Mateo 2

Nan Ummajan Chanan Man'alaingay Taku Nangilan An Hesus

1Nijana' kus Hesus ad Betlehem gway sa'up nan Judea san chimpun nan nan'aliyan Herod, iningkaw chanan man'alaingay taku gway nangacher sasan whituwon gway ummoy ad Jerusalem gway nerpucha san iliyay chumungitan nan init. 2Kun inimuscha sasan taku gway manggwanaon, “Agwan nan agwachan nan sachi ana'ay nijana' gway mangngachan alin chanan Hudyu? Inilami nan whituwon gway nampaila san chumungitan nan init gway nangipailaay nijana' as sija. Sija nan ummali ami tot chajagwonmis sija.”

3Chingngorn kun Ali Herod nan mipangkop san nanimusancha, nakuyu nan somsomo'na ja ama ahos chanan angsanay taku ad Jerusalem. 4Gwot impaajagna chanan papangat nan papachi ja chanan mangaagkammu san lintog Apudyus kun inimusna an chicha gway manggwana, “Agwan nan mijana'an nan Kristu?”

5Kun anancha an sija, “Ad Betlehem gway sa'up nan Judea tan annaja nan illistan nan profeta san agwi gway anan Apudyuson:

6‘Cha'ajuway takud Betlehem san ilid Judea,

wha'on kus anan chanan mangituyay ad Judea gway mangudchi aju ili

tan merpu an cha'aju nan mangituyay#2:5-6 Mawhasa san Mikias 5:2.

gway mangijamuut sasan taku' gway ijIsrael.’ ”

7Sachi kun inajakan Herod chachay man'alaingay taku gway nangacher san mipangkop sasan whituwon kun nanimus an chicha san maid mangakammus taku. Kun naakammugwana an chicha nan ustu'ustuway chimpu gway lummosgwaan chay whituwon. 8Kun ingwhaunna chicha ad Betlehem gway pinuyungna chichaay manggwana, “I'aju ad inammanju anapon nan sachi ana'. Ad sa'ad nu ochasanjus sija umaliju ipaakammu an sa'on tot iya' ahos chajagwon as sija.”

9-10Sachi kunay chingngorcha nan puyung chay ali, lummiggwatcha. Agwadcha kus chayan inilacha chay whituwon gway nampaila an chicha san chamu san chumungitan nan init kun nallaylajadchas amod. Kun impupujut chay whituwon chicha ingkana san summinong san whatug nan agwachan chay ana'.

11Kummatongcha kun nilumno'cha san hoyoy gwot inilacha nan ana' ja as Maria gway inana. Nampalintumongcha kun chinajawchas sija. Kun asichaot o'aton nan atchoncha gway man'apapatog gway huyagwan, whangwhangyu gway insenso ja lana gway ma'gwaniyon mirra kun inatodcha an sija.

12Lummajawcha kun ayasi nan inoycha tan ingwhakan Apudyus an chicha san ininop gway achicha managkulin an Herod.

Nan Nangijagwichan Josep An Hesus Ad Egipto

13Aysan kun chachay man'alaingay taku, nampaila nan osa anghel Apudyus an Josep san ininop gway manggwana, “Humangon'a ta ijagwidnu nan manina ad Egipto. Ingkaw ajud aschi ingkana san iwhaka' gway managkulin aju tan paanap Herod nan ana' tot ipaotoyna.”

14Gwot hummangon as sija san sachiyay lawhi kun iyagwidna nan manina gway ummoy ad Egipto. 15Kun iniingkawchad aschi ingkana san natoy as Herod. Na'gwa nannaja tot tumuttuwa nan ingwhakan Apudyus san profeta gway anana, “Manipud ad Egipto inajaka' nan ana''u.”#2:15 Mawhasa san Hosea 11:1.

Nan Nangipaotojan Herod Sasan Anana' Gway Lallaya'i

16Naakammugwan kun Herod gway sini'apan chachay man'alaingay taku as sija, amod nan huchu'na kun ingwhilinna gway otojoncha nan losanay laya'iyay ana' ad Betlehem ja sasan losanay whija'cha gway mantagwon as chugwa gwinnu uyang as chugwa. Ad san nangakammugwana sasay man'alaingay taku gway nerpu san chumungitan nan init, chugwan tagwon nan lummaus malluki san ummuna nangillancha san whituwon. 17Kun tummuttuwa nan ingwhakan profeta Jeremias gway anana,

18“Agwad nan kinga gway mamagngor ad Rama

gway amochay akaag ja iwhil.

Iwhiiwhilan Raquel chanan ana'na

ja lagwingonaay paliwligwa

kapu tan namincha natoy.”#2:18 Mawhasa san Jeremias 31:15.

Nan Nanagkulinan Cha Josep Ad Nazaret Gway Nerpud Egipto

19Natoy kus Herod, nampaila nan osa anghel Apudyus san ininop an Josep ad Egipto 20gway manggwana, “Humangon'a ta ijagkulinnu nan manina ad Israel. Tan sa'ad chachay mangtoy otjan san ana' natoycha.” 21Gwot hummangon kus Josep iyagkulinna nan manina kun ummoychad Israel. 22Gwon naakammugwana kunay as Arkelao nan nan'ali ad Judea gway nipasu an amana Herod, ummogjat gway umoy ad aschi. Kapu tan niwhaka an sija san ininop, ummod Galili as sija. 23Kun ummoycha na'aumili san iliyay ma'gwaniyon Nazaret tot tumuttuwa nan ingwhakan chanan profeta mipangkop san Mesias gway anancha, “Maagwakan as sija as iNazaret.”

वर्तमान में चयनित:

Mateo 2: NUA

हाइलाइट

कॉपी