LUKE 20
20
Jesu Gu Pumtan Lamga Maniubo
(Mt 21.23-27; Mk 11.27-33)
1Naikhat Jesu niu Charakyga maidungtu katikhaijiu bamboga, khatdi Kawibo Champaose dinjiu bamboga, singkudung, Tacheng-tajaigu katipaodung khatdi apaimaidung siniu wanglujiu pakhuga maniu-e, 2“Saoniu haidungse kamra natu pumtan pikhai jiulo?”
3Jesu niu paliutu paokakge, “Sichiusai, Iniu naliu khuga wakhat maniu khaine, akhuga dinkhailo. 4John niu tadui nphum khaibo pumtan haise Tingwang khuga suma, maksai chamaina khuga sulo?”
5Paliu ronna ari sude, “Aliuniu dechiujiu dinralo? ‘Tingwang khuga niu-e,’ chiusai paniu din-e, ‘Sichiusai, dekamjiu naliuniu John tu malum mak jiulo?’ 6Sichiu makjiu aliuniu, ‘Chamaina khuga suniu-e,’ chiusai maidung siniu aliutu tatu komrabo-e, palamra John haise phaimiukakung khatle chiujiu paliuniu malumme.” 7Sijengniu paliuniu paokakge, “Haise delam suniu wangbolo chiubo aliu simakge.”
8Siga Jesu niu paliu khuga din-e, “Sichiusai, Iniu dekambo majiniu haidungse kambolo chiubo naliu khuga dinkhai lakge.”
Mumsireng Lankhai Maitu Din Champanbo
(Mt 21.33-46; Mk 12.1-12)
9 #
Isa 5.1. Sigasu Jesu niu maidung khuga din champanbo haise dinkhaide: “Pawan khatga mai khatniu mumsireng kamkhai lujiu maidung khuga lankhai diaklujiu, pakak kathengkha nbintad mide. 10Mumsy khom maduirabo ting wangtang miboga, paniu padam rabose pikhailo chiujiu lankhai maidung khugase pavang khattu langkhaide. Chiudi lankhaibo maidung siniu pavang situ dapkhai lujiu wadi pikhai makjiu matha phutkhai lan bide. 11Sijengniu paniu katambo vang khattu langkhai lande, chiudi patudi lankhai maidung siniu dapkhai lujiu khatdi kam mangam khai lujiu wadi pikhai makjiu matha phutkhai lan bide. 12Sichiujiu paniu pasumbo vang situ langkhai lande; chiudi patudi lankhai maidung siniu dapkhaijiu, kam ajam tap-tap khailujiu phutkhai lan bide. 13Sigasu mumsireng paopiu siniu din-e, ‘Iniu dekam ralo? Iniu anah siakbo haitu langkhai rabode; maomakjiu paliuniu patura chakhuangthiu khaisu rabo-e!’ 14Chiudi lankhai maidung siniu patu ngaoboga, paliu ronna haichiu dinsude, ‘Haise panahpiu palek lurabo piu siakge. Aliuniu patu kamshat mikhe, chiusai pagu kabambo mania hinase aliugu mirabo-e!’ 15Sichiujiu paliuniu patuse mumsireng gasu jupad lujiu kamshat mide.
“Sichiusai, mumsireng paopiu siniu lankhai maidung situ dechiu ralo?” chiujiu Jesu niu maniu-e. 16“Paniu wanglujiu, simaidung situ kamshat mirabo-e, khatdi kakimai khuga mumsirengse pikhaimi rabo-e.”
Maidungniu haise chiuboga, paliuniu din-e, “Sichiu lakge!”
17 #
T.Lui 118.22. Jesu niu paliutu phuilujiu haichiu din-e, “Sichiusai, Masanbo ariakniu haibo lamga degu dinjiulo?
‘Chaky thiumaidungniu pageng
ha-e chiujiu thonmibo tu siniu nkiuthubo thiu rabo-e.’
18Sibo tu riga nkhuang kiumai hinatu kamtap-tap mirabo-e;
khatdi sibo tu siniu mai khangkhat kumbo riga kalakiu-e sai,
patu niakpet mirabo-e.”
Ramkha Pirabo Lamga Maniubo
(Mt 22.15-22; Mk 12.13-17)
19Tacheng-tajaigu katipaodung nai singkudung siniu sibo bam gasu Jesu tu minra matan sude, palamra paniu din champanbo hai paliutu dinbo-e chiubo paliuniu silude; chiudi paliuniu maidung situ ping-e. 20Sijengniu pawanse paliuniu phiusude. Paliuniu maidung khangsiatu paliu chun ngutbo jai thiujiu Jesu khuga wa maniura, sichiujiu palad gasu patu minlujiu Rom maigu dihthinpao khuga pikhai mira tanim pikhaijiu langkhaide. 21Chakhumpaodung siniu Jesu khuga din-e, “Katipao yo, nangra majibo katikhaibo piu-e chiubo aliuniu si-e. Nangra chamai zu phuimakjiu, chiudi Tingwang maningse chamaina leng katikhai bibo-e chiubo aliuniu si-e. 22Aliuniu Rommai Wangdipiu situ, aliugu ramkhadung pibo hai aliugu Tacheng-tajaiga suima, suimaklo? Aliu khuga dinkhai khelo.”
23Chiudi Jesu niu paliu thakse silujiu, paliu khuga din-e, 24“Rangkanggi khat akhuga khoiwanglo. Haibo riga bambose sao menglo, khatdi sao zanlo?” Paliuniu paokakge, “Wangdipiu-e.”
25Siga Jesu niu din-e, “Sichiusai, wide, Wangdipiu guse Wangdipiutu pimilo, sichiujiu Tingwang guse Tingwang tu pilo.” 26Siga maidung suangga paliuniu patu mindao lulak mide, khatdi pagu chamkak gase paliu suang hajiu maliu mak tamide.
Kashaimai Ringsulanbo Lamga Maniubo
(Mt 22.23-33; Mk 12.18-27)
27 #
Tk 23.8. Sigasu kashaibo gasu ringsulan makge chiujiu dinbo Sadducee mai khangsia, Jesu khuga wanglujiu din-e, 28#Taj 25.5.“Katipao yo, Mose niu haichiu aliuleng Tacheng-tajai hai raokhai diakge: ‘Mai khatniu panao thiulujiu panah lungmakjiu shaimi sai, sibo kamipui situ pakina saikariu piuniu maluang lungrabo-e, sichiujiu shaimibo piu zan ga panah lungkhai rabo-e chiu-e.’ 29Nda pawan khatga singna khang chinnia bamniu-e; tingthubo piu siniu panao thiulujiu panah lungmakjiu shai mide. 30Sigasu paniabo piu siniu sibo puitu maluanglung lande, 31sibosai pasumbo piuniu maluang lung lande. Sichiujiu paliu khang chinnia siniu maluang lungkhai kamde chiudi paliu nah lungmakge. 32Kanam thuboga, sibo pui sidi shai mide. 33Tuhoira, kashaimai ringsulanbo naise, sinapuise sao nao ralo? Paliu khang chinnia siniu patu maluang lungkhai kam mibo-e.”
34Jesu niu paliutu paokakge, “Haibo ken-ga lungmaidung siniu tanao-tanah thiubo-e, 35chiudi kashaibo gasu ringsulanbo, uibo ken-ga lungra maidung sira tanao-tanah thiulan lakge. 36Palamra paliuse mazadung kumjiu shailak mide. Paliura kashaibo gasu ringsulan mibo donniu, paliura Tingwang nahdung thiu mibo-e. 37#Tad 3.6.Mose niu kashai maidung ringsu lanne chiubo hai masanjiu dinkhai kamigu-e. Chaphejiuga chami taobo gasu Rapiu ra, ‘Abraham Rawang, Isaac Rawang, khatdi Jacob Rawang-e chiujiu dinkhai kamigu-e.’ 38Para kashai mai, Rawang makge, chiudi ringbam mai Rawang-e, palamra pakhuga mai hina ringjiu bambo-e.”
39Tacheng-tajaigu katipaodung khangsianiu din-e, “Sise kawibo chamkakge, Katipao yo.” 40Palamra paliuniu pakhuga wa maniulan huta mide.
Messiah Lamga Maniubo
(Mt 22.41-46; Mk 12.35-37)
41Jesu niu paliu khuga maniu-e, “Dechiujiu Messiah haise David kaikikge chiujiu din ralo? 42-43#T.Lui 110.1.Palamra David papum siakniu Tathoilui ariakkhuangga haichiu din-e,
‘Rapiu niu Arapiu khuga din-e:
Iniu nagu mikremaitu naphipa hangga pijiu
ntaokhai makthen aben majadlam ntao bamlo.’
44David niu patu ‘Rapiu’ chiujiu kusai, dechiujiu Messiah hai David kaikikge chiuralo?”
Jesu Niu Tacheng-tajaigu Katipaodung Lamga Rukhaibo
(Mt 23.1-36; Mk 12.28-40)
45Haichiujiu maidungniu pacham nkingjiu bamboga, Jesu niu pakhommaidung khuga din-e, 46“Tacheng-tajaigu katipaodungniu, paliu ntiang kathengbo ntiang lujiu, khatdi senkiga paliutu chakhuang thiujiu kahum khai ratu masenbo; khatdi maduikyga, matha malabo bamga, chakhuang thiubo bamga ntaora kadabo; 47khatdi kamipui-kaminah ma rupjiu sut tiubo, chiudi kakhengthiu mathengbo thak kamjiu tasao thiubo maidung situ naliuniu akhesi rabo-e! Paliutu pibo sajaise sathu rabo-e!”
वर्तमान में चयनित:
LUKE 20: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
