaloi hokinira hi?” #Mat 11.29; Luk 7.34; 15.1-2

17I Jisas mo rongora, mo darakinira mo viti kwara, “A tangaloi hinea rau rongo karea rahe lengai na tokita tea, vae aira kehekeheki hinea rau lenga rau lengai na tokita. I nau nohe vanamai tea kwara na kware na tangaloi hinea rau bakoto, vae aira hinea a tangaloi vaivai hati tavalavarea.”

A leo uhiuhi huri na reterete

(Mat 9.14-17; Luk 5.33-39)

18Vakatukwale, a ngwalagelo noi Sione, a tangaloi na bavtaes tangaloi, mana ngwalagelo nona Varisi* maira rau tuku rete. Vae a tangaloi ratuaki ramo vanamai vaki mai Jisas ramo uhia ramo viti kwara, “?Kworoho a ngwalagelo noi Sione mana ngwalagelo nona Varisi maira ramo rete, vae a nomu ngwalagelo rahe rete tea?”

19I Jisas mo daraki lakwara mo viti kwara, “?I kamu tulu domi kwara a tangaloi aira hinea ramo vanamai huri a kanikani na lakiana rana rete? Hetea. Lolona hi a ngwera na lakiana aia maira ranahe rete tea. 20Vae lo taroki a tangaloi rana lavi na ngwera na lakiana hi tiura, vunu ranari rete lo taro hi.

21“A tangaloi nehe somavu na mahigwai-lugwa karagwa tea tilo lugwa ngwanika. Diko ne vai kwehini a lugwa karagwa hi ne kuku ne reve dare na lugwa ngwanika, ne madare siletia hi tomua. 22Vunu vake a tangaloi nehe lilingi na waen karagwa tea tilolo tanga na waen tuai hinea a vinu na boboroa. Vae diko ne lilingi na waen karagwa tilolo tanga tuai, a waen karagwa hi a nona huirana ne maraka ne vai dare na tanga tuai, a waen mana tangaki raru ne hati i rarua vunu. Vae a tangaloi ne lilingi na waen karagwa tilolo tanga karagwa.”

A leo uhiuhi huri na Rani na Mabuana

(Mat 12.1-8; Luk 6.1-5)

23Lo Rani* na Mabuana katukwale, i Jisas mana nona ngwalagelo ramo lakao utuhi na agoago* na uit*. Vae a nona ngwalagelo ramo maraka hika ramo rarahi na biuki na uit lo hala. #Dut 23.25 24Vunu a Varisi* ramo tagaira, ramo kwaha lui Jisas ramo viti kwara, “!Tagaia! ?Kworoho a nomu ngwalagelo ramo vai na kinau hokinia hi, a noda Tangwata* he tirakikita tea kwara tana vai lo Rani na Mabuana?”

25-26I Jisas mo daraki lakwara mo viti kwara, “?I kamu tulu he valuki na kinau tea lo Uliuli* Kokona huri i Devit hinea mo vai tuai? Lolona hinea i Aviata aia a hugwe na tangaloi* lingilingi, i Devit mana nona ngwalagelo a kaga hinaka tikei, u marakatira. Vae i Devit mo soro tilolo ingwa noi God, mo lavi na bereti* hinea a tangaloi rau hilea ba lakwai God, mo kania. Vunu vake u bete lakwa na nona ngwalagelo ramo kani. Aia a noda Tangwata he tiraki tea kwara a tangaloi haro nga rana kani na bereti hi, kehekeheki na tangaloi lingilingi maira.” #a 1 Saml 21.1-6; b 2 Saml 15.35; d Lev 24.5-9

27Vunu i Jisas mo kwaha maira mo viti kwara, “A Rani na Mabuana u tauana huri na tangaloi, a tangaloi he tauana tea huri na Rani na Mabuana. #Eks 20.8-10; Dut 5.12-14 28Hokinia hini i nau, a Natu* na Tangaloi, nu hugwe koro na tangaloi, vae a Rani na Mabuana vake nu hugwe koroa hokinia.”

वर्तमान में चयनित:

MAK 2: HWT

हाइलाइट

कॉपी