LUKE 15
15
Hamibo Mily
(Mt 18.12-14)
1 #
Lk 5.29,30. Naikhat ramkha khamai nai nuan phungmaidung siniu Jesu khuga pacham nking raleng wang-e, 2sigase Pharisee maidung nai Tacheng-tajaigu katipaodungse paliu ronna haichiu dinsude, “Haina piuniu nuan phungmaidungtu lukhai-e, khatdi paliutu maluang tiu-e!” 3Sijengniu Jesu niu paliu khuga din champanbo hai dinkhaide:
4“Naliu ruangga mai khang khatgu mily kai khat bambo gasu, khat hamisai paniu dechiu ralo? Paniu pagu mily riakchakiu-je-chakiu situ piuriang liga khaidiak lujiu, hamibo khat situ phiudao makthen phiurabo-e. 5Sichiujiu paniu sise phiudao luboga, pachun wijiu pamakhuak rigasu ponlujiu pakyga wangrabo-e. 6Sichiujiu pakahmaidung nai pakiningmaitu kumadui lujiu, paliu khuga din-e, ‘I achun wichang wi-e, palamra Iniu agu hamibo mily situ daolan lude, siniu aliu chunwi machamkhe!’ 7Sikumgapjiu Iniu naliu khuga dinbo-e, lungli lanra pageng hamibo tacheng tadmaidung riak-chakiuje-chakiu tusuang, nuan phungmai khatniu lungliwang lanboga tinggen lam chunwi nkiurabo-e.
Hamibo Rangkang
8“Sichiu maksai maipui khatniu rangkang kariu bambo gasu rangkang khat hamisai paniu dechiu ralo? Paniu chamibung matao lujiu, paky biakjiu phiudao makthen phiurabo-e. 9Sichiujiu paniu phiudao luboga, pakahmaidung nai pakiningmaitu kumadui lujiu din-e, ‘I achun wichang wi-e, palamra Iniu agu hamibo rangkangse daolan lude, sijengniu aliu chunwi machamkhe!’ 10Sikumjiu Iniu naliu khuga dinbo-e, nuan phungmai khatniu lungliwang lanboga Tingwang gu mazadung siniu chunwi-e.”
Hamibo Nahpiu
11Jesu niu dinkiu lan-e, “Pawan khatga maipiu khatniu panah piumai khangnia bamme. 12Panah n-nahpiu siniu papiu khuga din-e, ‘Apiu yo, tuhoira adamrabo maniadungse aleng pikhailo.’ Sijengniu papiu siniu pagu bambo maniadungse panah kania damse njankhai mide. 13Sichiujiu watheng makjiu panah nabopiu siniu pagu hina jonlujiu paky phutlujiu tadmide. Paniu pabam kadiubo lam tadlujiu pagu kabambo hinase wajeng simakjiu thinkam mide. 14Sichiujiu paniu pagu bambo hinase thinkam mide. Siniu pah wadi thinra hamiboga, charakhum khumdi wangde. 15Sijengniu siga lungbammai khunlungmai khat khuga wangde, paniu patuse kavak khuanra langkhaide. 16Siga pase kavak tekdi tiujiu pawanse magiu khaini mide, chiudi mai khatniudi patu wadi pikhai makge. 17Sichiujiu kanamboga paniu wa maningtao lujiu haichiu dinsude, ‘Apiuniu lanbambo kavangdung sira tiumali malanjiu bambo-e, chiudi Ira haiga wadi tiura hajiu makim bamme. 18Iniu sulujiu apiu khulam wanglujiu din-e, ‘Apiu yo, Iniu Tingwang khuga khatdi nakhuga maomide. 19Atu hai nanahpiu leng kuji tamide, chiudi nangniu lanbambo kavang khattu kumjiu atu lukhailo.’ 20Sichiujiu paniu sulujiu papiu khulam jonwang sude.
“Sichiujiu paniu kadiulam tadkin khaga papiuniu patu phuimeng ngaolude, khatdi lungsaboniu phuilujiu pakmeng daojiu panahtu pamlujiu kapup khai sude. 21Panah siniu din-e, ‘Apiu yo, Iniu Tingwang khuga khatdi nakhuga maomide. Atu hai nanahpiu leng kuji tamide.’ 22Sichiudi papiu siniu pavangmaitu kulujiu din-e, ‘Kalang sulo, withubo faise khoipad lujiu patu benkhai bilo, khatdi paphitop nai njung khapse khai bilo. 23Sigasu pamai wibo tomse gisulo, sichiujiu aliu chunwi matha sukhe. 24Palamra anahpiu hai shaimibo-e, chiudi pah ringwang lan bamme; pahai hamibo-e, chiudi tuhoira daolan lude.’ Sichiujiu paliu chun wijiu matha sude.
25Sibo wan gase panah katingpiuse chaluga bamme. Sichiujiu paniu chaky wang mana suboga chalui thiubo khatdi chalen lenbo khuan hai chiusude. 26Siga paniu pavang khattu kulujiu nde kambo gulo chiu maniu-e. 27Pavang siniu paokakge, ‘Nasai kariupiuse malan wanglan bamme; sijengniu napiuniu pachun wijiu pamai wibo khatdi paman kungbo tomse gilujiu matha bambo-e.’ 28“Siga pachi katingpiuse palung pomchang pomjiu chakyga wanglakde chiujiu bam mide; sijengniu papiu siniu padlujiu patu hiamjiu chakyga wangra din-e. 29Siga paniu papiu khuga din-e, ‘Phuilo, takum haitheng lungga Iniu nalad majai kamakbo thiumakjiu kavang khat kumjiu lungwang mibo-e. Sichiudi nangniu aleng degu pikhailo? Kamipoi nadi akahmaidungtu maluang tiu nchamra pikhai makge. 30Sichiudi nanahpiu hainiu pagu kabambo hinase matun kamak puidungtu maluangjiu kam mahakam lujiu wangda, nangniu paman kungbo tomse gilanbi jiuma!’ 31Papiu siniu din-e, ‘Anah yo, nangra pawan machang akhuga bambo-e, siniu agu kabambo hinase nagu-e. 32Sichiudi aliu chunwijiu matha rabo-e, palamra nasai kariupiu haisira shaimibo-e, chiudi tuhoi pah ringwang lanbo-e; pahai hamibo-e, chiudi tuhoi patu daolan lubo-e.’”
वर्तमान में चयनित:
LUKE 15: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
