LOPNA 10
10
Hamda vi Korneliyus
1San ay kep hay Sesariya selem Korneliyus, nam mi mul ma sojen kalam kisna hay vok-ma-duura ma yum ala vok-ma-duura ma Italiyana. 2Nam mi sa sa ma ŋaa'a ŋolo ma li nar kuɗ Lawna hiɗi ziyna valam kaf. Nam vul slen ŋolo mi sumuna, siɗaw Lawna dok-dok kaw. 3Hay leer ma zleeŋena, nam wi sunda-wuralawna ma ɗek tuwam goy kiram haraŋ, ma co talamu, dum ala: Korneliyus! 4Nam cuk iram kalamu, may hobay hiɗi narta, nam ka dum ala: Mayɗin mige, Bum-Sumuna? Sunda-wuralawna di talam ala: siɗawta vaŋu, vulda vaŋu coowa kulo vok Lawna, kay humam ka gum kalamu. 5Wulini naŋ ma cuk sumuna hay Yoppe, kay mar sa mara kep yum Simon, ma gileta valamu Peter; 6nam ka musi vo vi sa mara kep yum Simon, ma lumut bakŋa, ma ziyna valam ka gal deŋel niy-lum ŋolla. 7Hay li ma sunda-wuralawna ma law hiɗi namna kalay kalla, Korneliyus yi sum ma' jar sa li lop vokomna, hiɗi sojena ma ŋaana kep kaw jar nisi sa tapay hiɗi nam ŋaana; 8Hay li ma nam visi labara kayni kaf, nam cuksi hay Yoppe.
9Hay buurta ka'ta, hay tu'da visi hay hagata, hay li ma nisi co goboy tam hoyok-ziyna, Peter jik kulo kay yam-ziyda, goboy hiɗi leer ma karkiyana, kay siɗawa. 10Mayta cumu, nam min ti'e. Hay liyn ma nisi ka kotom tina, slen vul tuwam kiramu. 11nam wi dukalawn goy maliya, nam wi va wura ŋol zim-zim' ma keŋem fiɗi pet ka juniya, siray gaa kay nagata; 12muur ma gayam fiɗi fiɗina hiɗi sle ma ɦarmatna kaf hiɗi layayna ma dukalawna kaf ay hayam kuɗulu'. 13Della di talam ala: Fokaŋ kulo'o, Peter, ŋatamu, tumu. 14Peter di ala: A'a Bum-Sumuna! Kay nan bay ti va ma liwisi hiɗi joo'o tuwa. 15Hay semda ma'ta del ka di talam lo ala: Va ma Lawna muɗum goy ŋaa'a cet-cet' naŋ as ɗuwum ki nam liwisi nala loɗi. 16Va ma ŋol ma wura zim-zimna co ta-ta sem ɦidi, bugol kayni nam pat huwat', kalay dukalawna.
17Hay li ma Peter ka muɗi ɦuyum' kay va ma vul tuwam kiramna kayni ɗek mige ni, ɗuw na kayni, sum sa Korneliyus cuksiyaysna nisi job kay ziyna vi Simon, nisi lak hay vun-galana: 18Nisi yi'e job kaw ala kayni mi ziyna ma Simon ma gileta valam Peter ka buur hayn su? 19Hay li ma Peter ka fek caw va ma vul tuwam kiramna, Ŋusta ka di talam ala: Sumun ɦidi ka garaŋu; 20Fokaŋ kulo'o, jikaŋ gaa'a, tuɗaŋ hiɗi nisi bay giriŋi, kay cuksiyays kayni mi nanu. 21Peter jikay gaa'a, di tam sumun ala: Ɗuwgiya, nan zawni, nigi garanti kayni mi nanɗi su? Va ma nigi garan kalamna mi mige? 22Nisi hotom dit ala: Korneliyus mul ma sojen kalam kisna, sa ma ɗigera ma li nar kuɗ Lawna kaw, ma jaf-sum sa Yudiyan kaf li di-goyta kalam ŋaa'a, sunda-wuralawna ma peldetna vul tuwam kiramu kay nam ma naraŋis hay ziyna valamu kay hum yoboyna vaŋu. 23Nam yawsi vo'o, vulsi liy ma buura kaw, hay buurta ka'ta nam fokay kulo'o, kal hiɗi nisiya. Sum sara kep kep jar ɓosiyom sa hay Yoppe tapay kuɗumu kaw.
24Nisi co hay buurta ka'ta hay Sesariya, Korneliyus yi sumiyamu hiɗi boniyomna aya, nam ka musi zamsiya. 25Hay li ma Peter kal kalafi, Korneliyus ma kay ŋafam iramu, nig gaa vok gayamu, girifimu kaw. 26May Peter vum kulo'o, ka dum ala: Fokaŋ kulo'o, kay nan kaw mi sana. 27Hay li ma Peter ka kus yoboyna hiɗi Korneliyus, nam kal vo'o, fi sumun dakay ɦir'. 28Nam disiya: Nigi wi ala telda ka kay Yudiyana kay tap ɦidi sa ma waana lebo kal vo valamu, may Lawna ɗekan kay nan ma di kay sa mara ala nam liwisi lebo joo'oɗi. 29Kay na'ta hay li ma nigi cuk sumunis kanu kay garaniya, nan tapay kuɗsiya bay lawta. Wulin kayn nan jobgiya, nigi gi suni kanu kay mige? 30Korneliyus sli ditiya di'e: Buur wulini liy fiɗi, nan ka siɗaw hay ziyna vanu hay leer ma zleeŋena, san cuki hiɗi sligar ma haɓ tal-tal', colay vokanu, di ala: 31Korneliyus, siɗawta vaŋu Lawna huma'awa, humam gumawa kay vulda vaŋu kaw. 32Gaŋ sun hay Yoppe, kay Simon ma gileta valam Peter, nam ka hay ziyna vi Simon ma lumut bakŋa, deŋel niy-lum ma ŋolla. 33Kay na'ta nan cuk sumunis taŋ gosoyo kay garaŋiya, naŋ ma kayni, naŋ li ŋaa'a ŋolo. Wulin kayni numa dakawa kaf vok Lawna tani, kay hum caw sle ma Bum-Sumuna vulaŋ hagatawa kay dumu.
34Peter sli ditiya di'e: Nan digi gasita, nan hum lawt kaynawa, kay Lawna may ka ir saɗi. 35May hay jafna kaf sa ma li nar kuɗumu, li ɗigerta kaw, nam kiram ŋaa'a. 36Nam gi yoboyna tam gurona vi Israyel, hay li ma nam kus labara ma firina vi toyta hay Yesu Kristu, kayni mi nam Bum-Sumuna vi sumun kafe. 37Nigi wi slena ma co hay Yudiya kaf, hay li ma nam tun cawamay hay Galileya pana, bugol baptisma ma Yohana kusumisna. 38Ir nanige Lawna ɦok Ŋusta-Peldetta hiɗi donota kay Yesu ma Nasaretna, ma poy hay liyna liyna, li ŋaata hiɗi yerta-goyta tam nisi kaf sa ay gaa kuɗ lasta vi Matna; kay Lawna ay hiɗi namu. 39Numa kayni sa wi slen kaf ma nam lum hay nagata vi Yudiyana, hay Yerusalem kaw. Nisi cum goyo hay li ma nisi ɓalam kulo kat guna. 40Lawna dayam kulo'o hay buur ta ɦidita, vulum a nam ma ɗek tuwam goyo. 41May kir sumun petɗi, may tam sa di-goyna sa vilekay jewe kay Lawna, tuma numa sa ti'e ci'e kaw hiɗi namu, bugol dayta-kulota valamu jar sa mitina. 42Yesu vulma hagata kay kus tam sumuna, kay di goy kalamu kaw ala Lawna tunum kay tuwam ma ɗeŋŋa ki sa ma ka kitata vi sa irina hiɗi sa mitina nala. 43Sa jobta-Lawna kaf li di-goyta kalam ala, gigekaw ma vi hay namu, nam fi gida vi sulukŋa hay semda valamu.
44Hay li ma Peter ka di yoboyna kayni tuwa, Ŋusta-Peldetta jikay gaa kay sa ka dakay hum yoboyna. 45Sa viyna sa kaay gosayna sa may hiɗi Peter muɗi ɦuyum' kay vulda vi Ŋusta-Peldetta ɦokay goy kay sa waana. 46Kay nisi humsi di hay vun ma wuliya, subur Lawna kaw. 47Wulini Peter sli dita di'e: Sa as a tel niyna vi Baptismana goy kay nisi sa fi Ŋusta-Peldetta ŋray ca ki nay nalana lo su? 48Nam vul hagata kay nisi ma fi baptisma hay semda vi Yesu Kristu. Nisi jobomu kay nam ma mus hiɗi nisi ir buur neeɗa.
נבחרו כעת:
LOPNA 10: Massana
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
BIBALDA TA PELDETTA © L'Alliance Biblique du Cameroun, 2001