MAK 11

I Jisas mo vano vaki Serusalem vae a tangaloi rusa ramo tabe hakeki na hinana

(Mat 21.1-11; Luk 19.28-40; Sione 12.12-19)

1Hikani ramo vanamai ramo maravuti u garagarani mana gwatuivanua Betvas maia Betani lo Vuti na Vikai* a Violev, hi u garagarani mana gwatuivanua lakua Serusalem. Lo taro hi i Jisas mo hora na nona ngwalagelo kairua tiura, 2mo viti lakwararua kwara, “Kuru vano vaki lo gwatuivanua kelekele hinea u tu koro na nakomiru. Kuru ne soro tilolona kuru ne hodilai na natu na dogi rau saniki-bibia hinea a tangaloi rahe kwalao te luna radu nga. Kuru mo teri na karo tiua, kuru mo lavia vanamai. 3Vae diko te tangaloi mo uduhuri kikamurua kwara ‘?Kworoho kuru mo vai hokinia hi?’ kuru mo viti kwara, ‘A Hugwe* u lengaia kwara ne kwalao luna, vunu ne taua taliku mulemai lai nga.’ ”

4Hika raru mo vano, raru mo tagahagwe na natu na dogi hi u tu lo hala lakua u sanikiana lo matakihala na ingwa. Lolona raru mo toko teri na karo tiua, 5a tangaloi ratuaki hinea rau tu takwa-hi ramo uduhuri kirarua kwara, “?Kuru vai aha kuru mote toko teri na karo tina natu na dogi hi?”

6Hika raru mo daraki lakwara hokinia hini i Jisas mo viti lakwararua. Vae a tangaloi vano hi ramo tirakirarua raru mo vano. 7Hikani raru mo lavi na natu na dogi hi vaki mai Jisas. Vunu raru mo teri na kakavugaru raru mo verakira hivoulu luna, i Jisas mo hugu luna.

8A tangaloi u rusa ramo vola kakavuga lo hala, ratuaki rau tai a rangai-vikai lo talutalu ramo tau lo hala. 9A tangaloi rusa rau tomua, ratuaki aira takuni ramo vidouki ramo viti

“!Keu kaluhakinigo!

Hugwe i God.

Ko vai tabetabeki na tangaloi

hinea u vanamai lo hinamu. #Sam 118.25-26; Mat 21.15; 23.39

10Ko vai tabetabeki na tangaloi hi

hinea ne mulemai kina Hugwe Lakua hika,

hoki i tubumai tuai i Devit

aia a hugwe lakua.

A tangaloi aira vunu hinea lolo taetae

rau kaluhakinigo.” #Luk 1.32-33; Bol 2.29

11Hikani i Jisas mo soro vaki Serusalem, mo vano vaki lolo Vanua* Kokona noi God, mo tagataga laliki lo kinau savira, vae huri u raviravi ba, mo tiraki na gwatuivanua lakua hi taliku mo mule vaki Betani mana nona ngwalagelo hangavulu dongwana kairua.

A vikai a hinaki a vivik hinea he kwai tea

(Mat 21.18-19)

12Mote mavukona ramo ngwalua tina gwatuivanua Betani, i Jisas mo marakatia. 13Mo tagai na vikai* vakahao, a vivik, u tavutavu ba, vae mo vano mo tagaia u domi kwara ne hagwe te kwaiki luna. Vae mo vano vaki maia, mo tagai na rauki kehekeheki, huri hete taroki radu nga kwara ne kwai. #Luk 13.6 14Hikani i Jisas mo kwaha mana vikai hi mo viti “Vae a tangaloi nehe kani na kwaimu tea vaki tuai.”

Vae a nona ngwalagelo rau rongo na leo hi mo vitia. #Mak 11.20

I Jisas mo vano vaki lolo Vanua Kokona noi God

(Mat 21.12-17; Luk 19.45-48; Sione 2.13-22)

15Lolona ramo maravuti Serusalem i Jisas mo soro tilolo Vanua* Kokona noi God, mo tinakaki mo livulivuti na tangaloi hinea ramo toko hokahokaki maira hi ramo toko volivoli lolona, mo hale bohiki na tevo na riririri mane* mana hagehagele na kaihokaki na kwiba. 16He tiraki na tangaloi tea kwara ne kwali a kinau ne lakao lalahi na loloiara* na Ingwa Kokona noi God maia. 17Vunu mo toko huhui na tangaloi mo viti lakwara kwara, “U uliana lo Uliuli* Kokona kwara i God u viti ‘A Ingwagu ne kwareki a ingwa na tiutangaroa huri na tangaloi na vanua rusa doluaki.’ Vae i kamu tulu mo bohikinia mo mulemai ki hilihili na tangaloi babalua.” #a Aes 56.7; b Jer 7.11

18Hikani aira a tangaloi* lingilingi lalakua mana tangaloi* kikikila na Uliuli Kokona ramo rongo na leo hi i Jisas mo vitira, ramo soro haro na halaki kwara rana kwohi mateia, huri rau mataku kinia, a vao rau idila haburu kina nona huhuiana. #Mak 14.1; Luk 20.19; 22.2 19Lolo raviravi hi i Jisas mana nona ngwalagelo ramo tiraki na gwatuivanua lakua hi.

A huhuiana tina vikai hi a vivik

(Mat 21.20-22)

20Mo sirovobongi ramo lakao lo halaga hi taliku, ramo tagai na vikai* hi a vivik u goru savia vaki lo kakwariki. 21Hikani i Pita mo domihagwe na leo hi, mo viti “Hugwe, ko tagai na vikai hi komo kwaha vovohia vae u goru savia.” #Mak 11.14

22Vae i Jisas mo kwaha maira mo viti “Tulu hauhuri lui God. 23Kareaki na viti lakwakamu, ihe te haro ne viti lakwa na vuti hika kwara, ‘Ko maraka ko rovo tilolo tahi sibomu,’ vae he dikoki te lolo domina, aia u hauhuri lo leona hi mo viti, vae neri mule luna lakwai hokinia hi. #Mat 17.20; Luk 17.6; 1 Kor 13.2 24Vae huri hi, na viti lakwakamu, tulu mo lengai naha tea tulu mo tiutangaroa, tulu hauhuri kwara tulu lavia ba vae tulu ne lai lavia. 25Vae lolona tulu mo tu kwara tulu ne tiutangaroa, tulu domidomi koro lakwa na tangaloi te lo havakinau hinea mo vai vovohikamu kwara vae i Tamamiu lolo taetae ne domidomi koro nomiu vakasileana.” #11.25: Lo Buku Kokona tuaki hinea a tangaloi rau ulira tuai, rau hoke na leo hika kina leo hinea mo viti kwara “26 Diko tulu he domidomi koro tea lakwara ratuaki, i Tamamiu lolo taetae vake nehe domidomi koro te nomiu vakasileana.” #a Mat 6.14; b Mat 5.23; Rev 2.4,14,20

A leo uhiuhi kwara ihe u rivuki i Jisas

(Mat 21.23-27; Luk 20.1-8)

27Vunu ramo vanamai taliku vaki Serusalem. Lolona i Jisas mo toko lakao laliki lolo Vanua* Kokona noi God a tangaloi* lingilingi lalakua mana tangaloi* kikikila na Uliuli* Kokona mana ngwarasea* maira ramo vanamai vaki maia. #Mat 16.21; 27.41; Mak 8.31; 14.43,53; 15.1; Luk 9.22; 22.66 28Ramo viti lakwae kwara, “?Ku hagwe na nomu bakotoana ave kwara kona toko vai na kinau vano hi? ?Ihe u rivukiko komo toko vai kwehi?”

29Hikani i Jisas mo daraki lakwara mo viti kwara, “I nau na uduhuri na kinau katukwale kikamu vae tulu ne darakinia lakweau, vunu i nau nari viti lakwakamu kwara nu gwatua ave nomo toko vai na kinau aira vano hika. 30Tulu daraki na nogu leo hika. ?I God u rivuki Sione kwara ne bavtaes na tangaloi, diko a tangaloi rau rivukia?” #Sione 1.33

31Hikani ramo toko vikwahaki luna aira mulekinira, ramo viti kwara, “?Tana viti kworoho? Diko tana daraki kwara ‘I God u rivukia,’ vae ne viti kwara, ‘?Kworoho tulu heva hauhuri tea lui Sione?’ #Mat 21.32; Luk 7.30 32Vae tanahe viti lai tea kwara, ‘A tangaloi rau rivukia.’ ” Rau viti kwehi huri rau mataku kina tangaloi, huri a tangaloi savia rau hago lo leoki kwara i Sione aia a tangaloi* duruduruki kareaki. #Mat 14.5; 21.46

33Vunu ramo daraki lakwai Jisas ramo viti kwara, “Kehe kikilai tea.”

Vunu i Jisas mo viti lakwara kwara, “I nau vake nahe viti tea lakwakamu kwara nu hagwe na nogu bakotoana ave nomo vai na kinau vano hi.”

वर्तमान में चयनित:

MAK 11: HWT

हाइलाइट

कॉपी