THA 26

26
Polnii Agripa doito katam sam
1Agripanii Pol dakii tamle, “Nang gopum sek jangpiinii tam katu mazhiipyii takle.” Teitinglang kak Polnii bah hampatsii mpougo dangtang karam sam tam tutakle.
2“He sagong Agripa, guphyii- ryiikii Jehudimeinii tam kamashyii sam hang mah kaang ki aito tingnei leimik godoito gumah dangtang karam sam tam tang karam ai gudoi kabilesii maningle. 3Kadapokii Je- hudimei mah kanat kanhii sateichii siiset hangtei nangnii kisii katimei hangniniile, teijangpiinii kamage kido gusam ai shiisei matu tang karam jangpii Inii godato khang leile.
4“Inii tiina kaleidou sekto kada takumpiinii lungtupo katu tei Jehudimei hangnii tile. Inii gunamdi kito sateichii Jerosalem kito kada takumpii gu tiilung hang ai lungpipo katu tei ahnyiinii tile. 5Ahnyiinii sakchyii pyii seinyii lepochiinii, nyii- mah kanat kito kisii tuksii swikalei bemei taitei swisii Inii Farasismei hangninii tiisii lungtule katu ndouto n-gu tile. 6Sateichii aitoinii nyiipei nyiipaomei dakii Saraanii pyiitang lesii riishii tiipyii kabam gotei doutang lesii maning kamalum kito n-gu samtak tiitang karam jangpii I-aitoi aiki sat leile. 7Teitei doutang karam jangpii nyii lui keariisiina- khiinii tinghum tingna Saraago lungswi haisii malumsii riitale; riita kalei ai kaang jangpiinii he sagong, gu phyiiryiikii Jehudimeinii tam mashyii leile. 8Kataimeigo Saraanii tiimaringpyiile katu ai gonyiinii kadajangpii malumpei wolaksii leipo?
9“Nazaret ki Jisu zeigo mazhii kasu tha hangtei tiitang karamlesii Inii gupum sekpiinii tiigatpii maningle. 10Sateichii teitiisii Inii Jerosalem kito aitiisii tiile, sateichii kanat kanhii kajum Tingdimei dato pumtei dousii, kamatei meihang go kabang kikii kai aitakle sateichii ahnyiigo kagi tinglang kak Inii ahnyii phyiiryiikii gumah kama- zhiido pyiile. 11Sateichii Jehudimei ndwihang kito ahnyiigo tiikamagesii kanat kanhii go tam kamashyii tei Inii tiimatule; sateichii ahnyii phyii- ryiikii kisii tiirakarhiimei takum- piinii meiki sazyii kito katangpii ahnyiigo baasii tiikamage pyiile.
Polnii mpou lung kali kalumah rasam katam
12“Aitiisii Inii kanat kanhii kajum Tingdimei dato pumtei ninado mwija kapyii larek tei kaswisii Damaskas ki katang tatleibangpii, 13tingna leimik asumkii, he sagong, leimik sung kisii vakabi sating gamto kava hangninanii n-gudo sateichii n-gu kaswisii tat kaleimei hang godo pwidito va magui kalu tei Inii ngoutakle. 14Sateichii nyii hangnii sazyii koumang sek-kii, ‘Sol, Sol, nangnii n-gu kadajangpii tiikamage leipo? Kuitu gamki gopipii kapiitiit gojangpii kahungle, sii gudakii Hebru latpii katam rok hangninii Inii shiile.’ 15Teito Inii tamle, ‘Nang tapo, Bangpii?’ Sateichii Bangpii tamle, ‘Inii nangnii tiikamage kalei Jisu teile. 16Nlenii gungtusii gopi gam sat tolo; kadaponii aijangpii Inii godakii mangou leile, katunii nangnii n-gu ngoukalu sateichii Inii godakii mangou tang karam tei kaang kito nga kangado sakchyii kapyiido n-go tiimatu tangle. 17Golui kak kito sateichii lui kakimei hang kak kito Inii n-go kaleipyii tangle; 18ahnyiinii kamyii kito kava ki sateichii sara kashyii mah teimaham kito Saraa Bangpiida nlaigongsii kem kalei kapyii sateichii n-gu kamalum paikito Saraanii kalai kalumei kak kito bam doumatu tang karam jangpii, Inii n-go ahnyii mik rak matutang karam jangpii ahnyii dakii langkai leile.’
Polnii mpou ngam jangpii katam
19“Teijangpiinii, he sagong Agripa, sating gamto mangou kapyii tei Inii swimakle makle, 20Nlenii karei reisang kito Damaskas kito kaleimei dakii tei taito Jerosalem kito kaleimei dakii, Judiya sazyii hang kikii sateichii lui kakimei dakii ahnyiinii Saraada ngaryii gong tang karamle ninado lung kali kalumah malum kabui tha tei tiitang karamlesii Inii tam ralipyiile. 21Ai kaang jang aipiinii Jehudimeinii n-gu Saraa kamaning kilungto jum wosii gitang karam jangpii tiitule. 22Teijangpiinii Saraa dato tiikaha tei dousii, kacheng kadihang dakiido sakchyii pyiisii tingnei katang Inii sat leile; 23Kristanii kada takumpii kamage kalak leh tangpo, sateichii mpounii kada takumpii katai kito ringkhii karei tiisii, mpou lui dakiido, lui kakimei dakiido kalei kapyii kava rasam ai tam ralipyii tang karamlesii lungkakalingmei hangniido, Moses- niido pat tang karam tam kabam sam teisupiinii samah kado Inii tam makle.”
24Sateichii mpounii dang tang karam jangpii sam tam leibangpii, Festasnii rok sagoisii tamle, “Pol, nang n-gok leitakle, gomah hangkii rali kalu teipii n-go tiirampou aitakle.”
25Nlenii Polnii tamle, “He teima- ham kadipii Festas, I n-gok makle, nlenii Inii kasang kamanoi samtei tam leile. 26Kadaponii Sagongnii ai kaang hang ai tiziile sateichii Inii mpou dakii samah kado adoi kadang gasii tam leile; kadapochiinii Inii malumle katunii, aihang kito hangninii kado mpounii tikamasak gale, kadapokii tha ai mei kaga nito tiimakle. 27He sagong Agripa, nangnii Lungkakalingmei go malum makpo? Nangnii malumle Inii tile.”
28Agripanii Pol dakii tamle, “Dwi kalei tinglang aikito nangnii n-gu kristen tiimatu wobui lesii maningpo!”
29Sateichii Polnii khekalatle, “Tinglang duikado thang kado nang roisupiinii, tingnei leimik gusam shii kalei meihangniido, bah sagyii rangkat aisupiinii, Inii tiikalei ai takumpiinii tiimatu tang karam jangpii Inii Saraa dakii kariita mareile.”
30Teito sagong teiniido, Governor teiniido, Barnis niido sateichii ahnyiigo kaswisii bam kalei meihang teiniido gungtu sat totakle; 31sateichiiahnyiinii tatpatsii hang- ninanii hangniniigo karashiile, “Mei sapfii mpou aipou ainii katai mak-kii reng pei kamajyii kama samah kado tiimakle.” 32Sateichii Agripanii Festas dakii tamle, “Mei aipou ainii sagong Kaisar dato samtak tiitang karam jangpii nlailoisii khangloi sulepochiinii mpougo mpatpyii buitakle.”

वर्तमान में चयनित:

THA 26: NAG2

हाइलाइट

शेयर

कॉपी

None

Want to have your highlights saved across all your devices? Sign up or sign in