LUKA 24
24
Jisua thoinôk thu
(Mat.28:1-10; Mk.16:1-8; Joh.20:1-10)
1A sûn sarinî (Pathiannî) zîng kôlrisam kaneh nupanghei khan namhoi an isiamhei khah ichôiin ithlânah an fe a. 2Thlân kotbâia lung khah inlum paiin an va mu a. 3Khante, an lûtin chu Pumapa Jisua ruak rêng rêng mu khâi mak a.
4Amakhan lunginzîngin an iding a, voikarengin mi inikah puan ivâr ri-el isilin an kôlah an zuang ngîr a. 5Nupanghei khah rilônthingin, nuaiah an ibok rak a, anni khan an ziangah, “Ithôm mi ring teh mithihei lâiah nin izong? 6Hin om khâi mak, kâiithoi a nit tâk. Galili ramah a om lâia nin zianga ai ti khah remai rei.#Mat.16:21; 17:22,23; 20:18,19; Mk.8:31; 9:31; 10:33,34; Lk.9:22; 18:31-33. 7‘Miriam Naipa hih mi sualhei kutah inman nîng a ta, krosah hêmde an ta, a sûn thumnin kâiithoiin om nôk a ti,’ ai ti ngai khah,” an ti a.
8Khanungchu, nupanghei khan a thu sîrhei khah an riat suak nôk tâk a. 9Ithlân ata an kîr a, Kôilôm Sômleikhatkahei neh mi danghei chu kha thu khah an iril a. 10Kha thu hong iril nupanghei khah Mari Magdalini, Joani neh Jakoba nu Mari hei an nit. Anni neh nupang dang an zianga omhei khan tirtônhei khah an îril a nit. 11Khannisela, nupanghei îsîr khah thu chanlamboi an ti a, iam mak a. 12Petera kha chu a thoi lik a, ithlânah khan a va tlân a; â khûn a, a vêng a, risompuan rizuat banah chu îte dang mu mak a. Thil om dân khah arkhêl tak tak iti pumin in tiang a fe nôk tâk a.
Emmau khua pun mal rifâkahei
(Mk.16:12-13)
13Kha nikhua takah khan Jisua zui ngai mi inikah kha Emmau khuaa fe rangin an suak a. Kha khua khah Jerusalem ata kilomitar sômleikhatkah vêla la a nit. 14An ruaikah khan thil itlung murdi khah an isîr a. 15Khangkana an ṭong a, an isîr lâiah khan amah Jisua ngêiin a hong nâi a, munkan a fepui tâk a. 16Nikhomsela, a mêl an riat thei nona rangin an mit ân vâi pêk a. #Joh.20:14—21:4. 17Jisuan an ziangah, “Lampuia nin îsîr khah î thurchi mani?” a ti a.
Khanchu, mâi ingûi riaikan an ngîr a. 18Khante, arming Kleopa khan a sâm a, “Nangmah bang hih nîng ni ti na, Jerusalem ithlo lâiah atûnlâia thil itlung thurchi ria no chu na?” a ti a.
19Ani khan, “Î thil im â tlung?” a ti a.
Anni khan, “Nazaret Jisua chunga thil itlung kha; Kha mi khah Pathian neh mi murdi mitmu khomah tinrêngah thu-ah neh sinthoah zânthla rithanei tak a nit a. 20Ani khah kin thiampu lalhei neh ruaituhein ithat rangin an pêk a, krosah an hêmde a. 21Keini lakin Israelhei ritlantu rangah kha a nit kin tûng a. Khabanah, khangkana thil tlungna khah vuani hih a sûn thumnî a nit tâk. 22Kin lôma nupang ṭhenkah, zînga ithlâna va fehein lungzîng an ne sak a. 23A ruak khah mu loiin an hong nôk a, ‘Vântirtônhei inlâr kin mu a, kha mihei khan a ring nôk tâk an ti,’ an hong ti a. 24Khante, kin lôma ṭhenkahei ithlânah an va fe a, nupanghei ti lam angkah chian an va mu a; khanniseh, amah chu an imu ual ino a nit,” an ti a.#Joh.20:3-10.
25Khante, Jisuan an ziangah, “Intlohei o, zânthlahei thu sîr tin tin iam thei inoa â sêthei o! 26Mesian khahei rêng rêng khah ituangin a roinpuinaah ai lût rang ni mak im a?” a ti a. 27Khanchu, Mosia lekhabu ata phutin zânthlahei lei irziak Thubuheia ama thurchi riziakna murdi khah anmani a rilfia pêk a.#Lk.24:44,45; TS.28:23; 1 Pet.1:11.
28Khante, an fena rang khua khah an hong nâi tâk a; Jisua kha chu la fe mai rang angkan a om a. 29Nikhomsela, bâiin an itûk a, “Kin ziangah om ta roh, sûn khom ân nung tâk a, inî khom â thla rang tak kêng,” an ti a. Khanchu, an zianga om rangin a fe tâk a. 30Khante, an ziangah khalai rikhîl rangin â ṭhung a, ibai a lâk a, ṭhat a vur a, a khoi a, an ziangah a pêk a. 31Khanungchu, an mit a hong vâr a, a mêl an riat infel tâk a; nikhomseh, an mitmu ata armang zel tâk a. 32Anni khan, “Lampuia a ne ṭongpui lâia Thubu-a thuhei a ne rilfia pêk lâiah khan ei lungril mei ikâng angkan om mang mêm a?” itin an risôn a.
33Khanchu, voikarengin an thoi a, Jerusalemah an kîr nôk zel tâk a; Kôilôm Sômleikhatkahei neh an rualhei lei ribûm khah an va mu a. 34“Pumapa chu a thoinôk titak; Simona ziangah khom ân lâr tâk,” an lei ti a.#1 Kor.15:5. 35Khante, inikahei khom khan lampuia thil itlung neh ibai a khoi a, amah Pumapa an riat infel tâk dânhei kha an isîr tâk a.
Kôilômhei ziangah Jisua ân lâr
(Mat.28:16-20; Mk.16:14-18; Joh.20:19-23; TS.1:6-8)
36Khante, mi inikahei khan kha thu khah an la sîr mai lâiin, voikarengin Pumapa ngêi khah an lâiah a zuang iding a, an ziangah, “Nin chungah thlangamna om riseh,” a ti a.
37Ân rît an ti a, an ṭi tak tak a, rithla an imu an sôn a. 38Khannisela, ani khan an ziangah, “Ithôm khangkah dôra nin iṭi? Ithôm nin lungrilah ringlana nin inei? 39Ki kuthei, ki kehei hih en ta u, keimah ngir khah ki nit hih. Ne tôn unla, en rei; nin ne mu lam angkah hin rithlan taksa neh ru nei ngai mak e,” a ti a.
40Khante, khah a ti zoiin chu a kuthei, a kehei ân en a. 41An lôm rai sikin tak la sôn zel thei mak a, arkhêl an ti tak tak sikin ani khan an ziangah, “Hintaka ifah rang nin nei im?” a ti a. 42Inga suang isa tlinkah an pêk a. 43A lâk a, an mu chungah khan a fâk tâk a.
44Khante, an ziangah khan, “Nin ziangah ki om lâiah khan hi thuhei hih nangni ke ril ngai kha, Mosia Dân lekhabuah hei, zânthlahei lekhabuah hei, Inpâkna la bu-ah hei ki thurchi riziak murdi chu a hong itlung idik rang a nit, itin nangni ki lei iril ngai kha,” a ti a.
45Khanchu, Thubu-a riziakhei an riat theina rangin an lungrilhei â ong pêk tâk a. 46An ziangah, “Hingka hin riziak a nit: Mesia khan a tuang ngêt rang a nit a, sûn thumka nungah mithi lâi ata thoinôk a ti. 47Ama rimingin riletna neh sual izâna thurchi Jerusalem ata nam tin ziangah isîr nîng a ti.#TS.1:4-8. 48Kha thil murdihei riatpuitu nin nit. 49Khante, ki Pa înkung khah keimah rengin nin chungah zuk tir ki ti; nikhomsela, chungtianga rithoka sinthotheina nin chungah a ṭum mâkah chu khopuiah nin om mai rang a nit,” a ti a.#TS.1:4.
Jisua rivân a kâi thu
(Mk.16:19-20; TS.1:9-11)
50Khante, khopui ata Bethani dênin a ṭhui a, amakhan â bân a phar a, ṭhat a vur a.#TS.1:9-14. 51Khangkana ṭhat a vur lâi takah khan anni khah ân ṭhenpui a, ani chu rivânah iṭhuiin a om tâk a. 52Khante, chubai an ûn a, ilôm takkan Jerusalemah an kîr nôk a, 53Tempilah khan Pathian zianga lômthu sîrin an zoro murdi an mang ngai a.
वर्तमान में चयनित:
LUKA 24: BIATBSI
हाइलाइट
शेयर
कॉपी
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
