San Juan 3
3
Ménderu andajpenuni
1Jarhaspti fariseo ma, enga Nikodemu arhinhempka, enga judiouechani jinguni k'éri ambepka. 2Ima chúrekua niraspti Jesusini p'urhembeni, ka arhispti:
–Jurhentpiri, míteskachi eskakini Diósï axaska jurhentpeni, jimboka nónema úpiringa xárhati milagru úani ísï eska t'u na úajka, enga Diósï no ima jinguni japiringa. 3Jesusi arhispti:
–Sési jimbokini arhixaka eska ne enga no ménderu uéntaska andajpenuni, eska ima no úsïnga Diósïri Irechekuani exeni.
4Nikodemu kurhamarhespti:
–¿Ka néna ua ma ménderu andajpenuni enga t'arhepeakia? ¿Andi ua ma nánde jémbani ménderu inchaakuntani, ka ménderu uéntani andajpenuni?
5Jesusi arhispti:
–Sési jimbokini arhisïnga eska ne enga no itsï ka espiritu jimbo andajpenuska, no úsïnga Diósïri Irechekuarhu inchani. 6Ne enga k'uiripu uájpeka, parhakpeni anapuesti, ka ne enga espiritu jimbo andajpenuka, espirituesti. 7Ásï nósesi xe engakini arhijka: K'uanisïndi eskari ménderu andajpenuntaaka. 8Tarhiata nirasïndi nani enga isï uékajka, ka náuejki ri kurhani jarhani, nóri mítesïnga naniasï tarhiaxaki. Ísïstiksï iámendu imajtu engaksï espirituni jimbo andajpenuntajka.
9Nikodemu ménderu kurhamarhespti:
–¿Ka nénasï úaia ísï úkorheni?
10Jesusi arhispti:
–T'u, engari Israelicheri jurhentpirika, ¿Nóri míteski? 11Sési jimbokini arhisïnga eskani jucha imani ambe uandasïnga engachi míteka, ka imani ambechi uandantasïnga engachi exerika; ka chájtsï no jakajkusïnga engaksïni arhini jarhajka. 12Engajtsïni no jakajkuchejka parhakpeni anapu ambe engaksïni aianguni jarhajka, ¿Nénajtsïnisï jakajkucheaia engaksïni auandarhu anapu ambe uandaxecheaka?
13“Nónema karhanchetisti auandarhu, imajku enga auandarhu uératini kétsetika; Acha Uájpanisïni arhini jaka. 14Ka ísï eska Moisesi na akuitseni iótakuarhu tarhatapka jima enga nónema irekaka, Acha Uájpajtu ísï tarhatanhaati, 15ka eska ne enga imani mintsikaaka, méntku isï anapu tsípekua jatsiati.”
Na enga xáni Diósï xénhchaka parhakpenini
16“Jimboka Diósï parhakpeni anapuechani xáni xénhchaaska jimbosï jamberi Uájpani íntspeti, imani enga májkueka, eska ne enga imani mintsikajka no uarhiaka, eska méntku isï anapu tsípekua kámaaka. 17Jimboka Diósï, Uájpani no parhakpeni arhinharhikpeni axaska, sánderu sáni axasti eska imani jimbo parhakpeni p'ímutanhantaaka.”
18“Ne enga Diósï Uájpani jakajkujka, no k'amanharhiranhantaati; k'óru ima enga Diósï uájpani enga jandiójkueka no jakajkujka, k'amanharhirantskatestia jimboka no jakajkukusïnga. 19Ima engaksï no jakajkujka, k'amanharhiranhantastiksïa, jimbokaksï nósesi ambe úsïrempka. Jiájkani enga parhakpeni anapu eramarhandekua juka, pájpakandekuanksï erakusti ka nóksï eramarhandekuani erakuni. 20Iámendu ima engaksï nósesi ambe niátajka nóksï xénhchasïndi eramarhandekuani, ka nóksï andarherasïndi jimboka ísï jámani mítekorheaka ambe engaksï úni jaka. 21K'óru ima engaksï irekani jaka eska néka, andarherasïndiksï eramarhandekuani, eska xarharaaka eskaksï iámendu ambe ísï úsïnga eskamendu néka Diósïri eratsekua.”
Nónema úati ambe ma jatsikorheni enga no Diósï íntskuaka
22Tátsekua enga na inde ambe úkorhepkia, Jesusiksï jurhengorhericha jinguni Judea isï niraspti, jimaksï jarhaspti namoni jurhia itsï atajtsïkpeni. 23Jini Enoni, Juánujtu itsï atajtsïkpexapti, jini enga Salimi no iauani jarharetinika, jimboka jimesï kánekua itsï uéraxapka; ka ninhasïrempti ka itsï atajtsïnhasïrempti. 24I ambe, urheta ísï úkorhespti engaksï Juánuni k'ataperakuarhu nótki incharani jápka.
25Ka máru Juánueri chúngumatichaksï uénaspti judio ma jinguni jupajtsïtperantskueri ambe uinhamu uandaxeni, 26ka Juánuniksï niraspti arhini:
–Jurhentpiri, ima enga t'u jinguni jámani jápka Jordani iurhekuarhu parhikutini, ima engari aiangpekuntaka, imajtu itsï atajtsïkpexati ka iámenduksï chúxapasïndi.
27Juánu arhiaspti:
–Nónema úati ambe ma jatsikorheni enga no Diósï íntskuaka. 28Chájtsïni sésimendu kurhajchaskia eskani ji no Krístueska, eskani imeska engani urhetatapunhaka. 29Tembuchakuarhu ma, tembuchasï tsípeni jarhajti tembunhani exeni; ka tembucheri p'íchpiri enga pámbeni jámani jarhajka, tsípenitsipesïndi tembuchani kurhajchani enga uandantani jarhajka. Jíjtuni iásï ísï tsípenitsipexaka. 30Imeri k'érikua jatsisti kánepani jarhani, ka ji sapichuentapani jarhani.
Ima enga auadarhu uératini jurhani jaka
31“Ima enga auandarhu uératini jurhani jaka, iámendu karhakua jakuasti. Ima enga echeririka parhakpeni anapuesti, ka parhakpeni anapu ambe uandaxesïndi. K'óru ima enga auandarhu uératini jurhajka iámenduechani karhakua jakuasti, 32ka uandantasïndi eska xáni ambe exeka ka kurhani; enga úka, imeri uandantskuani nónema jiókorhesïndi. 33K'óru enga nema jiókorhejka, ísï jámani chuperasïndi uandantani eska Diósï no chkuándirasïnga; 34jimbokachka ima enga Diósï axaka, Diósïri uandakuechani jimbo uandaxesïnga, jimboka Diósï imeri Espirituni kánhachani íntspesïnga. 35Diósï Táte, Uájpani xénhchasïndi, ka iámendu ambe jimbo juramukua íntskusti. 36Ne enga Uájpani mintsikajka, méntku isï anapu tsípekua jatsistia, ka ima enga Uájpani no uéjka mintsikani, imeni jásï tsípekua no intsïnhaati, ka Diósï ikimestia.”
נבחרו כעת:
San Juan 3: DKPJ
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Biblia en P´urhépecha, Michoacán, México © Sociedad Bíblica de México, A.C.
