LOPNA 20
20
Paulus hay Makedoniya, hay nagata Grek
1 Kor 16:1-7; Rom 15:25-27
1Hay li ma winekŋa tunawa gaa'a, Paulus yi sa hatayna ay talamu, bugol nam gatsi gatna, nam gisi deɓe, hinsiya, kalay hay Makedoniya. 2Nam jik hay nagata kayni, hay tu'da valamu nam vul gatta ŋolo mi sumuna, bugolda nam kal hay nagata vi sa Grekŋa. 3Nam musi ɗawni ir til ɦidi, nam ay goboy kay kal hay Siriya, sa Yudiyana ŋra vunsiya kay cakam hay tu'da, nala nam col varta valam kay hot hay Makedoniya. 4Sopater goora vi Pirus ma Berena, Aristarkus hiɗi Sekundus sa Tesalonikŋa, Gayus ma Derbena, Timotewus hiɗi Tikikus hiɗi Trofimus sa Asiyana, nisi tapay kuɗumu ta-ta hay Asiya. 5May nisi kalay vokma'a cubma hay Trowas. 6May numa'a, bugol buura vi fun-bay-kufna, numa jik hay lumna kay tuɗ hay Filipi, numa dol ir buur vasl, numa co fisi hay Trowas, ɗawni numa li buur siɗiya.
Paulus hay Trowas, Eutikus hot muɗ iriya lo
7Hay buurta jewta vi lumuna, numa ay dakay kay ti ɓuraw funa. Paulus ma min kal grawta, nam ka kus yoboyna tam sa dakayna, ɓakŋa valam li fiyoko, kal ta-ta hay henjet ŋolda. 8Hay ziyda-kulota ta numa ay dakay haya'ta fitilla ay ŋolo. 9Sa ma joriyona kep selem ala Eutikus, nam musi gaŋ fenetrena, nam nig sen to-to' hay li ma Paulus ka ɦur vokom hiɗi kusta valamu; senda sliwirimu, kulo hay ziyda-ɦidita pa, nam nig ay gaa'a, nisi slum kulo kayni, nam miti to-to'. 10May Paulus jikay gaa'a, her gaa kalamu, slum kulo hay ɓalamu ka di ala: Duɗu'gi kuloɗi, kay ciwta valam ka hayamu. 11Hay li ma nam jik kulo jikŋa, nam ɓuraw funa, ti'e kaw. Bugolda lo nam kus yoboyn ŋolo, ta-ta goy ŋarpita. Bugol kayni nam kaliya. 12Nisi mar goor ma joriyon iriya: Sumuna fi teŋ-irta ŋolo.
Paulus hay Miletus, ɓakŋa vi Paulus ma cawna tam sa maariyana hay Miletus
13May numa'a kalay hay lumna jewe, numa dolay hay Asos, liyn ma numa min sli Paulus hay lumna lo: Kay nam var kay tuɗ hiɗi selemu. 14hay li ma nam co fuma hay Asos fina, numa slum kuɗma hay lumna kay co hay Mitilen. 15Goy ɗawni, numa dol vokma ɗiger, numa co hay Kiyos hay buurta ka'ta. Hay buurta heta lo, numa co hay Samos, hay buurta ka'ta numa co hay Miletus may. 16Paulus min kayn kay nisi rawis goy hay Efesus, may gaɓ lumna kuloɗi, kay nam min ba liyn hay Asiyaɗi, nam gos tuwam koloy nala, kay la nam fi liyna, buurta vi Pantekotta fum hay Yerusalem dam'.
17May goy Miletus pa nam gi sunay hay Efesus kay sa maariyana vi sa Tapna kay nisi ma ŋaf hiɗi namu. 18Hay li ma nisi maawa talamu, nam disi ala: Nigi wi'e nanige nan poy hiɗi nigiya, hay li ma nan cuk sen hay Asiya hay buur ma jewna pa; 19Nan li sunda vi Bum-Sumuna hay hot-yamda gaata, hiɗi zimiyna, hay zumalda ma nan fi kuɗ ŋra-vunda vi sa Yudiyana. 20Nigi wi ala, hay li ma nan kus yoboyn tigiya, hatgi kaw, nan may ŋay va ma ŋaa goy kigi noŋ ne'ɗi, 21nan di goy tam sa Yudiyana, tam sa Grekŋa kaw, kay ham vok Lawna, vi hay Bum-sumuna vaya Yesu kaw. 22May wulini nan juni kay Ŋusta, nan min tuɗ hay Yerusalem, va ma min fanis ɗawn mige kla nan may wiɗi. 23May va ma kepna kayni, Ŋusta-Peldetta ka ɗekanu, dan goy kaw ala jaɓna hiɗi lasta kay zaman hay hoyok-ziyna hoyok-ziyna kaf. 24May nan di law irita vanu ki na' mi va ma ŋaa'a kanu naɗi, say nan hob vun jaŋŋa van kulo'o hiɗi firita, kay lopna ma nan fumay tam Bum-Sumuna Yesu, kayni ala: Li di-goyta kay labara ma firina vi slugota vi Lawna.
25Wulin kayni, nan wi ala nigi ma wan iran loɗi, nigi kaf sa nan kus kay mulda-Lawna jargiya. 26Kay na'ta nan di goy tigiya hay fatta vaydit zawni ala: Nigi kaf busuwna vigi may kanɗi. 27Nan may ŋay va goy ne'ɗi hay li ma nan digi kay varta vokka vi Lawna. 28Ŋomgi tuwgi ŋaa'a, ligi ŋali hiɗi fok-dimina ma Ŋusta-Peldetta tungi kalam ki sa ŋomda nala, kay ŋom ekklesiyata vi Lawna, ta nam gusa'ay hiɗi busuwna valam kay tuwamu.#20:28 ɗuw 1 Pet 5:2. 29Nan wi ala jargiya, bugol kalta vanu, keŋ ma joona ma zum jargiya, nam ma hin fok-dimina ŋolɗi, 30goy jargi nigi pa kaw, sum sa kus yoboy ma ɗutta ma yaw kulo'o, kay nem sa hatayna kuɗsiya. 31Kay na'ta lakgi jigere, kay humgi ma gigi ala, hay busata ɦidi, falayta hiɗi henjeta, nan gat gige gige jargiya hiɗi zimiyna.
32Wulin kayni, nan hingi kaf hay ɓam Lawna, hay yoboyna ma slugota valam kaw, nam ma donota valam ka kay ingi kulo'o, vulgi vocota kaw jar nisi kaf sa liy goy peldetna. 33Nan dar gurjutɗi, orɗi kaw, sligara vi saɗi kaw. 34Nigi kay tuwgi kaw wi'e kay ɓan yawni li lop kay vulan sle ma ŋom ŋil tuwanna, hiɗi sle ma ŋom ŋil sa tuɗay kuɗanna kaw. 35Hay slen kayni kaf, nan ɗekgiyawa ala nay ma li lopo ki kayn nala, nay ma gut kuɗ sa maŋayna, nala humay ma gay kay yoboyna vi Bum-Sumuna Yesu, ma nam kay tuwam dum ala: Sle'ta ka kay sa ma vul va goyo suw ma fi va'a.
36Hay li ma nam di nala dina, nam girif gaa'a, siɗaw hiɗi nisi kaf. 37Nisi kaf tiy ŋolo, cuk tuwsi kel Paulus bowom kaw; 38Diksi yor ŋolo, kay nam disi ala nisi ma wum iram loɗi. Nisi gum diram ta-ta hay liyn ma lumna ka haya.
נבחרו כעת:
LOPNA 20: Massana
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
BIBALDA TA PELDETTA © L'Alliance Biblique du Cameroun, 2001