Čơdơ̆ng Phŭn 7
7
Ia Lip
1Yêhôwa laĭ kơ Nôê: “Brơi ih hăng abih bang sang anŏ ih mŭt bĕ amăng kompăn, yua kơ amăng rơnŭk anai Kâo ƀuh kơnơ̆ng hơjăn ih yơh jing mơnuih tơpă hơnơ̆ng ƀơi anăp Kâo. 2Brơi ih djă ba khul hlô mơnơ̆ng rơgoh, rĭm djuai tơjuh grop, tơno hăng ania; samơ̆ kơ khul hlô ƀu rơgoh, rĭm djuai sa grop, tơno hăng ania. 3Brơi ih djă ba khul čĭm, rĭm djuai tơjuh grop, ông hăng ania, kiăng djă pioh djuai gơñu ƀơi lŏn tơnah. 4Yua kơ tơjuh hrơi dơ̆ng, Kâo či tuh ia hơjan trŭn pơ lŏn tơnah amăng pă pluh hrơi pă pluh mlam, laih anŭn Kâo či kih pơđuaĭ abih bang khul hlô hơdip Kâo hmâo pơjing laih mơ̆ng lŏn tơnah.” 5Nôê gưt tui abih tơlơi Yêhôwa hmâo pơtă laih kơ ñu.
6Tơdang hmâo ia lip lŏn tơnah hlăk anŭn Nôê hmâo năm rơtuh thŭn laih. 7Nôê hăng bơnai ñu, ƀing ană đah rơkơi laih anŭn ƀing hơđŭ ñu leng kơ mŭt amăng kompăn kiăng klaih mơ̆ng ia lip.#Mat 24:38-39; Luk 17:27. 8Khul hlô mơnơ̆ng rơgoh laih anŭn ƀu rơgoh, khul čĭm, khul hlô hro rui ƀơi lŏn tơnah, 9rĭm grop, tơno hăng ania, leng kơ mŭt amăng kompăn hrŏm hơbĭt hăng Nôê, kar hăng tơlơi Ơi Adai hmâo pơtă lui laih. 10Tơjuh hrơi tơdơi, ia lip truh ƀơi lŏn tơnah.
11Djơ̆ amăng hrơi tal pluh tơjuh, blan dua, thŭn tal năm rơtuh rơnŭk Nôê, abih bang hlâo ia mơ̆ng hlŭng dlam bluh đĭ, laih anŭn khul bơnư̆ amăng adai pŏk rơhông hĭ.#II Pê 3:6. 12Ia hơjan tuh trŭn pơ lŏn tơnah amăng pă pluh hrơi laih anŭn pă pluh mlam. 13Ăt amăng hrơi anŭn mơ̆n, Nôê hăng bơnai ñu, klâo čô ană đah rơkơi ñu Sem, Čam laih anŭn Japhet, laih anŭn hrŏm hơbĭt hăng klâo čô hơđŭ ñu mŭt amăng kompăn. 14Gơñu hăng khul hlô glai tui hluai hăng djuai gơñu, hlô mơnơ̆ng rong tui hluai hăng djuai gơñu, khul hlô hro rui ƀơi lŏn tơnah tui hluai hăng djuai gơñu, čĭm tui hluai hăng djuai gơñu, kiăng laĭ abih bang djuai hmâo čăng, 15leng kơ hmâo tơno laih anŭn ania mŭt amăng kompăn hrŏm hăng Nôê. Abih bang mơnơ̆ng hơdip 16sa drơi tơno sa drơi ania, rơbat mŭt amăng kompăn, djơ̆ tui hăng tơlơi Ơi Adai hmâo pơtă laih kơ Nôê. Giơ̆ng anŭn Yêhôwa krư̆ hĭ bah amăng kompăn.
17Ia lip gom hĭ lŏn tơnah amăng pă pluh hrơi. Ia yŏng glong đĭ laih anŭn pơđung kompăn đĭ gah ngŏ kơ lŏn tơnah. 18Ia prŏng tui nanao, yŏng đĭ glong biă mă mơ̆ng lŏn tơnah, laih anŭn kompăn đung ƀơi jơlah ia. 19Ia jai dlam jai ƀơi lŏn tơnah, glong tơl kơ ñu lip hĭ abih bang khul čư̆ glong. 20Ia lip glong hloh kơ khul čư̆ truh kơ tơjuh met ha mơkrah. 21Abih bang mơnơ̆ng hơdip ƀơi lŏn tơnah leng kơ djai hĭ, čơdơ̆ng mơ̆ng khul čĭm brĭm, hlô mơnơ̆ng rong, hlô glai, khul hlô hro rui ƀơi lŏn, truh kơ ană mơnuih. 22Abih bang mơnơ̆ng hmâo jua suă pran mơ̆ng amăng adŭng, kiăng laĭ khul hlô hơdip ƀơi lŏn thu, leng kơ djai hĭ abih. 23Ñu hmâo pơdjai abih mơnơ̆ng hơdip amăng lŏn tơnah, čơdơ̆ng mơ̆ng ană mơnuih truh kơ hlô mơnơ̆ng, hlô hro rui, khul čĭm brĭm. Abih bang leng kơ hmâo kih pơđuaĭ abih mơ̆ng lŏn tơnah, kơnơ̆ng dŏ glaĭ hơjăn Nôê laih anŭn abih djuai mơnơ̆ng dŏ hăng ñu amăng kompăn đôč. 24Ia gom lŏn tơnah amăng sa rơtuh rơma pluh hrơi.
वर्तमान में चयनित:
Čơdơ̆ng Phŭn 7: JRA2016
हाइलाइट
शेयर
कॉपी
Want to have your highlights saved across all your devices? Sign up or sign in
© 2016 United Bible Societies. All rights reserved.
