LUKE 18
18
Kamipui Nai Ladjanpaotu Din Champanbo
1Jesu niu pakhommaidungtu pawan machang kakheng thiujiu bamrabo-e, wadao khatdi paliu lungchun nkhinmi makrabo-e chiubo katikhaijiu din champanbo hai dinsude. 2“Namdi khatga Tingwang tudi pingmak, chamai tudi pingmakbo ladjanpao khat bamme. 3Khatdi sibo namdi gasu kamipui khat pakhuga wanglujiu, “Agu mikrepiu khugasu amaji rikhailo!’ chiujiu khengsao makjiu bamme. 4Pawan thengkha ladjanpao siniu suimakge, chiudi tanusu lamra paniu paronna haichiu din-e, ‘Iniu Tingwang tu pingmakge maksai chamai tudi chakhuangthiu makge, 5chiudi haibo kamipuiniu haijiuga atu kam chariu bambo donniu, Iniu pagu majise phuikhaira mide. Iniu sichiu maksai, paniu haichiujiu wang bamsai atu kam chariujiu bamrabo-e!’”
6Sichiujiu Rapiu niu dinkiu-e, “Haijiukha kasabo ladjanpao siniu dinbo haise nkinglo. 7Sichiusai nchun n-nien saomakjiu nkha khaira khengbambo pamaidungtu Tingwang niu paliu lam chapkhai lakma? Paniu paliutu nkha khai lakma? 8Iniu naliu khuga dinbo-e, paniu paliu lam chapjiu kamkhai siakbi rabo-e. Chiudi Chamai Nahpiu siniu wangbo nai kadihpiriga hai malummai daolu suma?”
Pharisee Maipiu Nai Ramkha Khapiutu Din Champanbo
9Jesu niu din champanbo haidi, paronna patu kawimaileng lukhai lujiu katambo mai hinatura wathao thiumak mai lamga dinbo-e. 10“Pawan khatga maipiu khangnia Charakyga kahumra tadle: maipiu khatniu Pharisee maipiu-e, khang khatniu ramkha khabo piu-e.
11Pharisee maipiu siniu paronna chap npenlujiu haichiu kakheng thiu sude, ‘Oh Tingwang yo, Iniu natu thuonne, palamra I hai aluni samakge, alungchun masan makbo thiumakge, khatdi makha makge, Ira maikum makge. Iniu natu thuonne, palamra Ira uibo ramkha khapiu kumdi makge. 12Ira n-nid-kak khatga kalumri lonnia-e, khatdi agu wangbo mania hinagu dam kariu gu damkhat hina pi-e.’
13Sichiudi ramkha khapiu siniu chap madiulujiu, pazudi tinggenlam ngangphui humakjiu, chiudi paga kaphijiu din-e, ‘Oh Tingwang yo, nuan phungbo atu hai lungsa khailo!’ 14#Mt 23.12; Lk 14.11.Jesu niu din-e, ‘Iniu naliu khuga dinbo-e, Tingwang khuga Pharisee maipiuse makjiu, ramkha khapiu siniu majibo-e. Palamra mai khatniu paronna patu maning madisai, patu kam masiam khaibi rabo-e; khatdi mai khatniu paronna patu kam manon kiusai, patu kam madi khaibi rabo-e.”
Jesu Niu Nahmaidungtu Thoikhaibo
(Mt 19.13-15; Mk 10.13-16)
15Maidung khangsianiu paliu nahdungtu kabakhaijiu thoikhai raleng Jesu khuga puiwangde, chiudi sise pakhommaidungniu ngaolujiu paliutu kasan khaide, 16chiudi Jesu niu nahmaidung situ pakhuga kuwang lujiu din-e, “Nahmaidung haitu akhuga piwang khailo, paliutu khammi tulo, palamra Tingwang gu Chawangdihse haikumbo maidung leng-e. 17Haise maning taolo! Mai khatniu nahmai khat kumjiu Tingwang gu Chawangdih haitu lukhai maksai wadaodi siga ngutsi lakge,”
Kalekwibo Piu
(Mt 19.16-30; Mk 10.13-16)
18Jehudi maigu jupao khatniu Jesu khuga maniu-e, “Kawibo katipao yo, tingtheng karingbo daolura Iniu degu kamralo?”
19Jesu niu pakhuga din-e, “Dekamjiu nangniu atu kawibo chiu kujiulo? Tingwang ronna makjiu mai khatdi kawibo ha-e. 20#Tad 20.14; Taj 5.18;Tad 20.13; Taj 5.17;Tad 20.15; Taj 5.19;Tad 20.16; Taj 5.20;Tad 20.12; Taj 5.16.Chamtandungse nangniu sibamme: ‘Makha mane; maitu gimane; maigu aga mane; maitu aratjiu din masa mane; napui napiutu chakhuang thiu silo.’”
21Sibopiu siniu paokakge, “Iniu nahgasu haibo chamtandung hai majaijiu lungkhang kinbo-e.”
22Jesu niu haise chiuboga, pakhuga din-e, “Nangniu kam tanglu makbo khat bamkha-e. Nagu kabambo hinase jonlujiu kaleksabo maileng njan khai milo; sichiusai tinggen dihga chakhiu-chalanse nangniu daorabo-e; sichiujiu wangjiu asai suilo.” 23Sinapiu siniu haise chiuboga, palung magenthiu mide, palamra pahai kalek wichang-wibo piu-e.
24Sichiujiu paniu palung magenthiu mibose ngaoboga Jesu niu haichiu din-e, “Kalekwibo mainiu Tingwang gu Chawangdihga ngutrabo hai dejiuga kakung gulo! 25Kalekwi mainiu Tingwang gu Chawangdihga ngutrabo suang, qontraoniu npin niukiga buang ngutboniu mala-e.”
26Pachamse chiulu maidung siniu din-e, “Sichiusai, saokum mainiu ranlubose daolu ralo?”
27Jesu niu paokakge, “Chamaina khuga suilu lakbose Tingwang khugara suilubui kamme.”
28Siga Peter niu din-e, “Phuilo! aliura nasai suira aliuky saodiak mide.”
29Jesu niu paliu khuga din-e, “Yo, Iniu naliu khuga pachang paling dinbo-e, mai khatniu Tingwang gu Chawangdih jengniu, paky-palu maksai panao-panahtu maksai pasingnatu maksai papui-papiutu phutkhai misai, 30haibo ken-ga kengkha daosanne, khatdi wangrabo chaken ga tingtheng karingbose daone.”
Jesu Niu Pah Shairabo Lamga Dinlon Pasumbo
(Mt 20.17-19; Mk 10.32-34)
31Jesu niu pakhommaidung khang kariu-je-niakiu situ majang malilujiu paliu khuga din-e, “Phuilo, Chamai Nahpiu lamga phaimiukakung maidungniu raokhai mibose pachangjiu wangtang khaira, aliuniu Jerusalem lam tadkinbo-e. 32Patuse Nkengmai ben-ga pikhaijiu, paliuniu patu tanui thiusune, khatdi pazuga tatai masiu khaijiu patu kam mangam sune. 33Paliuniu patu dapsune khatdi patu kamshatmi sune, chiudi pasumbo nai pah ringsulan mirabo-e.”
34Sichiudi paliuniu haidungse silu makge; parambase paliu khugasu baimide, khatdi Jesu niu degu dinjiulo chiubo paliuniu sitanglu makge.
Jesu Niu Pamik Tiatbo Takhengtiu Piutu Wikhaibo
(Mt 20.29-34; Mk 10.46-52)
35Jesu niu Jericho lam wang manasuboga, pamik tiatbo piu khatniu npui mungga ntaolujiu takheng bamniu-e. 36Maidung siniu pamungga tadjiu bambo khuanse paniu chiuboga, paniu maniu-e, “Chakhuan kariobo hai dekambo donniulo?”
37“Nazareth Jesu se wangkinbo donniu-e.” chiujiu paliuniu pakhuga dinkhai bide.
38Siga paniu pakhuan tanjiu sen-e, “David Nahpiu! Jesu yo! Atu lungsa khailo!”
39Pamasuangga bammaidung siniu patu maliu mane chiujiu kasan-e. Chiudi paniu pakhuanse tanliang liangjiu senlan-e, “David Nahpiu yo! Atu lungsa khailo!”
40Sijengniu Jesu niu mathak lujiu, pamik tiatbo piu situ pakhuga puiwanglo chiujiu chamtan pikhaide. Paniu pakhuga wangboga, Jesu niu pakhuga maniu-e, 41“Iniu naleng degu kamkhai raleng nang luni jiulo?” Paniu paokakge, “Rapiu yo, Iniu ngaokhai ni-e.”
42Jesu niu pakhuga din-e, “Sichiusai ngaomi sulo! Nagu malum siniu natu wikhai mide.”
43Sibo wansiak gasu pase ngao mide, khatdi Tingwang tu thuonjiu, paniu Jesu sai suitad mide. Chamai mendi siniu haise ngaoboga, paliu mathiuse Tingwang tu thuon sude.
वर्तमान में चयनित:
LUKE 18: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
