लुका 20
20
ये़सुरे़ कुयुक्
(मत्ति २१:२३-२७; मर्कु ११:२७-३३)
1थिक्ये़न् ये़सुरे़ माङ्हिम्मो निसाम् हुॽरुसिर सुनाइङ् इङ्भन् चोगुर यागे़॥ खे़प्मो तुम्निङ्वाॽफुसाम्बाहाॽ, साम्योथिम्साम्बाहाॽ हे़क्क्याङ् यहुदि तुम्लाम्लोबाहाॽ मे़द्ये़आङ् 2खे़ङ्हाॽरे़ खुने़ॽ अक्खे मे़मे़त्तुर सेःन्मे़दोसु, “खे़ने़ॽ थे़मा युक्किल्ले़ अक्तङ्बा याःम्बक्हाॽ के़जोगुर के़वाॽ? कन् युक्किन् हाःत्ले़ के़बिरे़? आमे़त्ते़ॽ॥”
3ये़सुरे़आङ् खे़ङ्हाॽ मे़त्तुसि, “इङ्गाॽआङ् लत्छा सेःन्लाप्थिक् सेःन्दोनिङ्लो॥ 4युहुन्नारे़ बप्तिस्मा पिमा कुयुक्किन् आत्तोलाम् त्ये़बाबे? निङ्वाॽफुमाङ्लाम् त्ये़बाबि, इ मनालाम्बि? आमे़त्ते़म्मे़ॽ!”
5खे़ङ्हाॽ खुनिॽ लुम्मो पान् मे़धक्ते़र अक्खे मे़मे़त्छिङ्, “आल्ल आनिॽ ‘निङ्वाॽफुमाङ्लाम्’ आमे़त्तुम्ने़ फाॽग्र, थेआङ् नसान् के़न्जोगुम्मिन् फाॽआङ् सेःन्आलाप्॥ 6कर ‘मनाहाॽलाम्’ आमे़त्तुम्ने़ फाॽग्र, मनाहाॽरे़ आनिॽ लुङ्ङिल्ले़ आम्बत्, थेआङ्भे़ल्ले़ मनाहाॽरे़ युहुन्नाःङ्ग माङ्निङ्वाॽपान् के़बाःप्पा फाॽआङ् निस्सेए मे़इःत्तुॽरो॥” 7खे़ल्ले़चोगुल्ले़ खे़ङ्हाॽरे़ ये़सुन् मे़मे़त्तु, “आनिगे मे़निसुम्बे़न्लो॥”
8हे़क्केःल्ले़ ये़सुरे़ खे़ङ्हाॽ मे़त्तुसि, “हे़क्केने़ फाॽग्र थे़मा युक्किल्ले़ अक्तङ्बा याःम्बक्हाॽ चोगुङ् खे़न् इङ्गाॽआङ् मे़मे़त्निङ्ङिन्लो॥”
फे़न् इक्मसाबाहाॽरे़न् खे़दाॽ
(मत्ति २१:३३-४६; मर्कु १२:१-१२)
9ये़सुरे़ मनाहाॽ कन् खे़दाॽइन् मे़त्तुसि, “उन्छेःन् मनाधिक्ले़ लत्छा इक्को चे़ल्ले़क्सेॽ लेःत्तुआङ् कुभ्रे़ःङ् लक्को खे़न् चे़ल्ले़क्सेॽ इक्किन् इक्मसाबाहाॽ पिरुसिआङ् खुने़ॽ यरिक् ये़म् थारिक् वेॽ लाजेॽओ पे॥ 10हे़क्क्याङ् चे़ल्ले़क्सेॽ तुप्मा ये़म् त्ये़ःल्ले़ कुलक् लासे़ कुसे़वारोबाधिक् इक्मःबाहाॽरो पाङ्घुरो॥ कर खे़न् इक्मसाबाहाॽरे़ खुने़ॽग मे़हिप्तुआङ् थेआङ् मे़म्बिए हाबा मे़बाङ्घु मे़देसुरो॥ 11हे़क्क्याङ् याम्मो निसिगेक्पा से़वारोबान् लक् ताःक्से़ पाङ्घु, कर खे़न्नाङ् खे़न् इक्मसाबाहाॽरे़ मे़हिप्तुर कुजाःत्थि मे़देसुआङ् कुघाले़म् मे़बाङ्घु मे़देःसुरो॥ 12याम्मो आल्लसाङ् सुम्सिगेक्पा के़से़वारोबान् लक् ताःक्से़ पाङ्घु, कर खे़न्नाङ् खे़न् इक्मसाबाहाॽरे़ मे़घाःन्दुआङ् मे़नाःत्तु मे़देसुरो॥
13“आल्ल चे़ल्ले़क्सेॽ इक्के़ल्ले़ कुन्दाङ्बान् निङ्वाॽ इःत्छिङ्, ‘इङ्गाॽ थे चोगुङ्बाबे? आल्ल इङ्गाॽ लुङ्माॽ तुक्तुङ्बा आस्सान् पाङ्घुङ्॥ खुने़ॽ मे़निसुआङ्ग कुना मे़साॽरुबिला॥’
14“कर खे़न् इक्मसाबाहाॽरे़ खे़न् कुस्सान् मे़निसुआङ् इङ्मे़दङ्घु, ‘कन् कुम्बारे़ कुलक् के़घोबारो, कन् से़रुम्माङ् कुलाजेॽ सिङ्बुङ्हाॽ आनिॽ हुक्काप्पासिरो॥’ 15हे़क्क्याङ् खे़ङ्हाॽरे़ खे़न् कुस्सान् चे़ल्ले़क्सेॽ इक्कोलाम् लाःक्कात् मे़लःत्तु मे़देॽरुआङ् मे़से़रुरो॥”
ये़सुरे़ खे़ङ्हाॽ सेःन्दोसुसि, “आल्ल चे़ल्ले़क्सेॽ इक्के़ल्ले़ कुन्दाङ्बाल्ले़ खे़न् इक्मसाबाहाॽ आक्खे मे़त्तुसिॽबे? 16खुने़ॽ ताआङ् खे़ङ्हाॽ के़रे़क् से़रुसिआङ् खे़न् चे़ल्ले़क्सेॽ इक्किन् वेॽ मनाहाॽ पिरुसिॽरो॥”
मनाहाॽरे़ खे़न् मे़घे़प्सुआङ् मे़बाःत्तु, “आप्फाल्ले़आङ् अक्खे मे़बोङ्ङिल्लरो॥” 17ये़सुरे़ खे़ङ्हाॽ अदक्तक्काङ् ओमे़त्तुसिर याम्मो सेःन्दोसुसि, “हे़क्केने़ फाॽग्र कन् साम्योसाप्लाओ साप्ते़बान् थे़माबे?
“‘लुङ् के़गाम्बाहाॽरे़ मे़नाॽरुबा लुङ्ङिन् कुम्मालुङ् पोःक्खे़आङ् वाॽरो॥’
18आत्तिन्हाॽ खे़न् लुङ् सम्दाङ् मक्मे़धाःॽ, खे़ङ्हाॽ मे़भक् मे़सिरो॥ हे़क्क्याङ् आत्तिन् सम्दाङ् खे़न् लुङ्ङिन् मक्था, खे़न् फे़क् सिरो॥”
19साम्योथिम्साम्बाहाॽ नु तुम् निङ्वाॽफुसाम्बाहाॽरे़ ये़सुन् बा खे़प्मोए ते़म्मा निङ्वाॽ मे़जोगु, थेआङ्भे़ल्ले़ ये़सुरे़ पाःत्तुबा खे़दाॽओ फे़न् इक्मसाबाहाॽनु तङ्घुसिबान् खे़ङ्हाॽरे़ निङ्वाॽ मे़घोसु, कर मनाहाॽ मे़गिरुसि॥
एःङ्याङ् हुङ्माबि मेःम्बि
(मत्ति २२:१५-२२; मर्कु १२:१३-१७)
20खे़ल्ले़चोगुल्ले़ खे़ङ्हाॽरे़ ये़सुन् ते़म्मा फाॽआङ् सुये़म् कोःप्मा मे़हेःक्तु॥ खे़ङ्हाॽरे़ मनाहाॽ याङ् मे़बिरुसिआङ् साम्योबा मे़ले़ङ्सिङ्ङाङ् ये़सुरे़ कुधोःम्से़ मे़बाङ्घुसि॥ खे़ङ्हाॽरे़ कुबाःन्नो ते़म्माआङ् रोमि युक्साबाहाॽ नु सुहाङ्गे़म्बाहाॽ पिमासि के़लॽबा निङ्वाॽ मे़जोगुरो॥ 21खे़ङ्हाॽरे़ ये़सुन् कुबाःन्नो थामा फाॽआङ् सेःन्मे़दोसु, “सिक्साम्बे, से़क्खासाङ् खे़ने़ॽग कुदोःप्मा पाःन्लक् के़बाःत्तुॽ, हे़क्क्याङ् कुदोःप्मारक् के़हुॽरुसिॽ॥ खे़ने़ॽग आत्तिन् मनाहाॽआङ् के़न्छे़न्दुन्छिन्, हे़क्क्याङ् निङ्वाॽफुमाङ्ङिल्ले़ कुलाम्मिन् से़क्खाए के़हुॽरुसिरो॥ 22हे़क्केःल्ले़ कन् पाःन्निन् ओमे़त्ते़ॽ रोमि पयम् हाङ् सिजरे़न् एःङ्याङ् हुङ्मा आनिॽ साम्योथिम्मिल्ले़ आबिॽबि आम्बिने़न्बि?”
23ये़सुरे़ खे़ङ्हाॽरे़ खुनिॽ निङ्वाॽ चिःप्मान् निसुआङ् खे़ङ्हाॽ नोगप् पिरुसि, 24“इङ्गाॽ याङ्इत्छिन् ओसेःन्आधाक्ते़म्मे़ॽ॥ कप्मो हाःत्ले़ कुइत्छाप् नु कुबाःन्साप् पप्पे?”
खे़ङ्हाॽरे़ नोगप् मे़बिरु, “सिजरे़ल्ले़न् पत्लो॥”
25ये़सुरे़ मे़त्तुसि, “हे़क्केने़ फाॽग्र सिजरले़ कुबाःन्हाॽ सिजरे़न् पिरे़म्मे़ॽ, हे़क्क्याङ् निङ्वाॽफुमाङ्ङिल्ले़ कुबाःन्हाॽ निङ्वाॽफुमाङ्ङिन्ने पिरे़म्मे़ॽओ॥”
26मना तगि खे़ङ्हाॽरे़ खुने़ॽ कुबाःन्नो ते़म्मा मे़न्छुक्तुन्॥ ये़सुरे़ पिरुसिबा नोगप्पिल्ले़ खे़ङ्हाॽरे़ खुनिॽ निङ्वाॽ मये़आङ् स्वाःत् मे़युङे़॥
सिमाआङ् याम्मो हिङ्मा
(मत्ति २२:२३-३३; मर्कु १२:१८-२७)
27हे़क्क्याङ् सिमे़न्लाम् याम्मो हिङ्मन् होप् लॽरिक् नसान् के़जोःक्पा कुभा सदुकिहाॽ ये़सुरो मे़द्ये़आङ् 28सेःन्मे़दोसु, “सिक्साम्बे, मोसारे़ग अक्खेलॽरिक् साप्तु आबिरे़आङ् पत्—‘आत्तिल्ले़ कुम्भुॽइन् कुस्सा कुए मे़न्वाॽए सिःॽ, खे़ल्ले़ कुन्साॽरे़ मेमेदुमा कुन्ने़ॽद्रेमान्नु मेःक्खिम् चोःक्माए पोङ्॥ हे़क्क्याङ् कुम्भुॽरे़ कुलागि सागप्मा पोङ्लो॥’#साम्यो इङ् २५:५ 29आल्ल नुसि फुॽनुसाॽहाॽ मे़वये़॥ तुम्बाल्ले़ मेःक्खिम् चोगुआङ् कुस्सा कुए मे़न्वाॽए स्ये़रो॥ 30-31हे़क्केलॽरिक् सरुम्बान् नु याङ्सरुम्बाल्ले़आङ् खुन्छिॽ ने़ॽद्रेमान्नु मेःक्खिम् चोगे़त्छु, हे़क्क्याङ् खुन्छिॽ हे़क्केए के़रे़क् नुसि फुॽनुसाॽहाॽरे़ खुनिॽ ने़ॽद्रेमान्नु मेःक्खिम् मे़जोगुआङ् सामे़न्वाॽए मे़स्ये़रो॥ 32के़रे़क्नुःल्ले़ एगाङ् खे़ङ्हाॽरे़ खुनिॽ ने़ॽद्रेमान्नाङ् स्ये़रो॥ 33आल्ल खे़ङ्हाॽ सिमे़न्लाम् याम्मो मे़हिङ्ङिल्ले़ आत्तिल्ले़ कुमेत् पोङ्बाबे? खे़न्नुग नुसि फुॽनुसाॽहाॽरे़ए मेःक्खिम् मे़जोगुआङ् मे़वये़॥”
34ये़सुरे़ खे़ङ्हाॽ नोगप् पिरुसि, “कन् इक्सादिङ् खाम्बेःक्मोबा मनाहाॽ कप्मोरक् मेःक्खिम् मे़जोक्लो॥ 35कर ताःन्दि के़दाबा ये़म्मोग हे़क्के मे़बोङ्ने़ल्लो, थेआङ्भे़ल्ले़ सिमे़न्लाम् याम्मो हिङ्मा लाॽरुसिबा मनाहाॽ मेःक्खिम् मे़न्जोःक्ने़न्लो॥ 36खे़ङ्हाॽग याम्मो मे़न्छिःने़न्, थेआङ्भे़ल्ले़ खे़ङ्हाॽ माङ्लाइङ्बा कुइसिक् मे़बोङ्लो॥ खे़ङ्हाॽ सिमे़न्लाम् याम्मो मे़हिङे़बाल्ले़ चोगुल्ले़ निङ्वाॽफुमाङ्ङिल्ले़ कुस्सासिरो॥ 37हे़क्केलॽरिक् के़सिबाहाॽ मे़हिङ् के़लॽबा पाःन्निन् मि के़दिःप्पा पोःक्लाओबा हिन्दोक्को मोसारे़ ओसेःन्आधाक्लो॥#ला ३:६ मोसारे़ अब्राहाम, इसहाक नु याकुबरे़ खुनिॽ निङ्वाॽफुमाङ्ङिन् यहवे दाङ्बाए लॽरिक् पाःत्तुरो॥ 38खे़ल्ले़चोगुल्ले़ खुने़ॽग कुसिवे़त्हाॽरे़न् मेःन्, कर कुहिङ्वे़त्हाॽरे़ खुनिॽ निङ्वाॽफुमाङ्लो, थेआङ्भे़ल्ले़ खुने़ॽ कुलागिग के़रे़क् कुहिङ्वे़त्ते मे़वाॽरो॥”
39हे़क्क्याङ् कुभा साम्योथिम्साम्बाहाॽरे़ खुने़ॽ मे़मे़त्तु, “सिक्साम्बे, खे़ने़ॽग साॽरिक् नुरिक्काङ् याप्मि के़मे़त्ते़रो॥” 40हे़क्क्याङ् आत्तिन्हाॽरे़आङ् खुने़ॽ पान् सेःन्दोमा आःन्छिङ्माआङ् मे़न्छुक्तुन्लो॥
ख्रिस्ते़न् हाःत्ले़ कुस्सानिबे?
(मत्ति २२:४१-४६; मर्कु १२:३५-४०)
41ये़सुरे़ खे़ङ्हाॽ मे़त्तुसि, “आक्खेलॽरिक् निङ्वाॽफुमाङ्ङिल्ले़ सेःन्दुबा ख्रिस्ते़न् दाउद हाङ्ङिल्ले़ कुस्सारो फाॽआङ् मे़मे़त्तुबाबे? 42-43थेआङ्भे़ल्ले़ निङ्वाॽफु साम्लोसुम्मो दाउदरे़ आबाङे अक्खे पाःत्तुआङ् पत्,
“‘यहवे दाङ्बाल्ले़ इङ्गाॽ आदाङ्बान् अक्खे मे़त्तु, “के़निङ्मिहाॽ के़युक्को इङ्गाॽ मे़न्दाःत्छिङ्ङे थारिक् आजुप्साङ् ले़प्माङ् खे़ने़ॽ युङे़ॽओ॥”’#निङ् सुम् ११०:१
44“दाउद हाङ्ङिल्ले़ए खुने़ॽ आदाङ्बे लॽरिक् मे़त्तुने़ फाॽग्र आक्खेलॽरिक् ख्रिस्ते़न् दाउदरे़ कुस्सा पोङ्बाबे?”
कुनिङ्वाॽ के़जिःप्पाहाॽरे़न् खुम्दिङ्
(मत्ति २३:१-३६; मर्कु १२:३८-४०)
45हे़क्क्याङ् के़रे़क् मनाहाॽरे़ मे़घे़प्सुर कुहुॽसाम्बाहाॽ अक्खे मे़त्तुसि, 46“साम्योथिम्साम्बाहाॽनु सिङ्सिङ् लॽरे़म्मे़ॽओ! खे़ङ्हाॽ केःम्ब केःम्बा लगेप् मे़जाक्खुआङ् नानुगत्ना लाङ्मे़घेःक्लो, हे़क्क्याङ् पाङ्जुम् लुम्मो से़वा मे़मे़त्तिगे़र के़लॽबा निङ्वाॽ मे़जोगुआङ् यहुदि चुम्लुङ्हिम्मो नु साभाङ्जाओ तुम्म्याङ्हाङ् युक्नाहाॽओ युङ्मा खुनिॽ सिराॽथाङ्लो॥ 47खे़ङ्हाॽरे़ मेमेदुमाहाॽ इङ्मे़ले़क्तुसिआङ् खुनिॽ हिम्धाःङ्हाॽ मे़लरुरो, कर नुबा ओसेःन्धाक्सिङ्मारे़ लागि केःम्ब केःम्बा तुवा मे़जोगुॽ॥ खे़ङ्हाॽरे़ग से़क्खाए साक्ल खुम्दिङ् मे़घोसुॽरो॥”
वर्तमान में चयनित:
लुका 20: LIF
हाइलाइट
शेयर
कॉपी
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
