Kucangtsi 32
32
Yakubu ti Esuwa Tu Atso
1Ti Yakubu kyang ku ru, atom Rimam ti apupwen ba tu wu. 2Ti Yakubu sae ba, awu ri baa, “Uwog wune si kang ufug rika Rimam!” Ikyaen yine awu kunn rinyi uwog wu baa, “Mahanayim#32:2 Mahanayim. Imbyi rinyi wune baa, afug akyirten..”
3Yakubu tom ande ru uwe ka tu inja-wu Esuwa uwae uten Seyir na Edom. 4Ti aba nwunn ku ru, awu ri te ba baa, “Ni fxen ira ti ani kaa ri te unde ti uwe-m Esuwa. Ni ri te wu baa, ‘Upyi-fu Yakubu ri baa, awu na som te Laban sa pu wu kiye ba ku kwer tine. 5Awu ama na site indag ti ku tom ritom, ti ikyinnsu, ti iwen, ti apyi ti arom, ti ti anda. Tine awu na pu yi ba ku na fu unde ti uwe-wu, ti wu na u tu kutxuwe ti tinyang uwe-fu.’ ”
6Ande ba ti Yakubu tom ru uwe kafe ba, u ri te wu baa, “Ati ka pu ti uwog inja-fu Esuwa, awu tí ande ukob inje ba ku kyang te fu fengo.” 7Tiri ikyenricwu ye Yakubu, ijwe-wu ku fufwer. Awu kata ande-wu ti iwen-wu ti indag-wu ti ikyinnsu ti kumunn isim-wu kumbub ifaen, 8ku kab baa, “Asiti Esuwa a ba ti rika ba wen tag kumbub kinjo, kumbub ti ifaen u ter nwang.”
9Ama Yakubu jwam Rimam baa, “Rimam na itse-m Ibrahim, Rimam na Itse-m Ishaku, Yaweh, afu ri te m baa, ‘Kafe ru ti uten-fu uwog ande-fu, ti ame u nde fu itinyang.’ 10Ame ko-m ti afu u tso m ure-fu ti tsi kukunn ti kubenti-fu yine be. Ame yen Unyim ti Yordan ti ukum amam kujwo-m, ama tine ame kafe ba ti kumbub ande ifaen bane. 11Ame ku jwam fu, nwangru m kujwo inja-m Esuwa, ikyaen ti, ame ku kyen ikyenricwu-wu baa, iki be awu u ba wen tag ti, ti awa-ti ti anyisu-ti meme. 12Tangsom ti afu yer unju baa, ‘Ame u nde fu itinyang, u nda rishi-fu u jwunn pangma isa riben, unde iki u pwen tu-wu aba be.’ ”
13Tiri awu nae atang utitang wu, u tsab iken ti awu site ti wu u pu na Esuwa inja-wu rinyangwae. 14Iwenten tiyae ukob ifaen, ti tishir ama si rikom, ti iwentam tiyae ukob ifaen ti tishir rikom, 15ikyinnsu ti kumunn isim tiyae rijweta ti imbae-yi, ti indag tiyae mae ifaen ti tishir rijwe, ti ikyinnsu tiyae rikom ti tishir rijwe. 16Awu pu yi na apyi-wu, u ri baa, “Ni ru yi uwe ti ni ya riyae ta kutampwa atso.” 17Awu ri te upyi-wu ti ta uwe baa, “Kiye ti inja-m Esuwa a ba tu fu u rang fu baa, ‘Afu si umbae ti kusog aye, afu ku ru-fu yi aka, asinn ti ta uwe-fu ne si ana aye?’ 18Ni ri te wu baa, ‘Ayi si ana upyi-fu Yakubu. Ayi si rinyangwae ti awu tom ba ku na unde ti uwe-wu Esuwa. Awu ku ba ti isim.’ ” 19Yakubu ri te kyi kumbub ti ifaen, ti ti ita, ti aba ti putsa asinn baa, “Ni ri ti mbwe-yi te Esuwa kiye ti ani a tu wu, 20ti ni ri baa, ‘Upyi-fu Yakubu putsa ti ku ba isim.’ ” Yakubu ku kab baa, “Ame u ci ra utob Esuwa ti rinyangwae ti ame tom ku ru uwe ne. Asiti ame a ba tu wu uwe ti uwe, iki be awu u kyang te m.” 21Tiri a pu rinyangwae yi ru uwe, ama awu nae ti afug atang utitang wu.
Yakubu Kwab Ukwab te Atom Rimam
22Utitang wu, Yakubu nwunn u pu awa-wu meme ifaen-ba, ti apyi-wu ti unda ifaen, ti anyisu-wu rijwe asu kinjo, u yen unyim ti Jaboki. 23Awu pu ba ti iken ti awu site meme yen unyim wu. 24Awu Yakubu amam ti som ti isim. Ama unde iki ba kwab ukwab te wu utitang wu pu ucwefam. 25Yi uwae ukwab ti kwab-ba yi, ti unde wu nung baa, awu na nde tu-wu te Yakubu be, awu sa kujwo tekunn kusa Yakubu ama kufaen imbyi-wu fxae ru. 26Tiri unde wu ri te wu baa, “Ya m ta ti m ru bē ucwefam ku yae pu wu.” Amaa Yakubu ri baa, “Ame u ya fu ta-m be, se afu a nde pu fu ame itinyang.”
27Unde wu rang wu baa, “Rinyi-fu baa imi?” Awu ri baa, “Rinyi-m si Yakubu.”
28Tiri unde wu ri baa, “A u kunn-ba afu baa Yakubu cwucwo be, tine a u kunn fu baa, Isirela, ikyaen ti, afu kwab ukwab ti Rimam, fa ti ande, ama u ci pu fu.”
29Yakubu ri baa, “Ame ku jwam fu, kunn rinyi-fu te m.” Ama unde wu ri baa, “Ikyaen imi ti afu ku rang rinyi-m?” Ama awu wae na wu ira.
30Ama Yakubu fa rinyi uwog wu baa, Penuwel, ti ku tatso baa, “Ame sae Rimam ayib ti ayib ama u cwu-m be.” 31Usir pur tso tu wu ti fengo kiye ti awu nyatsa Penuwel. Awu ku singag singag, ikyaen kufaen-wu ti fxifxae. 32Sa ti usir wu ba kwar tine, anyisu Isirela ku kub-ba kufaen imbyi ibye be. Ikyaen ti, atom Rimam tekunn kufaen imbyi Yakubu.
वर्तमान में चयनित:
Kucangtsi 32: kubNT
हाइलाइट
शेयर
कॉपी
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
