Matayo 8

Jeso unamuphoza mukongo wa mahana

(Mariko 1:40-45; Luka 5:12-16)

1Jeso ariphomarigiza kufunza atʼu kuko mwangoni, wateremuka vivi hata kuko tsʼini. Chidzako maduu-maduu ga atʼu gachimutuwa, 2na phapho phachidza mutʼu mumwenga yekala una mahana. Achimitʼa mavindi mbere za Jeso na achiamba, “Bwana, nitakasa! Ninamanya unaidima kunitakasa uchihenza.” 3Jeso achigolosa mukonowe achimukumba, na kuno unaamba, “Ninahenza, takasika!” Phapho kare mahana gachiyaya. 4#Alaw 14:1-32Chisha Jeso achimwamba, “Utsʼimwambire mutʼu yeyosi gaga godzikuhendera. Ela enda ukadzonyese kwa kuhani tu uwe, na ukalavye sadaka dza vihenzwavyo ni Shariya ya Musa, na yiyo yindaamanyisa atʼu kukala udzitakaswa.”

Kuluphiro ra mubomu wa shikari a viha

(Luka 7:1-10)

5Jeso aripholaa phapho, wakwenda mudzi wa Kaparinaumu. Ariphophenya phapho mudzini tu, mubomu mumwenga wa shikari a viha wa Chirumi wamutuwa, achimulombera 6achimwamba, “Bwana, muhendikazi wangu kuko mudzini ni mukongo wa kupholoza hata yupwi.” 7Jeso achimuudzidza achimwamba, “Hʼaya nidzisikira nindakudzamuphoza.” 8Yiye mubomu wa shikari achimwamba Jeso, “Bwana, mimi tsʼiwirya kukupiga karibu uwe mwangu nyumbani. Kwa vivyo, uwe amba muhendikazi wangu aphole tu, naye undaphola. 9Maana, hata mimi nami ni mutʼu niriye tsʼini za widimi wa abomu anjine, na ninao shikari tsʼini zangu. Na nikumuhuma mumwenga, naye akenda. Nikamwiha munjine, naye akadza, na nikumwamba muhendikazi wangu, ‘Henda rino,’ naye akahenda.” 10Jeso ariphomusikira unagomba gago, waangalala, chisha achiaamba ao atʼu okala a phamwenga naye, “Ninamwambira jeri mino, tsʼidzangwe kona mutʼu wa kuluphiro bomu dza yuyu phapha Iziraeli phosi! 11#Luk 13:29Na ninamuhakikishira kukala, atʼu anji kulaa mulairo wa dzuwa na mutswerero wa dzuwa andarya shuhuli phamwenga na Burahemu, Isaka na Jakobo kuko Ufalumeni kwa Mulungu. 12#Mat 22:13; 25:30; Luk 13:28Ela anji ehu siswi Ayahudi, hurio hata ndiswi oanza kwihiwa hupate Ufalume wa Mulungu, andatsuphwa kuko konze dzizani, ariko andadzuta na arire hata ga milatso.” 13Chisha, Jeso achimwamba yiye mubomu wa shikari, “Enda vyako mudzini, na muhumikio undaphola dza vyodzikuluphira.” Na muhendikaziwe kuko mudzini achiphola ukati uo kare.

Jeso unaphoza atʼu anji

(Mariko 1:29-34; Luka 4:38-41)

14Jeso wakwenda mudzini kwa Pʼetero, na kuko achendamona mutsedzangwa wa chiche wa yiye Pʼetero yu chitʼandani ni mukongo wa chiphuti. 15Jeso achendamugwira mukono, na chiphuti chichimuricha. Muchetʼu achiunuka, na achanza kumuhikirahikira Jeso.

16Kuriphotswa, atʼu achimurehera Jeso akongo anji, na okala ana mapepo. Jeso achigachemera gago mapepo hata gachilaa, na achiaphoza osi okala ni akongo. 17#Isa 53:4Phapho Jeso achichimiza maneno gogombwa ni mugomvi wa Mulungu Isaya, gaambago kukala,

“Wausa uwele wehu,

na makongo gehu wagaphoza.”

Awiryao kukala anafunzi a Jeso

(Luka 9:57-62)

18Jeso ariphoona atʼu achimira muno phapho, waamba anafunzie avuke ngʼambo ya phiri ya ziya. 19Chidzako, Jeso achituwiwa ni mwalimu mumwenga wa shariya achambwa, “Mwalimu, mino nindakutuwa uwe kosi kondakwenda.” 20Ela Jeso yiye achimwamba, “Mbewa ana mina, na nyama a kuburuka ana nyumba, ela mimi Mutʼu yelaa dzulu tsʼina phatʼu pha kwika mbavu.” 21Chisha, mwanafunziwe munjine naye achimwamba, “Bwana, niricha nikazike baba mwanzo, ndo nidze nikutuwe.” 22Ela Jeso yiye achimwamba, “Ga mahanga garichire ao ario chiroho áfa, ela uwe nituwa.”

Jeso unarichemera vuto rihurire

(Mariko 4:35-41; Luka 8:22-25)

23Jeso waphenya mashuwani na anafunzie. 24Ariphokala anenda, vuto bomu raanza kuvuma, na maimbi gachiyipiga yiyo mashuwa. Madzi gachanza kuphenya mumo mashuwani hata yichikala yinahoha, ela Jeso ukati uo yiye wakala urere. 25Ndo ao anafunzi achendamulamusa Jeso na kuno anamwamba, “Bwana, hutivye hunahoha!” 26Jeso achiaudzidza achiaamba, “Kwadze mu aoga vino mwimwi? Heka mwimwi hata kuluphiro renu ni dide vino?” Ndo Jeso achiunuka, achirichemera riro vuto na maimbi, na kuchihurira, kuchikala zizizi kamare. 27Anafunzie mumo achangalala, na achisala kwambana, “Uu! Yuno ni mutʼu wa chidzedze asena, ariye hata vuto na maimbi vinamogopha?”

Jeso unaaphoza atʼu airi a vitswa

(Mariko 5:1-20; Luka 8:26-39)

28Jeso ariphofika itsʼi ya Agerasa, ngʼambo ya ziya ra Galilaya, atʼu airi okala ana mapepo ga vitswa álaa mabirani achenda kwakwe. Atʼu ao ákala ana vitswa vya moho hata yiyo njira ya mabirani yakala yidziima kʼayigwirwa ni mutʼu kahiri. 29Ndo ariphomona Jeso tu, osi airi achanza kugomba kwa laka ra dzulu kwamba, “Unaswini uwe Mwana wa Mulungu? Vidze, udzikudzahuturisa kare, na hata ukati kʼaudzangwe kufika?”

30Kure vichache na phatʼu phapho phokala ao atʼu, kwakala kuna duu bomu ra nguluwe a kufuga okala anarisa. 31Ndo ao pʼepʼo achimulombera Jeso achimwamba, “Uchikala undahulavya kwa aa, bee huhenzeze hukaaphenye ara nguluwe.” 32Jeso achiaamba, “Hʼaya endani!” Phapho kare pʼepʼo achilaa kwa aratʼu atʼu, achendaaphenya ao nguluwe, na duu rosi ra nguluwe richivoromoka hata ziyani richihoha.

33Arisa a ao nguluwe ariphoona gago, ákaza mairo hata mudzini achendaambira atʼu nguma zizo, na gokala gahenderwa ao atʼu a mapepo ga vitswa nao. 34Atʼu osi phapho mudzini achilaa mairo kwendamulola Jeso. Ariphokwendamona, ámuvoya auke phapho jimbo ra phao.

वर्तमान में चयनित:

Matayo 8: CHIDUR

हाइलाइट

कॉपी