మత్తయి 9

కెయ్-కాల్క్ అర్సి మన్వన్ యేసు చొకొట్ కియ్వల్

(మార్క్ 2:1-12; లూక 5:17-26)

1తె యేసు రూకతగ ఉచ్చి, అద్ సమ్దుర్‌తున్ వీడ్సి తన్వ నాటె వాతొర్. 2అద్ వకత్నె కహితుర్, కెయ్-కాల్క్ అర్సి మన్వన్ చాప్రత పాడెతగ మీండుసి, యేసునగ పియ్సి వాతెర్. యేసు వూర బరొస సూడ్సి, వోర్ కెయ్-కాల్క్ అర్సి మన్వన్ సంగ, “నా మరి, నిమె దర్యమ్‌నె మన్. నీవంగ్ పాప్క్ మాపి ఆతంగ్” ఇంజెర్ వెహ్తొర్. 3తె అద్ గొస్టి కేంచి కహితుర్ సాస్తిరిర్ తమ్వ మన్దె, “బగవంతన్ వేర్ రెహ్చి వడ్క్‌సెర్ మంతొర్!” ఇంజెర్ సోంచ్ కీతెర్. 4వూర్ తమ్వ మన్దగ బతల్ సోంచ్ కీసెర్ మంతెర్ ఇన్వడున్ యేసు కరి కీసి, “మీవ మన్దె బారి అహన్ సోంచ్ కీసెర్ మంతిట్? 5‘నీవంగ్ పాప్క్ మాపి ఆతంగ్’ ఇంజెర్ వెహ్వల్ హల్కొ కి, సెలెకె ‘నిమె తేచ్చి తాక’ ఇంజెర్ వెహ్వల్ హల్కొ? 6తెర్ బతి స్వర్గ్‌నొర్ మాయ్నన్ పాప్కున్ మాపి కియ్వల్ అదికార్ ఇద్ దర్తురిత్ పొరొ మంత ఇన్వల్ మిరట్ కరి కియన” ఇంజెర్ వెహ్తొర్. అని కెయ్-కాల్క్ అర్సి మన్వన్ సంగ, “తేద! నీవ చాప్రతున్ పియ్సి రోన్ సొన్” ఇంజెర్ ఇత్తొర్. 7అస్కె వోర్ మాయ్నల్ సప్నె తేచ్చి, తన్వ రోన్ సొత్తొర్. 8ఇద్ సూడ్సి, అగ మన్వల్ మాందితున్ బావ్-బక్తిత వెరె జోమె మాత. తె ఈతల్ అదికార్ మాయ్నన్ సియ్వల్ బగవంతన్ హేతు కీసెర్ డగుర్-పాన్ సీతెర్.

మత్తయిన్ యేసు కేయ్వల్

(మార్క్ 2:13-17; లూక 5:27-32)

9అగటల్ యేసు పెసిసి సొంజెర్ మనెకె, టెక్స వసులి కియ్వల్ కమ్రతగ ఉచ్చి మన్వల్ మత్తయిన్ సూడ్తొర్. వేర్ టెక్స వసులి కియ్వల్ ఆందుర్. వోన్ సంగ యేసు, “నా పెజెయ్ వర!” ఇంజెర్ వెహ్తొర్. వోర్ మత్తయి తేచ్చి, వోన్ పెజెయ్ సొత్తొర్. 10తె యేసు మత్తయిన రోన్ జేవున్ కియ్లె ఉచ్చి మనెకె, వెలెటిర్ టెక్స వసులి కియ్వలిర్ అని పాపిర్ వాతెర్. అని వూర్, యేసు అని సిస్యలిర్ సంగ జేవున్ కియ్లె ఉత్తెర్. 11ఇద్ సూడ్సి, పరిసయుల్క్ యేసునుర్ సిస్యలిర్ సంగ, “మీవొర్ గురుజి, టెక్స వసులి కియ్వలిర్ సంగ అని పాపిర్ సంగ ఉచ్చి బారి తింజెర్ మంతొర్?” ఇంజెర్ పూసి కీతెర్. 12అదెన్ యేసు కేంచి, “బేమరితె మన్వన్ వయ్దున జురత్ మందంత బతి, జీవత్ చొకొట్ మన్వన్ జురత్ మనొ. 13నన పాపిర్కున్ కేయ్లె వాతొన్ బతి, నియత్నుర్‌కున్ కేయ్లె వాయ్మకి. అదెన్ సాటి ‘నా సాటి బలిదాన్క్ సీమ్ట్ ఇన్వడున్ బద్లి, దుస్రుర్ పొరొ మిరట్ దయ తొహన ఇంజెర్ కోరంతొన్’.#హోసెయ 6:6 ఇద్ గొస్టిత బావ్ బతల్ ఇన్వల్ మిరట్ సొంజి కరి కీమ్ట్” ఇంజెర్ వూర్కున్ వెహ్తొర్.

ఉపస్ పియ్వల్

(మార్క్ 2:18-22; లూక 5:33-39)

14అద్ ఆత పెజె, యోహన్ తెర్ సిస్యలిర్ యేసునగ వాసి, “మమొట్ అని పరిసయుల్క్ ఉపస్ పియంతొమ్. బతి నీవుర్ సిస్యలిర్ బారి ఉపస్ పియుర్?” ఇంజెర్ పూసి కీతెర్.

15తె యేసు, “నొవ్రల్ తన్వుర్ చుటల్-బందున్ తోడొ మనెకె, బోరె ఉపస్ పియుర్. అహ్నె నన గిర్ వీర్ సంగ మనెకె, వీర్ బారి ఉపస్ పియన? బతి బస్కెతె వోర్ నొవ్రన్ వూర్గటల్ జుల్మతె వోయ్వల్ గట్క వాంతయొ, అస్కె వూర్ ఉపస్ పియంతెర్” ఇంజెర్ జవబ్ సీతొర్.

16అని, “బోరె గిర్ ఆయి, పడన కప్డి సర్తెకె పూన కపిడె అత్క్ వాట్సి కొటొర్. అహన్ కొట్తెకె అద్ అత్క్ పడన కప్డితున్ ఉండె ఇచుర్ అదిక్ సరుసంత. 17ఆంగుర్క్‌న పూన కల్ పడన తితితగ#9:17 ఆంగుర్క్‌న పూన కల్ పడన తితితగ: ఇజ్రయేల్ దేస్నగ ఆంగుర్క్‌న పూన కల్దున్ రెహ్చి, ఉంది మోక తోల్ద పడన తితితగ వెడితెకె, తాన్గ వడి తయర్ ఆసి, తితితున్ పోకి కీసి, వొహంత. అదెన్ సాటి పూన కల్దున్ పూన తితితగనె వెడిన్దిర్. బారితెకె అద్ తితితున్ పోకి కీతెకె గిర్ వోరొ. బోరె వెడియొర్. ఉంది మోక వెడితెకె ఆంగుర్క్‌న పూన కల్ తితితున్ వొహంత. అదెన్ సాటి తాతొక్ ఆంగుర్క్‌న పూన కల్దున్ పూన తితితగన్ వెడియ లాగర్#9:17 ఇద్ నమునత అర్తమ్: పడన బోదతున్ అని పూన బోదతున్ మీరి కియ వాయొ.” ఇంజెర్ యేసు వెహ్తొర్.

సాత పేడిన్ నేండుస్వల్

(మార్క్ 5:21-43; లూక 8:40-56)

18యేసు ఇహిన్ వడ్క్‌సెర్ మనెకెనె, యూదుల్క్‌నొర్ అదికారి వాసి ముర్-టొంగ్రంగ్ కొట్సి, “నావ మియడ్ ఇంకెనె మార్త. బతి నిమె వాసి నీవ కెయ్ తాన్ పొరొ ఇర్కితె అద్ పిసంత” ఇంజెర్ ఇత్తొర్. 19తె యేసు అని వోనుర్ సిస్యలిర్ వోర్ అదికారిన్ పెజెయ్ పెసితెర్.

20అస్కె అచనక్ అగ, లంగ్ ఆసి బార (12) సాల్క్‌నల్ మన్వల్ బేమరి వాలె ఉంది వెయ్లొ మత్త. 21అద్ వెయ్లొ, “యేసున పాంగుడ కాటున్ ఇట్తెకె గిర్ ఆయర్ నన చొకొట్ ఆంతొన్” ఇంజెర్ తన్వ తన ఇత్త. అని సరియ్ సొన్వల్ యేసున పాంగుడ కాటున్ పెజెయె వాసి ఇట్త. 22అస్కె యేసు పెజె మల్సి తాన్ సూడ్సి, “బాయి, గటి-దీర్యతె మన్. నీవ బరొసయె నీకున్ చొకొట్ కీత” ఇంజెర్ వెహ్తొర్. అదె గట్కతె అద్ వెయ్లొ చొకొట్ ఆత.

23-24అద్ ఆత పెజె యేసు వోర్ అదికారిన రోన్ యెవ్తొర్. పేడి సాత ఇంజెర్ రోత్ రొపొ ఆడ్సెర్, బోబ్లె మాసెర్ అని సులుడి వడుసెర్#9:23-24 సులుడి వడుసెర్: యూదుల్క్‌న రివజున్ పియ్సి, దుక్సతున్ తొహ్లె సులుడి వడుసంతెర్. మన్వలిర్‌కున్ సూడ్తొర్. అని వూర్ సంగ, “ఇగెటల్ సొంట్! అద్ పేడి సాయ్మకి బతి, నరుమ్సెర్ మంత” ఇంజెర్ ఇత్తొర్. తె అద్ కేంచి వూర్ కవ్సెర్, యేసున్ చేడి కీతెర్. 25వూర్కున్ సారి కీత పెజె, యేసు రొపొ సొంజి, అద్ పేడిన కెయ్దున్ ఇట్తొర్. తె యెంటనె అద్ పేడి నేండ్త. 26ఇద్ కబుర్ అద్ యేరియ పూరొ కప్త.

ఇవిర్ గుడ్డిర్‌కున్ నదుర్ సియ్వల్

27యేసు అగటల్ పెసిసి సొనెకె, ఇవిర్ గుడ్డిర్, “దావిద్న కాన్‌దాన్తొని! మా పొరొ దయ తొహ” ఇంజెర్ కిలిసెర్ పెజెయ్ సొత్తెర్. 28అని యేసు రోత్ రొపొ నేంగ్త పెజె, వూర్ గుడ్డిర్ వోన్గ సొత్తెర్. తె యేసు వూర్ సంగ, “నన మీకున్ చొకొట్ కియ పరంతొన్ ఇన్వల్ బరొస మీకున్ మంతకి?” ఇంజెర్ పూసి కీతొర్. తె వూర్, “హో, పర్బు!” ఇంజెర్ జవబ్ సీతెర్. 29అస్కె యేసు వూరంగ్ కడ్కున్ ఇట్సి, “మీవ బరొస తీర్ మీకున్ జర్గి” ఇంజెర్ వెహ్తొర్. 30అదె గట్కతె వూర్కున్ నదుర్ వాత. తె యేసు, “ఇద్ గొస్టితున్ మిరట్ బోనె వెహ్మట్” ఇంజెర్ దమ్కి సీతొర్. 31బతి వూర్ సొంజి, అద్ యేరియ పూరొ వోన గొస్టితున్ కపుసీతెర్.

32యేసు అని వోనుర్ సిస్యలిర్ రోతల్ పెసిసి సొనెకె, బూత్ సోప్రె మాసి మన్వల్ మూకన్ కహితుర్ వోన్గ పియ్సి వాతెర్. 33తె యేసు, అద్ బూతున్ తెండ్సి పూడ్త పెజె, వోర్ మూకల్ వడ్క్‌వల్ సురు కీతొర్. అద్ సూడ్సి, వూర్ మాంది బెయ్ గుల్ ఆసి, “ఈతల్ గట్న ఇంకె వేరి ఇజ్రయేల్‌తగ బస్కెన్ జర్గ్‌మకి” ఇంజెర్ ఇత్తెర్. 34బతి పరిసయుల్క్, “వేర్, బూత్క్‌నొర్ రాజన మదత్నె అవ్ బూత్కున్ తెండ్సి పూడ్సెర్ మంతొర్” ఇంజెర్ యేసున్ బారెతె వెహ్తెర్.

పంట కొయ్వలిర్ బూయ్తలిర్

35యేసు సునగోక్నగ బోద వెహ్చెర్, స్వర్గ్‌న రాజున్ బారెత చొకొట్న కబుర్ పచర్ కీసెర్, హర్ ఉంది చహర్ అని హర్ ఉంది నార్ తిరితొర్. అని పర్జత్ నడ్డుమ్ మన్వలిర్ హరియేక్ బేమరినె అని యెడ్కి-దుక్నె మన్వలిర్‌కున్ చొకొట్ కీసెర్ సొత్తొర్. 36అస్కె గాయ్కి సెలొర్ అవ్ గొరెంగ్ బుజ్డె మాతపినయ్, పర్జతంగ్ గుబ్డంగ్ పరెసన్తె దిస్తంగ్. తె వూర్ పొరొ యేసున్ కివుల్ లాగ్త. 37అస్కె తన్వుర్ సిస్యలిర్ సంగ, “బెయ్ వెలె పంట కొయ్లెన్ వాత. బతి కొయ్వలిర్ బూయ్తలిర్ కమి మంతెర్. 38తన్వ పంటతున్ కొయ్లె, బూయ్తలిర్‌కున్ రొహ ఇంజెర్ మాల్కల్ ఆయ్వల్ పర్బున్ పార్తన కీమ్ట్” ఇంజెర్ వెహ్తొర్.

वर्तमान में चयनित:

మత్తయి 9: WSGNT

हाइलाइट

कॉपी