LUK 20
20
Jisu Rutan Mlei thu mdo Khewl
1Mma ngi luwbuk Inn thu nii khatti purchuk da, kṭha paumin mparyaam slii arlaanni, thiimpu kinreel rek, Nowlam chukpu rek, ungu kver rek Mhin arhang lamda. 2Ungta Mhin the lamda, “Nangva talu rutan ni hava lea ado tlot; mata hava rutan akpii miia ku, mhai the pik in?” 3Mma ngi arthawng da, “Nei rukva pau khat aju khewl inni; tun mhai the pik in, 4baptis kuptlot Johon na parwaan ki mo mata dulti mii rek hinki da?” 5Ungta mmaanni khat leh khatti karseel psuk lamda, the lamda, “ ‘Nenni parwaan ki pi’ ndit inbi, Mma ngi kthera, ‘Talu lei naanva mhin rin chmaan ti?’ di donle kthera. 6Pdainu nenni ‘Dulti mii rek hinki pi’ ndit inbi, mii mkheng ngi lung ngi mii kdeeng raan; mleija Johon na khulpu khat pi dida mii rek va bin da.” 7Ava leiji mmaanni theda,tva ki tdit neenni dei maan ring kdingi arthawng lamda. 8Ungbi Jisu ngi mhin inni theda, “Nei rukva talu rutanni hava lea kdo tlot tdit athe pik ni maan ring.”
Rikrou Bil Knum rek Paupurtol
9Ungta Mma ngi mii rek hin hava pau purtol li kthe pṭhunda: “Miilai khatti bil thung ngi rik rou phunda, knum rek hin sil na thida, khuwpaam ktlok tha mpha ksotti pjiin chda. 10Mpha mve thungta, mma ngi knum rek hinki rik rou thei mruk mdo piik nlamra, msra owr khat mhin inni va siida; pdainu knum rek va bun thida do khat lee kipsin kma vansi pthii lamda. 11Ungta mma ngi msra owr khat nowl vasiida, mma rukka bun lamda, mning kakjak rakki, mkhut thu do khat lee kipsin kma si pthii lamda. 12Ungta mma ngi mukdum na sii nowlda, hava mma ava sul purnul lam thida var pthii dok lamda. 13Ava dilli rikrou kpupa ngi theda, ‘Neiji talu tlo nik damma? Kwonsat lo kchapa neiji vasiini; mma ava kakjat kcha ruk kro lam.’ 14Pdainu knum rekki mdee in thungta, mmaanni msingreel inni the lamda, ‘Hava lamchi pipa, nenni eayou inche, mbi alrou mkheng nga nen ndo kurthuwk ra.’ 15Ungta mmaanni rikrou nowm bengi var pthii lam thida, eayou lamda. Ava mkurthut bi, rik rou kpupava tak ktlo rang? 16Mma ngi arva donle knum rekka ke ea krep ra, ungu rik rou bil ava ktlok hin kpii pthiira.” Mmaanni hava maryaak in thungta, the lamda, “Isowr va ro nime!” 17Pdainu Mma ngi suw lam thida theda, “Ava mkurthuttu hava mdo kjitta talu da:
‘Inn ksapa do pthlei lung ava katti markil ki kcho bul kurthuwkka.’ 18Lung ava leenni ktluw mii pum ktaija mikṭik mikṭikki kukui chra; pdainu hava tlaak na ku mii khat ava purvutti kjuwng chra.”
Khasna Kpii Mlei thu mdo Khewl
19Mpha ava kat thung ngi thiimpu kinreel rek leh Nowlam chukpu rekki Mma ava khut kjownni kjowng nuwm lamda, pdainu mmaanni mii rek ṭi lamda; mleija hava pau purtolli mdo the ava mmaan ki mraal mdo piik na tdit dei lamda. 20Ava leiji mmaanni Jisua mpau the thu mdo kjown nraan sut pṭoi lamda, ungta rutan kthloi rek leh paamkowl avaki kpupa rek hin Mma ava mdo parlaan nraan, tuprut pau kloura plung klut do tlot ktlo mii si lamda. 21Mmaanni Mhin the lamda, “Chukpu Nangva kindit deekki theti, ado purchu, ungu ksan ksui tlo mti, pdainu Isowr lam kindit purchuk tinu ava neenni kdee chaak in. 22Keisar hin khasna tpiik ava Nowlam do rot mo mata do rot pme?” 23Pdainu mmaanni kṭha do tlot mdo tlot in ava Mma ngi deida, mhin inni theda, 24“Thiir summa mhai piin. Hava ku mdutta, ungu ku miing mikjitta?” Mmaanni theda, “Keisar.” 25Jisu ngi mhin inni theda, “Keisar do rek ava Keisar hin apiin, ungu Isowr do rek ava Isowr hin apiin.” 26Ungta mii rek ma am daat arlaanni, mpau the leiji kjowng pchaang lamme; pdainu mpau arthaanni ngak chlam da rim kdi am lamda.
Kdiyou thungki Kring Kardel Mlei thu mdo Khewl
27Ungta kdiyou thungki kring karheel ame dida kthe sadusi rek mii angṭhe Mhin arva lamda. 28Ungu mmaanni Mhin pau khat khewl lamda, the lamda, “Chukpu, Mousi va hanto mikjit pik inda, mleija u pa khatti snu lou thi sora nao khat lee kuplu kcha mlaiji mdiyo chaak bi, mnaopa ava ngi mnumei ava lou donle, mu u pa tummi nao mdo pluk pik ra. 29Tunva unao tikheu rek am lamda; ru kri reep ki ngi snu khat louda, ungu naole khat lee kuplu kcha mlaiji diyou chda; 30Ungta miknit na 31ungu mukdumna ngi mma ava louda, anto hep daatti mtikheu kheu inni nao khat lee kthloi kcha kma ngi mkheng inni diyou chlam da. 32Ava diltha snu ava ruk diyou chda. 33Ava ngi mlei kurthuwk da, kring karheel nit thungva snu ava ku numei rang? mleija mtikheu kheu inni numei purthut sap lamda.”
34Ungbi Jisu ngi mhin inni theda, “Hava dultipaam naole va phal lamda innknei snu klou tlo lamda; 35pdainu karvangra kum thung ngi ka am rang rek, kdiyou thungki kring karheel kurhui mmaan ava kphal tlo me ungu innknei snu klou ame. 36Mleija mmaanna kring karheel naole mkurthut lei inni, diyou pchaang lam nime, mmaan ava Waan tamsii rek tu kinṭimmi, Isowr naole kurthuwk ra. 37Ungta kdiyou rekka kring kardel kat, mleija Mousi rukva chanchiim mei Kṭuwng phel ava thung ngi tdet da, mma ngi Mukpu mo own mpha thu, Abraham ki Isowr, Isek ki Isowr, Jakob ki Isowr, dida ownda. 38Tunva mma ava kdiyou rekki Isowr pme; pdainu kring ki Isowr; mleija mkheng nga Mma thu kring.” 39Ungbi Nowlam chukpu rek angṭhe ngi theda, “Chukpu, kṭha deekki athea.” 40Mleija mmaanni kurnowl bong da Mhin paukhewl nuwm lamme.
Masija Mlei thu mdo Khewl
41Pdainu Mma ngi mhin inni theda, “Tak heppi Khrista ava mmaan va Devid Chapa pi mdo dit inda?
42Mleija laa thung ngi Devid mdak katti theda,
‘Mukpu ngi neiki Mukpu hin theda,
43Neiji nah arawlmii rek,
akhu tingi kthiik du
khim khai,
Nei kukhut chang ktong tha ko ong.’
44Devid ti Mukpu dida mdo
own leiji;
tak heppi mma Chapa rang?”
Jisu ngi Nowlam Chukpu rek Mraal Kpii ngi Pau mdo Kham
45Ungta mii mkheng ngi maryaak slii arlaanni, Mma ngi siikhu rek hin theda, 46“Phrik kturown tu kchet nuwm, mii kurku na bajaar mun thung ngi salaam kngei, ungta synagog rek thung ngi longkhom kṭha kngei, ungu kmaal thung ngi takjat mun kngei, 47meikhu owr da, mi inn thungki klowng, ksaangpa ngi kṭhil kcha do tlot ktlo, Nowlam chukpu rekka chek asin chaan. Mmaanna kheel sii ki mraal karlaang chlam ra.”
वर्तमान में चयनित:
LUK 20: LAMKBSI
हाइलाइट
शेयर
कॉपी
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
