Mātiu 5

Ko e Malanga he Moʻunga

1Pea ʻi he vakai ‘e Si̇̄sū ki he fuʻu kakai tokolahi̇́, naʻá ne ‘alu hake ki ha tafatafa mo‘ungá ‘o nofo hifo ai, pea ‘unu‘unu atu kiate ia ʻene kau akó. 2Peá ne kamata akonekina kinautolu ʻo pehē:

Ko e Ngaahi Monūʻia ʻo e Puleʻanga ʻo e ʻOtuá

(Luke 6:20-23)

3‟ʻOku monūʻia ʻakinautolu ʻoku ongoʻi masiva honau laumālié he te nau maʻu ‘a e Pule‘anga ‘o e Langi̇́.

4ʻOku monūʻia ʻakinautolu ʻoku tangi mamahi̇́ he ʻe fakafiemālie‘i kinautolu.

5ʻOku monūʻia ʻakinautolu ʻoku anga-kātaki̇́ he ʻe ʻonautolu ʻa māmani.

6ʻOku monūʻia ʻakinautolu ʻoku fiekaia mo fieinua ki he māʻoniʻoni̇́ he ʻe fakafonu kinautolu ai.

7ʻOku monūʻia ʻakinautolu ‘oku faimanava‘ofá he ʻe faimanava‘ofa kiate kinautolu.

8ʻOku monūʻia ʻakinautolu ‘oku lotoma‘á he te nau mamata ki he fofonga ʻo e ʻOtuá.

9ʻOku monūʻia ʻakinautolu ‘oku fakatupu melinó he ʻe lau kinautolu ko e fānau ʻa e ʻOtuá.

10ʻOku monūʻia ʻakinautolu ‘oku ngaohikovia koe‘uhi̇̄ ko e lotu moʻoni̇́ he ʻe ‘onautolu ʻa e Pule‘anga ‘o e Langi̇́.

11ʻOku monūʻia ʻakimoutolu, ‘oka ngaohikovi‘i mo fakatanga‘i mo lau‘iʻaki ‘a e ngaahi kovi kehekehe koe‘uhi̇̄ ko au. 12Mou fai fiefia mo loto māfana he ʻe lahi ange fau homou totongi ʻi he Langi̇́, he na‘e pehē tofu pē hono fakatanga‘i ‘o e kau palōfitá, ʻa ia naʻe ‘i mu‘a ‘iate kimoutolú.”

Ko e Māsima mo e Maama

(Ma‘ake 9:50; Luke 14:34,35)

13‟Ko kimoutolú ko e māsima ʻo māmani̇. Ka ʻokapau ‘e mole ʻa e konokona ‘o ha māsima, pea ‘e toe fakakonokona ʻaki ia ʻa e hā? Kuo ʻikai hano toe ‘aonga ki ha meʻa, ka ke laku pē ki tu‘a ke tāmoloki ‘e he kakai̇́.

14Ko kimoutolú ko e maama ʻo māmani, ko ha kolo ‘oku tu‘u ‘i ha funga mo‘unga, ʻa ia ‘e ‘ikai lava ke puli. 15‘E ‘ikai tutu ‘e ha taha ha maama peá ne fakafo‘ohifo ai ha puha. Ka te ne fokotu‘u atu ia ki ha tu‘unga maama ke maamangia kotoa ai ʻakinautolu ʻi loto falé. 16Ke pehē foki ʻa e ulo atu ho‘omou maamá ki he kakai̇́, ke hā kiate kinautolu ho‘omou ngaahi ngāue lelei̇́, pea nau fakamālōʻia ai ho‘omou Tamai ʻoku ʻi hēvani̇́.”

Ko e Fakakakato ʻo e Lao ‘a Mōsesé

17‟‘Oua te mou fakakaukau ko ‘eku haʻú ke fakataʻeʻaongaʻi ʻa e lao ‘a Mōsesé mo e ngaahi tohi ʻa e kau palōfitá. Naʻe ʻikai te u haʻú ke fakataʻeʻaongaʻi, ka ke fakakakato hono ʻuhingá. 18Ko e mo‘oni̇́ ʻeni ‘oku ou tala atú, ‘e mole ʻa e langi̇́ mo māmani, ka ‘e ‘ikai lava ke mole mei he Tohitapú ha fo‘i kohi pē ha fo‘i fakaʻilonga ‘e taha, kae‘oua kuo fakahoko hono kotoa. 19Ko ia, ʻilonga ha taha ‘e talangata‘a ki he fekau si‘i taha he ngaahi fekaú ni mo ne fakahinohino ʻa e kakai̇́ ke fai pehē: ‘e lau ia ko e si‘i taha ‘i he Pule‘anga ‘o Hēvani̇́. Ka ʻilonga ha taha ʻe talangofua ki ai̇́ pea ne ako‘i ia ki he kakai̇́, ‘e lau ia koe ko e lahi ‘i he Pule‘anga ‘o Hēvani̇́.

20He ʻoku ou tala atu kiate kimoutolu, Kapau ‘e ‘ikai ke fakalaka atu ho‘omou māʻoniʻoni̇́ ‘i he māʻoniʻoni ʻa e kau faiako Tohitapú mo e kau Fālesi̇́, he‘ikai ‘aupito te mou lava ke hū ki he Pule‘anga ‘o e Langi̇́.”

Ko e ‘Ita Tāmaté

21‟Kuo mou fanongo na‘e folofolaʻaki ‘i he kuohili̇́, ʻo pehē, ‘Oua ‘e fakapō; ʻilonga ʻa ia ‘e fakapō, ‘e ‘ave ia ki he fakamaaú. 22Ka ʻoku ou tala atu kiate kimoutolu: ‘Ilonga ha taha ‘oku ‘ita ki hano kāinga ‘o ui ia ko e vale, ‘e ‘ave ia ke fakamaau‘i. Pea ‘ilonga ha taha te ne ui hano kāinga, ko e ʻatamai vale, ‘e li̇̄ ia ki he afi ʻi Heli̇́.

23Kapau leva ‘oku teu ‘ave ha‘o me‘a‘ofa ʻo tuku ki he funga ‘ōlitá, peá ke toki manatu‘i hake ‘oku ‘ita hao kāinga ‘iate koe ‘i ha me‘a. 24Tuku atu pē ho‘o me‘a‘ofá he ve‘e ‘ōlitá, ka ke ‘alu ‘o tomu‘a fakalelei mo ho kāingá, peá ke toki foki mai ‘o ‘oatu ho‘o me‘a‘ofá ki he ‘Otuá.

25Kapau ‘e tukuaki‘i koe ‘e ha taha ki ha kovi, pea fei mo fakalelei mo ia he kei faingamālié. He ka faifai pea mo a‘u ki he fakamaaú, pea te ne tuku atu ‘e ia koe ki he kau polisi̇́ pea ‘e ‘ave koe ki he ‘api pōpulá. 26Ko e moʻoni̇́ ʻeni ʻoku ou tala atú, Te ke nofo ai pē ‘i pili̇̄sone, kae‘oua kuó ke totongi kotoa ho mo‘uá.”

Ko e Nofo Mali

27‟Kuo mou fanongo na‘e tala ʻo pehē, ‘Oua ‘e tono mali. 28Ka ʻoku ou talaatu kiate kimoutolu: Ka sio ʻe ha taha ki ha fefine ʻo holi kovi ki ai, kuó ne tonoʻi ia ‘i hono lotó.

29Pea kapau kuó ke fai angahala he sio ho mata to‘omata‘ú, pea taʻaki ia ‘o li̇̄ʻaki. He ‘e sai ange ke mole hao kupu ‘e taha, ‘i hano li̇̄ kakato ho sinó ki Heli. 30Pea kapau kuó ke fai angahala he ngāue ʻa ho nima to‘omata‘ú pea tu‘usi ia ‘o li̇ʻaki! He ‘e sai ange ke mole hao kupu ‘e taha, ‘i hano li̇̄ kakato ho sinó ki Heli.”

Ko e Vete Mali

(Mātiu 19:9; Ma‘ake 10:11,12; Luke 16:18)

31‟Pea kuo mou fanongo na‘e tala ʻo pehē, ‘Ka ai ha taha te ne fievete mo hono mali̇́, kuo pau ke ne ‘oange ha tohi vete mali. 32Ka ʻoku ou tala atu kiate kimoutolu: ‘Oua ‘e vete mo ho mali̇́, tukukehe ‘i ha‘ane fe‘auaki. Ka ke ka veteʻi ho mali̇́, ko ho‘o tuku atu ia ke tonoʻi ʻe ha taha. Peá ka ai ha taha ‘e toe mali mo ia, ko e tono fefine ia.”

Ko e Fuakava Loi

33‟Kuo mou fanongo na‘e folofolaʻaki ʻi muʻa ʻo pehē, ‛‘Oua ‘e fuakava loi, ka ke fai ‘i he ‘ao ʻo e ‘Eiki̇́ ʻa e ngaahi me‘a kuó ke fuakava ke fai̇́.’ 34Ka ʻoku ou talaatu kiate kimoutolu: ‘Oua te mou fuakava ki ha me‘a ‘e taha! ‘Oua ‘e fuakava ki he langi̇́, he ko e ‘afio‘anga ia ‘o e ‘Otuá, 35pē ko māmani, he ko hono tu‘ungava‘é ia. ‘Oua ‘e fuakava ‘i Selusalema, he ko e kolo ia ‘o e Tuʻi fakalevelevá. 36‘Oua foki te ke fuakava ‘i ho ʻulú, he ‘oku ‘ikai te ke lava ke liliu hao tu‘oni lou‘ulu ‘e taha, ke hinehina pē ‘uli‘uli. 37Ka ʻoka ke ka fai leva ha‘o lea, peá ke ‟‘Io” ʻi hoʻo ʻIo pea ke ‟‘Ikai” ʻi hoʻo ‟ʻIkai̇́.” He ka ke ka toe tānaki atu ki ai mo ha me‘a, ko e tupu ia mei he tēvoló.

Ko e Sāuni

(Luke 6:29-30)

38‟Kuo mou fanongo na‘e folofolaʻaki ʻo pehē, ‛Ko e foʻimata ke totongi ʻaki pē ʻa e foʻimata, mo e foʻi nifo ʻaki pē ʻa e foʻi nifo.’ 39Ka ʻoku talaatu kiate kimoutolu ʻe au: ‘Oua ‘e sāuni ha kovi ‘oku fai mai kiate koe. Ka ʻoka sipi‘i ‘e ha taha ho kou‘ahe toʻomataʻú, peá ke tuku atu ki ai mo ho kou‘ahe toʻohemá.

40Peá ka ‘ai ‘e ha taha ke mo hopo koeʻuhi̇̄ ko ho soté, ‘oange maʻana mo ho koté. 41Peá ka ‘i ai ha taha te ne fekauʻi koe ke ke toʻo ʻene kavengá ‘i ha kilomita ‘e taha, peá ke toʻo ia ke kilomita ‘e ua. 42Ka fai atu ha kole, peá ke tali. Pea ʻoua naʻá ke taʻetali ha kole nō paʻanga meiate koe.”

Ko e ‘Ofa ki ho Fili̇́

(Luke 6:27,28,32,36)

43‟Kuo mou fanongo na‘e folofolaʻaki ʻo pehē, ‛‘Ofa ki ho kāingá, kae fehi‘a ki ho fili̇́.’ 44Ka ʻoku ou talaatu kiate kimoutolu ʻe au: ‘Ofa ki homou ngaahi fili̇́, pea lotua ʻa e kakai ‘oku faikovi mai kiate kimoutolú; 45Ka mou hangē ai ko ho‘omou Tamai fakahēvani̇́. He ‘okú ne finangalo ke hopo ʻene laʻā ki he kau faikovi̇́ mo e kau failelei̇́ fakatouʻosi, mo ne tuku ke tō ʻa e ‘uhá ki he kau faikovi̇́ mo e kau failelei̇́ foki. 46He kapau ‘oku mou ‘ofa pē ki he kakai ‘oku ‘ofa kiate kimoutolú, ko e hā ha totongi ʻoku mou maʻu ai̇́? ʻIkai ʻoku fai pehē foki ʻa e kau tānaki tukuhaú? 47Pea kapau ‘oku mou fakalea pē ki homou ngaahi kāingá, ko e hā ha meʻa oku mou lelei hake ai? ʻIkai ʻoku fai pehē mo e kau taʻelotú foki? 48Ko ia, te mou haohaoa ʻakimoutolu, ‘o hangē foki ʻoku haohaoa ho‘omou Tamai ʻoku ʻi Langi̇́.”

वर्तमान में चयनित:

Mātiu 5: TCNT

हाइलाइट

कॉपी