लूका 21
21
पेर्मी युक्सिमकी बुल्वा
(मर्कूस १२:४१-४४)
1तमा येशू यहूदी ल्हङाङ नाङ्ला ज्युनी मी छ्युक्पुतिवी दाक दाक्पी बुल्वा ति बुल्वा देकुप गामकी नाङ्ला पुलुप ति थोङ्सुङ। 2येलुङ पेर्मी युक्सिम पेराङ्बु यीकी डेवा ङ्यी बुल्वा पुलुप ति खोकी थोङ्सुङ। 3ती थोङ्सिमा खोकी सुङ्सुङ, “वुतुङ ङ ख्यिराङला सिरिन, दी पेर्मी युक्सिम पेराङ्बु तीकी यम्बा तेरीकी सिनाङ मङ बुल्वा पुल्सुङ। 4च्यिलासिसिन मी यम्बातिवी खोप्रे बङी वोतुप टोङ्बा नेसुर पुल्सुङ, यिने तीकी याङ खोरो पेराङ्बु वोतुप नेमा खोरो लोला वोतुप तेरी टङ्गा पुल्सुङ।”
यहूदी ल्हङाङ ना डोप कोर्ला येशूकी सुङ्गुप
(मत्ती २४:१-१४; मर्कूस १३:१-१३)
5थेङ्मा यी येशूकी लोमातिवा ललाइकी यहूदी ल्हङाङकी कोर्ला ताम्ङे कियी वोतुप पेला ती ल्हङाङ ति दो ल्यामु ल्यामु थ्वोन जोवु ताङ ती नाङ्ला बुल्वातिवा ति चुका डछ्यावु नोक सिनी सिक्यासुङ। ती ताम्ङे थोनी येशूकी तिवाला सुङ्सुङ, 6“दुका तुजे यी गितो, ती पेला तन्दा ख्यिरा थोङ्गुपतिवा ति दो च्यिक साङ यम्बा दे खला मालुवा क्यानी तेरी र्होम्गिवी।”
जम्बुलिङ ना डोप ततिवा
7तमा लोमातिवी येशूला टिसुङ, “गेकेन, दी ताम्ङेतिवा ति नम च्युङ्गिवी? तिवा च्युङ्गुप छलुप पेला चुका त गिवी?” 8येशूकी तिवाला सुङ्सुङ, “च्याङ्से देता, मीतिवी ख्यिराङला मुलुशी। मी बङीकी ङे मिङला वानी, ‘ङ ख्रीष्ट यिन।’, ‘तुजे चाला राङ लेम वे।’ सिनी सिवितो। यिने ख्यिराङ तिवी तिङ्ला तिङ माङ्योक। 9मक ग्यकुप ताङ हराङ हुरुङ कितुप ताम्ङे थोवु पेला ख्यिराङ ज्यिवा माकी। दी ताम्ङेतिवा गोमाला च्युङ राङ गोकिवी, यिने जम्बुलिङ शार्क्येक ना डोप ति मेङ्गिवी।” 10येलुङ येशूकी तिवाला सुङ्सुङ, “मिरिक मिरिककी तेन्दोकला ताङ ग्येल्खाप ग्येल्खापकी तेन्दोकला लानी मक शोर्कितो। 11तमा सयी ग्येर्पु ग्येर्पु ग्यकुप ताङ दासा दासाला ङ्यिमा मर्वु शरुप ताङ फेलुप नेजु मेलोक्पातिवा गिवितो। तमा नाम नेमा ज्यिवा लङ्गुप ताम्ङेतिवा ताङ हलेवु त ग्येर्पुतिवा छ्या देन्गितो।
12यिने दी तेरी ताम्ङेतिवा च्युङ्गुप सिनाङ गोमाला मीतिवी ख्यिराङला जिम्गितो, छेटाङ तेर्कितो, तमा ख्यिराङला यहूदी छ्योखाङ ताङ चोन्खाङला चेक तेकितो। तमा ख्यिरा ङला तेपा क्यावु तप्की तिवी ख्यिराङला ग्येल्वुतिवा ताङ रोमी ग्येला कितुप मी छ्येतिवी चिप्ला क्योल्गितो। 13यिने ती ति ख्यिरा ङे थोक्ला पङ्बु तेरुप पेला च्युङ्गितो। 14ती तप्की ख्यिराङ रङगी थोक्ला काङ सि गोकिवी सिनी गोमाला के पप माकी। 15च्यिलासिसिन ती पेला ङ ख्यिराङला लपुप ताम्ङे ताङ रिक्पा तेरिन, तुक क्यानी ख्यिरा चुका डतिवी साङ ख्यिरा ताम्ङेकी तेन्दोकला लङ मुथुपी, तमा तिवी ख्यिरा ताम्ङे टेके मिन सिनी सि मुथुपी। 16ख्यिरा पपाआमा, अच्युनुप, छेङ्गाछाली ताङ दाल्जातिवी साङ ख्यिराङला क्येन तेर्कितो, तमा तिवी ख्यिरा पर्ला ललाइला सेकितो। 17ख्यिरा ङला तेपा क्यावु तप्की तेरी मीतिवी ख्यिराङला ङ्यिङ्मर कितो। 18यिने ख्यिरा गोकी र्हे ङ्येङ्मा यी साङ तोर्नी मोडोवी। 19ख्यिराङ हम क्या देसिन ख्यिराङला नाम्साङ मिशिवु मिजी ङ्येकितो।”
येशूकी यरूशलेम ना डोप कोर्ला सुङ्गुप
(मत्ती २४:१५-२१; मर्कूस १३:१४-१९)
20“चो पेला यरूशलेम गारी गुरीला मक्मीतिवी चुपुप ख्यिरा थोङ्गिवे, ती पेला ती ग्येसा ना डोप तुजे ति चिप्ला राङ वानोक सिनी हाक्कोवा की। 21ती पेला यहूदिया लुङ्बाला वोतुपतिवा री नेवा टो डोशी, ग्येसा नाङ्ला वोतुपतिवा ति पाङ्ला थेन डोशी, तमा युलला वोतुपतिवा ग्येसा नाङ्ला मुशुक्शी। 22च्यिलासिसिन दी ति टि वोतुप कोन्छ्योककी सुङ तेरी छेवु पर्च्याकी तुजे यिन। 23ती तुजेला जु चेन्दी वोतुप पुम्पेजातिवा ताङ आङाला नुम तेरुप आमातिवाला मङ कले ख्येल्गितो। जम्बुलिङला छेटाङ ग्येर्पु ख्येल्गितो, दी मीतिवी खला कोन्छ्योककी पर्च्या फोकितो। 24ललाइला खुर्पा थ्वोनी सेकिवी, ललाइला ति जिम्नी लुङ्बा लुङ्बाला टिनी डिवी। तमा यहूदी मिन्दुप मिरिक यम्बातिवी यरूशलेमला खोरो ओङ्ज्येनला ज्याक्नी खोप्रे तुजे माछेवा सेक मेलोक्पा किवी।”
मी सेवु फेपुप कोर्ला
(मत्ती २४:२९-३१; मर्कूस १३:२४-२७)
25“तमा ङ्यिमा ताङ उला ताङ कर्मातिवाला ततिवा गिवी। जम्बुलिङला ग्येम्छोकी टेक्च्या ताङ ज्यिवा लङ्गुप बालापकी जोसालेन्सिन मीतिवा पप लानी यर्मिन मर्मिन डिवी। 26तमा मीतिवी जम्बुलिङला ख्येल वुङ्गुप छेटाङकी कोर्ला गोमाला के हाक्कोनी ज्यिवा लानी टेन्बा तोर्किवी, च्यिलासिसिन नामगी ओङतिवा तेरी योकिवी। 27ती पेला ङ मी पुज्युङ ति ओङ छ्येवु ताङ मोवा क्यानी मुक्पी खला वुङ्गुप ति मीतिवी थोङ्गिवी। 28चो पेला दी ताम्ङेतिवा च्युङ्गुप छोल्गिवे, ती पेला ख्यिराङ खोक लानी येर केला ल्हो, च्यिलासिसिन ख्यिरा थर्वा ति चिप्ला राङ वा वे।”
अन्जीरकी दोङ्बु नेसुर येन्देन
(मत्ती २४:३२-३५; मर्कूस १३:२८-३१)
29ती ज्युक्ला येशूकी तिवाला दी पे च्यिक शेन नाङ्सुङ; “अन्जीरकी दोङ्बु ताङ यम्बा तेरी दोङ्बुला ल्हो। 30दोङ्बी ज्योक थेन्सिमा ख्यिरा तीला खोरो राङ ल्हनी येर्वु थेन्दुप छाल्नोक सिनी हाक्कोकिवी। 31तुक राङ क्यानी ख्यिरा दी तेरी ताम्ङेतिवा च्युङ्गुप ति थोङ्सिन कोन्छ्योककी ग्येल्खाप ति चिप्ला राङ वानोक सिनी हाक्कोकिवी। 32वुतुङ के ङ ख्यिराङला टेङ्बो सिरिन, ती तेरी ताम्ङेतिवा माच्युङ्वा सेक्ला दी गिपा ना मोडोवी। 33स ताङ नाम ति तोर्नी डिवी, यिने ङे सिक्यावु ताम्ङेतिवा ति नाम्साङ तोर्नी मोडोवी।”
च्याङ्से देतुप
34“तुक क्यानी ख्यिराङ दाक दाक्पी थोक्ला च्याङ्से देता, सेम नोजु कितुप ताङ छ्याङ थुनी जेप ताङ मिजीकी थोक्ला पप कितुपला ख्यिरा सेम ख्येल माज्यी। मिसियाङ ती तुजे ति तर्वा दोके ख्यिरा हाक्माकोवा क्यानी ख्यिरा खला ख्येल्गिवी। 35च्यिलासिसिन ती तुजे ति तेरी जम्बुलिङला देतुपतिवी खला ख्येल्गितो। 36तुक क्यानी ख्यिराङ च्याङ्से देता, त च्युङ्गुप दी तेरी ताम्ङेतिवा नेसुर र्होक्नी मी पुज्युङकी चिप्ला लङ थुप्शी सिनी नरी मोपोर किसा।”
37ती पेला येशू ङ्यिमी गुङला ति यहूदी ल्हङाङला येन्देन नङ्गिनोक, तमा नुपला ति ग्येसा नेमा थेन्नी जैतुन पम्दोक सिरुप ते फेप्नी शासा ज्युकिनोक। 38तमा तेरी मीतिवा खोकी सुङ ङ्येन्दुपला टोपला टेताङ यहूदी ल्हङाङला गिनोक।
वर्तमान में चयनित:
लूका 21: xsrNT
हाइलाइट
शेयर
कॉपी
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
