BOTHUBO 9
9
Noha sasu Puloshoqhi Shi
1Alhou no Noha ngo panuliqo kumghatsu eno panongu vilo piputo ghi pi, “Axuthi kughuko wolulo eno ayeghi nhakhawolo. 2Ayeghilo tughashi aghau, ayeghi shou itikiche lhoxu eno azughilo akeu akha kumtsuno nongu msaighu ghi xunani. Panongu kumtsu ogholo apeni keu shi pephetsu anie. 3Ithakiche lhoxu kumtsu nongu chuqupu shilu nani, ino puzuu ayetsuni nongu tsuke toi, hikumtsu nongu tsu anie. 4Ikemu akuxu akeu shi, tiye tile aji apulaghi nonguno chukevilo. 5Eno khuno nongu kuxu pukavetsuni keno ino tipau akithipu ghime tsu nani. Tughashino nongu kutsapuaghi aye ino tipau kutsave nani. Timi khuno pakusami ghiqhini keno ino tipau aghime tsu nani. 6Khuno timi ghiqhini keno pa ghi timino ghiqhive nani. Kughengu timiye Alhou julho lono lhope puanike. 7Ike nonguno ati kughukowo eno kighishe wolo eno ayeghi nhakha ikowolulo.”
8Alhou no Noha ngo pa nuliqo putsaghi ishipi, 9“Julo, ino osasu iwu puloshoqhi shi anie eno otikughuko, 10ogholo lhoxu akeqo kumtsu sasu, aghau ngo tikishi ngo tughashi, khije ashukaki lono ipeghi keno ti kumtsu sasu 11atsa hipaqo pesu puloshoqhi shi anie; hinguno hilauye khilemu azuyimino lhoxu kumtsu pughavepe mae, ayeghi pughave nikeu zukuqo khilemu amae.” 12Alhou no pi, “Ino nongu sasu eno nongu dolo lhoxu akeqo kumtsu sasu ashekha kutolo puloshoqhi shi anie pikeu michi hinoke. 13Ino iwu milisu khungkusulo qhi ani. Hino ayeghi ngo ikujo dolo puloshoqhi michike. 14Kugho kughomu ino ayeghi shou khungkusu saghini keno khungkusu lono milisu ithulu nani. 15Tileno nongu sasu eno ayeghilo lhoxu jeli kumtsu sasu ino puloshoqhi shipuakeu kumsuchilelu nani, eno ti azu yimino itaghi khilemu lhoxu kumtsu pughave pemo nani. 16Milisu ye khungkusulo acheniae eno ino ithuluno ayeghi shou lhoxu jeli kumtsu sasu ino puloshoqhi shikeu kumsuchileluni.”
17Alhou no Noha vilo pi, “Ino ayeghi shou lhoxu kumtsu lau puloshoqhi shi akeu michi hu tikene.”
Noha eno Panuliqo
18Ashukaki lono ipeghi kelo Noha nuliqoye hipaqoe: Shem, Ham (Kanan papuh ke) eno Jafet. 19Noha nuli hipano kuthu tikughukono ayeghiqha kuchopu nhakhawoke.
20Noha ye alukichimi shiwuve eno pano atsayilu chie. 21Pano atsayiji sho no shomzuve eno aphimini umono pa phikilo zua. 22Kughou Ham ti Kanan papuh no, papuh Noha ye aphimini umono akeu ithulukeno khalau ipe puzu pa thikuzuu pama vilo pike. 23Ike Shem ngo Jafet pamano akuuphi lakhi ikhi pesu pama bighilo bepuzu shothiuno wuno panongu papuhno aphimini umono akeu nhavetsue. Pama giye athiu ju akeke panongu papuhno aphimini umono akeu ithumlae. 24Kughou Noha no shomzupu zuano idaithughi keno panu ayitiuno palau kishive keno ithi kelo, 25pano pi,
“Kanan ye angsu shipeniu!
Pa thikuzumiqo qeu shipeniu.”
26Pano highi pi,
“Shem Lhou AMPEU sheqhelo,
Kanan no Shem qeu shi nani.
27Alhou no Jafet kighishetsu nani,
palaghaye Shem gholo xu nani.
Kanan no Jafet qeu shi nani.”
28Noha ye azuyimi tavekethiu ampe 350 xue, kumtsu kuqha kelo 29paye ampe 950 xu puzu thive.
वर्तमान में चयनित:
BOTHUBO 9: SUMIBSI
हाइलाइट
शेयर
कॉपी
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
