San Juan 10
10
Karichi eranguti
1Ka jimajkani Jesusi uandaspti: “Sési jimboksïni arhixaka eska, ne enga no karichi incharantskuarhu isï niárajka karichichani exeani, inchatspiristi ka sïpajkurheni. 2Ka ima enga karichi incharantskuarhu isï inchajka karichi erangutisti. 3Mítati mítakusïndi, ka karichi eranguti mándani arhisïndi táchani jakangurhikua jimbo uandajpaani, ka karichichaksï míchakusïndi, ka petaataasïndi, 4ka engaksï na iámendu uérajkia, urhekupaasïndi, ka karichichaksï chúngumasïndi jimbokaksï michakusïnga. 5Ka enga nema nónemani mítejka, nónema chúxapasïndi, jamberiksï sïpakorhekusïndi, jimbokaksï no míchakusïnga.”
6Jesusi indeni terukutarantskua arhiaspti, ka imaksï no kurhanguspti ambesï uékani japi arhiaani.
Jesusisï ambakiti karichi erangutisti
7Jesusi ménderu arhiaspti: “Sési jimboksïni arhixaka: Ji inchakueska, engaksï isï karichicha inchajka. 8Iámendu engajtsïni urhechepuka inchatspiristiksï ka kuárhukpitistiksï; enga úka, karichichaksï ísku kurhauasti. 9Ji inchakueska: Ne enga ixuesï inchaska, kuájchakukateuati. Inchaati ka uéraati ka t'irekua xéntaati.”
10“Inchatspiri sïpantkusï jurhajti ka uándikpeni ka ambe k'amantskani; ka ji jurhaska eskajtsï cha ambakiti tsípekua jatsiaka, ka eskajtsï kánekuamendu sési irekorheaka. 11Ji ambakiti karichi erangutiska. Ambakiti karichi eranguti, karichichani jimbo tsípekua intspesïndi. 12K'óru ima enga tumina jimbojku ánchekorhejka, enga exejka eska jiuatsï jurhani jarhasïnga, jurarkuasïndi karichichani ka sïpakorhesïndi, jimboka ima nómendu karichi erangutiska ka jimbokaksï karichicha no imeriska. Ka jiuatsï karichichani katsarheasïndi ka etsandurhiani. 13Ima acheti sïpakorhesïndi jimboka tuminajkusï erarhukujka, ka karichichani no uandanheauani.”
14“Ji ambakiti karichi erangutiska; ka jucheti karichichani míteaska ka imajtujtsïni jíndeni mítesti, 15eskarini jucheti Táte na míteka jíndeni, jíjtuni ísï míteska jucheti Táteni ka jucheti karichichani jimbo tsípekua íntspesïnga. 16Máteru káasïnga karichichani engaksï no íni karichi jatakuarhu anapueka ka imechantuni juánguauaka. Imajtsïni michakuati, ka májkuentaatiksï, ka karichi eranguti májkueuati.”
17“Táterini xénhchasïndi jimbokani ji jucheti tsípekuani íntspesïnga ka ménderu tsípekua p'íntasïnga. 18Nónemarini euantasïndi tsípekuani, jísïni íntspejka. Jatsïska juramukua tsípekua íntspeni ka ménderu p'íntani. Jucheti Táterini indeni úni axasti.”
19Engaksï judiouecha ísï kurhapka, ménderuksï uéntaspti arhukurhini. 20Uánesptiksï engaksï uandempka:
–¿Andijtsïsï jaki indeni kurhajchani? ¿Nójtsï exesïnki eska inde nóambakitini incharhekorhetini kámaxaka ka eska xerejtsïskia?
21Ka máteruksï uandasïrempti:
–Nónema nóambakitini kámani jarhasïndi ka úni ísï uandani. ¿Andi újki nóambakiti nemani éskatarantani?
Judiouechaksï Jesusini no jiókorhesti
22Iauantskuarhuesptia, enga Jerusaleni Tiosïo Míndantskueri k'uínchekua únhantani jápka. 23Jesusi tiósïo jarhaspti, ka Salomoniri jájchukurini isï jámaxapti. 24Jimaksï judiouecha jópkurhaspti ka kurhamarhenksï:
–¿Na jatini jamberijtsïni tsimanitsimanhearhataa? Méntkujtsïni aiangu eskari t'u Krístueska.
25Jesusi arhiaspti:
–Chánksïni aianguskia, ka nójtsïni jakajkucheska. Ambantku xarharasïndi, imani ambe jimbo engani újka, eska jucheti táteri juramukua jimboesïnga; 26enga úka, chájtsï no jakajkusïnga, jimbokajtsï no jucheti karichiska. 27Jucheti karichichajtsïni míchakusïndi, ka ji míteska imechani ka imajtsïni chúxapasïndi. 28Ji tsípekua méntku isï anapu íntsaasïnga, ka nómenksï uarhiaati ka nójturini nema euajkuauati. 29Táterini íntsaasti, ka ima sánderu k'éristi ka nónema úati euajkuani. 30Táte ka ji májkueskachi.
31Judiouechaksï ménderu uéntaspti tsakapu k'arhantani Jesusini k'uanirakuekani, 32k'óru Jesusi arhiaspti:
–Táte juchetiri juramukua jimbo uánekua sési ambe úskia chánksïni japarini; arhijtsïni ¿Náki ima úkua jimbojtsïni tsakapkueraa?
33Judiouechaksï arhispti:
–Nóksïni imani jimbosï tsakapkueraaka engari xáni sési ambe úka, imani jimboksïnisï ataaka engari chéti uandakua jimbo Diósïni útakuni jaka. T'úri ísku acheti méska, ka jandiojkuri Diósï eratakorhexaka.
34Jesusi arhiaspti:
–¿Andi no chári juramukua arhisïni? “Uandaska eskajtsï cha diósïcheska. 35Enga Diósï, diósï arhiajka imechani enga Uandajpaaka, ka karakata iámu ambe ísï úkorhesïndi. 36Ka ekarini Diósï jíndeni arhutaka ka parhakpenirini axani, ¿Andijtsïsï uandajki eskani útakuska engani uandajka eskani Diósï Uájpeska? 37Engani ji no imani ambe úska enga jucheti Táte újka, ásïjtsïni jakajkuche je. 38Ka ji náuejki engani irekajka, ásïjtsïni jíndeni jakajkuche je, imani ambe jakajku je engani újka, ísïjtsï méntku míteaka eska Táte jíndeni jinguni jarhaska ka eskani ji Táte jinguni jarhaska.”
39Ménderuksï jupikani uékaspti, ka Jesusi uéjkuaspti.
40Jesusi iurhekua Jordanini parhimentaspti, ka jima pakaraspti, jima enga Juánu itsï atajtsïkpepka. 41Uánekuaksï andarheraspti ka uandasïremptiksï:
–Sési jimbo, náuejki Juánu nóma milagru úka, eska xáni íni achetiri ambe uandantapka, ísïspti.
42Ka uánekuaksï jima anapuecha Jesusini jakajkukuspti.
נבחרו כעת:
San Juan 10: DKPJ
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Biblia en P´urhépecha, Michoacán, México © Sociedad Bíblica de México, A.C.
