LUKAS 17
17
Lohe Pappiu'rangi
17:1-6
1 #
Mat. 18:6-7; Mark. 9:42 Appaui Isa mange ri ana'-ana' gurunNa, ”Tantumu rie'na tulaappa'lingu, mingka balamo tau appa'rie' injo. 2Bajikangangi ampa gilingang batu risaakang ri kallonna, maeng injo rilabuangi ri tamparang, nalapassabaki sala se'renna ri tau ki'di' inni a'bua' kadorakaang. 3#Mat. 18:15Katutui kalemmu! Ampa urang siana'mu a'bua' kadorakaang, piu'rangii, na ampa lasassala kalenna, sarei ampung. 4#Mat. 18:22Injo pole ampa a'bua'i doraka mange ri kau pintujung siallo na pintujung todo'i mange ri kau ngera ampung na lakua: Kusassala kalengku, parallui muampungi.”
5Jari lakuamo suro-suro injo mange ri Karaeng Isa, ”Ripakajarre'i katappakamba!” 6Appihalimu Karaeng Isa, ”So'di injo rie' tappa'mu manna assimbakka'juai lisere sinahu, akkulleko appau ri poong kaju ara inni: Ta'bu'bu'ko na tatti'ja'ko ri tamparang, na ia tunru'i ri kau.”
Karaeng surang ata
17:7-10
7”Inai ri kau intu rie' se're atanna lapambingkungangi tana iyareka lakalahakiangi binantanna lappau mange ri ata injo, sungka'i muliammo battu ri koko: Maeko langanreki! 8Gelejua sibale'na ia lappaui mange ri ata injo: Pappatalaanga kanre, ka'ba' jarre'i aja'mu na appantoroko sa'gengku ammono' nganre surang nginung. Maempa injo ampako akkulle nganre surang nginung. 9Makala attarima kasi juai mange ri ata injo, saba' ata injo maeng ngase'mu lageokang apa nurisuroang injo mange ri ia? 10Appakonjo todo'i ri kau intu. Ampa maeng ngase'mu mugeokang iangase'na nuripassuroang mange ri kau, parallui mupau: Kambe inni ata tide' jua matu-matunna; nutageokang sangga anggeokamba jua rinuparallu injo latageokang.”
Sampulo tau kattakang
17:11-19
11Lalang ripa'lingkaanNa mange ri Yerusalem Isa attete passimbanganna Samaria na Galilea. 12Rihattu antama'namo rise're desa rie'mo sampulo tau kattakang mange ri Isa laurangi assijanjang. Ammenteng dere juai, 13na a'nga'ngarai: ”Isa, Guru, rikamaseangkang!” 14#Im. 14:1-32Jari assailei Isa mange ri iyai na lakua: ”A'lampamoko, pappijanjangangi kalemmu mange risikonjo imang.” Na rihattu attangnga lalannai juapa sikalinna molemu katta'na. 15Rie' se're tau battu ri iyai, muliangi na lapakabakka'i sa'ranna lapakala'biri Allataala, 16maeng injo joppa'i ri a'rakang bangkenna Isa na appanai' sukkuru mange ri Isa. Tau injo tau Samaria. 17Jari lakuamo Isa, ”Gelejua tau sampulo injo sumpae' mole ngase'i katta'na? Riantee mae tau kaassa injo? 18Geleka rie' manna se're tau ri iyai muliang mae konni lapakala'biri Allataala maraenganna ri tau battu-battu inni?” 19Maeng injo lakuamo Isa mange ri tau injo, ”Ammentengko na a'lampamoko, tappa'mu lapakasalama'ko.”
Pariekanna Pakkaraengang Allataala
17:20-37
(Mat. 24:23-28, 36-41)
20Sungka'i rikuta'nang risikuanna tau Farisi sikuraiya larie'i Pakkaraengang Allataala, pappihalinna Isa, ”Parie'na Pakkaraengang Allataala tide' tanra-tanra kajanjangang, 21tau inni gele todo'i akkulle lakua: Janjangi, ia rie'i ri inni iyareka ia rie'i konjomange! Saba' sitoje'na Pakkaraengang Allataala rie'i ri kaui.”
22Maeng injo lakuamo Isa ri ana'-ana' gurunNa, ”Larie' hattunna sallo' a'ra'i mujanjang siallo battu allonna Ana' Rupatau, mingka gelei akkulle mujanjangi. 23Rie'mo tau laappau mange ri kau: Janjangi, Ia rie'i konjomange; janjangi Ia rie'i ri inni! Akomo a'lampa mange konjo, akoimo minahang. 24Saba' assimpole kila' ta'bebe battu riappa'na langi' se'reang mange riappa'na langi' sihaliang, appakonjo todo'i sallo' passala'na Ana' Rupatau ri allo pariekanNa mae. 25Mingka Ia parallui languppa lohe kamarasaiang riolo na ritolla'i risikuanna tau konni-konni. 26#Kej. 6:5-8Assimpole kajariang rihattunna Nabbi Nuhung laappakonjo todo'i rihattunna Ana' Rupatau: 27#Kej. 7:6-24Nganre manginung ngase'i, a'bonting surang ripa'bontingangi, sa'genna larapi' hattunna Nabbi Nuhung antama' ri lopi injo, maeng injo battumu a'ba bakka' nalapakamate ngase'i. 28#Kej. 18:20–19:25Appakonjo todo'i assimpole kajariang rihattunna Lot; nganre manginung ngase'i, a'balu' surang ammalli, a'lamungi surang appaenteng ngase'i sapo. 29Mingka rihattu ansulu'namo Lot battu ri Sodom, turungi bosi api surang bosi halerang battu ri langi' na lapakamate ngase'i. 30Appakonjo todo'i passala'na sallo' rihattunna Ana' Rupatau lapappijanjangang kalenNa. 31#Mat. 24:17-18; Mark. 13:15-16Rihattu injo inai rie' rate ri sapo na apa-apanna lalangi ri sapo, andamu naung langalle, na appakonjo todo'i tau rie' injo ri koko, andamu muliang. 32#Kej. 19:26U'rangi kajariang ri bahinenna Lot! 33#Mat. 10:39, 16:25; Mark. 8:35; Luk. 9:24; Yah. 12:25Inai jua apparri-parri lakatutui nyahana, ia latappela' nyahana, na inai tappela' nyahana, iamo lapakasalama'i. 34Nakke appau mange ri kaui: Ribangngi injo rie' rua tau ri patinroang, se're tau lariurang na se're tau injo laribokoi. 35Rie' rua bahine assurang anggiling, sitau lariurang na sitauang laribokoi.”
[ 36Ampa rie' rua tau ri koko, se're tau lariurang na se're tau laribokoi.] 37Akkuta'nangimu mange ri Isa, ”Karaeng, ri anteemae lakajariang?” Lakuamo Isa mange ri iyai, ”Ri antee-tee mae rie' bonara ri injo lohe kalaa' a'domung.”
נבחרו כעת:
LUKAS 17: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)
