LUK 18
18
Meikhunuh leh Kekṭewlpa Paupurtol
1Ungta Jisu ngi siikhu rek hin paupurtolli theda, mleija mpha ktai thu mmaanni plung kpinle kma mdo ṭhil chaak nraan kurthuwk. 2Mma ngi theda, “Khuwpii khat thu Isowr kṭi kma, mii ruk tut ksut pik kma kekṭewlpa khat amda. 3Ungta khuwpii ava thungva meikhunuh khat ruk amda, mma ngi mhin thleng kchok da, mma kusnuwm kma rek phuw mdolo pik chaak nra the chda. 4Mpha mruk thu mma ngi mat da, pdainu am bong thida mma ngi theda, ‘Neiji Isowr ṭi maang, mii ruk tuk sut maang, 5anto daat joso hava meikhunuh va kning mpumul reenna, neiji mphuw lo pik daat ni, anto mkurthut mabi mma ngi thleng thleng donle kning kpumul ra.’” 6Ungta Mukpu ngi theda, “Rinkindit kma do kṭewl ava talu tdit aryaa chaan. 7Ungta suwn jaanni Mhin kṭap Mma do kchol rek phuw ava lo pik nime mo? Roi ksotti kikrem pik lam rang mo? 8Neiji akthe pik inna, Mma ngi kbeiji mphuw klo pik chlam ra. Anto daat joso Mii Chapa ngi murjun mpha thu, dultipaam thung ngi krin kcha mii kpha rang mo?”
Pharisi leh Khasna Klou rek Paupurtol
9Ungta mii mursonna do ksi pme dida kbin, ungu mdaksaa daat rinkindit ping ngi dida kilrin kcha mii angṭhe hin Mma ngi hava paupurtol rukva theda; 10Luwbuk Inn thu kṭhil chra miilai knii hangda, khatta Pharisi ungu khat ava khasna klou. 11Pharisi ngi rip da mdaksaa hanto kirthe da ṭhil chda, ‘Isowr, akpanpaak chaakka, mleija nea mii murson lulu pmaang, hangmal, kindit kma, snu ktukui, mata hava khasna klou miilai lulu ruk kurthuwk maang. 12Neiji hapta khat thung ngi then vei knii ngowl nu, kdo phaak chaak mkheng thungki tholowm ado kpiik chaak.’
13“Pdainu khasna klou mii ava ngi lam kla ngi rip da, parwaan hansuw da mmik kapkhap pchaang kma ngi, muplung tpeengda, theda, ‘Isowr, pnu kirvei kcha neia aplungnee mhai tdet cha!’ 14Neiji naan hin kthea, hava miilaiji mdaksaa ava mii murson hinva kindit kdingi mi inn tha jungda; mleija mdaksaa karkhiing nuwm mii pum ktai ava kupchowm pthiira, pdainu mdaksaa kchowm riimmi ka am mii ava kikhiing ra.”
Jisu ngi Kmo sisi rek Phowl Kṭha mdo Piik
15Tunva Jisu ngi mdo kmei pik chaak nlam ra kmo rek sisi mmaanni arhai ṭhi lamda; ungu siikhu rekki ava mdee in thungta arkowk lamda. 16Pdainu Jisu ngi own lam thida, theda, “Kmo rekka ki hinni arva chdaat lamso, khaan maan, mleija Isowr Kruwngpaam ma hava mmaan lulu thung ngi ka am. 17Kinditti, Neiji ahin thaanni kthea, Isowr Kruwngpaam ava hava kmo rek lulu ngi ku mii khatti marlaan chaak mabi, lut chip pchaang nime.”
Suwangpa Khat
18Ungta paam kpupa khatti Jisu hin theda, “Kṭha, Chukpu, kṭuw knai kma ki rinkhu kdo phaak chaak nrangki neiji talu tlo nik da?” 19Ungbi Jisu ngi mhin theda, “Talu leiji kṭha diti ado to ownda? Isowr kma donle kṭha ku khat lee ame. 20Paureen rekka nang ngi ado dee: ‘Nala tukui chma, mii eayou ma, pruma, kindit kma thu ripik ma, apah leh anuh akjat cha.’ ” 21Ungta mma ngi theda, “Hava mkheng nga neiji keksenao daatki kdo pṭoi chaak.” 22Ungu Jisu ngi ava maryaak thungta, mhin theda, “Kvaat do khat ka am daatta, ado thloi mkheng ajur dok thira sra hinni athem pik, ungta parwaan tha alrou nang ngi thloi chna di; ungu arvara Nei kdil aṭoi cha.” 23Pdainu mma ngi hava maryaak thungta, suwang mkurthut leiji kdung ngi muplung pja chda. 24Jisu ngi mma msut chunni theda, “Suwang rekki Isowr Kruwngpaam mlu rang nga tija thung ngi kparsa chdaat ta! 25Mleija suwang miilai khatti Isowr Kruwngpaam mlu rang kchang nga, ut khatti prou khor thung ngi mlu ava ngi ko ol sii ra.” 26Karyaa mii rekki theda, “Ava mkurthut tu mdo ktlan rang nga kule rang da?” 27Pdainu Mma ngi theda, “Mii rek hin kurthuwk pchaang kma lu ava Isowr hinva kurthuwk lu.” 28Ungta Pitor ri theda, “Asuw, neenni ki inn ma pthii thiinnu Nah dil kdo ṭoi chaak in.” 29Ungbi Mma ngi mhin inni theda, “Kinditti, Neiji ahin thaanni kthea, Isowr Kruwngpaam tummi inn,mata mnumei, mata mu u mnao, mata mnuh mpah, mata mnaole kma pthii ku mii khat ma ambi, 30mma ngi hava mpha thu mtum ava kheelli kpha chra, ungu karvang ra kum thung ngi kṭuw knai kma rinkhu karlaang chra.”
Jisu ngi Mdiyo nra Mlei thu Mvei Kdumna mdo The
31Ungta sowm lei knii ṭhida Mma ngi mhin inni theda, “Asuwn, nenni Jerusalem kphara kahang in min, ungu Mii Chapa mlei thung ngi khulpu rek do kjit mkheng ava kurkhum ra. 32Mleija Mma ava ktlok chati rek khut thung ngi kparlaan pthii ra, ungu kipnii chaak lamra, ungta ningkja kuhui rakki tlo lamdonle kupthot lamra; 33mmaanni prei lam donle ke eayoura; ungu mnii kdumna nitti kring kardel ra.” 34Pdainu hava lea mmaanni khat lee pre deipandi chlamme; mdo the ava mmaan thungki kurdowl kcha a, ungta Mma do the ava talu tdit mmaanni dei chlamme.
Jisu ngi Then Kṭhil Miktot Khat mdo Pdam
35Jisu ngi Jerikho mhai nai thungta, then kṭhil miktot khat ava lam siir ri ko ong daat da. 36Ungu kurtuwl mii rek kchet mma ngi maryaak thungta, hava talu leiki da kdingi mma ngi mii khewl chda. 37Mmaanni mhin theda, “Nasareth ki Jisu kthleng.” 38Ungbi mma ngi owngda, “Devid Chapa, Jisu, aplungnee mhai tdet cha!” 39Ungu mma dusukki ka am mii rekki arkowk lamda, rim kdi jiam, kdingi the lamda; pdainu mma ngi kheel set setti owngda, “Devid Chapa, aplungnee mhai tdet cha!” 40Ungbi Jisu ngi rip da, ungta Mma hinni mdo arhai ṭhi nraan paureenda; ungu mma ngi mhai nai thungta, Jisu ngi khewl da, 41“Talu ado ktlot pik ra angeija?” Mma ngi theda, “Mukpu, khuw dei chni.” 42Ungbi Jisu ngi mhin theda, “Khuw adei cha; ado rin chaakki kdam im pti.” 43Ungta tun kat daatti mma ngi khuw deida, Isowr panpaak da mdil ṭoi chda, ungu mii mkheng ngi ava mdee thungta Isowr panpaak chlam da.
वर्तमान में चयनित:
LUK 18: LAMKBSI
हाइलाइट
शेयर
कॉपी
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
