Kucangtsi 38
38
Ira Kutampwa Yawuda ti Tamar
1Kiye wu Yawuda ya ameinja-wu ta, u ru ka som te unde ti Adulam iki ti rinyi-wu si Hira. 2Atang Yawuda tu wandab iki ti rinyi itse-wu si Shuwa, unde ti Kanana. Awu mbe wu u nae te wu. 3Wandab wu kyaen rishwu u mbae umbae ti urom, awu fa rinyi-wu baa, Er. 4Awu kyaen kyi rishwu u mbae umbae ti urom ama u fa rinyi-wu baa, Onan. 5Awu mbae kyi umbae ti urom ama u fa rinyi-wu baa, Shela. Awu mbae umbae wune yi Kezib.
6Yawuda pu unda na Er umbae-wu titawe, rinyi unda wu si Tamar. 7Ama Er, umbae titawe Yawuda, nde iken ti beb timambe uwe Yaweh. Ikyaen ayine, Yaweh wen ra wu. 8Yawuda ri te Onan baa, “Ti inja-fu cwu-wu ne, ru ka yaen uwa inja-fu, ti fu mbae umbae ti rinyi inja-fu ā kunn atang.” 9Ti Onan nung baa, umbae wu na u si-wu ana wu be, ko kiye ti tine ti awu a ku nae te uwa inja-wu, awu ku sa usur yaensi riben ti wu na u mbae-wu umbae iki na inja-wu be. 10Iken yi ti awu ku nde ne, nyang-yi uwae Yaweh be, ama Yaweh wen ra wu. 11Yawuda ri te uwabyib-wu Tamar baa, “Kafe ru ti kununn ande-fu, ti ka som usom uwa-icwu atang. Baen-fu unde iki be, se kiye ti umbae-m Shela a ser ben pu wu.” Awu ku kab baa, Shela na u cwu pangma ameinja-wu. Tiri Tamar kafe ru-wu ti yi kununn ande-wu.
12Isim kiye yang-yi, uwa Yawuda, umbae Shuwa ti unda, sa cwu. Ti Yawuda som tag ricwu uwa-wu, awu ru yi Timina uwog ti a ku pwén asing iwentam-wu atang. Urwan-wu Hira, unde ti Adulam te wu ru tetso. 13A ri te Tamar baa, “Itse ubaen-fu ta fengo ku ru yi Timina ti awu kaa pwén asing iwentam-wu.” 14Ti Tamar nung baa, Shela na ko ben pu wu, ama na u ka yaen-wu awu be, awu tunn pu atupwa uwa-icwu tso, u pu atupwa titinyang si, u pu iki burkyi risu-wu, u ka som fengo ti ku ru yi Timina, uwog ti fengo Enayim kata atang.
15Kiye ti Yawuda sae wu, awu kab baa, iki be awu na si iyaen, ikyaen ti awu pu atupwa kukyi uwe-wu. 16Yawuda kya tsi, u ka tu wu iyen fengo u ri te wu baa, “Ba ti m nae te fu.” Ikyaen ti awu nung-wu ti unda wu na si uwabyib-wu be. Tamar rang wu baa, “Imi ti afu u nda m titawe afu u nae te m?”
17Awu ri baa, “Ame u tom na fu imbae iwenten kinjo uwae asinn-m.” Tamar ri baa, “Afu u nda m iken iki ti m u ye su kujwo-m ba sang kiye ti afu u tom iwen wu ba a.”
18Yawuda rang baa, “Imi ti ame u nda fu ti u tatso unju ti yer-ti?” Awu ri baa, “Pu na m sitami te uji-wu, fa ti ukum ti afu ye su ne.” Ikyaen ayine Yawuda pu iken yine na wu ama u nae te wu, ama unda awu kyaen rishwu. 19Isim ti awu nwunn atang, awu tunn pu atupwa titinyang-wu yi cwu kae, u pu ana uwa icwu si ti atang.
20Yawuda sa iwen wu tom urwan-wu unde ti Adulam ti wu na sa ka na unda wu, ti wu na mbe isu unju ti yer-ba kujwo unda wu na kafe ba na wu ti atang. Ama urwan-wu kafe ka tu-wu unda wu be. 21Awu rang ande ti ta atang baa, “Iyaen wu ti ku som kob fengo ti ku ru yi Timina, uwog ti fengo Enayim kata atang ta-wu aka?” Aba ri te wu baa, “Iyaen iki ku som-wu ike be.”
22Ikyaen ayine, awu kafe ka tu Yawuda u ri te wu baa, “Ame tu-m unda wu be. Cwucwo ande ba ti ta atang ri te m baa, iyaen iki na ku som-wu atang be.”
23Yawuda ri baa, “Awu ā pu iken yi ru-wu bē ande u skaen ti ikyaen. Ame kwab pu m. Ame tom fu te mbawen-m ti fu na sa ka na wu, amaa, afu tu-fu awu be.”
24Isim ishaen ita, Yawuda fxen baa, “Uwa byib-fu Tamar, nde iyag ama u kyaen pu wu rishwu.” Yawuda ri baa, “Ni ye wu ruye ti a twen wen wu.”
25Ti aba pu wu ruye pu ba, awu tsa kutsa ru uwog itse ubaen-wu baa, “Ame kyaen rishwu ti unde ti isu yine. Sae, ko iki be afu u nung unde wu ti sitami ti iji ti ukum wune si ana wu.”
26Ama Yawuda nungye yi ama u ri baa, “Kubenti-wu skeb pu yi ana-m, ikyaen ti, ame pu wu na-m umbae-m Shela be.” Ama Yawuda nae te kyi-wu unda wu cwucwo be.
27Ti kiye itimbae-wu nde, anyisu ishe ta rishwu-wu. 28Ama ti awu ku pwe umbae, kinjo sa kujwo ruye. Nyakam ti ku mbe umbae sa itub tibyaen kya fa wu kujwo, u ri baa, “Awune ti ruye uwe.” 29Amaa umbae wu sa kujwo-wu kafe sang ti uwae, ama inja-wu ru ye-wu. Unda wu ri baa, “Ah! Ne fengo ti fu yaen ru ye a.” Ama a fa rinyi-wu baa, Perezi. 30Isim-yi inja-wu ti itub tibyaen kya fa wu kujwo ne ruye, aba fa rinyi-wu ama baa, Zera.
वर्तमान में चयनित:
Kucangtsi 38: kubNT
हाइलाइट
शेयर
कॉपी
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
