LUKE 24
24
Ringsu Lanbo
(Mt 28.1-10; Mk 16.1-8; Jn 20.1-10)
1Nidnai nsuan kalu maipuidung siniu, paliuniu kaden lubo parim wibo wasase thinlujiu charao lamse tad sude. 2Paliuniu rawkham tuse kaladpad bamniubo ngaode. 3Sichiujiu paliuniu ngutboga, Rapiu Jesu pumse daomakge. 4Sijengniu paliu suang hajiu chap bamboga, ranranbo fai benbo piu khangnia sibo mungga chap bamniu-e. 5Siga maipuidungse pingju mijiu kadihga paliu pi makhum kiuboga, maipiu khangnia siniu paliu khuga din-e, “Dekamjiu naliuniu ringbambo patuse kashaimai ruangga phiukin jiulo? 6#Mt 16.21; 17.22,23; 20.18,19; Mk 8.31; 9.31; 10.33,34; Lk 9.22; 18.31-33.Pah haiga ha-e, pah ringsu mide. Paniu Galilee ga bambo tingga naliu khuga dinkhai mibose maningtaolo: 7“Chamai Nahpiu situ nuan phungmai ben-ga pikhaijiu jumasengshat mine, chiudi pasumbo naise pah ringsulan mine.”
8Siga maipuidung siniu pachamse maningtao lujiu, charao gasu malanwang mide; 9khatdi pakhommaidung khang kariu-je-khatkiu khatdi kakimaidung khuga pakhiangna haise wangjiu paokhaide. 10Maipuidung sira: Magdalene Mary, Joanna, khatdi Jacob pui Mary paliu-e; paliuniu khatdi kakibo maipuidung siniu pakhiangna haise pakhommaidung khuga dinkhaide. 11Chiudi pakhommaidung siniu maipuidung situ malum makge, khatdi paliuniu dinbose kamengbo gu-e chiujiu lukhaide. 12Chiudi Peter niu sulujiu charao lamse paktad mide, paniu kinkiu phuiboga, fainoise majiukhai bambo makjiu, wadi ngao makge. Siga degu padmibo gulo chiubo simakjiu pasuang hajiu chaky lam malanwang mide.
Emmaus Npuikiga Maluong Tadbo
(Mk 16.12-13)
13Sibo naise pasai suimai khangnianiu Jerusalem gasu mathakbam kariu-je-khatkiu kumbo kadiubo, Emmaus kubo namga tadra tadkiude, 14sichiujiu padmibo hina lamga panainiu khat-khat khuga din kin-e. 15Sichiujiu panainiu dinjiu ari kinboga, Jesu niu wangmana lujiu, panaitu maluang lujiu tadkin-e; 16panaidi patu ngao-e, chiudi wakhat nadi patuse si-nsilu makge. 17Jesu niu panai khuga din-e, “Nanainiu haichiu tadkinboga, dekambo lamga khat-khat khuga arikin jiulo?”
Sichiudi panai chun sajiu chap bamme. 18Panai ruangga khangkhat, pazanniu Cleopas kubopiu siniu pakhuga maniu-e, “Jerusalem ga nbin mengbo maidung ruangga, haibo kak lungga padmibodung simakbo hai nang naronna suma?”
19Paniu maniu-e, “Degu padmi jiulo?”
Panainiu paokakge, “Nazareth Jesu khuga padmibo situ-e. Patu hai Tingwang niu kadakhai mibo phaimiukakung khatle, sichiujiu paniu dinbo khatdi kambo hinaga pumtan bambo piu-e, chiujiu maidungniu lukhaibo-e. 20Chiudi aliugu mawangpaodung nai singkupaodung siniu patuse kamshat mira suikhai mibo-e, sichiujiu jumasengjiu kamshat mibo-e. 21Israel maitu paniu khen-rang pithiu khai bine chiujiu aliuniu maningbo-e. Sichiujiu thainai haise jeng sum tang mibo-e. 22Sigasu aliu ruangga maipuidung khangsianiu aliu suang kam maha khaide; paliuniu nsuan kalu charawlam tadboga papumse daomakge chiujiu din-e, 23mazadungniu paliu khuga madu khaijiu, ‘Pah ringsu mide’ chiujiu aliu khuga paokhaide. 24Sichiujiu aliu ruangga sudi khangsianiu charaw lamse tadlanjiu phuiboga, maipuidungniu dinbo kumgapjiu dao-e, sichiudi paliuniu patura ngaolu makge.”
25Siga Jesu niu panai khuga din-e, “Naliuse dejiukha kapang mailo, phaimiukakungdung siniu dinkhai mibose dekamjiu naliuniu malummak jiulo! 26Messiah niu haichiujiu chariu khengkhai maksai dechiujiu pakendibo gase ngutlu ralo?” 27Sichiujiu Jesu niu Mose gu ariakkhuangga phaimiukakungdung siniu palamga raokhaibo hinase paphibang gasu, panai khuga dinjiu katikhai sude.
28Sichiujiu panainiu tadkhai rabo namgase wangtangboga, Jesu niu tad madiu mirabo kumjiu kam sude; 29chiudi panainiu patuse khamjiu din-e, “Aliu khuga manai khai milo, tuhoira rimide, khatdi tamiuwang kinne.” Sijengniu panai saisuilujiu manai khaira pah ngutde. 30Katiu tiuraleng paliutu maluang ntaokiu lujiu, paniu taruakse thinsujiu thoikhaide; khatdi paniu taruakse thenpang lujiu paliuleng pikhaide. 31Siga paliu mikse rakphak padjiu ngaode, khatdi paliuniu patuse silude, chiudi pase paliu khugasu halan mide. 32Siga paliu karai khat-khat khuga dinsude, “Npuikiga tadjiu npao kinboga khatdi paniu Masanbo Ariakse aliu khuga dinjiu katikhaibo lonse aliu lungga chami taobambo kum makma?”
33Sibo wan gasu panai sulujiu Jerusalem lamse malan wangboga, pakhommaidung khang kariu-je-khatkiu siniu wang aruang bamniubo daode. 34Siga paliuniu “Rapiu hai ringsu siak mide! Paniu Simon khuga ngaolen khai-e,” chiujiu dinbamniu-e.
35Panai khangnia siniudi npuikiga degu padmilo, khatdi Rapiu niu taruakse thenpang khaiboga, dechiujiu panainiu patu silulo chiubose paliu khuga dinlen khaide.
Jesu Niu Pakhommaidung Khuga Ngaolen Khaibo
(Mt 28.16-20; Mk 16.14-18; Jn 20.19-23; Tk 1.6-8)
36Sichiujiu panai khangnia siniu paliu khuga haichiu dinbamboga, simak dakjiu Rapiu papumsiak paliu ruangga wang chaplujiu, paliu khuga din-e, “Naliu khuga agi-manai bamlo!”
37Siga paliuniu mahiu ngaojiu bamne chiu maning lujiu, ping masajiu charen mide. 38Chiudi paniu paliu khuga din-e, “Dekamjiu naliu sibo nping pingjiulo? Dekamjiu naliu haichiu maning masa bamjiulo? 39Aphi aben phuilo, haise I-e. Atu wangjiu dikhailo, palamra naliuniu atu ngaobo kumjiu mahiu sira patia khatdi paraa thiumakge.”
40Paniu haichiu dinlujiu, paphi pabense paliu khuga lenkhaide. 41Paliu chun wichang wimide khatdi paliu suang hamide; chiudi paliuniu malum masa bambo donniu, paniu paliu khuga maniu-e, “Naliu khuga wa-tiura bamma?” 42Paliuniu langlubo chakha puikhat pakhuga pikhai bide. 43Paniu sise lulujiu paliu masuangga tiulen khai bide.
44Sichiujiu paniu paliu khuga din-e, “Haidungse Iniu naliutu maluang bambo tingga dinkhai mibo si-e: Mose gu Tacheng-tajaiga, phaimiukakungdung siniu raokhaibo khatdi Tathoilui ga dinkhai mibose wangtang raleng-e.”
45Sigasu Masanbo Ariakse silu raleng paniu paliu chunse pikhai bide, khatdi paliu khuga din-e, 46“Haichiujiu raokhai mibo-e: Messiah se chariu khengrabo-e, khatdi kashaibo gasu pasumbo naise ringsulan rabo-e; 47khatdi Jerusalem ganiu sujiu jat hinaga chalung lira khatdi nuan kuak khai raleng pazan gasu dinron tadrabo-e. 48Pakhiangna haise naliuniu lamchap thiubo-e. 49#Tk 1.4.Sichiujiu Apiuniu ladriat thiukhai mibose I apumsiakniu naliu riga langkiu khaibi rabo-e. Sichiudi kakulamgu pumtanse naliu riga kiumak then, naliuniu namdi gase khuanjiu bamlo.”
Jesu Tu Tinggenlam Lukhang Mibo
(Mk 16.19-20; Tk 1.9-11)
50 #
Tk 1.9-11. Sigasu paniu paliutu Bethany namdi tangbo maluang padlujiu, paben khengkhangjiu paliutu thoikhai bide. 51Sichiujiu paniu paliutu thoikhaijiu bambo gasu, patuse tinggenlam lukhang mide. 52Sichiujiu paliuniu patu kahumkhai lujiu, khatdi paliu chun wibo siniu phuilujiu Jerusalem lam malanwang mide, 53sichiujiu Charakyga bamtan tanjiu Tingwang tu thuonjiu bamme.
वर्तमान में चयनित:
LUKE 24: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
