TA KƏLA 17
17
Nə́ɓā əndā rī Abəram na i Abəraham ō, əhɔ madə̄ naā seneé ō
1Abəram rāā ɓāl̄ kutə ndōhó gidə i ndōhó anī, Kɔ́ɔ̄ɓē ndɔ̄bə̄n ədan na:
Mā i Nə́ɓā kə́ bo kə́ tɔ́gə́ḿ i ngá̰ý. Ī-njə̄rā ta kumḿ tə́ ō, ādə̄ najə̄ gətóo dɔí tə́ ō. 2M-ā m-ə́hɔ madə̄ naā seí ō, m-ā m-ə́hɔ kadə̄ gír kaaí a ojə naā ngá̰ý ō. 3Abəram ɔsə non nang tə́, anī Nə́ɓā ɔr̄ najə̄ seneé ɓáý to̰, əda na:
4Á̰a̰ madə̄ naā yāḿ ń m-ā m-ə́hɔ seí ní n toó: Ā ī-tél kaa nápar de kə́ ngá̰ý gə̄. 5A ɓāríīn̄ Abəram to̰ alé, ba a ɓāríīn̄ na i Abəraham#17.5 Abəraham kə ta Hebəro kumən na i bɔbə̄ de kə́ ngá̰ý gə̄., tɔdɔ̄ m-ā m̄-rāāī kadə̄ ā ī-tél kaa nápar de gə̄ kə́ ngá̰ý gə̄. 6M-ā m-ādī ngán kaaí gə̄ ngá̰ý kadə̄ a télən̄ gíŕ nápar de gə̄ ō, mban̄g gə̄ a teēn̄ gír kaa yāí tə́ ō. 7M-ā m-ə́hɔ madə̄ naā seí ō, kə ngán kaaí gə̄ ń a utə̄n̄ gōí ní ō, kə gō kojədə́ gēé. I madə̄ naā kə́ a to ngándáńg, adə̄ mā i Nə́ɓā yāí ō, yā gír kojə yāí ń a utə̄ gōí ní ō. 8Dɔ nang kə́ Kanaan ń ḭ̄ i mbā tū tə́ toō, m-ā m-ādī ḭ̄ ō, ngán kaaí gə̄ ń a utə̄n̄ gōí ní ō. Dɔ nang ní a tél i dɔ nang yādə́ kə́ njɔ́ḿ gə̄ tə́ ō, mā i Nə́ɓā yādə́ ō.
9Nə́ɓā əda Abəraham ɓáý to̰ na:
Ḭ̄ ō, ngán kaaí gə̄ ō, ā ə̄ndāī kumsí gír madə̄ naā ń m-ə́hɔ sesí tə́ toō. 10Yá̰á̰ ń m-ə̄ndā dɔsí tə́ kə ngán kaaí gēé kadə̄ ī-rāāī ní n toó: Dəngam gə̄ malang a əjan̄ mɔtədə́#17.10 Kəja mɔtə: Á̰a̰ī tū «Kum Najə̄ kə́ Ngón̄g Ngón̄g gə̄» tə́.. 11Mɔtəsí ń ā ə́jaī ní i yá̰á̰ kə́ a ɔjə kadə̄ ə́hɔī madə̄ naā seḿ. 12Ngáńsí kə́ dəngam gə̄ malang ń ā ójiīdə́ ní, ré rāān̄ ndɔ̄ sɔ́sɔ́ anī, ā ə́jaī mɔtədə́. I yá̰á̰ kə́ kadə̄ ā ī-rāāī i kə gō gír kaa yāsí gēé. Ɓəlo gə̄ ń ojən̄də́ ɓēé loosí, aláa ɓəlo gə̄ ń ī-mangiīdə́ kə naraá á nin̄ i gír kaa yāsí tə́ aĺ ní, ā ī-rāāī i beé sedə́. 13Adə̄ ɓəlo ń ojənən̄ ɓēé loosí aláa ɓəlo ń ī-mangin̄ kə naraá ní, ā ə́jaī mɔtən yā kadə̄ madə̄ naā yāḿ i kə́ ndang kem dā̰ rɔ̄sí tə́ ō, i kə́ a to ngándáńg ō. 14De kə́ dəngam ń əjan̄ mɔtən aĺ ní, a ɔr̄nən̄ kɔ̄ɔ́ dan gír de gə̄ yān gə̄ tə́, tām̄ ni-mbātə́ madə̄ naā yāḿ.
15Gō tə́ anī Nə́ɓā əda Abəraham na:
Ā ī-ɓāŕ nə̄yá̰í Sarai to̰ alé, ā ī-ɓārə́n na i Sara#17.15 Sara kə ta Hebəro kumən na i ngār kə́ dəyá̰.. 16M-ā m̄-rāā majə seneé ō, m-ā m-ādī ngōn̄ kə́ dəngam kə kūl̄neé ō. M-ā m̄-rāā majə seneé kadə̄ a tél kaa nápar de kə́ ngá̰ý gə̄. Mban̄g kə́ bo gə̄ yā gír de kə́ tayā tayā gə̄ a teēn̄ gír kaa yān tə́. 17Abəraham ɔsə non nang tə́ ba əgō. Ni-əda kə́ kemən tə́ na ké deē ń ɓālə̄n i ɓú kógə̄ḿ ní ké a ojə ngōn̄ wa. Ké Sara ń ɓālə̄n i kutə ndōhó ní ké a ojə ngōn̄ ō wa. 18Anī ni-əda Nə́ɓā na:
Ādə̄ Ismael ndi kə kumneé ta kumií tə́! 19Nə́ɓā tél ədan na:
Rɔ̄kum, nə̄yá̰í Sara a ojə ngōn̄ kə́ dəngam seí kadə̄ ā ə̄ndā rīn na i Isaak#17.19 Isaak kə ta Hebəro kumən na i əgō.. M-ā m-ə́hɔ madə̄ naā seneé ō, kə ngán kaan gēé gotən tə́ ō. I madə̄ naā kə́ a to ngándáńg. 20Ba yá̰á̰ ń ī-dəje tām̄ yā Ismael tə́ ní m-ā m-ādī. M-ā m̄-rāā majə seneé. M-ā m̄-rāā kadə̄ ni a ojə ngán gə̄ ō, kadə̄ gír kojə yān a bəla ngá̰ý ō. Ni a ojə ngār gə̄ kutə gidə i jōó ō, a tél kaa nápar de kə́ ngá̰ý gə̄ ō. 21Banī m-ā m-ə́hɔ madə̄ naā i kə Isaak ń Sara a ojən yā kadī ní. A ojən dan kə́ tītə̄ ń toō tə́ kem ɓāl̄ ń a reē tə́ toō.
22Dan ń Nə́ɓā ɔr̄ najə̄ kə Abərahamaá gír gān̄g anī, əya̰n ba aw̄. 23Abəraham un ngōnə̄n Ismael ō, ɔy ɓəlo yān kə́ dəngam gə̄ malang kə́ ɓēé looneé, ngé gə̄ ń ojən̄də́ ɓēé looneé ní ō, ngé gə̄ ń ni mangdə́ kə naraá ní ō, əja mɔtədə́ ndɔ̄ nəkɔ́ ń noō tə́ tītə̄ ń Nə́ɓā ədanəń ní. 24-25Dan ń əjan̄ mɔtə Abəraham nin̄ kə ngōnə̄n Ismael ní, ɓāl̄ Abəraham i kutə ndōhó gidə i ndōhó ō, ɓāl̄ Ismael i kutə gidə i mətá ō. 26Əjan̄ mɔtədə́ i ndɔ̄ kógə̄ḿ beē, 27naā tə́ kə ɓəlo gə̄ malang ń ojən̄də́ ɓēé looneé ní ō, kə ɓəlo gə̄ ń ni mangdə́ jī tə̄rā gə̄ tə́ ní ō.
נבחרו כעת:
TA KƏLA 17: SARDC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bibəl ta Sar̄ © L'Alliance Biblique du Tchad, 2006, 2010.