NASEPTE 2
2
Thagau Thiengtho Hungtunna
1Chun, Pentekost ni a hung tun in, gingtute cheng chuh lungthim mun khat in abawn un mun khat ah a um khawm vek u a.#Tpd 23.15-21; Dann 16.9-11 2Tichun, hatkhat in, van apat in thil gi, huihpi nung guolin a hungtung ta phut a. Zie chun, a chutna In u chuh a hihdim vek ta a. 3Chun, lei haw chuh mei guola kihawm zak in, a chungu ah a chu ta a. 4A bawn un Thagau Thiengtho in a dim vek tau a, Thagau in a pau sak guol zelin, pau zatchuom in a hung pau tau a. 5Chun, khawvel gam tin apat a hung khawm; Pathien limsak Judate chuh Jerusalem ah a châm u a. 6Tichun, zie gi chuh a zak phet un, mipi a hung kikhawm u a; mitin in, sawlchakte thugen chuh amau pau chieta a na zak ziekun a lungzîng ten tau a. 7Tichun, a bawn u chun a lungkham u a, mak a sa mah mah u a, “En tiem u! zie a paute chengcheng hi Galili gam apat hilo ahiu hi? 8Bangti’n a, I bawn u a, I pienpih pau guola I zak chiet theih uh? 9Abang Parthaite, Medai te, Elam te apat I hiu a; abang Mesopotamia gama umte, Judea gama umte, Kappadokia gama umte, Ponto gama umte, Asia gama umte; 10Phrugia gama umte, Pamphulia gama umte, Aigupta gama umte, Kurini khuo kieng vela Libia gama umte, I hiu a. Abang, Rome khuo malzin, 11Juda te leh a phungkaiteu tawh I hiu a, khenkhat hila, Kret tuikuol leh Arab gama umte I hi ngâl u a, himahlele, Pathien thilhih maktakte a gen hawu, eimau pau chieta I zak chiet ngâl u hih!” a tiu a. 12A bawn u chun maksa’n a ngai buoi mah mah u a, “Ziehaw hi bangti dân ahi?” a kitiu a. 13Abang in a nuihsan u a, “Uain thak kham ahiu hi!” a tiu a.
Peter Thugen
14Himahlele, Peter chuh sawmlekhatte tawh a ding khawm u a, amah chun ngeih tak in a kawm u ah a gen a, “Nanguh, Judea gama umte, nanguh Jerusalem khuo a um cheng chengte haw, ziehaw hi heu inla, ka thu le ngaiun. 15Ziehaw hi na ginchak guol un a kham puou hi, vaihamsang phet ahi hi. 16Ziehaw hi thiemgau Joel in a gen khah ahi zawi:
17‘Pathien in, Ni nunung haw achun hiti hi hi’n tin,
Mi chengcheng chungah ka thagau sungtha’ng ka ting;
Tichun, na chapateu, na chanuteu in ka thu gen un tin uh;
Na tangvalteu in kilâkna muu un tin uh,
Na teksieteu in mang in mat un tin;#Jol 2.28-32
18A hii, zie nihaw a chun ka suokpate,
ka suoknu te chung ale,
Ka thagau sungtha’ng ka ting; ka thu gen un au;
19Chun, chunglam van ah thilmak haw,
nuoi lam lei ah melchikna haw muhsak ing ka ting;
Thisan leh mei leh, meikhu sah tak haw,
20Nisa chuh hung thim intin, Tha thisan hung suok intin;
Lalpa Ni lopitak leh minthang tak chuh a hungtun ma’n,
21Chun, tihi hi’n tin, kuole, Lalpa min sam ta chuh bit un au, a ti ie!’ a tih khah.
22“Nanguh Israel mite haw, zie thu haw hi zau in! Nazareth Isu, Pathien in amah manga na lak u a thil lopihaw, thilmak haw, melchikna haw a hih ngêi khan, a hun hêtchet sak na hiu hi. Nangmau ngêi in ziehaw khah na he ngâl u a, na lak u a hungtun tâk ziekin. 23Amah chuh Pathien lemguot leh hetlawk bangin, a matsak u a, nangun migilote khut in kross ah na khêndên u a, na sulum tau a. 24Amah chuh Pathien in thihna kânna haw chuh a phel sak a, a kaitho ta a; amah chuh thihna tuk den guol a hih loh ziekin. 25Chun, David chun a thu a gen a:
‘Ka ma ah kumkhuo’n Lalpa chuh ka mu sek a;
Ka lunggim lohna’n ka changlam ah a um hi,#Sam 16.8-11
26Zieziekchun, ka lunggil a lawp a,
Ka lei le a kipâk hi.
Ka thagau mithi khuo ah nusieh puo’n na tin;
27Na mi thiengtho thâna a muot mang phal puo’n na tin,
Zieziekchun, ka pheh le kinem takin um ina.
28Nangin hinna lampi le nei kâwkmuh a,
Nangin, na mel in kipâkin nei sudim inla,’ ti’n.
29“Suohpihte haw, ei suonpau David thu hi lau lo in na kawm u ah ka gen thei hi; amah chuh a thi ta a, vuih le a vui tau hi, a thân le tuni chan hin I kawm u ah a um zing nalai hi. 30Amah chuh thiemgau a hi a, Pathien in amah suona mi, kuo ahim khat chuh, lenga hun chut sak ding ahi tih, kihâksiela a gen chuh a he a.#Sam 132.11; 2 Sam 7.12-13 31David chun, tunung a Pathien in thil a hun hih ding chuh a na mulawk a, tichun, Krista thawhkitna ding thu chuh a gen ta a:
‘Mithi khuo ale nutsieh in a um puoh a;
a luong le thân a chun a muot den diek puoi,’ ti’n.
32Zie Isu chuh Pathien in thihna apat in a kaitho ngêi a, zie thudik hetpihte chuh I bawnchau hin I hiu ui. 33Pathien khut changlam ah limbawl in a um ta a, Thagau Thiengtho tiem chuh Pa kawm apat a mu a, na muh u leh, na het u hi a hun sunthak ahi. 34David vang van ah a kal to puoi, amah ngêi in:
‘Lalpa chun ka Lalpa kawmah,
Ka changlam ah chu zing ah;#Sam 110.1
35Na melmate na kêngpêk ngak dênna a ka siem masang sieh, a ti ie,’ ti ahi zaw kha.
36“Khutichun, Isu, na khetdênpau ngêi khah, Pathien in Lal leh Krista hi kawmin a siem tai tih, Israel namtin in he tei u hen,” a ti a.
37Chun, mipite chun zie thu haw chuh a zak phet un, a lunggil u chuh a kisun a hung bang ta a, Peter leh sawlchak dangte kawm achun, “Suohpihte, bang ka hih ta ding u leh?” a tiu a.
38Peter chun a kawm u ah, “Na gitloh uh ngaihdam ahih theih na dingin lunghei unla, chun, Isu Krista min in na bawn un baptistma chang chiet un; tichun, Thagau Thiengtho thawna piek hi mu’n lau. 39Pathien thutiem khah, nang haw leh na chateu ding leh, gamla taka mi chengcheng ding leh, Lalpa I Pathien un a kawma a sap tapohte ding le ahi ngâl a,” a ti a.
40Chun, Peter chun, a kawm u ah thu dang tamtak gen in, a tîlkhoh a, “Tulai khangthak, lungthim manlohte laka hin kivengphau in,” a ti a. 41Mi tamtakin a thugen chuh a gingchau a, baptistma a chang u a, zie ni chun mi, sangthum vel behlap in a um tau hi. 42Amau haw chun a hunteu chuh, sawlchakte kawma thu zilna’n a mang u a, kivawp khawm in, chângthâk phelsuoh in, paucham in, phachuomngai takin a um zing u a.
Gingtute Kipawlkhawmna
43Sawlchakte chun thilmak leh melchikna tamtak a hih u a, tichun, mitin in a lau tau a. 44Gingtute chengcheng chuh kipawlkhawm in a um zing u a, a thil neihteu a kikawp u a. 45A go hawu, a thil neih teu a zuok u a, tichun a dangkateu chuh a sinmawh dungzui zelin a laku ah a hawm chiet sek u a. 46Chun, ni chengin, lungthim munkhat in Pathien Ho-In a chun phachuomngai takin a um sek u a; a In lam hawu ale chângthâk phelsuoh in, lawp tak leh lungkim takin a an uh a ne sek u a. 47Pathien a pakchau a, tichun, mi cheng cheng deihsakna a lawh sek ui. Tichun, hukdama um masa tiem chuh, Lalpa’n nicheng in a kawm u ah a tel sak zel sek hi.
वर्तमान में चयनित:
NASEPTE 2: GANGBSI
हाइलाइट
शेयर
कॉपी
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
