युहुन्ना 7
7
ये़सुन् नु कुन्साॽसि
1खे़न् एगाङ् ये़सुन् गालिल थुम् खिरिबा पाङ्भेॽहाॽओ ताक्कन्दे़र वये़रो॥ खुने़ॽग यहुदिया थुम्लाम् माःङ्घाए वाॽमा निङ्वाॽ चोगु, थेआङ्भे़ल्ले़ यहुदि लाम्लोबाहाॽरे़ खुने़ॽ से़प्मा फाॽआङ् मे़सुगुर मे़वये़रो॥ 2कर यहुदिहाॽरे़ खुनिॽ साःङ्गाहिम् तङ्नाम्मिन्#७:२ यहुदिहाॽरे़ खुनिॽ पाधे़बाहाॽ एःक्सादे़न्नो लिबोङ् (४०) तङ्बे थारिक् लाम्दिक् मे़जोगे़बा निङ्वाॽसोओ कन् तङ्नाम्मो साःङ्गाहिम् मे़जोगु॥ यरिक् यहुदिहाॽरे़ यहुदिया थुम्मोबा यरुसले़म ये़क्यक्को मे़बेआङ् ये़त्नाम् थारिक् कन् तङ्नाम्मिन् मे़देसुरो (ले़बि २३:३३-४३; साम्यो इङ् १६:१३-१६)॥ तामा इःत्ते़ल्ले़ 3कुन्साॽसिरे़ ये़सुन् अक्खे मे़मे़त्तु, “खे़ने़ॽ कन् ते़न्निन् ले़रे़ॽआङ् यहुदियाओ पेगे़ॽओ, खे़ल्ले़चोगुल्ले़ खे़प्मो खे़ने़ॽ के़जोगुबा निङ्वाॽ के़माबा याःम्बक्हाॽ वेॽ के़हुॽसाम्बाहाॽरे़आङ् मे़निसुररो॥ 4आत्तिन् मनाःल्ले़ कुमिङ्सो कुधाङ्सो फोमा निङ्वाॽ चोगुॽ, खे़न् चिङ्सिङ्मा मे़नुॽने़न्लो॥ हे़क्केलॽरिक् खे़ने़ॽआङ् निङ्वाॽ के़माबा याःम्बक्हाॽ के़जोगुर के़वाॽने़ फाॽग्र इक्सादिङ् खाम्बेःक्मो ओसेःन्धाक्सिङ्ङे़ॽओ॥” 5थेआङ्भे़ल्ले़ आबाङे कुन्साॽसिरे़आङ् खुने़ॽ नामे़न्छाॽरुन्लो॥
6ये़सुरे़ नोगप् पिरुसि, “इङ्गाॽ आये़म्मिन् मे़न्दाए वाॽरो॥ खिनिॽग आप्फाल्ले़साङ् पेःक्मा के़सुक्तिॽरो, 7इक्सादिङ् खाम्बेःक्मोबाहाॽरे़ खिनिॽ चिःप्मा के़मे़न्छुक्तिन्लो, कर खे़ङ्हाॽरे़ मे़जोगुबा याःम्बक्हाॽ ताप्फे़ःम्बा चोक् मे़त्तुङ्सिङ्बाल्ले़ चोगुल्ले़ इङ्गाॽ मे़जिःत्तारो॥ 8तङ्नाम्मो खिनिॽ थो यरुसले़म्मो पेगे़म्मे़ॽओ॥ इङ्गाॽ आल्लो मे़बेःक्कान्, थेआङ्भे़ल्ले़ इङ्गाॽ आये़म्मिन् मे़न्दाए वाॽरो॥” 9ये़सुरे़ अक्खे पाःत्तुर गालिलओए वये़ लारे़रो॥
ये़सुरे़ तङ्नाम्मो हुॽरुसिॽ
10कर ये़सुरे़ कुन्साॽसि तङ्नाम्मो मे़बे हे़क्क्याङ् खुने़ॽआङ् आत्तिन् मनाहाॽरे़आङ् मे़न्निए स्वाःत्ताङ् यरुसले़म्मो पेरो॥ 11आल्ल तङ्नाम्मो यहुदि लाम्लोबाहाॽरे़ खुने़ॽ मे़गोःत्तुर अक्खे मे़बाःत्तु, “कन् मनान् आत्तान् पेबे?”
12यरिक् मनाहाॽरे़ ये़सुरे़ कुयाःम्बेओ स्वाःत्ताङ् मे़जे़क्खु॥ कुभारे़ मे़बाःत्तु, “खुने़ॽग नुबा मनारो” कर वेॽहाॽरे़ मे़बाःत्तु, “मेःन्, खे़ल्ले़ग मनाहाॽ इङ्ले़क्तुसिर वाॽरो॥” 13कर यहुदि लाम्लोबाहाॽ मे़गिरुसिबाल्ले़ चोगुल्ले़ आत्तिन्हाॽआङ् मनाहाॽरे़ मे़घे़प्सुर ये़सुरे़ कुयाःम्बेओ मे़म्बारे़न्लो॥
14हे़क्क्याङ् तङ्नाम्मिल्ले़ कुलुम्मो ये़सुन् माङ्हिम्मो थो पेआङ् मनाहाॽ निसाम् हुॽमा हेःक्तुसिरो॥ 15यहुदि लाम्लोबाहाॽरे़ खुने़ॽ कुनिसाम्मिन् मे़घे़प्सुआङ् खुनिॽ निङ्वाॽ मये़र अक्खेलॽरिक् मे़बाःत्तु, “कन् मनाःल्ले़ मे़न्हुॽसिङ्ङे आक्खेलॽरिक् आनिॽ हे़क्के कन् निसाम्मिन् ले़स्सुबे?”
16ये़सुरे़ खे़ङ्हाॽ नोगप् पिरुसि, “इङ्गाॽ आनिसाम्मिङ्ग आबाङे इङ्गाॽइन् मेःन्लो, कर कङ्ग इङ्गाॽ याप्मि के़बाङ्बा निङ्वाॽफुमाङ्लाम् त्ये़बारो॥ 17आत्तिन् मनाःल्ले़ निङ्वाॽफुमाङ्ङिल्ले़ कुनिङ्वाॽ हे़क्के चोःक्मा निङ्वाॽ चोगुॽ, खे़ल्ले़ इङ्गाॽ आनिसाम्मिन् निङ्वाॽफुमाङ्लाम्बा त्ये़बाबि इङ्गाॽ आबाङे पाःत्तुङ्बाबि फाॽआङ् कुसिङ् निःत्तुॽरो॥ 18आबाङे युक्कोलाम् के़बाःप्पाहाॽरे़ग आबाङे मिङ्सो इङ्धाङ् मे़गोःत्तुॽरो, कर आत्तिल्ले़ खुने़ॽ के़बाङ्बान् मिङ्सो इङ्धाङ् पिमा निङ्वाॽ चोगुॽ, खे़ल्ले़ से़क्खा पान् पाःत्तुॽरो॥ हे़क्क्याङ् खुने़ॽओ थेआङ् इङ्ले़क्पा पान् होप्लो॥ 19मोसारे़ खिनिॽ साम्योथिम् के़बिरि, कर खिनिॽ आत्तिन्हाॽरे़आङ् के़न्इःत्तुम्मिन् के़न्नाःत्तुम्मिन्॥ हे़क्केःल्ले़ थेआङ् खिनिॽ याप्मि से़प्मा के़गोःत्तिबाबे?”
20खे़न् मनाहाॽरे़ खुने़ॽ नोगप् मे़बिरु, “खे़ने़ॽग फे़न्साम्मिल्ले़ के़याङ्घे़आङ् के़वाॽरो! हाःत्ले़ खे़ने़ॽ से़प्मा के़गोःत्ते़बे?”
21ये़सुरे़ खे़ङ्हाॽ नोगप् पिरुसि, “इङ्गाॽग लत्छा मनाधिक् नाःम्सिङ्मा ये़न्नो नुसुङ्ङिल्ले़ खिनिॽ निङ्वाॽ मये़रो॥ 22कर खिनिॽआङ् मोसारे़ के़बिरिबा हर्दो हे़क्मा साम्योथिम्मिन् के़नाःत्तुम् के़इःत्तुम्माङ् नाःम्सिङ् ये़न्नोए खिनिॽ साहाॽरे़न् हर्दो के़हे़गुम् के़बिरुम्सिम्मिल्ले़ खिनिॽआङ् साम्योथिम्मिन् के़भेःन्दुम्लो॥ (से़क्खाःल्ले़ कन् हर्दो हे़क्मा साम्योथिम्मिङ्ग मोसालाम् मेःन्, कर कङ्ग अब्राहामलाम् पोःक्खे़ ये़बारो॥) 23आल्ल मोसारे़ कुसाम्योथिम्मिन्#७:२३ मोसारे़ कुसाम्योथिम् कुइसिक् (ले़बि १२:३; तोलिङ् १७:१०) अङे़ःक्वासान् सावाःन्छिङ्ङाङ् ये़त्छि ये़न्नो हर्दो हे़क्मा के़बोङ्बा वये़रो॥ मे़बेःन्ने़न्ल फाॽआङ् नाःम्सिङ् ये़न्नो खिनिॽ साहाॽरे़न् हर्दो हे़क्मा याःम्बक् के़जोगुम्ने़ फाॽग्र, इङ्गाॽ कन् मनान् नाःम्सिङ्मा ये़न्नो नुसुङ्ङिल्ले़ थेआङ् इङ्गाॽनु खिनिॽ याःक्ले़ॽबाबे? 24मना ओमे़प्मासिआङ् मेःन् कर से़क्खाओ खासे़न् लोःन्दे़म्मे़ॽओ॥”
निङ्वाॽफुमाङ्ङिल्ले़ सेःन्दुबा ये़सु
25खे़न् ये़म्मो यरुसले़म के़युङ्बा कुभा मनाहाॽ अक्खे मे़मे़त्छिङ्, “मे़ःम्बे़, से़प्मा मे़गोःत्तुर मे़वाॽबा मनान् बा कन् मेःम्बि? 26कर कङ्ग मनाहाॽरे़ मे़घे़प्सुरए पाःत्ल वाॽरो॥ हे़क्केसाङ् खे़ङ्हाॽरे़ थेआङ् मे़म्मे़त्तुन्लो॥ मे़ःम्बे़, आनिॽ लाम्लोबाहाॽरे़ खुने़ॽए निङ्वाॽफुमाङ्ङिल्ले़ सेःन्दुबा ख्रिस्त फाॽआङ् कुसिङ् मे़निःत्तुबि? 27कन् मनान् आत्तोलाम् त्ये़ के़लॽबा आनिॽ आनिसुम्लो॥ कर निङ्वाॽफुमाङ्ङिल्ले़ सेःन्दुबा ख्रिस्ते़न् ताःल्ले़ग खुने़ॽ थाःम्सिङ्लक्लो, खुने़ॽ आत्तोलाम् ता के़लॽबा आत्तिल्ले़आङ् मे़निसुन्लो॥” 28ये़सुरे़ माङ्हिम्मो हुॽरुसिर पत्छे़ल्ले़ यम्बा इक्लाओ अक्खेलॽरिक् पारे़, “से़क्खाए खिनिॽ इङ्गाॽ याप्मि कुसिङ् के़निःत्तिॽ बि? आत्तोलाम् इङ्गाॽ त्याङ्बा फाॽआङ् खिनिॽ के़निसुम्बि? इङ्गाॽग आबाङे त्याङ्बा मेःन्लो॥ इङ्गाॽ याप्मि के़बाङ्बाङ्ग से़क्खाए चोक् हे़क्क्याङ् खुने़ॽग खिनिॽ कुसिङ् के़न्निःत्तुम्मिन्लो, 29कर इङ्गाॽग खुने़ॽ कुसिङ् निःत्तुङ्लो, थेआङ्भे़ल्ले़ खुने़ॽलाम्बा त्याङ्बा हे़क्क्याङ् खुने़ॽ पाङ्घाङ्बारो॥”
30ये़सुरे़ अक्खेलॽरिक् पाःत्तुल्ले़ मनाहाॽरे़ खुने़ॽ ते़म्मा मे़गोःत्तु, कर आत्तिन्हाॽरे़आङ् खुने़ॽ मे़न्छुस्सुन्लो, थेआङ्भे़ल्ले़ खुने़ॽ कुये़म्मिन् मे़ङ्गे़त्ते वये़रो॥ 31हे़क्केसाङ् यरिक् मनाहाॽरे़ खुने़ॽ नसान् मे़जोगुरो॥ हे़क्क्याङ् खे़ङ्हाॽरे़ अक्खे मे़बाःत्तु, “निङ्वाॽफुमाङ्ङिल्ले़ सेःन्दुबा ख्रिस्ते़न् ताःल्ले़ कन् मनाःन्नुःल्ले़आङ् यरिक् निङ्वाॽ के़माबा याःम्बक्हाॽ चोगुबि?”
32मनाहाॽ ये़सुरे़ कुयाःम्बेओ स्वाःत्ताङ् खुस्खुस् लॽरिक् मे़बारे़बा फरिसिहाॽरे़ मे़घे़प्सुरो हे़क्क्याङ् तुम्निङ्वाॽफुसाम्बाहाॽ नु फरिसिहाॽरे़ माङ्हिम्मोबा तिलिङ्गाहाॽ खुने़ॽ कुदे़म्से़ मे़बाङ्घुसि॥#७:३२ माङ्हिम्मोबा तिलिङ्गाहाॽ ले़बि सुवाङ्लाम् मे़वये़, हे़क्क्याङ् तुम् निङ्वाॽफुसाम्बाहाॽरे़ खुनिॽ युक्को याःम्बक् मे़जोगुरो॥
33कर ये़सुरे़ मे़त्तुसि, “इङ्गाॽग खिनिॽनु सप्फारक् कप्मो वाॽआरो हे़क्क्याङ् याप्मि के़बाङ्बाल्लो नुङ्ङा पेःक्कारो॥ 34खिनिॽ याप्मि के़गोःत्तिॽ कर याप्मि के़ङ्घोसिन्लो हे़क्क्याङ् इङ्गाॽ पेःक्काबा ते़न्नोआङ् के़प्मा के़न्छुक्तिल्लो॥”
35यहुदि लाम्लोबाहाॽ सेःन्मे़लाप्सिङ्, “मे़ःम्बे़, खुने़ॽ आत्तो पेःक्मा निङ्वाॽ चोगुर वाॽआङ् आनिॽ तुम्मा आन्छुक्तुम्मिन्बाबे? खुने़ॽ वेॽ लाजेॽओ के़युङ्बा आनिॽ मनाहाॽरो पेःक्काङ् थिम्मे़न्दङ् सुवाङ्हाॽ हुॽरुसिबाबि? 36खिनिॽ याप्मि के़गोःत्तिॽ कर याप्मि के़न्दुमिन् हे़क्क्याङ् आत्तान् पेःक्का खे़न् ते़न्नोआङ् के़प्मा के़न्छुक्तुम्मिल्लो लॽरिक् थे पाःत्तुबाबे?”
हिङ्मन् के़बिबा च्वाःत्
37हे़क्क्याङ् तङ्नाम्रे़ कुनुप्मा नु के़ये़क्पा ये़न्नो ये़सुन् ये़म्सिङ्ङाङ् यम्बा इक्लाओ मनाहाॽ अक्खेलॽरिक् मे़त्तुसिरो, “खिनिॽ लुम्मो कुवागे़मिबाल्ले़ इङ्गाॽओ ताआङ् थुङुररो॥ 38साम्योसाप्लाःल्ले़ पाःत्तुबा कुइसिक् इङ्गाॽ याप्मि नसान् के़जोःक्पाल्ले़ कुसिगाङ्लाम् हिङ्मन् के़बिबा च्वाःत्तिन् यङ्घङ् कुइसिक् पुन्लःन्लो॥” 39कङ्ग ये़सुरे़ सेसेमाङ्ङिल्ले़ कुयाःम्बेओ पाःत्तुबारो॥ थेआङ्भे़ल्ले़ खुने़ॽओ नसान् के़जोःक्पाहाॽरे़ सेसेमाङ्ङिन् मे़घोसुबा पोःक्खे़आङ् वये़रो॥ सेसेमाङ्ङिन् खे़न् ये़म् थारिक् मे़म्बाङ्ङे वये़रो, थेआङ्भे़ल्ले़ ये़सुन् साङ्ग्राम्पेदाङ्ङो मे़न्नुःङ् मे़म्बेःक्के वये़रो॥#७:३९ ग्रिक पाःन्दाङ्ङो “ये़सुरे़ कुमिमिदिङ् मे़म्बोङ्ङे वये़रो॥”
ये़सुरे़ कुयाःम्बेओ पाःन्धङ्
40हे़क्क्याङ् कन् मे़घे़प्सुआङ् मनाहाॽरे़ अक्खे मे़बाःत्तु, “से़क्खासाङ् कन् मनाःङ्ग ता लॽरिक् इःप्मनाबा माङ्निङ्वाॽपान् के़बाःप्पे़न्नेरो॥”#साम्यो इङ् १८:१५, १८
41वेॽहाॽरे़ मे़बाःत्तु “खुने़ॽग निङ्वाॽफुमाङ्ङिल्ले़ सेःन्दुबा ख्रिस्तरो॥” कर आल्लसाङ् वेॽहाॽरे़ अक्खेलॽरिक् मे़बाःत्तु, “कङ्ग पोङ्माए मे़सुक्ने़न्लो, थेआङ्भे़ल्ले़ ख्रिस्ते़ङ्ग गालिल थुम्मोलाम् मे़दाने़न्लो॥ 42साम्योसाप्लाओ तोःन्दोन्नाङ् साप्ते़आङ् पत्लो, ‘निङ्वाॽफुमाङ्ङिल्ले़ सेःन्दुबा ख्रिस्ते़ङ्ग दाउद हाङ्ङिल्ले़ कुहिम्सयङ्लाम् हे़क्क्याङ् दाउद हाङ् वये़बा बेथले़हे़म पाङ्जुम्मो सावाःन्छिङ्लो॥’”#मिका ५:२ 43अक्खेलॽरिक् ये़सुरे़ कुयाःम्बेओ मनाहाॽरे़ खुनिॽ निङ्वाॽ मे़दङे़न्नाङ् मे़से़रे़रो॥ 44कुभारे़ खुने़ॽ ते़म्मा मे़गोःत्तु, कर आत्तिन्हाॽरे़आङ् खुने़ॽ हुक् मे़न्याक्तुन्लो॥
45हे़क्क्याङ् खुने़ॽ कुदे़म्से़ के़दाबा माङ्हिम्मोबा तिलिङ्गाहाॽ, तुम्निङ्वाॽफुसाम्बाहाॽ नु फरिसिहाॽरो आम्भा मे़नुःक्खे़ मे़बेरो॥ खे़ङ्हाॽरे़ माङ्हिम्मोबा तिलिङ्गाहाॽ सेःन्मे़दोसुसि “थेआङ् खुने़ॽ के़न्दे़म्सुम्मिन् के़न्दारुमिम्बाबे?”
46खे़ङ्हाॽरे़ नोगप् मे़बिरुसि, “आत्तिन्नाङ् खे़न् मनान् हे़क्के पारे़बाग मे़ङ्घे़म्मे वाॽरो॥”
47हे़क्केःल्ले़ फरिसिहाॽरे़ खे़ङ्हाॽ मे़मे़त्तुसि, “मे़ःम्बे़, खिनिॽआङ् खे़ल्ले़ कुइङ्ले़क्को के़ध्ये़ॽइबि थे़माबे? 48आनिॽ लाम्लोबा नु फरिसिहाॽरे़ खुने़ॽओ नसान् मे़जोगुआङ् वाॽबि? 49आत्तिल्ले़आङ् मे़न्जोःक्के वाॽ॥ कन् साम्योथिम्मिल्ले़ कुयाःम्बेओ थेआङ् मे़ल्ले़मनाबा मनाहाॽरे़रक् मे़जोगुआङ् वाॽरो॥ कन् मनाहाॽग निङ्वाॽफु साङ्ग्रारे़ ते़त्तुसिआङ् वाॽरो॥”
50तगि थिक् से़न्दिक् ये़सुरे़ कुदुम्से़ के़बेःक्पा निकोदेमस मे़प्मनाबा खुनिॽ लुम्मोबा थिक् फरिसि लाम्लोबान् पारे़रो, 51“मे़ःम्बे़, खे़न् मनाःल्ले़ थे चोगुर वाॽ के़लॽबान् नुःरिक्काङ् कुसिङ् मे़न्निःत्ते आप्तिक् कुःप्मा आनिॽ साम्योथिम्मिल्ले़ आबिॽबि?”
52हे़क्केःल्ले़ खे़ङ्हाॽरे़ नोगप् मे़बिरु, “खे़ने़ॽआङ् गालिललाम्मे के़द्ये़बाबि? खे़ने़ॽ आबाङे साम्योसाप्लान् निरे़ साॽरे़, गालिललाम्बाग आप्फाल्ले़आङ् माङ्निङ्वाॽपान् के़बाःप्पे़न् मे़दाने़न्लो॥”
53((हे़क्क्याङ् मनाहाॽ आबाङे हिम्हिम् मे़नुःक्खे़ मे़बेरो॥
वर्तमान में चयनित:
युहुन्ना 7: LIF
हाइलाइट
शेयर
कॉपी
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
