युहुन्ना 10
10
के़नुॽबा मे़ल्लुक्कम्बा
1ये़सुरे़ पाःत्तु, “इङ्गाॽ से़क्खाए मे़त्निङ्, आत्तिन् मनान् लाम्धेःप्पोलाम् मे़ल्लुक् थाःङ्ङो मे़लाःत्ने़न् कर वेॽ ले़प्माङ्नु लाःत् खे़ङ्ग खुःन्द्रिक्पा नु फाःन्दारो॥#१०:१ मे़ल्लुक्खरओ मे़ल्लुक्हाॽ मे़लाःत्ताङ् लाम्धेःप्पे़न् सुप् हे़क्केःल्ले़ से़न्दिक् मे़ल्लुक्हाॽ खुःन्द्रिक्पा नु फाःन्दा हे़क्क्याङ् थक्साहाॽलाम् ताङ्से़ःप् मे़घो॥ 2कर मे़ल्लुक्कम्बाङ्ग लाम्धेःप्पोलाम् लाःत्लो॥ 3लाम्धेःप् के़गोबाल्ले़ खुने़ॽ कुलागि लाम्धेःप्पे़न् हन्दु पिरु हे़क्क्याङ् मे़ल्लुक्हाॽरे़आङ् खुने़ॽ कुइक्लान् कुसिङ् मे़निःत्तुॽरो॥ हे़क्क्याङ् खे़ल्ले़ कुमे़ल्लुक्हाॽ खुनिॽ मिङ्ङोनु उःत्तुसिआङ् लाःक्कात् लाम्लोसुसिॽआङ् तेॽरुसिरो॥ 4हे़क्केलॽरिक् खुने़ॽ कुमे़ल्लुक्हाॽ लाःक्कात् लःत्तुसिॽआङ् तगि तगि लाङ्घेःक्ल लाम्लोसुसिॽरो॥ हे़क्क्याङ् खे़न् मे़ल्लुक्हाॽरे़ खुने़ॽ मे़दिम्दुॽ थेआङ्भे़ल्ले़ खे़ङ्हाॽरे़ खुने़ॽ कुइक्लान् कुसिङ् मे़निःत्तुॽरो॥ 5कर कुसिङ् मे़न्निःत्तुम्बाङ्ग खे़ङ्हाॽरे़ मे़न्दिम्दुन्, कर मे़लोक् मे़बेःक्लो, थेआङ्भे़ल्ले़ खे़ल्ले़ कुइक्लान् खे़ङ्हाॽरे़ कुसिङ् मे़न्निःत्तुन्लो॥”
6अक्खेलॽरिक् ये़सुरे़ कन् पाःन्निन् खे़दाॽओ मे़त्तुसिआङ् वये़, कर ये़सुरे़ थे पाःप्मा निङ्वाॽ चोगुबा खे़न् पाःन्निल्ले़ कुबेन् खे़ङ्हाॽरे़ कुसिङ् मे़न्निःत्तुन्लो॥ 7खे़ल्ले़चोगुल्ले़ याम्मो ये़सुरे़ खे़ङ्हाॽ मे़त्तुसि, “इङ्गाॽ से़क्खाए मे़त्निङ्लो, इङ्गाॽए मे़ल्लुक्हाॽरे़ लागि लाम्धेःप्पाआरो॥ 8इङ्गाॽनुःल्ले़ तगि के़दाबाहाॽ के़रे़क् खुःन्द्रिक्पा नु फाःन्दासिरो, कर मे़ल्लुक्हाॽरे़ खे़ङ्हाॽरे़ खुनिॽ पान् मे़ङ्घे़प्सुन्लो॥ 9इङ्गाॽए लाम्धेःप्पाआरो, इङ्गाॽलाम् सिगाङ् के़लाःप्पाहाॽ ताङ्मे़से़ःप्लो॥ खे़न् सिगाङ् लाःप्मा नु लाःक्कात् पेःक्मा सुक्लो हे़क्क्याङ् खे़ल्ले़ चाराम्दे़न् खोसुॽरो॥ 10खुःन्द्रिक्पाङ्ग खुःत्छे़, से़त्छे़ नु मे़ङ्से़रक् तारो, कर इङ्गाॽग मनाहाॽरे़ से़क्खाबा हिङ्मन्निन् मे़घोसुर, हे़क्क्याङ् खे़न्नाङ् आत्तात्तान्ने यरिक् मे़घोसुर फाॽआङ् त्याङ्बारो॥
11“इङ्गाॽ के़नुॽबा मे़ल्लुक्कम्बाआरो॥ के़नुॽबा मे़ल्लुक्कम्बाङ्ग कुमे़ल्लुक्हाॽरे़ लागि सिमाए पोङ्साङ् मे़गिने़न्लो॥ 12कर याङ्ङो याःलिक् साङ्मनाबा मनाःङ्ग से़क्खाबा मे़ल्लुक्कम्बा नु मे़ल्लुक्दाङ्बा मेःन्लो॥ खे़ल्ले़ पराबान् फे़न्ल पप्पा निसुल्ले़ मे़ल्लुक्हाॽ ले़रुधसिआङ् खे़त्छिङ् पेःक्लो हे़क्क्याङ् पराबान् ताआङ् मे़ल्लुक्हाॽ फत्तुसिॽआङ् से़सुदेसुसिॽरो॥ 13खे़न् मनान् याङ्ङो याःल्लिक् साङ्मनाबाआङ्लक् वाॽबाल्ले़ चोगुल्ले़ मे़ल्लुक्हाॽ नुरिक्काङ् ओमे़मे़त्तुन्छिन् कर ले़रुधसिआङ् खे़त्छिङ् पेःक्लो॥
14-15“इङ्गाॽ के़नुॽबा मे़ल्लुक्कम्बाआरो॥ इङ्गाॽ आमे़ल्लुक्हाॽ कुसिङ् निःत्तुङ्सिङ् हे़क्क्याङ् पानुदिङ् आम्बारे़ कुसिङ् निःत्ताबा हे़क्केए आमे़ल्लुक्हाॽरे़ इङ्गाॽआङ् कुसिङ् मे़निःत्तारो—इङ्गाॽआङ् खुने़ॽ कुसिङ् निःत्तुङ्, हे़क्क्याङ् आमे़ल्लुक्हाॽरे़ लागि सिमाआङ् यारिप् वाॽआरो॥ 16इङ्गाॽ वेॽ मे़ल्लुक्हाॽआङ् कत्तुङ्सिङ्॥ खे़ङ्हाॽग कन् लुप्पोबा मेःन्छिरो कर खे़ङ्हाॽआङ् इङ्गाॽ लत्छा लुप्पो ताःप्मासि पोङ्लो॥ इङ्गाॽ आइक्लान् मे़घे़प्सुॽआङ् खे़ङ्हाॽ थिक् लुप् मे़बोङ् हे़क्क्याङ् मे़ल्लुक्कम्बान्नाङ् लत्छारक् पोङ्लो॥
17“पानुदिङ् पाःल्ले़ इङ्गाॽ लुङ्माॽ तुक्कारो, थेआङ्भे़ल्ले़ इङ्गाॽ आहिङ्मन्निन् याम्मो याङ्ना खोमा फाॽआङ् कन् आहिङ्मन्निन् खुने़ॽ पिरुङ्देसुङ्लो॥ 18आत्तिल्ले़आङ् ने़त्तिगे़न् आहिङ्मन्निन् इङ्गाॽओलाम् तेॽमा मे़सुक्तुन्लो, कर कङ्ग इङ्गाॽ आबाङे आसिराॽ थाङ्धाङ् पिरुङ्लो॥ ने़त्तिगे़न् आहिङ्मन्निन् आबाङे पिमा नु याम्मो याङ्ना खोमा युक् कत्तुङ्लो॥ इङ्गाॽ पानुदिङ् आम्बारे़ अक्खे चोःक्मा इङ्जाङ् पिराङ्ङाङ् वाॽरो॥”
19ये़सुरे़ पाःत्तुबा कन् पाःन्निल्ले़ चोगुल्ले़ यहुदिहाॽ याम्मोआङ् खुनिॽ निङ्वाॽ मे़दङे़न्नाङ् मे़से़रे़रो॥ 20यरिक्ले़ अक्खे मे़बाःत्तु, “कङ्ग से़क्खासाङ् फे़न्साम्मिल्ले़ युक्तुआङ् नाक्खे़ पेआङ् वाॽरो! अक्तङ्बा मनाःल्ले़ कुबाःन्निन् थेआङ् खे़म्माबे?” 21कर वेॽहाॽरे़ मे़बाःत्तु, “फे़न्साम्मिल्ले़ युक्तुबा मनान् अक्खेलॽरिक् मे़बाःत्ने़न्लो॥ फे़न्साम्मिल्ले़ याङ्घुबाल्ले़ मिक्फःम्बाल्ले़ कुमिक्किन् हम्मा सुक्तुबि?”
यहुदिहाॽरे़ ये़सुन् मे़नाॽरु
22हे़क्क्याङ् यरुसले़म्मो माङ्हिम् तोःम्मा तङ्नाम्रे़न्#१०:२२ कङ्ग १६८ नाजिरि तङ्बे तगि यहुदिहाॽरे़ माङ्हिम्मिन् सेसेसाङ्साङ् मे़जोगुबा निङ्वाॽसोओ ये़त्छि ये़न् थारिक् ससाङ्स्रोत् चोःक्मनाबा तङ्नाम्मिन् वये़॥ ये़म् वये़, कङ्ग चुङ्वाःम्मा लाओ वये़रो॥ 23हे़क्क्याङ् खे़प्मो ये़सुन् माङ्हिम् लक्खुम् खिरि सोलोमनरे़ कुआःम्भो मे़प्मनाबा ते़न्नो लाङ्घेःक्कि वये़रो॥ 24खुने़ॽ कुघिरि यहुदिहाॽ मे़जुप्से़आङ् मे़मे़त्तु, “खे़ने़ॽ आप्फाल्ले़ थारिक् पिर्बेःम्बो याप्मि के़गप्पाबे? खे़ने़ॽ निङ्वाॽफुमाङ्ङिल्ले़ के़सेःन्दे़बा ख्रिस्तने़ फाॽग्र कुदोःप्माङ् पाःत्ते़ॽओ!”
25ये़सुरे़ नोगप् पिरुसि, “इङ्गाॽग तगिसा खिनिॽ मे़त्निङ्ङाङ् वाॽआरो॥ कर खिनिॽग नसान् आगे़न्जोगिन्लो॥ पानुदिङ् आम्बारे़ कुयुक्कोलाम् चोगुङ्बा निङ्वाॽ के़माबा याःम्बक्हाॽरे़ए इङ्गाॽ हाःत्आ फाॽआङ् ओसेःन्गे़धाक्तिॽ, 26कर खिनिॽ नसान् के़न्जोगुम्मिन्लो थेआङ्भे़ल्ले़ खिनिॽग आमे़ल्लुक् मे़ःन्निङ्लो॥ 27इङ्गाॽ आमे़ल्लुक्हाॽरे़ग आइक्लान् कुसिङ् मे़निःत्तुॽरो, हे़क्क्याङ् इङ्गाॽआङ् खे़ङ्हाॽ कुसिङ् निःत्तुङ्सिङ्ङाङ् खे़ङ्हाॽरे़ग इङ्गाॽ मे़दिम्मारो॥ 28खे़ङ्हाॽ इङ्गाॽ मे़न्नुप्मनाबा हिङ्मन् पिरुङ्सिङ् हे़क्क्याङ् खे़ङ्हाॽ आप्फाल्ले़आङ् मे़म्मे़क्ने़न्॥ हे़क्क्याङ् आत्तिल्ले़आङ् खे़ङ्हाॽ आहुक्कोलाम् नाप्मा तेॽमा मे़सुक्तुन्लो, 29थेआङ्भे़ल्ले़ पानुदिङ् आम्बारे़ खे़ङ्हाॽ इङ्गाॽ पिराङ्ङाङ् वाॽ हे़क्क्याङ् खुने़ॽ काक्नुःल्ले़ पयम् यम्बा चोक्लो॥ खे़ङ्हाॽ आम्बारे़ कुहुक्कोलाम् आत्तिल्ले़आङ् नाप्मा तेॽमा मे़सुक्तुन्लो॥ 30पानुदिङ् आम्बा नु इङ्गाॽ लत्छासिगे़रो॥”
31हे़क्केःल्ले़ याम्मो यहुदिहाॽरे़ ये़सुन् ले़प्मा से़प्मा फाॽआङ् लुङ्ङिन् मे़घप्सु, 32कर ये़सुरे़ खे़ङ्हाॽ मे़त्तुसि, “इङ्गाॽग पानुदिङ् आम्बालाम् यरिक् नुबा याःम्बक्हाॽ चोगुङ् पिनिङ्, हे़क्केःल्ले़ खे़ङ्हाॽओ आत्तिन् याःम्बक्किल्ले़ चोगुल्ले़ लुङ्ङिल्ले़ ले़प्मा आगे़गोःत्तिबाबे?”
33यहुदिहाॽरे़ नोगप् मे़बिरु, “खे़ने़ॽ के़जोगुबा नुबा याःम्बक्किल्ले़ चोगुल्ले़ग मेःन्लो, कर खे़ने़ॽ निङ्वाॽफुमाङ्ङिल्ले़ कुदक्ले़ङ्वाओ माङ् चे़ॽयापान् के़बारे़बाल्ले़ चोगुल्ले़ लुङ्ङिल्ले़ ले़प्मा कोःत्तासिगे़बारो॥ थेआङ्भे़ल्ले़ खे़ने़ॽग मे़न्छाम् याप्मिने़रक्, कर निङ्वाॽफुमाङ्आ लॽरिक् के़बाःत्तुॽरो॥”
34ये़सुरे़ खे़ङ्हाॽ नोगप् पिरुसि, “खिनिॽ आबाङे साम्योथिम् साप्लाओ निङ्वाॽफुमाङ्ङिल्ले़ मे़न्छाम् याप्मिहाॽ खिनिॽ माङ्निङ्लो लॽरिक् मे़त्तुसिबा साप्ते़आङ् पत्लो॥#१०:३४ निङ् सुम् ८२:६ ओ निङ्वाॽफुमाङ्ङिल्ले़ इस्राइल लाजेॽओ लाम्लोबा पोङ्मा के़बोङ्बा मनाहाॽ कन् पाःन्हाॽ मे़त्तुसि॥ खुने़ॽ खे़ङ्हाॽ “खिनिॽ माङ्निङ्लो” मे़त्तुसि, थेआङ्भे़ल्ले़ खे़ङ्हाॽ निङ्वाॽफुमाङ्ङिल्ले़ कुले़क्वा मनाहाॽलुम्मो खुने़ॽ कुनिङ्वाॽ कुइसिक् याःम्बक् चोःक्मा के़बोङ्बा वये़॥ 35हे़क्क्याङ् साम्योसाप्लान् ले़ङ्मा सुक्मे़दे़त्ने़न्बान् के़निसुम्लो॥ निङ्वाॽफुमाङ्ङिल्ले़ आत्तिन्हाॽ पाःन्जाक् पिरुसि खे़ङ्हाॽ खिनिॽ माङ्निङ्लो लॽरिक् मे़त्तुसिरो॥ 36हे़क्केःल्ले़ पानुदिङ् पाःल्ले़ सेसे चोगुआङ् इक्सादिङ् खाम्बेःक्मो पाङ्घुबा मनाःल्ले़ इङ्गाॽ निङ्वाॽफुसाआ लॽरिक् पाःत्तुल्ले़ आक्खेलॽरिक् निङ्वाॽफुमाङ्ङिल्ले़ कुदक्ले़ङ्वाओ माङ् चे़ॽयापान् के़बाःत्तु फाॽआङ् याप्मि के़धिक्तिबाबे? 37इङ्गाॽ पानुदिङ् आम्बारे़ चोक् पाङ्ङाबा याःम्बक्किन् मे़जोःक्कान्ने़ फाॽग्र याप्मि नसान् आन्जोगे़म्मिन्ने़ॽओ॥ 38कर इङ्गाॽ खे़न् याःम्बक्किन् चोगुङ्ने़ फाॽग्र इङ्गाॽओ नसान् के़न्जोगुम्मिन्छाङ् कन् चोगुङ्बा याःम्बक्हाॽओग नसान् चोगे़म्मे़ॽओ॥ हे़क्केलॽरिक् पानुदिङ् पान् इङ्गाॽओ वाॽ हे़क्क्याङ् इङ्गाॽ खुने़ॽओ वाॽआ के़लॽबा पाःन्निन् कुसिङ् के़निःत्तुम्लो॥”
39खे़ङ्हाॽरे़ खुने़ॽ याम्मो ते़म्मा मे़गोःत्तु कर खुने़ॽ फिःन्छिङ् पेरो॥
40हे़क्क्याङ् ये़सुन् यर्दन यङ्घङ्ङिल्ले़ नाधाःम्बि तगि युहुन्नारे़ बप्तिस्मा पिरुसिबा ते़न्नो पे॥ खुने़ॽ खे़प्मोए याःक्ते़ल्ले़ 41यरिक् मनाहाॽ खुने़ॽओ मे़द्ये़रो॥ खे़ङ्हाॽरे़ मे़बाःत्तु, “युहुन्नारे़ निङ्वाॽ के़माबा याःम्बक् मे़जोगुन्छाङ् कन् मनाःल्ले़ कुयाःम्बेओ पाःत्तुबा के़रे़क् पाःन्हाॽ से़क्खाएरो॥” 42हे़क्क्याङ् खे़प्मो यरिक् मनाहाॽरे़ ये़सुन् नसान् मे़जोगुरो॥
वर्तमान में चयनित:
युहुन्ना 10: LIF
हाइलाइट
शेयर
कॉपी
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
