پێدایش 4

کائِن و هابیل

1آدما، گۆن وتی جَن هئوایا وَپت و واب کرت و هئوائے لاپ پُرّ بوت و کائِن پێدا بوت. هئوایا گوَشت: ”چه هُداوندئے برکتا، منا مردێن‌چُکّے بوتگ.“ 2رَندا هئوایا کائِنئے برات، هابیل پێدا کرت. هابیلا شپانکیَ کرت و کائِنا دِهکانی.

3کَمّے وهدا و رَند، کائِنا چه وتی ڈگارئے بر و سَمران په هُداوندا ٹێکیے آورت. 4هابیلا هم چه وتی رَمگئے پَسانی ائولی چُکّان لهتێن کُشت و آیانی پیگی گۆشت زُرت و په هُدایا ٹێکی آورت. هُداوندا هابیل و آییئے ٹێکی پسُند بوتنت، 5بله کائِن و آییئے ٹێکی آییا پسُند نبوتنت. کائِن سکّ زَهر گِپت و دێمی تَهار بوت.

6هُداوندا گۆن کائِنا گوَشت: ”چێا زَهر ائے؟ چێا تئیی دێم تَهار اِنت؟ 7اگن تئو شَرّێن کار بکنئے، تئیی هئیالا کبول کنگَ نبئے؟ بله اگن تئو شَرّێن کارَ نکنئے، گناه تئیی دروازگئے پُشتا اۆشتاتگ و تئیی رندا کپتگ. تئو باید اِنت گناهئے سرا بالادَست ببئے.“

8کائِنا گۆن وتی برات هابیلا گوَشت: ”بیا ڈگارئے سرا رئوێن.“ ڈگارا که شتنت، کائِنا وتی برات هابیلئے سرا اُرُش کرت و کُشتی. 9گڑا هُداوندا گۆن کائِنا گوَشت: ”تئیی برات هابیل کُجا اِنت؟“ آییا گوَشت: ”نزانان. زانا من وتی براتئے نِگَهپان آن؟“ 10هُداوندا گوَشت: ”تئو چِه کارے کرت؟ تئیی براتئے هۆن چه زمینا گۆن من پریات کنگا اِنت. 11نون تئو نالتیے ائے. چه اے زمینا دَرپَدَر کنگَ بئے که دپی په تئیی براتئے هۆنئے اێر برگا پَچ اِنت، هما هۆن که چه تئیی دستا رێچگ بوتگ. 12وهدے زمینا کارَ کنئے، زمین په تئو برَ نئیاریت و تئو، جهانا دَرپَدَر و بےآرامَ بئے.“

13کائِنا گۆن هُداوندا گوَشت: ”منی سِزا چه منی سَگّ و بَرداشتا ڈَنّ اِنت، 14مرۆچی تئو منا چه اے سرزمینا گَلّێنئے. من چه تئیی بارگاها گارَ بان. جهانا دَرپَدَر و بےآرامَ بان و هرکَس که گۆن من ڈیکّ بوارت، منا کُشیت.“ 15هُداوندا گۆن آییا گوَشت: ”چُشَ نبیت. هرکَس که ترا بکُشیت، آییئے سِزا هَپت سَریَ#4‏:15 هَپت سَری، بزان هَپت برابر، هَپت رندا، هَپت همینچُک. بیت.“ گڑا هُداوندا کائِنارا نشانے پِر کرت تانکه اگن کَسے گۆن آییا ڈیکّ بوارت، مکُشیتی. 16کائِن چه هُداوندئے بارگاها در بوت و اَدَنئے رۆدراتکا، نۆدئے سرڈگارا نِشت.

کائِنئے نَسل و پَدرێچ

17کائِنا گۆن وتی جَنا وپت و واب کرت و آییئے جَنئے لاپ پُرّ بوت و چه آییا هَنوک نامێن چُکّے پێدا بوت. کائِن شهرے اَڈّ کنگا اَت و شهرئے نامی وتی بچّئے نامئے سرا هَنوک کرت. 18چه هَنوکا ایراد پێدا بوت، چه ایرادا مِهویاییل، چه مِهویاییلا مِتوشاییل و چه مِتوشاییلا لَمێک.

19لَمێکا دو جَن گِپت، ائولیئے نام آدَه اَت و دومیئے زِلَّه. 20چه آدَها یابال پێدا بوت. یابال، هما مردمانی پت اَت که گِدان‌نِند اَتنت و دَلوَتِشَ داشت. 21یابالئے براتئے نام یوبال اَت. یوبال، چَنگ#4‏:21 چَنگ اِسراییلیانی کِرّا سیمّی سازے. و نَل جنۆکانی پت اَت. 22چه زِلَّها، توبال‌کائِن پێدا بوت که بْرنج و آسِنئے وڑ وڑێن ائوزار و سامانانی اَڈّ کنۆک اَت. توبال‌کائِنئے گهارئے نام نَهمَه اَت.

23لَمێکا گۆن وتی جَنان گوَشت:

”او آدَه و زِلَّه! منی تئوارا گۆش دارێت.

او لَمێکئے جَنان! منی گپّان گۆش دارێت.

یکّ مردێا منا ٹَپّیگ کرت و من آ کُشت،

وَرناێن مردے که منا ٹَپّیگی کرتگ‌اَت.

24اگن کائِنئے بێر هَپت سَری گِرگَ بیت،

لَمێکئے بێر هپتاد و هَپت سری گرگَ بیت.“

سئیت

25آدما پدا گۆن وتی جَنا وپت و واب کرت و آییئے جَنا مردێن‌چُکّے آورت. جَنا چُکّئے نام سئیت #4‏:25 سئیتئے مانا ”داتگێن“ اِنت. کرت. گوَشتی: ”هُدایا منا هابیلئے بدلا دگه چُکّے داتگ، پرچا که کائِنا هابیل کُشت.“ 26سئیتا هم مردێن‌چُکّے بوت و آییئے نامی اێنۆش کرت. همے وهدا مردمان هُداوندئے نامئے تئوار کنگ بِندات#4‏:26 بِندات، بزان بُنگێج، شُرو. کرت.

वर्तमान में चयनित:

پێدایش 4: HPKB

हाइलाइट

कॉपी