LOPNA 9
9
Hamda vi Saulus
Lop Ap 22:3-16; 26:9-20; Gal 1:1-16
1Hay na'ta Saulus dikam may tun suk noŋɗi, nam ka ɦiwir sa hatayna vi Bum-Sumuna, ka gar kay cisi goyo kaw, nam tuɗ tam mul ŋol ma-ɗifinna, 2jobom ɗerwella kay sinagogayna ma hay Damas, kay hay li ma nam fi sumu lebo boy sara'a, sa tapay kuɗ hagat kaynawa, nam ma marsi hay Yerusalem kayn juni jun'. 3Hay rogoyta valamu, hay li ma nam co goboy hiɗi Damas, wum pa kayni, haraŋa may kulo hay wuralawn pa, wile kalam wilik'. 4Nam nig gaa'a, nam hum della ka di talam ala: Saulus, Saulus, naŋ lan las kay mige? 5Nam hot dit ala: Naŋ mi gige Bum-Sumuna? Bum-Sumuna dum ala: Mi nan Yesu ma naŋ ka lasamna, lop ŋol kaŋu kay li wuri kat jalaŋŋa. Saulus hobay hiɗi narta, tuwam muɗ vum bat-bat', nam di ala: Naŋ min ala nan ma lum mige Bum-Sumuna? Kay na'ta Bum-Sumun dum ala: 6Fokaŋ kulo'o, tuɗaŋ hay hoyok-ziyna, sumun ma daŋ kay va ma naŋ ma lumna. 7Sum sa tuɗay rogoy hiɗi namna ay lakay ŋelay kitiŋ' kay narta; nisi ka hum della, may irsi tun kay saɗi. 8Saulus fokay kulo'o, iram goy mali jiɗi', may wi va ne'ɗi; nisi vum ɓalamu kay tuɗum Damas. 9Nam li buur ɦidi, iram may wiɗi, nam may tiɗi ciɗi kaw.
10May hay Damas kayni, sa ma hatayna ay kepe, semda valam Ananiyas. Bum-Sumuna dum hay ɗekka ala: Ananiyas! Nam hot dit ala Bum-Sumuna, nanis zawni! 11Bum-Sumuna di talam ala: Fokaŋ kulo'o, tuɗaŋ hay hagata ta ya' ala ta Ɗigerta, naŋ ma gar san ma yum ala Saulus ma Tarsusna, naŋ ma garam hay ziyna vi Yudas. 12May nam ka siɗawa, nam wi san ma semda valam ala Ananiyas vul tuwam kiramu, nam kalay kalafi, tun ɓalam kalamu, kay nam ma muɗ wi'e. 13Ananiyas hot dita: Bum-Sumuna, nan hum sumun ŋolo ka law kay joota ŋolda ta san kayni ka la' tam sa peldetna vaŋu hay Yerusalem; 14Wulin tan kaw, nam ka hiɗi donota ta nam fa'ay tam muliyan ŋulo sa-ɗifinna, kay jun nisi kaf sa yi semda vaŋu. 15May Bum-sumuna dum ala: Tuɗaŋu, kay san kayni muɗi mi sa ma nan vilekem goyna, kay nam ma tuɗan semda van goy jar jaf-sumuna, goy tam muliyana, goy vok gurona vi Israyel kaw; 16Nan ma ɗekem ala nam ma ci lasta ŋolo hay semda vanu. 17Ananiyas kaliya, nam kal kalaf hay ziyda, nam tun ɓalam kay Saulus di'e: Saulus ɓasunna, Bum-Sumuna Yesu ma vul tuwam kiraŋ hay hagata ta naŋ tuɗi haya'ta ganiyawa taŋu, kay naŋ ma muɗ wi'e, lo kay naŋ ma hob hiɗi Ŋusta-Peldetta. 18Wulini wulini van nig goy kiramu ki ɓulokŋa nala, nam fi wida kaw. Nam fokay kulo'o, fi baptisma kaw; 19Bugol nam ti fun tina, nam fi donota. Nam musi ir buur neeɗa hiɗi sa hatayna hay Damas,
20Wulini wulini nam tun caw kus kay Yesu hay sinagogayna, nam tun caw di goy ala Yesu kayn mi goora vi Lawna. 21Nisi kaf sa humumna muɗi ɦuyum' di kaw ala: Kayni mi nam ma las nisi kaf sa yi sem na'ta kayni hay Yerusalem ɗisu? Nam ma tan kayni kay jun sumuna kay narsi tam muliyan ŋulo sa-ɗifinna ɗisu? 22Hay na'ta Saulus muɗ dono vokom suwa suwa, nam viy Yudiyana sa hay Damas goy diwiŋ' hay li ma nam ɗeksi goy haraŋ ala Yesu mi Kristu.
23Buura kalay ŋol neeɗa bugol kayni, sa Yudiyana ŋra vun tuwsiya kay cum goyo. 24May Saulus hum kay ŋra-vunda visiya. Henjeta hiɗi falayta kaf, nisi ka ŋom vun-ziyna kay cum goyo. 25May hay henjeta sa hatayna slumu musum hay tikisina, sirim gaa'a ŋor gulmunna.
26Hay li ma nam co Yerusalem, nam gar kay tap tuwamu hiɗi sa hatayna, may nisi kaf li nar kalamu, varta visi ala nam as muɗ sa ma hatayaɗi. 27Nala Barnabas vum kuɗumu, tuɗum tam sa hatayna, visi labar ala ir nanige hay hagata, Saulus wi Bum-sumuna ma law talamu, a nanige hay Damas kaw nam law goy haraŋ kay semda vi Yesu. 28Nam ka tuɗa, ka hotay hiɗi nisi Yerusalem kaw, nam ka di goy kursuliya kay semda vi Bum-sumuna. 29Nam ka lawa, ci way kaw hiɗi Yudiyan sa di vun Grekŋa, may nisi gar kay cum goy mati. 30Hay li ma ɓosiyomna humawa, nisi kalam hay Sesariya, gum iram hay Tarsus.
Yerta-goyta vi Eneyas, dayta-kulota vi Tabita
31Hay Yudiya, hay Galileya, hay Samariya kaw, ekklesiyata ay tuni hay sle'ta, na' ka in kulo'o, tuɗ ŋaa'a kaw hay narta vi Bum-Sumuna, ka ɦur voka'a hiɗi gutda vi Ŋusta-Peldetta.
32Peter ma ka ŋuy liyn kayni kafna, tuɗ tam sa peldetna sa ka hay Lidda. 33Nam fi san kep ma semda valam Eneyas, sa ma hurɓulina, buri gaa kay raŋgawna busat glafandi. 34Peter dum ala: Eneyas, Yesu Kristu muɗaŋ goy ŋaa'a, fokaŋ kulo'o, kotaŋ va ma buura vaŋ kay tuwaŋu, nam fokay kulo cigiɗaw' de'. 35Sumuna sa hay Lidda kaf hiɗi sum sa hay beɗna vi Saron kaw wumu, nisi muɗi kuɗ Bum-Sumuna kaw.
36Hay Yoppe cata ta hatayta ay kep ta semda va' ala Tabita, kayni min di ala Dorkas,#9:36 Tabita lebo Dorkas min di ala dukga. na' li lop ma ŋaana ŋolo, vul ŋolo kaw. 37Na' li moyo hay buur namna, mitiya kaw. Hay li ma nisi muza' goy muzna, nisi sla'a, bura' hay ziyda ta kulota. 38Ki Lidda ka goboy hiɗi Yoppe, sa hatayna hum kaw ala Peter ay ɗawni, nisi cuk sumun ma' talamu kay dum ala: Naŋ ma vi yaŋay kay co tumaɗi. 39Peter fokay kulo'o kalay hiɗi nisiya. Hay li ma nam coowa, nisi kalam kulo hay ziyda-kulota. Boy sa duhulla kaf sa ka tiya ma talamu, nisi ɗekem kay sligara hiɗi sligar-tuwna ma Dorkas kotomna hay li ma na' ays hiɗi nisiya. 40Peter gi ir sumun kaf goy jiya, nam girif gaa'a, siɗawa kaw, nam muɗ iram tam tuwna di ala: Tabita, fokag kulo'o! Na' mal ira' goyo, na' wi Peter, na' mus kulo'o kaw. 41Nam vula' ɓalamu, musa' kulo'o kaw. Bugolda nam yi sa peldetna hiɗi boy sa duhulla, nam cola' goy voksi iriya. 42Van kayni biyay goy hay Yoppe pet, sumuna ŋolo vi hay Bum-sumuna kaw. 43Peter musi hay Yoppe vo vi Simon sa ma lumut bakŋa ir buur neeɗa.
נבחרו כעת:
LOPNA 9: Massana
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
BIBALDA TA PELDETTA © L'Alliance Biblique du Cameroun, 2001