Mt 8
8
Yesus asye nzëzam
Mk 1,40-45; Lk 5,12-14
1Asus angasus a nkol a si#8,1—9,34 A mvus yë na Yesus amana ya yëgëlë bod a nkol a yob, abò mësimba ebul. Mësimba mëte malëdë bod na anë fò mfaṅ ṅyëgëlë bëbëla. Kòm esë, a mvus mësimba mëlè, Yesus ayëgëlë bod asu yë na bëtoan wog mësimba mëte., abui minkunda angatoṅ nyè. 2Antëm na, ndò nzëzam ongazu nyè laban a mëkol a si, nyè na: «A Mënti, ngë wadiṅ, onë ma fubu.» 3Ndò angasam wò, anamba nyè, nyè na: «Mayi nala, bò mvoè.» Etye etye te, ndò zam dzie engalèdëban. 4Ndò Yesus adzo ai nyè na: Obò okala na të walèè dò tò mod ziṅ; këlë, okë lëdë fada nyòl, otuni fë efaè Moses angatëbëlë mina asu mbòòlan waan.
Yesus abò mòngò bisye ndzoe ntèd bëzimbi mvoè
Lk 7,1-10. 13,28; Yoh 4,46-53
5Anyian anganyian a Kafarnao, ndò ndzoe nkunda bëzimbi ntèd#8,5-10: Kafarnao angabë a ṅnyie nnam, asu te nkunda bëzimbi ongabë ete ai bëzimbi bë Herodes Antipas. Abui bëzimbi ya nkunda te bëngabë ki Yuden. azu toban ai nyè, angakogëlan ai nyè na: 6A Nti, mòngò bisye wama adzogo ma a nda, anë ebog ai eyëgan abui mintye abëlë nyè. 7Ndò adzo ai nyè na: Mazu nyè kë bò mvoè. 8Ndò ndzoe nkunda bëzimbi nyò afèd na: A Nti, masëki a nkoṅ yë na onyian ma a nda#8,8 Ndzoe bëzimbi ayëm na man Yuden ayean ki nyian a nda man haiden, asu yë na të eboe yakë nyè a nyòl. Ngogëlan ndzoe bëzimbi endzò biakar kogëlan osusua komunion., dzam da, kòbògò të hë nkòban, mbò bisye wama abò mvoè. 9Yënë sik, mod anë ma, bod badzoe ma, ma mëbëlë e bëzimbi madzoe. Ngë madzo ai e nyò na: «Këlëg», akëlë fë. Mëdzoo ki ai e nyò mbòg na «Zaag», asò fë; mëdzoo ai olò wama na: «Bòò anë osi, anë oka», abòò fe. 10Awog Yesus angawog nala, ndò angakam, nyè ai e bod bëngabë biege nyè na: Bëbëla emen, makad mina, mabë ya ki yen e kan ṅyëbë nyi abë mod ziṅ a Israel. 11Ndò makad mina na: Abui layi sò a nnam kidi ai nnam ngoge, bënganòṅ bitoa na badi ai Abraham ai Isaak ai Yakob a edzoe ya yob#8,11 Ndzoe ntèd bëzimbi ya Kafarnao anë e man haiden osu ya azu a ṅyëbë., 12dzam da, bòn bë ayòṅ bayi wooban a e dibi ya nsëṅ. Awe, miṅyon ai nladan mëkëg. 13Ndò Yesus adzo ai ndzoe nkunda bëzimbi na: Këlëg, ayënan ai wa akyaè ya oyëbë. Ndò mod bisye woe angabò mvoè awola te.
Yesus asye abui bod
Mk 1,29-34; Lk 4,38-41
14Ndò Yesus angakë a nda Petrus, antala nkyè mininga woe adzogo, akònò fiba. 15Ndò abi nyè a wò, fiba akodo fò nyè a nyòl, ṅnyè akodo a si nyò, angasye nyè. 16Eyòṅ ngoge engabò, ndò bëngazu ai nyè abui bod ya bëbe minsisim bëngabë bëndëgëlë. Angatsidan minsisim ai ebug dzia, ndò e bod bësë bëngabë kònò bëngabò mvoè, 17na ebug engakòbëban abë profet Isaias etoban na: Anganòṅ akòn daan, amana mintye mian.#8,17 Ebug profet Isaias (Is 53,4). Yesus amana mintye mi bod, amu emen ayi dzugi mintye.
Bod bëziṅ ya bayi na bazu batoṅ Yesus
Lk 9,57-60
18Ayen Yesus angayen nkunda bod okuban nyè a nyòl, ndò azu bende na bëdaṅ e kindig fòg. 19Ndò nsaṅa bëkalara mbòg angasò, nyè ai nyè na: A ṅyëgëlë, mayi wa bie, e hom osë onkëë. 20Ndò Yesus adzo ai nyè na: Mvu afan ebëlë biboga, anòn ya yob abëlë mumba, dzam da mòn mod abëlë ki e hom anë dzam bede nlo. 21Ndò mbòg ya bëyègè adzo ai nyè na: A Nti, vaa të ma ngul na mëtari kë dzëb tara. 22Yesus nyè ai nyè na: Biege ma, odzoge bëwu bëdzëb bëwu baban.
Yesus abam ai nkulu
Mk 4,35-41; Lk 8,22-25
23Ndò angabed a mal, bëyègè boe bëtoṅo nyè. 24Antëm na, mod nkulu adzimbi a maṅ, e kan yë na mal mëngadzie ai mëndim, mfa woe, nyè akëlë oyò. 25Ndò bazu nyè vëlë bò na: A Nti, kodëge bia, biamana dzaṅ. 26Nyè ai bò na: Za wòṅ minë di, a bod miabëlë ki abui ṅyëbë ba? Ndò azu tëbë a si, abama ai evundu ai maṅ, ndò biaku a miëëṅ. 27Bod bëngakam bò na: Za akyaè mod di anë na tò bivundu tò maṅ biwogo nyè!
Yesus asye bod bëbè bëbëlë mbë nsisim a Gadarena
Mk 5,1-17; Lk 8,26-37
28Ndò angakui a kindig ayat a nnam Gadarena, bod bëbè ya mbë nsisim angabë abëlë, bëkui a mësòṅ, bësòò toban ai nyè, (bëvuṅu abui, e ndie yë na tègè ai e mod alodo zen te). 29Ndò bëngabon a yob bò na: Dze enë a zaṅ bia ai wa, a man Zamba? Yë wasò na wazu bia ndëgëlë, zul mëtiṅ engënë të kui#8,29 Zuli mëtiṅ: Amos ya Zamba ayi bò nkat. Bësatan bayi ki fë bi ngul dzaban amos te.? 30Nkunda ngoe#8,30 Mbol bod babi ngoe a nnam hi, biayen ete na basëki Yuden, amu Yuden bëngabë eki të bi ngoe. ongabë a mëdiga man ntye hala. 31Ndò bëbe minsisim bakogëlan ai nyè na: Ngë watsidan bia, lomo të bia a nkunda ngoe ete. 32Nyè ai bò na: «Kaṅan». Ndò bëngakui, bëkë nyian a ngoe ete. Ndò nkunda ngoe ongabumi a mbimbiṅ bëngabë, bësuman a maṅ, ndò bëngawu a mëndim. 33Bënòni bëtubu a hm fò, bëkëlë a tisòn, bëmana lèè mësë, tò e di e bod bëmbë bëlë bëbe minsisim. 34Ndò tisòn esë engabugi na bakë toban ai Yesus. Ayen bëngayen nyè, ndò bakogëlan ai nyè na akodo bò a dzal daban.
वर्तमान में चयनित:
Mt 8: NTE12
हाइलाइट
शेयर
कॉपी
Want to have your highlights saved across all your devices? Sign up or sign in
MKPAMAṄ AMVOE Nouveau Testament en langue Ewondo © Bible Society of Cameroon, 2012.
