Medhetethi 7
7
Dhayo Haathaa
1Hessafe guye, Goday Nohe haysada yaagis; “Neeni ne soo asa ubbaara markabiya giddo gela. Ha wodiya yeletethaa giddon ta sheniya poliday ne xalaala gididaysa be7as. 2Neeni tuna gidonna mehenne do7a ubbaafe iya qommofe qommofe addenne macca laapun laapun, tuna mehenne do7a ubbaafe iya qommofe qommofe issi addenne issi macca gelsa. 3Qassi salo kafotape iya qommofe qommofe addenne macca laapun laapun oothada, biitta ubbaa bolla dumma dumma kochay de7on daana mela neera ekada gela. 4Laapun gallasape guye, taani oytamu gallasinne oytamu qamma ha sa7aa bolla ira bukisana. Yaatada taani medhida medhetetha ubbaa biitta bollafe quchana” yaagis.
5Yaatin, Nohey Goday iya kiitida ubbaba oothis.
6Dhayo haathay ha sa7aa bolla yida wode Nohes laythi usupun xeeta. 7Nohey, iya adde nayti, iya machiyanne iya nayta macheti dhayo haathaafe attanaw markabiya giddo gelidosona. 8Tuna gidonna mehepenne do7ape, tuna mehepenne do7ape kafotapenne biittara goosheteyisata ubbaafe 9Xoossay Nohe kiitidaysada addenne maccas nam7a nam7a gididi, Noheko markabiya giddo gelidosona. 10Laapun gallasape guye, dhayo haathay ha sa7a bolla yis.
11Nohey usupun xeetu laythi de7in, nam7antho ageenan, tammanne laapuntha gallasan, biitta giddon de7iya gita ciimmuwa pulto ubbay dhuuqi aggis. Salon de7iya haatha maskooteti dooyetidosona. 12Iray ha sa7aa bolla oytamu gallasinne oytamu qamma bukis. 13Iri buka doomida gallas Noheynne iya machiya, iya adde nayti, Seemi, Kaaminne Yaafeti, iya nayta heedzata macheti issife markabiya giddo gelidosona. 14Do7a ubbaafe ba qommon qommon, mehe ubbaafe ba qommon qommon, biittara gooshetiya ubbaafe ba qommon qommon, kafo ubbaafe ba qommon qommon entara issife gelidosona. 15Shempora de7eysati ubbay nam7a nam7a gididi Noheko markabiyan gelidosona. 16Xoossay Nohe kiitidaysada, medhetetha ubbaafe addenne macca gididi markabiya giddo gelin Nohepe guyera Goday markabiya pengiya gordis.
17Dhayo haathay oytamu gallas sa7a bolla bukishe de7is. Haathay daridi markabiya biittafe pude denthis. 18Haathay biitta bolla keehi darin, markabey haatha bolla tooketis. 19Salope garsan de7iya zumati ubbay mitettana gakanaw haathay sa7a bolla keehi daris. 20Haathay zumata xeerape aadhidi, tammanne ichashu wadha gakanaw diccis. 21Yaatin sa7a bolla woxi qaaxiya medhetethati ubbay, kafoti, mehey, do7inne, asi ubbay hayqis. 22Biitta bolla de7iya ba siidhera de7o shempo shempiya ubbayka hayqis. 23Sa7a bolla de7oy de7iya ubbay, asay, mehey, do7aynne salo kafoti ubbay sa7ape qushetidosona. Noheynne iyara markabiya giddon de7eyisata xalaali attidosona. 24He haathay pacconna xeetanne ishatamu gallas sa7a bolla gam7is.
נבחרו כעת:
Medhetethi 7: GFBLVF
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
The Word for the World International and The Word for the World Ethiopia