LUKE 13
13
Naliu Nuan Gasu Lungli Lulo Maksai Shairabo-e
1Sibo tingga maidungniu chara thiujiu bamga Pilate niu Galilee maidungtu kamshat mibo lamga Jesu khuga dinkhaide. 2Jesu niu paliutu paokakge, “Kamshat mibo Galilee maidungse, kakibo Galilee maidung suang sa-nkiubo nuan kambo donniu-e chiubo naliu maning jiuma? 3Pachangjiu chiumakge! Iniu naliu khuga dinbo-e chiubora naliudi naliu nuan gasu lungli lumaksai, paliu kumjiu naliudi shairabo-e. 4Siloam ga chaky-ton kaokiujiu chamai khang kariu-je-tachatkiutu kamshat mibose dechiubo gasulo? Jerusalem ga lungbambo kakimaidung suang paliuse sa-nkiubo donniu-e chiubo naliu maning jiuma? 5Pachangjiu chiumakge! Iniu naliu khuga dinbo-e chiubora naliudi naliu nuan gasu lungli lumaksai paliu kumjiu naliudi shairabo-e.”
Masimakbo Ndutbangtu Din Champanbo
6Sigasu Jesu niu din champanbo hai paliu khuga dinkhaide: “Pawan khatga maipiu khat reng lungga ndutbang khat puak bamme. Sichiujiu paniu ndutsy phiutadboga wakhatnadi daomakge. 7Sijengniu paniu pareng tenbo piu khuga din-e, ‘Phuilo, Iniu haibo ndutbangga pasy phiuwangbo hai takum sum tangmide chiudi Iniu wakhatnadi daomakge. Haise huithon milo! Deleng kadihtam haitu kam mahajiu bamralo?’ 8Chiudi kareng tenbo piu siniu paokakge, ‘Paohubo, haise takum khat lengra pichiu khaibam railo; Iniu haibo munggase chu magui lujiu kadihtam khai mataine. 9Sichiujiu ma-kum hai pasy masi dasai wi-diangde; masi makjiu tasai haise nangniu huimidi sui-e.’”
Jesu Niu Tabamnai Pangen Tangbopui Khattu Wikhaibo
10Tabamnai khatga Jesu niu maduiky khatga katikhaijiu bamme. 11Siga maipui khat khuga rasa ngutbo jengniu takum kariu-je-tachat marawang mibo pui khat bamme; pahai nkontarung mijiu wadaodi chap mating ngamlak mibo pui-e. 12Jesu niu sinapuitu ngaoboga, paniu patu kujiu din-e, “Narapot gasu wimi sulo!” 13Sichiujiu paniu pariga paben kabakhai biboga, pase paronna chap matingkhang mide sichiujiu Tingwang tu thuon sude.
14 #
Tad 20.9,10; Taj 5.13,14. Jesu niu Tabamnai wikhaibo donniu, maduikygu chakampaose palung pom mide, sichiujiu paniu maidung khuga haichiu dinsude, “Aliuniu changam kamra jeng charuk bamme; sijengniu sibo lungga wikhaira wanglo, chiudi Tabamnai mak rabo-e!” 15Rapiu niu patu paokakge, “Wasao thiubo mai yo! Naliu mai hina, naliugu matomtu maksai qonniamtu pareng lunggasu Tabamnai khipad lujiu tadui pisak khai-e. 16Tuhoi haibo pui, Abraham kaikik haitu Satan niu takum kariu-je-tachatkiu rewang mibo-e; patuse Tabamnai khikhai mak rama?” 17Pagu chamkak hainiu, pagu mikre maidungse paliu ronna mangamjiu bamga, maidung sira paniu tasibo ngam kamkhaibo jengniu paliu chun wijiu bamme.
Njengsiutu Din Champanbo
(Mt 13.31-32; Mk 4.30-32)
18Jesu niu maniu-e, “Tingwang gu Chawangdih situ dechiujiu Iniu din kada ralo? 19Sise haikumbo-e. Mai khatniu njengsiu khat khoilujiu paluga lingkhai-e, sibo bangse puakkhangjiu, singbang kadibo thiukhang-e, sibo kedung gase thingnadungniu wangjiu paliu sip ponkhaibo kumbo-e.’
Chakhitu Din Champanbo
(Mt 13.33)
20Jesu niu maniu lan-e, “Iniu Tingwang gu Chawangdih haitu dechiujiu din kadakhai ralo? 21Sise haikumbo-e. Maipui khatniu takhui takamga chakhi tamnakha jakhaijiu sise pungpad makthen khai bambo kumbo-e.
Marumbo Rengmun
(Mt 7.13-14,21-23)
22Jesu niu namdakdung khatdi namdungtu katikhaijiu Jerusalem lam jonwang kin-e. 23Maidung khangsianiu pakhuga din-e, “Paohubo yo, maidung khangsia ronna rankhaibo daorama?”
Jesu niu paliutu paokakge, 24“Marumbo rengmun-ga ngutra naliu matan lulo; palamra maidung kakengniu siga ngutra matan sune chiudi ngut ngamlakge. 25Chaky paopiu siniu sulujiu akhamse khammi sune, siga naliuniu lenlam chaplujiu akhamse lekhaira maganjiu dinsune, ‘Aliuleng nkham lekhailo, Rapiu yo!’ Siga paniu naliutu haichiu paokak sune, ‘Naliu delamsu wangmailo I naliutu simakge!’ 26Siga naliuniu paokak sune, ‘Aliu hai nangtu tiu macham sak macham khaimibo mai-e; nangniu aliu namdakga katikhai mibo-e!’ 27#T.Lui 6.8.Chiudi paniu dinsune, ‘Naliu delamsu wangmailo? I naliutu simakge. Naliu hai kasamai maliang-e, akhugasu tadmilo!’ 28#Mt 22.13; 25.30. #Mt 8.11,12.Naliutu thonpadbo bamgasu, naliuniu Abraham, Isaac khatdi Jacob khatdi phaimiukakung maidung hinatu Tingwang gu chawangdihga ngaoboga, naliu kapjiu naliu hiu n-getjiu bamsu rabo-e! 29Maidungniu tingbang lamsu khatdi tingnu lamsu, tingpi lamsu khatdi tingrun lamsu Tingwang gu chawangdihgu Ngee gase wang ntao sune. 30#Mt 19.30; 20.16; Mk 10.31.Sichiusai tuhoi kanamaidung siniu raimi sune, khatdi tuhoi raijiu bam maidungse kanammi sune.
Jerusalem Jengniu Jesu Huibo
(Mt 23.37-39)
31Sibo wan gase Pharisee maidung khangsianiu Jesu khuga wanglujiu din-e, “Nang haibo bamgasu tadmilo khatdi pabam kakilam maritad milo, palamra Herod niu nangtu kamshat raleng phiu bamme.”
32Jesu niu paliutu paokakge, “Tadlujiu sibo tany khuga dinbilo: Iniu thainai, sonnai lungga rasadungtu hapadjiu wikhai kinbo-e, sichiujiu pasumbo naise Iniu angam loimi rabo-e,’ 33chiudi Iniu thainai, sonnai, khatdi pasaibonai angam kambam rabo-e; phaimiukakung situ Jerusalem ga makbo kakilam kamshatra maji makge.”
34“Oh,Jerusalem, Jerusalem! Phaimiukakung maidung situ nangniu kamshat mibo-e, Tingwang niu pagu ladlangtad maidungtu langkhaiboga nangniu tatu rotshat mibo-e! Maruipuiniu pakan hangga papoinatu kagom kumjiu, Idi akan hangga naliu mathiutu gomkhai nibo-e, chiudi naliuniu atu suikhai makge! 35#T.Lui 118.26.Sijengniu naliu Raky hai nchummi rade. Iniu naliu khuga pachang paling dinbo-e chiubora naliuniu, ‘Rapiu zan gasu wangbo patu Tingwang niu thoikhai bilo,’ chiu dinmak thenna, naliuniu atu ngaolak mide.”
वर्तमान में चयनित:
LUKE 13: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
