तोलिङ्सोमु 10
10
नुहःल्ले़ कुस्साहाॽरे़ खुनिॽ मुॽइदाङ्साहाॽ
1नुहःल्ले़ कुस्सा सेम, हाम नु येपेतरे़ खुन्छिॽ साप्मुःन्धुम् हाबा कल्लो॥ वदप्मा थाङे़आङ् याङ्सि खे़ङ्हाॽरे़आङ् खुन्छिॽ ये़म्बित्छाहाॽ मे़बोःक्खे़॥#१ साप्मु १:५-२३
2येपेतरे़ कुस्साहाॽ
गोमेर, मागोग, मादे, याबान, तुबल, मेसेक नु तिरास॥
3गोमेरले़ कुस्साहाॽ
असकनज, रिपत नु तोगर्मा॥
4याबाने़ल्ले़ कुस्साहाॽ
एलिसाह, तर्सिस, कित्तिम नु रोदानिम॥ 5कन्हाॽलाम्बाए वरःङ्ङिल्ले़ कुयाओ के़युङ्बाहाॽ, खे़ङ्हाॽरे़ खुन्छि लाजेओ, खे़ङ्हाॽरे़ खुन्छि आबाङे पाःन्दाङ् नु सुवाङ् इसिःक् मे़बोःन्दे़रो॥
6हामे़ल्ले़ कुस्साहाॽ
कुस, मिस्रइम,#१०:६ मिस्र लाजे पुत नु कनान॥
7कुसरे़ कुस्साहाॽ
सेबा, हबिला, सब्ता, रामाह नु सब्ताका॥
रामारे़ कुस्साहाॽ
सेबा नु ददान॥
8कुसरे़ निम्रोदे़न् कत्तु॥ खुने़ॽ इक्सादिङ् खाम्बेःक्मो के़रे़क्नुःल्ले़ तगि मुक्के़गुबा मना पोःक्खे़॥ 9यहवे दाङ्बे़ल्ले़ कुदगि खुने़ॽ मुक्के़गुबा सावागे़म्बा वये़॥ खे़ल्ले़चोगुल्ले़ “निम्रोद हे़क्तङ्बा सावागे़म्बा” लॽरिक् पाःप्मा मुःन्धुम् वाॽ॥ 10कुहेःक्सिङ्मो खुने़ॽ कुहाङ्जुम्मिन् बेबिलोन, एरेक, अक्कद, हे़क्क्याङ् कल्ने वये़, खे़न् हाङ्जुम्हाॽ सिनार लाजेॽओ ने़रो॥ 11हाबा खे़न् लाजेॽओनु खुने़ॽ अस्सुर लाजेॽओ पे, हे़क्क्याङ् निनबे, रहोबोत-इर हे़क्क्याङ् कालह मे़प्मनाबा ये़क्यक्हाॽ, 12हे़क्क्याङ् निनबे नु कालह ये़क्यक्किल्ले़ कुलुम्मो रे़से़न ये़क्यक्किन् चोगु॥ रे़से़न्ने़ङ्ग पयम् यम्बा ये़क्यक्लो॥
13मिस्रइमे़न्
लुदिहाॽ, अनामिहाॽ, लहाबिहाॽ, नप्तुहिहाॽ, 14पत्रुसिहाॽ, कस्लुहिहाॽ (खे़ङ्हाॽलाम् पलिस्तिहाॽ मे़द्ये़) नु कप्तोरिहाॽरे़ खुनिॽ पानुदिङ् पा वये़॥
15कनाने़न्
खुने़ॽ कुस्सा तुम्बा सिदोनरे़ कुम्बा, हे़क्क्याङ् हित्तिहाॽरे़ खुन्छि पा वये़॥ 16यबुसिहाॽ, एमोरिहाॽ, गिर्गासिहाॽ, 17हिब्बिहाॽ, अरकिहाॽ, सिनिहाॽ, 18अर्बादिहाॽ, समारिहाॽ नु हमातिहाॽ मे़लःन्दे़॥
खे़न् एगाङ् कनाने़ल्ले़ कुसुवाङ्हाॽ के़रे़क् पिसाङ् मे़से़रे़॥ 19कनान लाजेःल्ले़ इःन्दोन् सिदोनलाम् गरार पेःक्मालाम् ले़प्माङ् गाजा थारिक् ने़स्से़, हे़क्क्याङ् सदोम, गमोरा, अद्मा नु सबोयिम पेःक्मालाम् ले़प्माङ्नु लासा थारिक् ने़स्से़॥
20हामे़ल्ले़ कुस्साहाॽ, खे़ङ्हाॽरे़ खुन्छिॽ थाःक् नु खुन्छिॽ पाःन्दाङ् इसिःक्, हे़क्क्याङ् खे़ङ्हाॽरे़ खुन्छिॽ लाजेॽ नु खुन्छिॽ सुवाङ्हाॽ हाबा कन्छिरो॥
21ये़रे़दरे़ कुम्भुॽ सेमे़ल्ले़आङ् कुस्सा मे़वये़॥ सेमे़न् एबेररे़ के़रे़क् कुस्साहाॽरे़ खुन्छिॽ थाःक्थे़बा वये़॥
22सेमरे़ कुस्साहाॽ—एलाम, अस्सुर, अर्पछ्यद, लुद
नु अराम मे़वये़॥
23अरामरे़ कुस्साहाॽ
उज, हुल, गेतेर नु मेसेक मे़वये़॥
24अर्पक्छ्यदे़ल्ले़ सेलहन् कत्तु॥
सेलहःल्ले़ एबेरे़न् कत्तु॥
25एबेरे़ल्ले़ ने़प्फु सा कत्तुसि॥
लत्छाःल्ले़ कुमिङ् पेलेग#१०:२५ पेलेग—कन् मिङ्ङिन् हिब्रुओ “फःङ्मा” हे़क्तङ्बा खे़म्दे़त्॥ वये़, थेआङ्भे़ल्ले़ खे़ल्ले़ कुये़म्मो इक्सादिङ् खाम्बेःक्मे़न् कुलक् कुलक् मे़हासुआङ् ने़स्से़॥ खुने़ॽ कुन्साॽरे़ कुमिङ् योक्तान वये़॥
26योक्ताने़न्
अल्मोदद, सेलेप, हसर्मवित, येरह, 27हदोरम, उजाल, दिक्ला, 28ओबाल, अबमाएल, सेबा, 29ओपिर, हबिला नु योबाबे़न् कत्तुसि॥ कङ्हाॽ के़रे़क् योक्ताने़ल्ले़ कुस्सा मे़वये़॥
30खे़ङ्हाॽरे़ खुन्छिॽ युङ्मादे़न् मेसाआङ् कत्ना नाम्गे़न् पिसाङ्बा थे़गु माङ्वाहाॽओबा लाजेॽ सपारा पेःक्मालाम् थारिक् ने़स्से़॥
31सेमे़ल्ले़ कुस्साहाॽ, खे़ङ्हाॽरे़ खुन्छिॽ थाःक् नु खुन्छिॽ पाःन्दाङ् इसिःक्, हे़क्क्याङ् खे़ङ्हाॽरे़ खुन्छिॽ लाजेॽ नु खुन्छिॽ सुवाङ्हाॽ हाबा कन्छिरो॥
32नुहरे़ कुस्साहाॽरे़ खुन्छिॽ थाःक्हाॽ आबाङे खुन्छिॽ सुवाङ् इसिःक् कङ्हाॽएरो॥ वदप्मा थाङे़आङ् एगाङ् कन्हाॽलाम्बा वेॽ वेॽ मे़न्छाम् सुवाङ् मे़बोःक्खे़आङ् इक्सादिङ् खाम्बेःक्मो के़रे़क् पिसाङ् मे़से़र मे़बेरो॥
वर्तमान में चयनित:
तोलिङ्सोमु 10: LIF
हाइलाइट
शेयर
कॉपी
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
