युहुन्ना 20
20
ये़सुन् सिमे़न्लाम् हिङ्
(मत्ति २८:१-८; मर्कु १६:१-८; लुका २४:१-१२)
1आल्ल ते़ने़बा ये़न्नो खामे़न्ओःत्ते वये़ल्ले़सा मरियम मग्दलिनिःन् इःप्पुङ्ङो पेरो॥ खे़न् इःप्पुङ्ङिल्ले़ कुमुराओ मे़ये़प्सुबा यम्बा लुङ्ङिन् थिक्ले़प्माङ् मे़इसुआङ् ने़स्से़बा निसु॥ 2हे़क्क्याङ् खे़न् लोःक्ते़र सिमोन पत्रुस नु ये़सुरे़ लुङ्माॽ तुक्तुबा वेॽसमा हुॽसाम्बाल्लो पेआङ् मे़त्तुसि, “खे़ङ्हाॽरे़ दाङ्बाल्ले़ कुधक्किन् इःप्पुङ्ङोलाम् मे़देॽरुआङ् होप्लो! आत्तान् मे़ने़स्सुआङ् ने़ःॽ आनिगे मे़निसुम्बान्लो!”
3पत्रुस नु खे़न् वेॽ हुॽसाम्बान् इःप्पुङ् ले़प्माङ् थाःने़त्छि॥ 4खे़न् ने़प्माङ् लोःक्ते़त्छि, कर खे़न् वेॽ हुॽसाम्बाल्ले़ पत्रुसे़न् लाम्बाक्तुआङ् इःप्पुङ्ङो तगि के़रे़रो॥ 5खे़न् अःक्खुम् फन्छिङ्ङाङ् सिगाङ् ओमे़त्तुल्ले़ चेदेःत्तिन् खे़प्मो ने़स्से़बा निसु, कर सिगाङ्ग मे़लासे़न्लो॥#२०:५ इःप्पुङ् सिगाङ् लाःप्मा लाम्धेःप्पाङ्ग मितरधिक्लक् थ्ये़रो॥ 6कुएःक् कुएःक् सिमोन पत्रुसे़न् खे़प्मो के़रे़आङ् सिगाङ् लासे़॥ खे़ल्ले़ चेदेःत्तिन् नु 7ये़सुरे़ कुनारा मे़दे़प्तुबा तेःत्तिन् खे़प्मो ने़स्से़बा निसु॥ खे़न् नादे़प्मा तेःत्तिन् चेदेःत्तिल्ले़ कुबेसाङ् मे़भाक्तुआङ् ने़स्से़बा निसुरो॥ 8हे़क्क्याङ् तगि इःप्पुङ्ङो के़गे़प्पा हुॽसाम्बे़न्नाङ् सिगाङ् लासे़॥ खे़ल्ले़ खे़न् निसुआङ् नसान् चोगुरो॥ 9(खे़ङ्हाॽरे़ आल्लसाङ् ये़सुन् सिमे़न्लाम् हिङ् लॽरिक् साम्योसाप्लाओ के़बप्पे़न् कुसिङ् मे़न्निःत्ते मे़वये़रो॥) 10हे़क्क्याङ् खे़न् हुॽसाम्बाहाॽ ने़प्माङ् हिम्मो नुःक्खे़त्छिरो॥
मरियम मग्दलिनिरो ये़सुन् थाःम्सिङ्
(मत्ति २८:९-१०; मर्कु १६:९-११)
11कर मरियम्मिन् इःप्पुङ् लाःक्कात् हाबे़र ये़बे़रो॥ खे़न् हाबे़र अःक्खुम् फन्छिङ्ङाङ् इःप्पुङ् सिगाङ् ओमे़त्तुल्ले़, 12फःगे़लॽबा तेत् के़जाङ्बा ने़प्फु माङ्लाइङ्बाहाॽ ये़सुरे़ कुधक् मे़ने़स्सुआङ् ने़स्से़बा ते़न्नो थिक्किन् कुधे़गेक् ले़प्माङ् नु वेॽसमान् कुलाङ् ले़प्माङ् युङे़त्छिबा निसुसिरो॥
13खे़न् माङ्लाइङ्बाहाॽरे़ खुने़ॽ सेःन्दोसे़त्छु, “खे़ने़ॽ थेआङ् के़हाःप्पाबे?”
खे़ल्ले़ खे़ङ्हाॽ मे़त्तुसि, “इङ्गाॽ आदाङ्बाल्ले़ कुधक्किन् कप्मोलाम् खे़ङ्हाॽरे़ मे़देॽरुरो हे़क्क्याङ् आत्तान् मे़ने़स्सुआङ् ने़इ इङ्गाॽ मे़निआन्लो॥” 14हे़क्के पाःत्तुर मरियम्मिन् खिरि हिसिङ्ङिल्ले़ ये़सुन् खे़प्मो ये़बे़बा निसु, कर खुने़ॽ ये़सुःन्नेरो फाॽआङ् कुसिङ् निःप्मा मे़सुक्तुन्लो॥
15ये़सुरे़ खे़न् मे़त्तु, “मामुए, खे़ने़ॽ थेआङ् के़हाःप्पाबे? हात् के़गोःत्तुबाबे?”
मरियमरे़ खुने़ॽग फुङ्इक् के़गोबाबिला लॽरिक् निङ्वाॽ इतुआङ् मे़त्तु, “आदाङ्बे, दाङ्बाल्ले़ कुधक्किन् कप्मोलाम् के़देॽरुआङ् वाॽने़ फाॽग्र आत्तान् के़ने़स्सुआङ् ने़ःॽ इङ्गाॽ मे़त्ताङ्ङे़ॽना, हे़क्क्याङ् कुधक्किन् इङ्गाॽ तेॽरुङ्लो॥”
16ये़सुरे़ खे़न् मे़त्तु, “मरियम्मे!”
खुने़ॽ ये़सुन् ले़प्माङ् हिसिङ्ङाङ् “रब्बोनि!” मे़त्तुरो॥ (खे़न् फाॽइङ्ग हिब्रु पाःन्नो “सिक्साम्बे” पोङ्लो॥)
17ये़सुरे़ खे़न् मे़त्तु “इङ्गाॽ मे़दे़म्साङ्ङिन्ने़ॽओ, थेआङ्भे़ल्ले़ आल्लो थारिक् इङ्गाॽ पानुदिङ् पाःल्लो मे़म्बेःक्के वाॽआरो॥ कर पेगे़ॽआङ् आन्साॽसि अक्खे मे़त्ते़से़ॽओ, ‘इङ्गाॽ पानुदिङ् आम्बा नु खिनिॽ पानुदिङ् पा हे़क्क्याङ् इङ्गाॽ आनिङ्वाॽफुमाङ् नु खिनिॽ निङ्वाॽफुमाङ्ङो नुःङ्ङा पेःक्कार पत्तारो॥’”
18मरियम मग्दलिनिःन् पेआङ् हुॽसाम्बाहाॽ, “इङ्गाॽ दाङ्बान् निसुङ्ङाङ् वाॽरो” मे़त्तुसिआङ् ये़सुरे़ पाःत्तुबा पाःन्हाॽ खे़ङ्हाॽ चे़क्तुसिरो॥
ये़सुन् कुहुॽसाम्बाहाॽओ थाःम्सिङ्
(मत्ति २८:१६-२०; मर्कु १६:१४-१८; लुका २४:३६-४९)
19बा खे़न् ते़ने़बाल्ले़ युःन्छिक् हुॽसाम्बाहाॽरे़ यहुदिहाॽ मे़गिरुसिआङ् हिम्सिगाङ् मे़सुम्सिङ्, हे़क्क्याङ् लाम्धेःप्पे़न् मे़ए़त्तुआङ् मे़युङे़ल्ले़ ये़सुन् खुनिॽ लुम्मो थाःम्सिङ्ल अक्खे मे़त्तुसि, “सनारुङ् के़घोसुम्लरो!” 20हे़क्के पाःत्तु सुरुआङ् खुने़ॽ कुहुक्हाॽ नु कुले़म्भेःप्मान् ओसेःन्धाक्तुसि॥ दाङ्बान् मे़निसुबाल्ले़ हुॽसाम्बाहाॽ साॽरिक् मे़सःत्ते़रो॥
21ये़सुरे़ खे़ङ्हाॽ याम्मो मे़त्तुसि, “सनारुङ् के़घोसुम्लरो! पानुदिङ् पाःल्ले़ इङ्गाॽ पाङ्घाङ्बा कुइसिक् खिनिॽआङ् इङ्गाॽ पाङ्निङ्ल पत्तारो॥” 22हे़क्क्याङ् ये़सुरे़ खे़ङ्हाॽओ साङ्गुगे़न् सक्माःल्ले़ मुःत्तुसिर अक्खे मे़त्तुसि, “सेसेमाङ्ङिन् ताःक्ते़म्मे़ॽओ॥ 23मनाहाॽरे़ खुनिॽ लायोन् ले़प्मि के़बिरुम्सिम्ने़ फाॽग्र खे़ङ्हाॽरे़ खुनिॽ लायोन् ले़प्मि पोङ्लो, कर मनाहाॽरे़ खुनिॽ लायोन् ले़प्मि के़म्बिरुम्सिम्मिन्ने़ फाॽग्र खे़ङ्हाॽरे़ खुनिॽ लायोन् ले़प्मि मे़बोङ्ने़ल्लो॥”
ये़सुन् थोमाःल्लो थाःम्सिङ्
24आल्ल ये़सुन् खुनिॽ लुम्मो त्ये़ःल्ले़ थिक्-ने़त् हुॽसाम्बाहाॽओ थिक् दिदिमस मे़प्मनाबा थोमाःन् खे़प्मो होःप्ते़रो॥ 25हे़क्केःल्ले़ वेॽ हुॽसाम्बाहाॽरे़ थोमाःन् अक्खे मे़मे़त्तु, “आनिगे़ग दाङ्बान् निसुम्बे़रो!”
कर थोमाःल्ले़ खे़ङ्हाॽ मे़त्तुसि, “इङ्गाॽ कुहुक्को मे़धे़प्तुबा फे़न्तिङ्ङिल्ले़ कुयोःक्किन् मे़न्निए नु खे़प्मो आहुक्चोन् मे़ङ्गेःत्ते हे़क्क्याङ् कुले़म्भेःप्मो लाःक्किल्ले़ मे़धुबुबाओ आहुक्किन् मे़ङ्गेःत्तेग नसान् मे़जोःक्कान्लो॥”
26ये़त्छि ये़न् एगाङ् हुॽसाम्बाहाॽ याम्मो हिम्सिगाङ् मे़जुप्से़आङ् मे़युङे़॥ कन् ये़म्मो थोमाःन्नाङ् वये़, लाम्धेःप्पे़न् सिगाङ्लाम् मे़सुबुआङ् पत्छे़साङ् खुनिॽ लुम्मोए ये़सुन् थाःम्सिङ्ल, “सनारुङ् के़घोसुम्लरो” मे़त्तुसि॥ 27हे़क्क्याङ् थोमाःन् मे़त्तु, “थोमाए, के़हुक्चोःन् कॽयो याक्ते़ॽ, आहुक्हाॽ ओमे़त्ते़ॽ॥ खे़ने़ॽ के़हुक्किन् आले़म्भेःप्मो लाःक्किल्ले़ मे़धुबुबा कुयोःक्को केःत्ते़ॽओ॥ खे़ने़ॽ चप्चि मे़जोगे़न्ने़ॽ, कर नसान् चोगे़ॽओ॥”
28थोमाःल्ले़ मे़त्तु, “खे़ने़ॽग आदाङ्बा नु आनिङ्वाॽफुमाङ्ने़रो॥”
29हे़क्क्याङ् ये़सुरे़ खे़न् मे़त्तु, “खे़ने़ॽग इङ्गाॽ के़निसाङ्ङाङ्लक् नसान् के़जोगाङ्लो, कर इङ्गाॽ याप्मि मे़न्निए नसान् के़जोःक्पाहाॽग मुॽइसाबासिरो॥”
30ये़सुरे़ कन् साप्पन्नो साप्ते़आङ् के़बप्पान्नुःल्ले़आङ् यरिक् निङ्वाॽ के़माबा मिक्सेःन्हाॽ कुहुॽसाम्बाहाॽरे़ खुनिॽ तगि चोगुआङ् वये़॥ 31कर कप्मोग ये़सुन् ने निङ्वाॽफुसा, निङ्वाॽफुमाङ्ङिल्ले़ सेःन्दुबा ख्रिस्तरो लॽरिक् नसान् के़जोगुम्ल फाॽआङ् साप्ते़आङ् पप्पारो॥ हे़क्केलॽरिक् नसान् के़जोःक्पाहाॽरे़ मे़न्नुप्मनाबा हिङ्मन् मे़घोसुॽरो॥
वर्तमान में चयनित:
युहुन्ना 20: LIF
हाइलाइट
शेयर
कॉपी
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
