San Juan 6
6
Jesusi uánekua t'irerpesti
(Mt 14.13-21; Mc 6.30-44; Lc 9.10-17)
1Tátsekua enga na ísï ambe úkorhepka, Jesusi Galilea anapu japundarhu niraspti, enga Tiberiasi arhinhajka, 2Uánekuaksï chúxapaxapti, jimbokaksï exespka eska xáni ambe xarhatempka p'amenchatichani ambakerantaani jámani. 3Ka Jesusi juátarhu karhamaspti ka jima jurhengorheri jémbecha jinguni uaxakaspti. 4Judiouecheri k'uínchekua páskueri andamutaxaptia. 5Enga Jesusi eraapka, ka exejpeni enga xáni uáni chúxapanhani jápka, arhispti Felipeni:
–¿Nanichi pía xáni t'irekua enga andanguaka iámendu t'irerpeni?
6Ísku ísï arhispti uékani kurhani Felipe néna arhipirini, jimboka Jesusi sési mítespkia néna enga jámapiringa, 7Felipe arhispti:
–Témbeni ekuatse jurhiatekua andakata jimbo t'irekua piákata no andangupirindi ka útasï sánhantku intspeparini.
8Andresï, enga Jesusiri jurhengorheripka, ka enga Simoni Pédrueri erachi jémbepka, arhispti:
9–Tumbi ma ixu jámaxati, enga iúmu (5) echakua tríjueri kurhinda kámani jaka ka tsimani (2) kuruchechani; nénajtuchi andangutaa xántku, uánenhasti.
10Ka tátsekua Jesusi uandaspti:
–Uaxastpe je.
Jima xúxunhandespti; ka achetichaksï iúmu míli isïspti. 11Jesusi p'íkuaspti imani kurhindechani, ka diósmaiamu arhintatini, arhustakuaspti engaksï xáni uaxandetini jápka; ka kuruchechantu méntkueni íntspeaspti, anhaspti eska xáni anhejchanhapka. 12Ka engaksï na uiniarhapkia, arhiaspti jurhengorheri jémbechani:
–Tánantsï je enga xáni pakaraka, eska no sáni tsîncheaka.
13Ka témbeni tsimani tsïkiataksï uinirantaspti, engaksï iúmu (5) tríjueri kurhinda pakatapka. 14Jimajkani kóru ísï exénhatini ambe enga Jesusi xarhatapka, uandanhaspti:
–Ístia sési jimbo ima Diósïri uandari enga parhakpeni jupiringa.
15Ka enga Jesusi exepka eskaksï uinhapetarhu Irecheni pérakuekaxapka, ménderu kéndikukuaspti, ka juátarhu jandiojku niraspti.
Jesusi itsïrhu parhijtsïkusti
(Mt 14.22-27; Mc 6.45-52)
16Enga na chúrepkia, Jesusiri jurhengorherichaksï japundarhu kétsemaspti andamukuerani, 17icharhutarhu máksï jataspti, ka Kafarnaumi nirani jámanksï parhimexaptia. Chúresptia ka Jesusi útasï nótki andanguntaasïrempti. 18Ka japunda ísku úndaspti kánekua nósesi tarhameni jimboka uinhamu tarhiaxapka. 19Engaksï na iúmu o kuímu kilometrueni isï xanharapkia, eronukorhesptiksï Jesusini eska andarheraaxapka itsïrhu parhijtsïkuparini, ka chérakorhesptiksï 20K'óru ima arhiaspti:
–¡Ásï che je, jíska!
21Jámastiksï icharhutarhu jatsirakuekani, ka k'óruksï nóteru ióndasptia andamukuentani jima engaksï niárapiringa.
Kafarnaumiksï niraspti Jesusini jirinhantani
22Pauandekuarhu, enga xáni jiniani parhimetini pakaranhapka, exesptiksï eskaksï jurhengorhericha ma icharhuta jimbojku niraspka enga jima jápka, ka eska Jesusi no jataspka imechani jinguni, ka eskaksï jurhengorheri jémbechajkusï nípka. 23Ka máteru icharhutechaksï Tiberiasi uératini niáraspti, jima no iauani enga t'irenhapka ka enga Acha urheta diósmaiamu arhintapka. 24Ka engaksï exepka eskaksï nóteru jima jarhaspkia Jesusi jurhengorheri jémbecha jinguni, icharhutecharhu jatanhantaspti ka Kafarnaumiksï niraspti Jesusini jirinhantani.
Imani ambe jimbo ánchekorhe je enga no k'amakurhijka
25Ka engaksï na niárapka jiniani parhimetini, xéntasptiksï Jesusini ka kurhamarhesptiksï:
–Jurhentpiri, ¿Na jatiniri jurhaski xúeni janoni?
26Jesusi arhiaspti:
–Jíksïni sési jimbo arhixaka eskajtsïni cha jirinhantaxaka no jimbokajtsï kurhangukia milagruechani sánderu sáni jimbokajtsï niáchantaska t'ireni. 27Ásï t'irekua jirinhani ánchekorhe je enga ísku k'amakurhijka, sánderu sáni imani t'irekua jimbo ánchekorhe je enga no k'amakurhijka ka engaksïni méntku isï anapu ambakiti tsípekua íntskujka. Indeni jásï t'irekuaksïni íntskuati Acha Uájpa, jimboka Diósï erakuska enga Tátjembeka.
28Ka imaksï arhispti:
–¿Néna uétarhesïnki eskachi jámaaka Diósïni marhuakuni?
29Jesusi arhiaspti:
–Diósïni marhuakuni imajkuesti eskajtsï jakajkukuaka imani enga ima axaka.
30Ka ménderuksï kurhamarhespti:
–¿Ambejtsïni ua xarhatacheni, eskaksïni jucha imani exerini jakajkucheaka? ¿Amberisï úaia? 31Juchari sïrukuechaksï mana t'iresti jimesï enga no nema irekapka, eska karakatarhu na jataka: Auandarhu anapu t'irekua íntsaasti.
32Jesusi arhiaspti:
–Jurhimbitkuksïni aianguxaka, nóksïni Moisesisï t'irekua auandarhu anapu íntskupti, jucheti Táteksïnisï ambakiti t'irekua auandarhu anapu íntskujti. 33Jimboka Diósïri t'irekuasï auandarhu uératini kétsejka ka parhakpeni ambakiti tsípekua intspeni.
34Imaksï arhispti:
–Tata, méntkisïjtsïni indeni jásï t'irekua íntsku.
35Ka Jesusi arhiaspti:
–Jísïni t'irekueka enga ambakiti tsípekua íntspejka. Ne engarini andarhentajka, nómeni k'arhimaati; ka ne engarini míntsikajka, nómeni k'arhichaati. 36Eskaksïni k'óru na arhikia, chájtsï no jakajkusïnga náuejkijtsïni exekia. 37Imechani engarini Táte íntsaajka andarhentasïndijtsïni; ka imechani engajtsïni andarhentajka, ji sési eroasïnga. 38Jimbokani ji no juramukorheni andajpenuska, sánderu sáni imani marhuakuxamka engarini axaka. 39Ka imeri eratsekuesti engarini axaka, eskani nónemani uéjkuaka engarini ima íntsaaka, sánderu sáni eskani k'amarhuni jámani tsítantauaka. 40Jimboka Jucheti Táteri eratsekueska, eska ne engaksï míteaka Diósï Uájpani ka mintsikanksï, eskaksï méntku isï anapu ambakiti tsípekua intsïnhaaka; ka eskani ji k'amarhuni jámani tsítantauaka.
41Jimboksïsï Judiouecha uénapti Jesusini uandatseni, jimboka uandaspka: “Jíska t'irekua enga auandarhu uératini andajpenuka.” 42Ka uandasptiksï:
–¿Andi no ísï Jesusi Jose uájpe? Míteskachi amambani ka tátjembani. ¿Néna jimbosï uandajki eska auandarhu úeratini andajpenuska?
43Jesusi arhiaspti:
–Ásteru uandatseni ja je. 44Nónemarini úsïndi jíndeni andarherani, enga no Táte andarhetantajka; ka k'amarhuni jámani ji tsítantaaka. 45Diósïri uandaricheri karakatecharhu arhisïndi: Diósï iámenduechani jurhendauati. Ísï jimbo iámendu ima engaksï kurhajchajka Táteni ka engaksï kurhangujka imeri ambe, andarhentasïndijtsïni.
46“No jimboka nema Táteni exerika; imajkusï exeriti enga imerika. 47Sési jimboksïni arhixaka, ne engarini mintsikajka, méntku isï anapu ambakiti irekua jatsikorhestia. 48Jísïni t'irekueka enga ambakiti tsípekua intspejka. 49Chári ióntki anapuechaksï mana t'iresti jimesï enga no nema irekaka, ka uarhistiksïa; 50ka ji imani t'irekuasïni uandani jaka enga auandarhu uératini jurhajka; ne enga imani arhajka, no uarhisïndi. 51Ji ima tsípiti t'irekueska enga auandarhu uératini andajpenuka; ne enga arhaska indeni t'irekuani, méntku isï ambakiti tsípekua jatsiati. T'irekua engani ji íntspeaka jucheti kuiripuekuesti. Engani ji iámenduechani jimbo íntspeaka.”
52Judiouechaksï arhinhaskperani uénaspti:
–¿Nénajtujtsïni inde inderi k'uiripuekuani íntskua?
53Jesusi arhiaspti:
–Sési jimboksïnisï arhijka eska engajtsï Acha Uájperi k'uiripuekuani ka iurhirini no arhaska, nójtsï p'iuaka ambakiti tsípekua. 54Ne enga jucheti k'uiripuekuani ka jucheti iurhirini arhajka, méntku isï anapu irekua jatsisïndi; ka ji k'amarhuni jámani tsítantaaka. 55Jimboka jucheti k'uiripuekua sési jimbo t'irekueska, ka jimboka jucheti iurhiri sési jimbo itsïmakueska. 56Ne enga jucheti k'uiripuekuani ka jucheti iurhirini arhajka, jíndeni jingunisïndia, ka ji imani jingunisïnga. 57Ísï eskarini Táte enga irekani jaka na jíndeni axaka, ji Táteni jimbo irekaxaka; ka ne engarini p'iuaka, ji irestani jauaka. 58Imani t'irekuanisïni arhijka enga auandarhu uératini andajpenuka. No manani engaksï chári ióntki anapuecha aka ka uarhinksï; ne enga arhajka íni t'irekuani no méni uarhiaati.
59Jesusi íni ambe, Kafarnaumi tángorhetskuecharhu jurhentpespti.
Méntku isï anapu tsípekueri uandakua
60Uánekua jurhengorheri jémbechaksï ísï kurharini uandaspti:
–Indeni ambe enga uandajka kánekua ts'unhapesti kurhanguni; ¿Néjtu kurhangua?
61Jesusi mítetini ambe engaksï arhindikperani jápka, kurhamarheaspti:
–¿Nósesiksïni pásïni indeni ambe kurhani? 62¿Nénajtsï jámapirini jimajkani engajtsï exepiringa Acha Uájpani karhanchentani jarhani jini niántani enga jápka? 63Espiritusï ambakiti tsípekua íntspejti; k'uiripuekua nómbema marhuasïndi. Ka indeni ambe engaksïni arhika espirituesti ka tsípekuesti. 64Jarhaskajtsï k'óru cha máru engajtsï no jakajkujka.
Jimboka Jesusi uénani jámantki mítetixaptia ne engaksï no jakajkupiringa ka ne enga imani intsïnharhitpepiringa. 65Ka uandasptiteru:
–Indeni jimboksïnisï arhijka eskarini nónema úaka andarherani, enga no Táte jimboeuaka.
66Jimajkani uératinksï uánekua jurhegorheri jémbecha kéndikukuspti engaksï ima jinguni jámani jápkia, ka nóteruksï chúxapasptia. 67Jesusi jimajkani témbeni tsimani jurhengorherichani kurhamarheaspti:
–¿Chájtu ninhejchantaxakiia?
68Simoni Pédru arhispti:
–Tata, ¿Nénguntuchi niua? T'úrisï méntku isï anapu ambakiti tsípekueri ambe uandajka. 69Jucha jakajkuskia ka míteskachi eskari t'u Diósïri Újchakurakateska.
70Jesusi arhiaspti:
¿Andi nóksïni ji chánksïni témbeni tsimani erakuski? Ka náuejki isï, cha ma isïjtsï nóambakitiska.
71Ísï uandarini, Jesusi Júdasïnisï arhini jápti, Simoni Iskariote uájpani, jimboka Júdasisï intsïnharhitpepiringa, náuejki imechani jingunipka.
נבחרו כעת:
San Juan 6: DKPJ
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Biblia en P´urhépecha, Michoacán, México © Sociedad Bíblica de México, A.C.
