Litoonl 1
1
1N ninkpelu Teofilusi, n gbɔŋkpog n-yaan, n nan sɔb nan biɛn wee Yisa nan piin ki tun, nin waah nan wɔɔn man, 2ki nan kpaa lidaal lan wee bi nan nan ta u don paabin, Kasi a Naaŋin kaah nan che u wɔɔn u tooi yan wee u gann nin, le Uwonbɔr nin nan ta u don paab. 3U fala a jim a bɔɔn, le u ta u baa ki wɔɔn bi ki jin siɛra takpem ke u fo. U nan degir bi bu ki be nin bi iweehn pina ki wɔɔn bi Uwonbɔr a naamin a bɔr.
4Kulaguŋ kuba ni, le u nan lagin ki ka ji nin bi, le ki nan sei bi limɔsiinl nan: “Ni laa nya Jerusalami, amaa ni li guu ipiin yan wee n baa nan siin limɔsiinl lan wee ni gbir n pag li bɔrin. 5Nan bu-n Jɔnn fun ni nnyum le, amaa naa li yuuri ni li gbee nin Kasi a Naaŋ.”
Yisa kaah don paab a naamin man
6Yisa nin u tooi kaah nan lagin tab n-yonn man nin, le bi baan u ke, “Uyudaan daandaan nan le a yin jiin Iziral yaab a naamin ki sei baa?”.
7Le u bei bi ke, “Naa ye ni li nyi n-yonn man bee idaa yan wee n Baa siin ke nin tun man u tɔɔl a ninkper a pɔɔmin ni. 8Amaa ni li kan npɔɔn n-yonn man wee Kasi a Naaŋin li jiirin ni bu-n, le ni na li ji n siɛra Jerusalam nin Judiya a timin biɛn nin Samariya nin dulinya nan a logi nan biɛn.”
9Waah pag man ki diɛ a bɔɔn, le Uwonbɔr ta u don paab bi numbimin, le kitilangbɔŋ degin u bu le baa ji ga wi. 10Amaa le bi paar si ki ta bi num kpaa ki lig papaab kitilangbɔŋin waah chaa do man, libol nmɔn ki miin bijab bilee yee tiwanpenn, ki nan sir bi ban. 11Ki baan bi ke, “Nim Galilii yaab, ba ŋa wee ni si ki lig papaab man naa? Yisa wan nyan ni ban ki don paabin, u le ji na yin jirin man le ke naah le kan u wee u don paab man nin.”
Wan nan gaa Judasi a sisibol nan a bɔr
12Iyaayoo nmɔn le Yisa a tooi yin nan nyan ligungonl lan wee bi yi ke Olif a Siigi a Jɔɔlin a paab ki chaa jir Jerusalam. Nin yaan nin Jerusalam kaa nan foo maal kiba. 13Baah foo Jerusalam n-yonn man nin, le bi jon tan kɔɔ iniin yan yaan wee bi ti be-n, i nan ye tidititɔɔr le. Ban nan be nin yaan le ye Piita, Jɔnn, Jemisi nin Anduru; Filib nin Tomasi, Batolomiu nin Matiu; Jemisi wan nan ye Alifiu a bija-n, nin Simɔnn wan wee bi nan yi u ke zealo#1:13 Zealo ye bininfob ban nan kɔn bi bol a kaal bu le., nin Judasi wan ye Jemisi a bija-n. 14Bi biɛn nan ti lagin tab le nin bipiib biba nin Yisa a na Meri, nin Yisa a watiib, ki miɛ Uwonbɔr nin potiɛl liba kaa peri.
15Iyaayoo nmɔn le Piita nan fii sir biwonjiɛm ban nan lagin a sisiigin, (bi na li foo bininfob kobig nin pilee paam) 16ki len ke, “N nabum, Uwonbɔr a leen yan wee Kasi a Naaŋ nan che Defid pag Judasi a bɔr n-yonn man nan jon nni, ye nin gbeen le. U ma nan liin nsan ki tan wɔɔn le bi choo Yisa. 17U nan ye ti kpiɛg uba le, ki kpiɛ ti bu itoon nan yaan.”
18(Judasi a toonbir a ligi yan wee u kan nin, le u ta ki daa bukpaab; nin yaan nmɔn le u ji nan lu le u yul chaan tum, le u pool pɔɔ le u niɛr biɛn nyan. 19Jerusalam yaab biɛn nan gbir tibɔr nmɔn na, le ki yin bukpaab nmɔn bi leen yin ke, Akelidama, ni taai le ye, Ncham a Kpaab.)
20Ke Piita kaah nan len man ni, “Ke ni sɔb Ilan a gbɔŋin ke,
‘Che u niin n sir kulangboŋ;
wee uninfo laa kɔɔ niin ni.’
Amaa
‘Ni ŋan nin uba nsir u toon tun bol.’
21Mambu ni kpaa le nin ti gann uja uba wan be ni ti iyoo yan biɛn wee Uyudaan Yisa nan jɔɔ ti choon nin, 22naah nan nyan Jɔnn Wan nan Fu Bininfob Uwonbɔr a Nyunfulin ki tan kpaa iyoo yan wee Uwonbɔr nan nan ta Yisa ki don papaab ki sin jiɛn ti-n. U daan le ye wan nan jin Yisa a kum a fiim a siɛra ki kpiɛ ti bu.”
23Le bi nyan bijab bilee: Josef wan wee bi nan yi u ke Basabasi, (bi ji yi u ma le Jasitusi) nin Matiyasi. 24Le ki miɛ Uwonbɔr ke, “Uyudaan, fin le nyi uninfo biɛn a sufu ni. Wɔɔn ti bininfob bilee nan a sisiigin wan wee a gann, 25wee un ŋa a toom ki gaa a toon yan wee Judasi ta jiɛn ki sin jon tan be nan yaan kpaan nin win.” 26Le bi tɔn inaa, le Matiyasi jin, le bi ta u ki kpiɛ itoon piig nin uba-n bu.
वर्तमान में चयनित:
Litoonl 1: KUGL
हाइलाइट
शेयर
कॉपी
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
