LUKAS 19
19
Zakheus
19:1-10
1Antama'mu Isa ri kota Yerikho na a'lingka tarrusui a'molong ri kota injo. 2Ri injo rie' tau riareng Zakheus, ponggaha palele sima, na ia se'rei tau kalumannyang. 3Ia a'ra'i lajanjang tau anteekamua riareng injo Isa, mingka gelei akkulle kanara lohena tau, saba' ia tubodo-bodo. 4Jari allarimu lapilombai tau lohe injo, ampai ngambi' ri poong kaju ara lalajanjangi Isa ampa lumaloi ri injo. 5Sungka'na ambattumo Isa mange ri tampa' injo, Ia ammongai na appaui mange ri ia, ”Zakheus, lassiriko naung mae, saba' allo inni parallua lasse'ka ri sapommu.” 6Jari lassirimu Zakheus naung na latarimai Isa lalang rikarannuang. 7Lajanjanna passala injo, lohemo tau pakaramula a'moro-moro, lakua, ”Ia asse'kai ri sapo tau doraka injo.” 8Mingka ammentengi Zakheus na appaui mange ri Karaeng Isa, ”Karaeng, janjangi, sidahu ruana nurie' ri nakke lakupaa'dahu-dahuangi mange ri tau kaasai-asi na ampa rie' nukualle passa battu ri parangku tau, lakupahuliangangi a'lappi appa'.” 9Lakuamo Isa mange ri ia, ”Allo inni a'jarimu kasalamakang mange riassinna sapo inni, saba' tau inni ana'na todo'i Abraham. 10Saba' Ana' Rupatau rie'i mae laa'boja na laappakasalama' tau lingu.”
Pakkalebarang doe' mina
19:11-27
(Mat. 25:14-30)
11Riattangngana tau lohe injo appilangngeri sikonjo passala, lasambungi pauna Isa lalang se're pakkalebarang, saba' ambanimu ri Yerusalem na pa'ngare'na ma'nassana Pakkaraengang Allataala lalibai kajanjangang. 12Jari lakuamo Isa, ”Rie' se're pinangka' karaeng laa'lampa mange rise're kota maraeng laripaa'jari karaeng injo na maempai injo ampai muliang. 13Ia lakeo'i sampulo atanna, ampai lasarei doe' mina sampulo lahara'na mange ri iyai, lakua pauna: Pakei doe' intu a'danggang sa'gengku muliang. 14Mingka sikuanna tau sikamponna likingi ri ia, jari appalampai suro lalapinahang ribokoi laappau: Gelekang attua tau inni a'jari karaeng ri kambe. 15Sungka'i maemmo riangka' a'jari karaeng, rihattu muliannamo, ia lasuro keo' ngase' atanna, tumaeng risare injo doe', lalaisse'i sikura sahala dangganganna. 16Mangei tau makase're injo na lakua: Karaeng, doe' se're injo Mina a'jari ganna'mu sampulo mina. 17Lakuamo mange ri tau injo: Baji' sikali panggeokammu, oe ata lambusu; kau mallangko ripassala ki'di', kanara injomo kau larisare kahasa mange risampulo kota. 18Mange tommoi tau makarua injo na lakua: Karaeng, doe' se're injo mina a'jarimu lima mina. 19Lakuamo mange ri tau injo: Na mange ri kau, kahasai todo'i lima kota. 20Jari mange todo'i ata maraeng injo na lakua: Karaeng, iamo inni doe'ta nuse're injo Mina, maeng kunanroangki ri passapuku. 21Nakke malla'a ri ditte, saba' ditte tau sekke'; ditte ngalleki nanugele minang ritaro na anduruki nanugele minang rilamung. 22Lakuamo mange ri tau injo: Oe kau ata daa intu sipa'na, kupassalako assituru' pappaumu to'jua. Muisse'i ma'nassa nakke inni tau sekke', kualle nanugele minang kutaro na andurua nanugele minang kulamung. 23Ampa appakonjo, ngura doe'ku gele mupantama' ri baang? Jari, rihattu muliangku akkulle kualle surang ana'na. 24Maeng injo lakuamo mange risikuanna tau ammentengi ri injo: Allei doe' Mina rie' injo ri ia na mupassareangi mange ri tau rie' injo sampulo doe' Minana. 25Lakua ngase'mo mange ri ia: Karaeng, ia rie'mo sampulo doe' Minana. 26#Mat. 13:12; Mark. 4:25; Luk. 8:18Pappihalinna: Sikuanna tau rie' anunna, larisarei, mingka inai tide' anunna, laripangallei, injo pole nurie' injo ri ia larialle ngase'i. 27Mingka, sikonjo balingku inni, tugele injoa langai a'jari karaenna, erangi mae konni na hunoi ri a'rakang matangku.”
Isa ripakala'biri ri Yerusalem
19:28-44
(Mat. 21:1-9; Mark. 11:1-10; Yah. 12:12-15)
28Sungka'i maeng ngase'mo lapau injo a'lampa rioloi Isa na latarrusang lingkaNa mange ri Yerusalem.
29Rihattu seppa'namo ri Betfage na ri Betania, se're tampa' rate bonto nuriare' Bonto Zaitun, assuroi Isa rua suro-suroNa 30na lapasangi, ”A'lampako mange ri desa rie' injo ri a'rakammu intu: Rihattu antama'mui ri injo, lanrumpakiko sikaju kaladai longko tattambang, nugelepa minang labai tau. Lekkesi tambanna kaladai injo na renrengi mae. 31Ampa rie' tau akkuta'nang mange ri kaui: Ngura mulekkesi tambanna? Appakonni pappihalimu: Laparalluangi Karaeng Isa.” 32Jari a'lampaimu tau rua risuro injo, na larumpaki ngase' toje'i assituru' pauna Isa. 33Rihattu lalekkesinna tambanna kaladai injo, appaumu opuna kaladai, ”Ngura mulekkesi tambanna kaladai intu?” 34Lakuamo, ”Laparalluangi Karaeng.” 35Larenrengimu kaladai injo mange ri Isa, na baju bakka'nai lapalapa' ampai lapabai Isa nai' ri kaladai injo. 36Ria'bainamo Isa ri kaladai injo, lapaaparimu baju bakka'nai ritangnga lalang. 37Rihattu ambaninamo Isa ri Yerusalem, ri tampa' solorang ri Bonto Zaitun, pakaramulamu sikonjo ana' gurung larurung injo Isa a'rannu-rannu na lapakala'biri Allataala lalang sa'ra bakka' saba' lohena numasagala maeng lajanjangi. 38#Mzm. 118:26Lakuaimo,
”Ripakala'birii Turie' injo mae assimpole Karaeng lalang arenna Allatala, dame salehangang ri Suruga na kala'birang ripammarianna Tukaminangang la'biri!”
39Rie' todo' sikura tau Farisi minahang ri tau lohe injo appau mange ri Isa, ”Guru, pisangkaisadai ana'-ana' gurumMu intu.” 40PappihalinNa, ”Nakke appau mange ri kau: Ampa ammakkang ngase'i inni, batu-batu inni isse' la'gora-gora.”
41Rihattu seppa'namo Isa na rilajanjanna kota injo, apparaui Isa, 42lakua pauNa, ”Sanna'i baji'na so'di ri allo inni mupahangi apa nuparallu ri dame salehangammu! Mingka konni-konnina passala injo ta'lengu'i ri matammu. 43Saba' larie' hattunna, rihattu lapiappuimmu bali, maeng injo lasesseriko na laampangi sikonjo pa'molongammu. 44Lalahunoko surang sikonjo jannangang rie' ri kaui, na tembo'na gelei lapa'biang rie' batu a'lonjo' manna se're rateang batu maraeng, saba' gelena muisse' hattunna Allataala larie' lalapakasalama'ko.”
Isa appakatangkasa Sapo Allataala
19:45-48
(Mat. 21:12-13; Mark. 11:15-18; Yah. 2:13-16)
45Maeng injo antama'i Isa ri Sapo Allataala na pakaramulamu labongka ngase' padanggang rie' ri injo, 46#Yes. 56:7; Yer. 7:11lakua mange ri iyai, ”Rie' ta'ukiri: SapongKu iamo intu Sapo pangera dowaang. Mingka kau ngase' intu mupaa'jari pammariang palukka'.”
47 #
Luk. 21:37
Allo-alloi Isa ngajara ri Sapo Allataala. Sikonjo imang ponggaha na guru Tora' surang tutoa-toana Israele laparri-parri lalahuno Isa, 48mingka gele laisseki, anteekamua ta'ranna, saba' tulusu lohe tau riampi'Na na a'ra' ngase'i appilanggeri pauNa.
נבחרו כעת:
LUKAS 19: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)
