Jenesis 8

Bigfala wota i godaon bakegen

1Be God i stap tingbaot Noa yet, wetem olgeta samting ya we oli stap wetem hem long sip ya, nao i sanem wan win i blu long wota ya, mo wota i stat blong godaon bakegen. 2Be fastaem, hem i satem ol hol blong wota insaed long graon, blong wota i no moa kamaot, mo i blokem bigfala ren ya, nao ren i finis.

3Nao wota ya i stap godaon smosmol. Wan handred fifti dei i pas, 4mo long namba seven manis, long namba seventin dei blong hem, bigfala sip ya i fas antap long wan bigfala hil long Ararat. 5Wota ya i stap godaon smosmol, mo long namba ten manis blong yia ya, long fas dei blong hem, samfala hil i stat kamkamaot bakegen.

6Biaen long foti dei bakegen, Noa i openem windo blong sip ya, 7-8from we i wantem save olsem wanem long olgeta ples ya, mo i tekem wan bigfala pijin we nem blong hem reven,* i letem i flae i go. Be pijin ya i go we i go olgeta, i stap flae olbaot nomo, gogo kasem taem we wota i drae. Biaen, Noa i tekem wan sotleg,* i letem i flae i go, 9be sotleg ya i no faenem wan ples blong sidaon, from we wota i stap kavremap graon yet, nao i kambak long sip bakegen. Taem hem i kambak, Noa i pusumaot han blong hem long windo, nao sotleg ya i kam sidaon long hem, mo Noa i tekem i kam insaed. 10Hem i wet seven dei moa, nao i letem sotleg ya i goaot bakegen. 11Mo long sapa, sotleg ya i kambak bakegen, we i karem wan lif blong tri ya olif long maot blong hem, nao Noa i save se wota ya klosap i finis. 12Hem i wet seven dei bakegen, nao i letem sotleg ya i goaot bakegen, be hem i no moa kambak long hem bakegen.

13Nao long yia ya we Noa i kasem sikis handred wan yia blong hem, long fas manis blong hem, long fas dei blong manis, wota ya i kam drae olgeta long graon. Taem Noa i openem doa blong sip ya, hem i luk we wota i finis, mo graon i stap kam drae bakegen. 14Mo long seken manis* blong yia ya, long namba twanti seven dei blong hem, graon i kam drae olgeta.

15Nao God i talem long Noa se, 16“Noa. Naoia, yu wetem woman blong yu, mo trifala pikinini blong yu wetem trifala woman blong trifala, yufala evriwan i save kamaot long sip ya. 17Mo yu save letem olgeta samting ya we oli stap wetem yu insaed long sip ya oli kamaot tu, blong bambae oli gat pikinini, blong oli save kam plante bakegen long wol ya.” 18Nao Noa olgeta oli kamaot long sip, 19mo olgeta samting ya tu we oli stap wetem hem oli kamaot, folem ol grup blong olgeta.

Noa i mekem sakrefaes long Hae God

20Nao Noa i wokem wan olta blong mekem wosip long Hae God, mo i tekem ol anamol wetem ol pijin we oli klin long fes blong Hae God, i mekem sakrefaes long olgeta. Hem i tekem wanwan long olgeta evriwan, mo i kilim olgeta, i bonem olgeta we oli bon evriwan long olta ya blong mekem wosip long hem. 21Mo taem Hae God i harem smel blong olgeta, hem i glad tumas long hem, mo i stap tingting hem wan se, “Neva bambae mi singaot* trabol i kam long wol ya bakegen from ol samting we ol man oli stap mekem, from we mi save se i stat taem olgeta oli smol pikinini nomo, be tingting blong olgeta i stap finis long ol rabis fasin. Naoia mi spolem finis olgeta man wetem olgeta narafala samting we i gat laef, oli ded evriwan, be neva bambae mi save mekem olsem bakegen samtaem. 22Naoia, long wol ya, i gat taem blong planem garen, mo i gat taem blong tekemaot kakae long hem. I gat taem blong kolkol, mo i gat taem blong hot. I gat taem blong lif i folfoldaon, mo i gat taem blong lif i gru bakegen. I gat taem blong dei, mo i gat taem blong naet. Mo ol samting ya, bambae oli no save lus, gogo kasem en blong wol.”

वर्तमान में चयनित:

Jenesis 8: BBR

हाइलाइट

कॉपी