NASEPTE 7
7
Stephan Thugenna
1Chun, Thiempu Lienpen chun Stephan kawmah, “Zie thu haw hi a dik em?” ti’n a dawng a.
2Chun, Stephan chun a dâwng a, “Suohpihte haw, upate haw, ngaitiem u! Ei suonpau Abraham, Haran khuo a a um maa, Mesopotamia gama a um lai khan, Lopina Pathien chuh a kawmah a hung kilak a,#Tsb 12.1 3a kawmah, ‘Na khuo leh na chite lak apat pawt inla, gam ka hun etsakna ding lam ah chieh ah,’ a ti a. 4Tichun, amah chuh Kaldai haw gam apat a chiehdawk a, Haran khuo ah a va um ta a. Chun, a pa a thih nung in, tak apat chuh, tu a na umnau khuo lama hin Pathien in a pemlut sak ta a.#Tsb 11.31; Tsb 12.4 5Himahleh, taka hin vang chuh, bangmah mun luoh ding a kêngpêk ngakna kham le a pie puoh a; himahleh, amah leh, a nunga a suonte chana go dingin piek a tiem a, cha a na neih ma him inle. 6Chun, Pathien in zie tawbang hin a gen a: ‘A suonte chuh mi gam ah kum zali chengun tin uh, mi’n suok in mang un tin uh, sugimthei un au,’ ti’n.#Tsb 15.13-14 7Chuleh, Pathien mah in, ‘Suok a nei dingte nam chuh ken hun ngaihtuoh ing ka ting, chun, zie zawh chuleh hung pawt un tin uh, zie mun ahin kei dingin sem un au,’ le a ti a. 8Chun, Pathien in a kawmah zektan thugawlh le a pie a. Khutichun, Abraham in Isak a hing a, a ni giet ni chun a zek a tan sak a; Isak chun Jakob a hing a, Jakob chun chi sep zakte sawm le nih te khah a hing ta a.#Tsb 17.10-14; Tsb 25.26
9“Chun, chisep zakte khan Joseph a mitthîp u a, Aigupta gam lam ah a suok in zuok tau a, himahleh, Pathien a kawmah a um a,#Tsb 37.11, 28; 39.2, 21 10a dahum thawkna chengah a hukdawk zel a. Aigupta gam leng Pharaoh le a lungsiet sak a, miching tak ahi tih le a hetsak a, tichun, amah chun, Aigupta gam leh a In a mi chengcheng chungah lawiupa’n a siem ta a.#Tsb 41.39-41 11Tichun, Aigupta leh Kanaan gam chengcheng achun kiel a hung um a, gimtheihna nasatak a hung tung ta a. Ei uh ei suonteu chun nek ding himhim a mu zo ta puou hi.#Tsb 42.1-2 12Himahleh, Jakob chun, Aigupta gam ah nek ding a um hi tih a zak phet chun, ei-uh ei suonte chuh a sawl dawk a; zie chuh a chieh masak na pên uh ahi. 13Chun, a nihvei chieh nau achun, Joseph chuh a suohpihte kawma chun a kihetsak a; tichun, Joseph suohpihte chuh Pharaoh a hetsak tau hi.#Tsb 45.1 14Chun, Joseph chun, a pa Jakob leh a suohpihte cheng chuh a sap sak a; amau haw chuh sawmsagih leh nga ahiu hi.#Tsb 46.27 15Tichun, Jakob chuh Aigupta gam ah a va chieh a; tak achun amah leh ei suonteu chuh a thi tau hi.#Tsb 46.1-7 16Chun, a luong chuh Sekem khuo a zawn tung u a, Abraham in Sekem khuo a Hamor chate laka thân, dangka suma a châwk akhan a vui tau hi.#Tsb 23.3-16; 33.19; 50.7-13; Jos 24.32
17“Chun, Pathien in Abraham kawma thu a tiem khah, a tun hun a hung naih phetin, mipite chuh Aigupta gam achun a hung pung u a, a hung tam deuh deuh tau a.#Pdn 1.7-8 18Joseph helo, leng dang a hung um tieng khan 19Zie pa chun I chiteu chuh lepbawl in, ei uh ei suonteu chuh a bawlsie a, a chasen hawu khat chale hing lo dingin a paih dawk sak sek a.#Pdn 1.10-22 20Zie lai chun Mosi a hung pieng a, a mel a hawih mah mah mai a; a pa In ah tha thum a vak u a, 21chun, In apat a paih dawk phet un, Pharaoh chanu’n a kilak a, amah cha dingin a kivâk ta a.#Pdn 2.3-10 22Tichun, Mosi chuh, Aigupta gama mite chitna chengcheng a sinsak tau a, a thu leh a thilhih ah a lopi mah mah ta a.
23“Chun, amah chuh kum sawmli a hihin, a suohpih, Israel suonte chuh va vehthak a guo a.#Pdn 2.11-15 24Chun, a lak u a mi khat, Aigupta mi khatin a sukgimtheih lai a mu a, a panpih a, sukgimtheih thuokpa phu chuh a laa, Aigupta mi chuh a that ta a. 25(Mosi chun, amah khut in Pathien in amau haw a hukbit hi tih a suohpihte’n a he ding u aw, tih a ngaihtuoh a, himahlele, a he puoh ngâl u a.) 26Chun, a zingin, amau laka mi nih, a kisuol pêt un a kawmuh a hung tung a, ‘Pute haw, suohpih khat na hiu hilo maw, bangati a diklo taka kibawl?’ ti’n châm a guo a. 27Himahlele, a inveng chunga thil diklo bawl zawpa chun Mosi a sawn dawk a, ‘Ka chung u a, lawiupa leh, vaihawm dinga kuo a hun siem?’ 28‘Thangni a Aigupta mi na thah guol a kha thah nei guot ahi maw?’ a ti a. 29Zie thu ziek chun Mosi a tai mang a, Midian gam ah a va thâm zing ta a, tak achun chapa nih a nei den ta a.
30“Chun, kum sawmli a hung kivel phetin, Sinai tâng gamthip a nawnglak ah, mei kuong lak ah vânsâwlchâk khat a kawmah a hung kilak a. 31Mosi’n a muh chun, a thil muh chuh mak a sa mah mah a; chun, en dinga a va naih lai in Lalpa aw’n, 32‘Kei, nang hun suonte Pathien, ka hi hi, Abraham Pathien, Isak Pathien, Jakob Pathien chuh,’ a na ti a. Tichun, Mosi chuh a kilîng a, a en ngam ta puoh a. 33Chun, Lalpa chun a kawmah, ‘Na kêngpêk a na kengtawbek khah sut ah; na dinna mun chuh lei thiengtho ahi. 34Aigupta gama ka mite chuh, a dahum thuok zieu ka mu zing a puo, a mau git u le ka za zing a, amau hukbit dinga hung suk ka hi tai. Khaile; Aigupta gam ah hun sawl ing ka,’ a ti a.
35“Chun, Mosi, ‘lawiupa leh vaihawmpa a kuo a hun siem?’ ti a a hawt u chuh, nawnglaka vânsâwlchâk a kawma kilak khan a huh a, Pathien in amah mawng chuh, lawiupa leh hukbitpa hi kawm dingin a sawl ahi. 36Amah chun, Aigupta gam ale, Tuisuohgiet San ale, Thalek haw achun, kum sawmli sungin, thilmak leh melchiknate a muh sak zet a, amau haw a pui dawk ta a.#Pdn 7.3; Kis 14.33 37Zie Mosi chuh ahi, Israel suonte kawma, ‘Pathien in keimah ei siem guolin, na suohpihteu laka mi ngêi, thiemgau hun siem sak ina,’ ti pa khah.#Dann 18.15, 18 38Amah chuh ahi, gamthip a mi kikhawmkhawmte laka, Sinai tânga hopihpa vânsâwlchâk kawm leh, ei uh ei suonte kawma um khah; amah chuh, ei piek sawn dinga thuhing haw lapa chuh ahi.
39“Himahleh, ei uh ei suonteu chun a thu a zawp nuom puou a, a hawu a, 40Aron kawmah, ‘Ka mapui dingun pathien haw nei siem sak ah; Mosi, Aigupta gam apat a ei puidawkpa hila a chanchin ka he ta ngâl puou a,’ ti’n a lungthim hawu chuh Aigupta lam ah a kîkkit ta a. 41Chun, zie lai chun, bâwngno lim a siem u a, a lim chuh gan that in a ho u a, amau haw khut suok chung achun a lawp tau a.#Pdn 32.2-6 42Khutichun, Pathien in a nungngat a, van a aksihaw a chibai theihna dingun amau haw a haihsan ta a; thiemgau lehkhabu a:
‘Israel chate haw,
gamthip a khan kum sawmli sungin sa that leh gan that in kei nei ho um?#Amo 5.25-27
43Molok puon-In leh pathien Rephan aksi chu le,
Chibai dinga a lim na siem hawu khah,
Na zawn zaw sek u a;
Zieziekchun, Babulon khaw khel lam ah Nanguh hun puimang ing ka,’
tih zik guol khan.
44“A lim a muh banga siem dinga Mosi hilhpa’n a guot guol khan, ei uh ei suonte’n gamthip akhan hetsakna puon-In chuh a nei u a. 45Zie mah chuh, ei uh ei suonte suon kit inle a nei sawn zel u a, zie chuh, Pathien in ei uh ei suonteu maa Jentel nam a nawhdawkte haw gam luoh dinga Joshua lawi a a chieh lai u khan a lutpih u a. Zie chun, David hung um tieng khan a um zing ta a.#Jos 3.14-17 46Zie David chun, Pathien deihsakna a chang a, Jakob Pathien dingin umna siem sak a ngên a.#2 Sam 7.1-16; 1 Kh 17.1-14 47Himahlele, Solomon in In chuh a sak sak ta zaw ahi.#1 Let 6.1-38; 2 Kh 3.1-17
48“Himahleh, Chungnung pên pa Pathien chuh khuta sak In haw ah a um ngêi puoi; thiemgau chun:
49‘Lalpa’n, Van ka chutphah ahi a
Lei ka keng ngakna ahi:
In bang tawbang in a nei sak sak dinguh?
Ka chawlhna mun le bang ahi?#Isa 66.1-2
50Keimah khut in zie thil bangakai hi ka siem puoh a ahim?’ a tii,
ti a a gen guol khan.
51“Mi genhak, lunggil leh bil tan lohte haw! kumkhuo’n Thagau Thiengtho chuh na dodal zing u a; nanguh hun suonte hih guol zel khan na hih sek uh ahi.#Isa 63.10 52Nanguh hun suonte’n, thiemgaute laka kuo a, a bawlsiet loh uh um? Mi Diktat hung ding thu hilhlawkte khah a that u a; zie Mi Diktat chuh matsakte leh thatte chuh nangmau hi na hiu apuo! 53Dan, vânsâwlchâkte piek sawn khah mu zet a, zawp sâmlo te haw!” a ti a.
Stephan Suong a Sehlupna
54Zie thu haw chuh a zak phet un, a lung uh a vilh ta a, Stephan chung achun a hau a gawi u a. 55Himahleh, amah chuh Thagau Thiengtho a dim a hi a, van lam a en chak kêi a, Pathien lopi zie leh, Pathien chang lama Isu ding a mu a. 56“Ngaitiem u, van kihawng ka mu a, Pathien chang lama Mihiem Chapa ding le ka mui.” a ti a.
57Ziephet chun, amau haw chuh aw ngeih tak in a kiko u a, a bil uh ahim u a, kiguol takin a bawl diek mai u a, 58khuo apat chuh a nawhdawk u a, suongin a sep u a, a hetpihte chun tangval khat, a min Saul a tihpau keng bul achun a puonhawu a kawih u a. 59Khutichun, Stephan in, “Lal Isu, ka thagau la ta’n,” ti a Lalpa a sap lai in, suongin a sep sausau u a.
60Chun, a khupdin a, aw ngeih tak in a kiko a, “Lalpa, zie a thilhih gitloh u hi, a chungu ah mawh puok sak ki’n,” a ti a. Chun, zie thu chuh a gen zawhin, a ipmu ta a.
वर्तमान में चयनित:
NASEPTE 7: GANGBSI
हाइलाइट
शेयर
कॉपी
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
