Yohanes 2

Yesus arye talye mek sirika dobuka, anggur mek kintinipdeibuk yupu

1Yesus arye Galilea tam noutam bukni, mutuku si Kana mutuku biyukce, daunmeka ani, winilye sum akunum kibukura, amutuku ninye arye kil dona ati yunmek. Sik yunmek aik ara, Yesus el lin ap neika unmek. 2Ayuna deiyok nang arye, Yesus ap, elce wipdeiamuk nang ap ati, “Anggun ton dilyalulume,” nyabuka yukubika ati, sik ap anyaik uk, kil dona ati yupmek aik unmek.

3Kil dona ati yunmek ninye nirya arye, kanye deibuka dina ap, kanye wangalamak mek, anggur mek ap dinmekbuk, anyaik kintinipmek anggur mek nirya dibikba, akunum kum dayuk. Kum dayukba, Yesus el lin birye Yesus ati nyabuk. “Aninye sik kanye wangalamak anggur mek ara, akunum dipmak arye, kum dale. Tonap kum kintinipmake,” nyabuk.

4Nyabukura, Yesus arye tamubuka nyabuk. “Nongo, yata ati ayupu nyapmanilam do? Allah arye teneamnuk talak#2:4 Allah arye teneamnuk talak – Yesus arye ayupu nyabuk ning deiyok ara, ani. Ara, ‘Ninye kum winipmanto pil dopnebuk, ninye eibikirye, ‘Se, elda Allah el mi koprop ulule’ tenen, kel bikikirye, ‘Lak akarye nyanamniake,’ tenebukce nyabuk. kabula dam kum upmanile,” nyabuk. 5Nyabukura, el lin birye, anyaik pil melinang ati, “Yesus arye nyapsil yupu uk, adiparyuk kekebuka winiplulume,” nyabuk.

6Sik yupu talipmek aik ara, nong weik kat mek makau naku barye kintinibuka deipmekba aupmok. Amek makau ara mek ton min kum kwebuka deipmek. Amek makau ara, sik Yahudi yala ninye arye, ‘Allah derepsilyak’ tenen, ‘Musa nyapsuk touk nun taruk mek likinamap’ tenen, deililamik atonun ning uamuk. Tonok mek makau pum bisik, winipmanto mek pia weike, 100 liter mek kwebuka dikildongolamik.

7Aweik mek makau dam upmoka anya arye, Yesus arye anyaik pil melin nang ati nyabuk. “Talye mek sirika kwebuka, amek makau nirya dikdongoplulume,” nyabuk. Nyabuk touk, anang arye, mek weik arye kwebuka, anaku barye weik mek makau nirya dikdongobik. 8Akunum dikdongobikura, Yesus arye anang ati nyabuk. “Winira amek makau pum bisik arye, wini talak aupmal mek kwebuka, kil dona ati kwalina deiyoknye biti arilbilulume,” nyabukba, ayupu nyapdeibuk touk winibik.

9Yuna deiyoknye birye amek dobuka dipdeyuk. Amek ara, atalak ara talye mek upmok bukni, winira Yesus arye amek dobuka, anggur mek ninye kanye wangalamak ning akunum memebukura, anggur mek dayuk. Yuna deiyoknye birye, ‘Amek, anggur mek ara, amek makau arye boyanmaniyake’ tenen, kum bikuk bukni, anyaik pil melibuka dolamik nang ara, sikce kwepmeka ati, sikda bikmeke. Anyaik deiyoknye birye, talye mankau kanye bobuka, dipdeyukura, amek ara pia teleb ubuka ati, lukdayuk. Lukdayukce, kil dopnuyuknye biti yukubukba, yayuk. 10Yayukura, kwalina deiyoknye birye nyabuk. “Amio, amutuku wininyap ning an kele. Yuna kwalinyap talak nirya ara, minyuma talak pia teleb anggur mek aribibyopura, nun kayapu weik arye akunum dibikcopura, akunum bouplyop ati, aminyan talak mitik teleb ning arinyabe. Wininyap bukni, anda pia teleb ning ‘Na’ tenenauk deiplum bukni, wini talak ara, pia teleb ning arepmasilame. Wini talak dipnuyap ning ara pia telebe,” nyabuk.

11Yesus arye talye mek dobuka, pia teleb anggur mek, ninye kanye wangalamak ning kintinipdeibuk ning ara minyuma ning, ninye kum winipmanto pil dobuk. Apil dobuk ning deiyok ara, ‘Anye bira Allah el mikip deice arye pil dolule, tenepnamniake,’ tenebukce, apil ninye kum winipmanto ning dobuk. Ati, Galilea tam noutamak Kana mutuku arye apil dobuka deice arye, el weik mambul winibuk ning ap, pia teleb winibuk ning ap, laka kipdeipsuke. Tonda, winibukura, elce wepdeibuk nang eibikce, el Yesus ati, weik arye diba tenebikce, sik kanye talima el deiceuk deibik.

Yesus arye, malye nang ati, Allah arena aik pum bisik arye yakuka, dopkwetebuk yupu

12Yesus arye Kana mutuku noutamak arye, ninye kum winipmanto kum pil, minyuma yubukap ning akunum dobukopura, amutuku batakuka, Kapernaum mutuku koluku biyuk. Yesus ap, el lin ap el weitcapu ap, elce wipdeiyamuk nang ap, neika biyikce Kapernaum mutuku like winilye atonun, like dumbarye atonun mapmek. 13Mapmeka ani, sik Yahudi yala ninye arye weik yuna talak, Kaplina ati Kwalina#2:13 Kaplina ati Kwalina deiyok kiyamik talak ara, Mesir mutuku batakuka binuyik sum, Allah arye nyapdeibuk touk, sik Israel ninye arye, domba basam mi obikce, ining dobuka, sik buplan dana-dana tam ap, balye tam ap, likdeibik. Winibikura, Allah el ninye on malaikat, ‘Du mapu nirya opnun’ tenen, yayuk talak ara, aining eibukopura, Israel ninye, sik aik nirya bisibuka otamuk banmuk. Bukni, Mesir mutuku ulamik ninye, sik du mapu nirya obuka sirya dakuk. talak akunum dam kibukura, Yesus ap, el wepdeibuk nang ap, Yerusalem mutuku biyik. 14Yahudi yala ninye arye, Allah arena ati, weik domik aik dam ara,#2:14 Allah arena aik ara, Allah el si erena aik ulamuk bukni, Allah el si erena ap, tonda, ‘Ninye malye winin ning kum kipdeipnamsil’ tenen, kam ning yala weik olamekce, Allah ati anyaik dam arilyanganlamik. Tonda laka nyana yupu nomor 15 dindelelume. ninye weik bulubuka unmek. Anyasik dam ara, kam ulul ning dekne nang weik bukmek.

Ara, Yahudi ninye arye, ‘Allah arye nun malye winin ning ati oplopsutu bukni, nun malye winilamap ning kilibuka lyena ati, kam ning obibirye, elti, aribibyopura, nun malye ning kum kipdeipnamsile’ tenen, aning obuka arilamik. Tonda, ‘Allah el si erena ati, kam ning obuka, Allah arepnamak anya arye, aning deknuyak’ tenen, kam ning dekna deiyok nang weik anyasik dam unmek. Anang arye, sapi basam ap, domba basam ap, yalma maka ap, dekenmek. Tonda, aninye dana-dana tam mutuku nirya arye arilyanganmeka ati, yo bok dekuka boyangalamik nang ap, Allah el si erena asik damuk, sik meja deibuka pil donmek.

15Sik nirya wininmeka ati, Yesus ara yu ubukba, tapu dobukabukce, ninye libukne ning pibuka, anang sik nong deice libuklobuka, bai tam yakuka dopkwetebuk. Ara, ‘Allah arena aik dam ara, apil kum dopnuyak’ tenen, anang ap, sik sapi basam ap, domba basam ap nirya, bai tam dolkwetenmok. Sik yo bok dekuka dekenmek nang ati aning ara, sik meja tomobuka yamuplopbukce, sik keil uang nirya yamubuka donokuk. Aning dekne nang babye, anyasik dam arye bai tam yakuka dopkwetebuk. 16Yalma maka dekenmek nang ati, “Amaka dobuka, bobilulume. Na ni Allah, el mambul aik ara, talye aning-aning nirya deknak, pasar atonun aik kum ati, anggun yata ati, anyaik dam aning-aning bobuka dekelyangalulum do?” nyabuka wenebuk. 17Aninye nirya ati wenebuka bai tam yakuka dopkwetebukura, Yesus elce wipdeiamuk nang arye, Allah yupu noutamak sekamik yupu ila tuba tonap tenebik. Sik tenebik yupu ara ani.

‘Naie, ninye nirya arye, an weik mambul aik ati, ‘Si erenamkiak’ tenen, pia pi dobuka, pil dopnyopura, kanye imun ning weik unamnile.’ (Mazmur 69:9)

18Yesus arye, anang nirya yakuka bai tam dopkwetebukura, sik Yahudi yala deiyok nang arye, elti, nyabik. “Ara, ‘Allah arye, anye dopkwetebukura, pil dolule’ tenen, ‘Diba tenekitibye’ tenen, ninye kum winipmanto ning, yata pil dopnusilam do? Aninye bai tam dopkwetepmalama ara, yatanye birye deiyok ning aripkuka deice arye, wininmalam do?” nyabuka wenebik.

19Nyabikba, Yesus arye nyabuk. “Anyaik ara, uluplopmunyopura, like winilye sum deice arye, na tamubuka tonap dopnirye, teleb kipdeipnamne,” nyabuk. 20Nyabukura, sik Yahudi yala deiyok nang arye tamubuka nyabik. “Kume. Anyaik Allah el si erena ap, el erena ap ati domik aik ara, like yupa weik, keting tamun 46 tahun deice arye domika ati, anda yata wiribuka deice arye, like winilye sum aryuk tonap tamubuka doptum do? Aning ara, kum winipmantoe,” nyabik.

21Nyabik bukni, Yesus arye, “Anyaik,” nyabuk ning ara, talye aik sirika ati kum nyabuke. Tonda Allah el si erena aik ati kum nyabuk. El domona yupu deice arye, aik nyabuk. Bukni, aik yupu nyabuk ning deiyok ara, el bidamnye nong ati nyapdayuk. 22Adeiyok ati nyabuka anya arye, aminyan talak malye nang arye Yesus obikopura, dibuk bukni, Allah arye ila tamubuka Yesus kam bukeibukopura, el mapu ara, ‘Se, aning deiyok ati nyapsuke’ tenen, moubuka tenebikce, bikike. Winibukopura, minop talak Allah yupu sekamik ning ap, Yesus arye nyabuk ning ap ati, diba tenebik.

23Ura, Yesus ara, Kaplina ati Kwalina talak noutamak, Yerusalem mutuku noutamak unmokce, aninye ara, ‘Allah arye anye dopkwetebukura, pil donmale tenebikirye, biknamak’ tenen, ninye kum winipmanto ning, pil weik donmokba, ninye weik elinmek. Elinmeka anya arye, Yesus ati diba tenebik.

24Sikce Yesus ati kanye deibuka diba tenebik bukni, Yesus arye ninye nirya, sik kanye talima noutamak uamuk ning akunum bikamuka ati, Yesus arye amutuku ninye nirya ati ara, kanye kum delilamukce, el winilamuk ning nirya, sikti, lakak koprop kum nyalamuk. 25Yesus arye, ‘Se, anang arye, “Yesus ara dipnye ulule,” nyapniting’ tenen, kum patalamuk. Ninye talima noutamak ulul ning ara, el akunum bikamuka ati, aninye nirya ati, kanye deibuka dib kum tenebuk, ‘Sik dib nang, teleb unyake’ tenen, sikti, el kanye kum delilamuk.

נבחרו כעת:

Yohanes 2: EIPA

הדגשה

שתף

העתק