Yohanes 6

Yesus arye dina bokuka aribukba, ninye weik yupa-yupa pamubarye (5.000) nang arye dibik ati, nyabuk yupu

1Yesus arye Farisi nang ati yupu nyabukce, sik nirya daulamika ani, aminyan talak ara, amutuku batakuka, mek lia perahu yo deice bukuka, Galilea mekwen otam biyuk. (Amekwen bukni, ton yuk si ara, Tiberias mekwen nyalamik.) 2Dana-dana tam ulamik ninye ara, Yesus arye uk talilamuk ninye kwetelamukce, ninye kum winipmanto pil dolamuk ning ara elilamika ati, Yesus biyukba, ninye yupa weik, ‘Yesus eipnamap’ tenen, amutuku uk biyik. 3Yesus otam mutuku Betsaida mutuku biyukce, tonok mutuku deice welebukce, el ap, el mapu ap bukmek. 4(Amutuku biyik talak ara, sik Yahudi yala ninye arye Kaplina ati Kwalina kwalilamik sum akunum dam ubuk.)

5Yesus ap, el mapu ap, amutuku deice bukmek talak ara, amutuku yanmek ninye yupa weik el dam yanganmekba, Yesus arye eibuk. Eibukce, Pilipus ati nyabuk. “Pilipuso, dan mutuku arye dina weik dektibirye, ayanganmak nang ati areptibye do?” nyabuka asipdeyuk. 6Yesus arye, ‘Anang sik din arena ati, winipnune,’ akunum tenebuk bukni, Pilipus biti asipdeyuk ning ara, ‘Pilipus yata nyapnunil do?’ tenen, tenebuka asipdeyuk.

7Yesus arye nyabukba, Pilipus arye tamubuka nyabuk. “Kume, naio. Aninye ara, yupa weik wekmaka anya arye, mince wala pin barye talak arye pil dopmatibyeura, nun dekna ati, yo bok weik arepmasitinga babye, adeice arye dina weik kum dektibye bukni, dina weik dektibya babye, suktuba aninye nirya kum diptinge,” nyabuk.

8Nyabukba, Yesus el mapu kan-kan arye, tonoknye ton Simon Peterus el weit Anderias arye nyabuk. 9“Tonok mi, anyaka unmal mi ara, din ning ati roti mitik ning pamubarye ap, mekin bal mitik ning bitinye ap, libuka boyanmala ara, eipmap bukni, aning nirya bokuka aninye yupa weik ati areptibya babye, ninye weik kum diptinge,” nyabuk.

10Nyabukura, Yesus arye el mapu nirya ati nyabuk. “Anggunce abulupmak ninye nirya ati, ‘Buklulume,’ nyaplulume,” nyabukba, sikce nyabikopura, sik unmeka ara maning weik pamukak ati, aninye nirya arye maning deice bukmek. Kilapu ap, mapu ap kum nukik bukni, sal ara yupa weik 5.000 nang unmek. 11Akunum bukikopura, Yesus arye aroti kwaning pamubarye dobuka ereptalibukce, el li Allah ati, “Telebe,” nyabukura, el mapu ati aribukba, sikce bukmek ninye nirya ati bokuka arebik. Arinmekura, aninye sik patanmok touk, dobuka dinmek. Aning atonun, Yesus arye amekin bal bitinye babye bokuka aribukba, sik nirya arye dobuka dibik.

12Sik nirya arye aning dobuka dinmeka ani, akunum boubukopura, Yesus arye el mapu ati, “Sik anang arye kwal batakmak ning nirya dobuka, tonok akuk bulubuka deipnamlulume. Mitika babye ton batakana kume,” nyabuk. 13Aning nyabuk touk, el mapu arye dina kwal batakmek ning dobuka tonok ak deibikba, sik bulubuka libuka deipmek ning ara, aling atonun ning, el si bakul weik ning 12 deiyamik arye libuka deibik. Ara, aroti kwaning pamubarye, mitik anun upmok bukni, Yesus el pil dobuka deice arye, kwal batapmek ning ara weik kibuk.

14Yesus arye ninye kum winipmanto ning, adin ning bokuka arepmok ning ara eibikce, adiparyuk deiyok koubuka ayupu nyapnin banmek. Ara, “Kume, sik nabi nang arye minop talak arye nyapdeiamsik atonun, ‘Allah el yupu Laka nyananye, nabi yanamle,’ nyapdeiyamsiknye bira, Yesus elda akunuma,” nyabuka lak nyapra balamik. 15Nyalamika ati ara, sik kanye noutamak tenelamik ning babye, Yesus akunum tenyamuk. Ara sikce Yesus ati, ‘Nun weik ninye deiyoknye, Raja unamsil’ tenen, ‘Yesus dobdebibyeba, amutuku nirya talinamsil’ tenen, ‘Yesus dobuka erepdeibibyeba, elce talinamsile,’ tenelamik. Sikce utenelamik ning ara, Yesus akunum bikamuka anya arye, aninye asukumuk batakuka, el yuk bai tam mutuku biyuk.

Yesus arye, weik mekwen deice yanibuka biyuk ati, nyabuk yupu

16Asum bukni, keting wekelbinuyuk talak ara, Yesus el mapu mekwen kup-kup kouluka biyik. 17Biyikopura, weik mek lia yo wekmekce, ‘Mek kwen otam Kapernaum mutuku binuyap’ tenen, yo lakase dobuka bukunmekce banmek. Mekwen deice banmek talak ara, akunum inibuk bukni, Yesus ap kum biyik. Yesus ara, el yuk tukwak tam tuba unmok. 18Yesus el mapu ara, mekwen deice banmek bukni, mekwen noutamak banmek talak ara, weik mungna ap, liman ap, mok ap ubukba, mekwen weik arye lonting-lonting anmok.

19Wininmok talak ara, sikce yo lakase mikip arye bukunmekce, pamubarye kilometer atonun, tonda, naku barye kilometer#6:19 kilometer – Tonok kilometer nyanyak ara, bisik bana mitik pera ati nyanyake. Nun mutuku noutamak ara, winipmanto ning nyapnusine. Ara, Londinin asik arye Barama atonun, tonda Eipomek arye Pamek bana atonun, tonda Londinin asik arye Lalakon bana atonun, abisik bana ara satu kilometer atonun nyaptibye. atonun biyik bukni, weik kumanya donmok anya arye, amekwen noutam akuk tuba wekmek. Mek kwen deice banmeka ani, Yesus arye mekwen deice yanibuka biyukce, sik unmeka damak biyukba, eibik. Banmoka eibikopura, ‘Isa do?’ tenen, ilil weik ubukba lukdayik.

20Ilil weik unmok bukni, Yesus arye sikti, nyabuk, “Kume, na aununa anya arye, anggun ilil kanye bona meme. Aning ara, bataklulume,” nyabuk. 21Nyabukura, sik kanye deibik. Yesus arye sik mek lia yo perahu welebuka bulbiyukura, mekwen deice mitik ton biyikopura, mekwen kup-kup otam Genesaret mutuku biyik.

22Kapernaum mutuku mapmeka, berekukopura, amekwen otam Betsaida mutuku tuba unmek ninye arye utenebik. ‘Kume, mekwen lilun ara, mek lia yo perahu tonok ninguk upmobuk, Yesus el mapu aning dobuka, mekwen deice binmonge bukni, Yesus ap, sik ap neika kum banmangue. Sik yuk binmangue,’ tenebik.

23Betsaida mutuku unmeka ani, aminyan talak mekwen otam, Yesus binmok mutuku uk, Tiberias mutuku arye banmeka ani, mekwen atam Betsaida mutuku biyik. Mek lia yo perahu yanuka lukeibuk opura, Yesus arye, “Telebe,” nyabuka, dina bokuka aribukba, ninye yupa weik arye din dinmek mutuku, Betsaida mutuku uk biyik. 24Biyikce sik ap, amutuku unmek ninye ap, yupu talipmek deice arye bikik. ‘Yesus ara Tiberias mutuku kum binmoe. El Kapernaum mutuku binmo daribe’ tenebikce, ‘Yesus dilbinuyap’ tenen, Kapernaum mutuku biyik.

Yesus arye, “Nara, kam una deiyok kwaning unune,” nyabuk yupu

25Sik Betsaida mutuku ninye arye, mekwen deice banmeka ani, mekwen otam Kapernaum mutuku yayikce, Yesus enmeka ani, Yesus aunmoka ak, eibik. Eibikce, Yesus ati asipdeyik. “Nun Peterena Deiyoknye, anda yata talak arye amutuku yanmomu do?” nyabuka asipdeyik. 26Asipdeyikba, Yesus arye anang ati nyabuk.

“Na kele. Anggunce enmanuluma deiyok ara, ‘Yesus arye ninye kum winipmanto ning pil dopmoka anya arye, el yupu kekepnuyap’ tenen, kum dilyanmanulume. Anggunda, ‘Roti kwaning bokuka, weik arye arepmasuka, dinmapua ani, boupsuka ati, atonun din ning tonap arepnamsil’ tenen, dilyanmanulume. 27Narye nyapsine. Talye lyupmanto din ning ati, ‘Kanye deibuka dopropnamap’ tenen, pil dona meme. Aninguk tenena kum bukni, nara Ninye Mi Koprop Atonunye arye, din ning atonun ning arepsitinye aning ara, arepsiniba dopropmunyopura, aminyan pia kam unamlume. ‘Aninguk doproptibye’ tenen, pil donamlulume. Ninye Mi Koprop Atonunye ati ara, nun ni Allah arye elti, kanye akunum deibuke,” Yesus arye nyabuk.

28Yesus arye nyabukba, sikce asipdeyik. “Allah arye, ‘Wininamake,’ tenyamsuk ning, ‘Aninguk tenebuka pil donamape’, tenebibyopura, yatato pil doptibyeba, Allah arye kanye deipsutu do?” nyabuka asipdeyik. 29Asipdeyikba Yesus arye, “Kume, Allah arye, ‘Wininamake,’ tenyamsuk ning ara, yuk pil ton kume. Ara, elce wipdeipsuknye biti, dib tenenamlulume. Anggun wininamlum ning ara, aninguka,” nyabuk. 30Yesus arye nyabuka ati, sikce nyabik.

“Ura, yata mambul pil, ninye arye winipman kum pil dopsutumopura, eiptibye deice arye, ‘Dipkoprop Allah arye anye bira wipdeipmasile’ tenen, kel kiptibirye, dib tenepkitibye do? Danto pil dopsutum do?” asipdeyik. 31“Aning atonun ara, Allah yupu noutamak ara ayupu sekik.

‘Allah arye im deice din ning el si ara, mana kwaning dopkwetebukura, dibik.’ (Keluaran 16:4)

Ayupu sekamik atonun, nun apu yapu#6:31a Yahudi yala nang, sik apu yapu ati, laka nyana yupu nomor 20 dirume. arye, ninye kum ulamik mutuku ap, mok kum celamuk mutuku noutamak balamik talak ara, Allah im deice arye, arilamuk kwaning el si ara, mana kwaning#6:31b mana kwaning – Ayupu mana kwaning nyalamik ning ara, Ibrani yupu deice arye nyalamik. arilamukba dilamik. Ati ara, anda yata ning arepsutum do?” nyabik.

32Nyabikba, Yesus arye aninye ati tamubuka nyabuk. “Na dipkoprop nyapsine. Musa arye im deice din ning roti, kwaning el si ara mana kwaning, dipkoprop ning ara kum areamsuke. Na Ni Koprop Allah arye im deice roti dipkoprop ning ara#6:32 im deice roti kwaning – Yesus arye, im deice roti nyabuk ning ara, domon yupu arye nyabuk bukni, ayupu nong noutamak ara, el bidamnye biti nyapdayuk. arisulule. 33Anyapmasina ara, talye ati kume. Deiyok ara, Allah el im deice roti atonun ning ara yuk ning kume. Ara im deice arye tukwak mutuku yanuka ulamlirye, ninye mutuku-mutuku nirya ati, kam una deiyok ning arilya deiyoknye el uka.#6:33 kam una deiyok ning arinanye – Ayupu ara, Yesus arye, el bidamnye atibuk nyapdayuk. Elda roti kwaning atonun ululnye.” Yesus arye nyabuk. 34Nyabukura, sikce Yesus ati, “Ati naio, atalak arye dipdongobuka, oyanamle talak nirya ara, an nyapsilam roti kwaning arenamsilame,” nyabik. 35Nyabikba, Yesus arye tamubuka adomon yupu nyabuk.

Roti kwaning kam una deiyok ning ara, na uka. Yuknye ton kume. Yata ninye do nirya, nati moropnikirye, na dam yanamniyak ninye ara, wini talak arye dipdongobuka, doyanamle talak nirya ara, din pia kum patapnamle. Tonda, nati diba tenepnice ninye nirya ara, doyanamle talak nirya ara, mek pia kum patapnamle. 36Bukni, narye anggunti arup arye nyapmasina atonun, na wininun ning ap, na nong ap, akunum elinululum bukni, tuba-tuba dib kum tenenululume.

37Yata ninye do nirya, na ni koprop Allah arye arinilye ninye nirya ara, nati dib tenepnikirye, na dam yanganamniake. ‘Elcuk lyepnamsil’ tenen, na dam yanganamniyak ninye nirya ara, ‘Sikda na lik,’ nyabuka kum batakanamne. 38Anyapmasin yupu deiyok ara, im deice arye tukwak mutuku yasirye, ‘Na dopdeipnuknye, Allah el tenenilye piluk donamne,’ tenepsirye yase. Nara, ‘Na kanye aryuk tenenun ninguk tenebuka wininamne’ tenen, kum yase. 39Dopdeipnuknye, ‘Wininamle,’ tenyamnuka ara nyapnusine. Ara, na Ni Koprop Allah arye, ‘Aninye nirya ara, na mi ati arenamne,’ tenyamukce, wibuka areamnuk ninye nirya ara, tonok babye kum wangapnamnile. Tonok ning babye, kum winipnitinge bukni, sirya talak ara, ‘Aninye nirya ara, pia kam unamak’ tenen, sik nirya kam bukeibuka ereipnamne.

40‘Winipnamne,’ nyapmasina ara, talye ati kum nyapsine. Deiyok ara, na ni koprop Allah arye utenelule. Ara, Allah arye, yata ninye do nirya sikce, ‘Allah el Mi Koprop arye lyepsute’ tenen, na mi ati dib tenebiceura, ‘Dipkoprop pia kam unamake,’ tenelule. ‘Kam pia unamak’ tenen, na Yesus arye sirya talak, aninye nirya ara, kam bukdeipnirye ereipnamne. Yesus arye awekmek ninye nirya ati nyabuk.

41Nyabukopura, sik Yahudi yala nang arye, Yesus ati yu ubukba, malye kanye bobuka, yuprobikce malye nyanmek. Yesus arye, “Nara, im deice arye yayuk kwaning, kam un kwaning roti deiyok ara, na uka,” nyabuka ati, sik yuk anye bopmek. 42Yu ubukba nyanmek. “Anye bira, Yusuf arye deibuk mi kum ulul do? Kume, elda anye binyuka. El li koprop ap, el lin koprop ap, ara nun kele. Ati ara, yata wiribuka, ‘Nara, im deice arye tukwak mutuku yase,’ nyapsutu do? Talye nyanmasile,” nyabik.

43Nyanmekba Yesus arye sikti, nyabuk. Yu upmasilabuk, malye yupu nyaldanmaluma ara bataklulume. 44Yata nang do nirya, na dopdeipnuknye, na Ni Koprop Allah arye anang ati, ‘Yesus dib tenepnamak’ tenen, sik kanye talima kum tamupdeiplyopura, nati dib kum tenepnitinge. Allah arye wipdeiamuk ninye nirya, sirya talak ara, narye kam bukdeipnirye ereipnamne. 45Minop talak, Allah el yupu lak nyalamuknye, nabi Yesaya arye sekamuk touk, nati dib tenenyak nang unyake. Nabi Yesaya arye nyabuk yupu ara ani.

‘Allah arye aninye nirya ati peterepliba, kel bikinamake.’ (Yesaya 54:13)

Ayupu aubuka ati, yata ninye do nirya, Allah arye el yupu nyalyeba, kekebikirye dib tenebuka, elti, kel kinyak ninye nirya ara, ‘Yesus arye lyepnamsil’ tenen, nati dib tenenamake. 46Allah im deice arye dopdeibuknye, elcuk Allah elilamuk. Yuk ninye nirya arye, Allah pia kum elilamik. Allah arye wipdeibukce, sik ak dopdeibuknye, eluk Allah eililule. 47Dipkoprop nyapsine. Na nyanye yupu ap, na ap ati, dib teneplinye bira, kam una deiyok ning akunum dololule. 48Nara, talinye kume. Nara, roti kwaning kam una deiyoknye bira, na uka. Yesus arye nyabuk.

49Nyabukce ayupu ton nyabuk. “Anggun apu yapu ara, Allah im deice arye dopkwetebuk kwaning, el si ara mana kwaning, bulubuka dilamik bukni, aminyan talak ara diplamik. 50Bukni, na nyapmasina ara, im deice arye yayuk roti kwaning dobuka dilinye bira kum dipnamake. Pia kamuk unamle. 51Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.

52Nyabukopura, sik Yahudi yala nang arye, yu ubukba nyaldanmek. Sikce nyanmek. “Kume, anye bira, yata wiribuka el nong arepsutuba, diptibye do?” nyabuka yupu deice nyaldanmek. 53Nyaldanmekba, Yesus arye sikti, nyabuk.

Dipkoprop nyapsine. Nara, Ninye Mi Koprop Atonunye, na nong ap, na ining ap kum dipmunyopura, bol koplobuka kam una deiyok ning kum doproptume. Pia kam kum unamlume. 54Bukni, yata ninye do nirya, na nong ap, na ining ap dinyak ninye nirya ara, pia kam una deiyok ning akunum doprobikirye unyake. Aninye nirya ara, sirya talak kam bukdeipnirye, ereipnamsine.

55Aning ara, na nong ara, kwaning sirik atonun ulule. Na ining ara, mek sirik atonun ulula ati nyapsine. 56Yata ninye do nirya, na nong ap, na ining ap dinyak ninye ara, na ap kanye dukdongobuka, na ap neika unyake. Narye sik kanye talima noutamak tuba unamne. 57Ara, Kam Una Deiyoknye bira Allah pia aulule. Na ni Allah dopdeipnukce talinululba, kam tuba unye touk, aning atonun na unun ning ap, nyasinye yupu ap, dolonyak ninye ara, narye talisinibuk, na deiceuk pia kam unamake. Yesus arye nyabuk.

58“Adomon yupu nyapmasina deiyok ara, im deice arye yayuk kwaning, nati nyasunune. Nun apu yapu ara, Allah im deice arye dopdeiamuk ning, el si mana kwaning bulubuka dilamik bukni, aminyan diplamik. Bukni, na nyapsin roti dobuka dinyak ninye ara, kam pia unamake. Ara, nati dib tenepnikirye, melinamniak ninye ara, pia kam unamake.” Yesus arye ayupu nirya nyabuk.

59Yesus arye ayupu nyabuk talak ara, Kapernaum mutuku noutamak, Yahudi yala ninye, sik Allah yupu peterena aik#6:59 Allah yupu peterena ap, kekena ap ati, domik aik – Yahudi yala nang, sik Allah yupu peterna aik ara, nun gereja mitik atonun uamuk bukni, mitikto yuke. Ara, sikce hari Sabtu weklamikce, Allah el si erelamik. Tonda yuk-yuk sum ara, Allah yupu kekena ap, peterena ap, ninye wapdanopura, sik yupu lipsisikuka bokoliana ati, anyaik weklamik. Bahasa Indonesia deice arye, ‘rumah ibada’ nyanyake. Anyaik lak len yupu ati, nomor 26 dipdelulume. pum noutamak arye nyabuk.

Ninye weik, Yesus yupu kekelamik bukni, ton nang arye Yesus batakuka biyik ati, nyabuk yupu

60Yesus arye, ayupu nirya Kapernaum mutuku nyabukura, el yupu kekebuka dobolbalamik ninye kan-kan noutamak arye, ton nang ara, “Se, anyapmasil yupu ara, ikin weik yupu anya arye, yata wiribuka dib tenebuka doproptibye do?” nyabik. 61Ayupu nyaldanmekce malye kanye bobuka, waldana atonun wininmekbuk, Yesus arye kekebuka ati, el melibuka banmek nang ati nyabuk.

“Anyapmasin yupu ati ara, ‘Se’ tenen, malye kanye bopmanulum do? 62Ninye Mi Koprop Atonunye, mince ulamukak tuba tamubuka im deice welebilibuk, eipmunyopura, yata tenepnamlum do?

63Allah El Dib Kanye arye, kam una deiyok ning arilule. Ninye nong ap, ninye mikip usilye ning ara, mambul ning pia kume. Ara nong kum upnamle ning uka. Narye nyapmasin yupu nirya ara, Allah El Dib Kanye arye nyalule. Ayupu ati, diba tenepmunyopura, kam una deiyok ning dololulume. Ayupu ara, kam una deiyok yupu ulule. Talye yupu kume. 64Kam una yupu nyasunun bukni, na kele, anggun kan-kan noutamak arye, ton nang ara diba kum teneninyake.” Yesus arye nyabuk.

Yesus arye ayupu nyabuk ning ara, talye ati kum nyabuk. Minop talak arye, sik dib kum tenelamik nang ap, tonda, ‘El opnamak’ tenen, ninye yupu deililbinamuknye ap, Yesus arye akunum bikamuka ati, ayupu nyabuk.

65Aminyan ara dukdongobuka ayupu ton nyabuk. “Anggun kan-kan arye, ton nang ara dib kum tenenyaka anya arye, arup arye ayupu nyapmasine. ‘Yata ninye do nirya, na ni koprop Allah arye, ‘Yesus diba tenepnamake’ tenen, sik kanye talima kum tamuplyopura, nati diba kum tenepnamniyake,’ nyapmasine.” Yesus arye awekmek ninye nirya ati nyabuk.

66Yesus arye nyabukopura, atalak arye deiyok koubuka, elti, melibuka dobolbalamik ninye kan-kan bokuka, yupa weik arye elti, batakikce, ‘El yupu kum kekenamabe’ tenen, elak melina batakik. 67Sik batakuka biyikba, Yesus arye el wipdeiyamuk nang, sik 12 nang ati asipdeyuk. “Anggun dan do. Anggun ton, ‘El batakuka bitibye,’ tenepmanulumce, na batakuka binamanulum do?” nyabuka asipdeyuk. 68Yesus arye nyabuka asipdeyuk bukni, Simon Peterus arye tamubuka nyabuk. “Kume, naio. Anuk ara, ninye pia kam una deiyok yupu talibuka nyasilyama ati, yatatonye dam bitibye do? 69Nun kel bikuburye, anti akunum dib tenekinyabe. Allah arye dopdeipsukba, Diksukum una deiyoknye bira, an tonoka. Yuknye kume,” nyabuk.

70Nyabukura, Yesus arye nyabuk. “Na aryuk, anggun obarye nang wipdeiamsise bukni, anggun kan-kan noutamak ara, tonoknye isa mi ulule,” nyabuk.

71Yesus arye ayupu nyabuka ara, Simon Iskariot, el mi Yudas ati tenebukce ayupu nyabuk. Yudas Iskariot ara, Yesus melilamik nang, 12 nang kan-kan ulamuk bukni, aminyan talak ara, ‘Yesus optinge’ tenen, ninye yupu deililbinamuka ati, Yesus arye ayupu nyabuk.

נבחרו כעת:

Yohanes 6: EIPA

הדגשה

שתף

העתק