wandījo 13

Abulamu na Lutu kūlekana

1Ū Abulamu wīnga ko ī Misili alī nū nke, ūja Negevu nī shikolo shakwe pyī ī shose; walī nang'hwe nū Lutu. 2Ū Abulamu akajikwīja no ī mitugo nī hela, hamò nī zahabu. 3Nī Negevu atadīlile koi, wīnga ūja akūsaama saamaga, nose ūkashika Beeseli, ūja hangī ūko yalī ng'hambī yakwe kwandya, a ha gatī ya Beeseli na Ai; 4Ūko walī wabeeja ng'walīlo. Aho washika ko ūlīkumīlīja ī lina lya ng'wa SEEBA. 5Nū Lutu walī nsabi, nang'hwe walī na madaale mataale ga mitugo na maheema mingī. Alīyo nang'hwe wajaga akūsaama saamaga hamò nū Abulamu. 6Gwike nose īkabagehela ī sī; būlemeelwa ū kwikala hamò. Nguno a madaale ga mitugo jabo gakakūla no, kūshisha yūbiza shilambu ū kwikala hamò. 7Yūbūūka yombo a ha gatī ya badīīmi ba mitugo ja ng'wa Abulamu, na a ba mitugo ja ng'wa Lutu; būyikala bakūyogaga. Nīyo a makanza gene bikalaga Bakanaani ū mu sī yenīyo, hamò na Bapelizi. 8Hūna ū Abulamu ūng'wīla ū Lutu gīkī, “Bebe ītī yawiza ībūūke yombo a ha gatī yako nū nene, nūūlū a ha gatī ya badīīmi bako na a bane; nguno a bise tūlī ba lūdūgū lūmò. 9Ī gīsī ūlībona kinehe, tūhaya ī sī yīyī īlī kū būtongi wako īkulindīlīle? Tūlekanage; ū bebe ūlū ūsola kūja kū nkono gwa lūmoso, ū nene nakūja kū gwa būlyo. Alīyo ū bebe ūlū ūsola kūja kū nkono gwa būlyo, ū nene nakūja ū kū gwa lūmoso.” 10Ū Lutu ūbūūcha a miso gakwe kūgalola a matogolo, ūlībona ī lilago lya kū mongo gwa Yolodani ūmo lyalī ū būnīlīzu.#13:10 Būnīlīzu: Būlī kwene lyalī na minzī ga kwigela. Ū SEEBA aho ataalī kūjikenaagūla sī ja Sodoma na Gomola, ī litogolo lyenīlo lyalī gītī ngūnda gwa ng'wa SEEBA, nūūlū gītī sī ya Misili, kūjīlīīla Zoa. 11Hūna lūūlū ū Lutu wisolela ī mbūga ya kū mongo gwa Yolodani, wīnyama pye ī yose yūbiza yakwe. Hūna ūsaamya ī ng'hambī yakwe kūjīlīīla kīya, būbiza balekana a banhū benabo: 12Ū Abulamu wikala mo ū mu sī ya Kanaani. Alīyo ū Lutu ūkigasha hamò nabo a banhū ba mu mizengo ya kū mbūga ja ng'wilago, ī ng'hambī yakwe wīyiheja na nzengo gwa Sodoma. 13Gwike a bana Sodoma baalī na nhūngwa ja malofu no; baalī na shītīle shabūbi no ū kū būtongi bo ng'wa SEEBA.

14Aho wasaama ū Lutu, ū SEEBA ūng'wīla ū Abulamu gīkī, “Būūchaga lūūlū a miso gako wīlole ī sī ū kūfuma aho ūlī henaho; lolaga ī sukuma nī dakama, nī kīya nī ng'weli. 15Pyī ī sī īyo ūlīyībona yenīyī nalīkwinha bebe na būbyīle wako, shikū ja welelo na welelo. 16Ū būbyīle wako nakūbūkwīja no, būkwīle gītī lūbuubu lwa ha sī; ūlū ose ose ūdūla kūlūbala lūbuubu lwa ha sī, hū kūhaya akūdūla nū kūbūbala ū būbyīle wako. 17Yeela yeelaga lūūlū ū mu sī yenīyī, nguno nalīkwinha bebe; īlolage wībone ū būlīhu wayo, nū būgalī galī wayo.”

18Hūna ū Abulamu ūsaamya ī ng'hambī yakwe a henaho, ūja Hebuloni ūkazenga hihī na mitī ya Mamule.#13:18 Mamule: Mamule, nzengo gūmò gūkinhwa lina lya ng'wa munhū nebe. Ūbeeja ho na ng'walīlo kūlwa ng'wa SEEBA.

वर्तमान में चयनित:

wandījo 13: SUKBI15

हाइलाइट

कॉपी