Rasul 3
3
Peterus arye, yok kwanyamuknye, kwetebuk yupu
1Ara, aminyan talak, Peterus ap, Yohanes ap, sintam jam tiga ato kibukura, ara, Yahudi yala nang bulubuka sik Allah morolamik keting kibuk ati, sik abitinye nang ara Yahudi yala nang, sik Allah ati arilbalamikce, el si erelamik aik banmarik. 2Ara, tonoknye el deiamik talak arye nirya, yok kwanyamuknye ulamukak, sik yuk nang arye el baya wibuka, Allah ati arilbalamik aik buplan dam asum-asum nirya deililbalamik. Abuplan si ara, Urasin Teleb Bublan nyalamik. Delilbalamik anyak, anye birye, ‘Sikda yo bok talye arepnamniak’ tenen, sik anyaik wekelbalamik nang ati, pia moronauk ulamuk.
Asum-asum nirya winilamika ati, sik baya wibuka bobayik talak ara, Peterus ap, Yohanes ap, banmarika dam kirikuka banmekbuk, anye birye Peterus ap, Yohanes ap eibuk. 3Peterus ap, Yohanes ap, anyaik weknurik talak ara, el eibukopura, ‘Yo bok arepnamnirak’ tenen, morobuk. 4Morobukopura, Peterus ap, Yohanes ap minopce dipderik akarye, Peterus birye ayupu nyabuk. “Nun dipdesilyame!” nyabuk. 5Nyabuk ati, anye birye ‘Yo bok arepnamniraka atia’ tenen, dinmok.
6Dinmok anyak, Peterus arye ayupu nyabuk. “Geil uang atouk bukni, dekna pia weik ning perak ap, emas ap ara,#3:6 Emas ara, gat ning bukni, dekna weik ning ulule. Emas ning kel kina ati, lak len yupu nomor 4 dipdelulume. pia nun ton kum upmasil bukni, aupmanil ning ara, arepnukine. Nasaret nang arye deiyamiknye Yesus Kristus, el si mikip arye, tikuka bilyame, nyapkine,” nyabuk.
7Nyabuk akarye, anye biti el sirik taruk talipdakuka, tikilinmok talak ara, adiparyuk anye bira el yan ap, el yan kwamul ap, mikip kibuk. 8Mikip kibukura, anye bira el bidamnang erebuka im sukukce, el yan tuku deice yanibuka talye-talye banmok. Banauk unmokak arye, anye ap, sik ap, Yahudi yala nang, sik Allah ati arilbalamik aik, el si eren aik dam biyikura, elda talye-talye bana ap, kanye deibukce merena ap, Allah si erena ati, “Allah ara, el pia telebe,” nyabuka, Allah si erena ap, wininmok. 9Wininmok talak ara, abulubuka wekmek nang nirya arye, el bana ap, Allah si erena ap, wininmok ning eibik.
10Eibikce, dinmekak arye, ninye tonok-tonok arye, ‘Anye bira ara, Urasin Teleb Bublan dam bulamukak arye yo bok morolamuknye bira, anye,’ tenenmeka ani, bikik. Bikik akarye, Peterus arye anye kwetebukura, winibuk ning eibika ati, ‘Se, aning ara pia teleb’ tenen, lukdayik akarye, teniltonauk unmek.
Peterus arye, adinmek nang ati, nyabuk yupu
11Ura, ayo bok morolamuknye kanye deibukce Peterus ap, Yohanes ap, sik nong talibuka kibuk talak ara, adinmek nang nirya ‘Se’ tenen, lukdayik akarye aunmek aik si ara, Salomo Atolonga (Kolonade)#3:11 Salomo Atolonga, tonda Salomo Kolonade nyalamik ning ara, minop talak Raja Salomo birye domuk. Allah el si erena aik dam domuk. Kolonade nyalamika ara, el urasin ara, mitik anun bura asik atonun bukni, pia cang weik ap, tonda pia teleb ning domuk. Ara ninye buknarye yupu sisikina ati, domuk. Tonda Salomo Kolonade laka nyana upu nomor 5 dipdelulume. memamukak bik-bik abuka dilyanganmekce, awekmek. 12Sik dilyanganmek ak, Peterus eibukopura, anang ati nyabuk.
Na kayapu, anggun Israel nango, Yata ati aning eipmalumce, lukuldanmalum do? Nun mikip ap, nun diksukum una ap deice arye, anye bira kum kwetepmaname. Sikce, ‘Allah el diksukumuk ulye touk, sik babye, atonun diksukum urikirye deice arye, anye bira kweteipmarakba banmale,’ tenenmasulum do? Ati, ‘Se’ tenen, nun dinmasulum ara, yata ati do?
13Nun bitinye nang aryuk anye bira kum kwetepmaname. Aning kum bukni, Abraham ap, Isak ap, Yakup ap, sik moubuka talyamik Allah ara, nun apu yapu#3:13 Yahudi yala nang, sik apu yapu ati laka nyana yupu nomor 20 dirume. nirya talyamik Allah ara, el yupu kekebuka, el piluk melibuka ninye winipmanto kum pil dolulnye, Yesus akunum erepdeibuk. Anggunda, ‘Nun deiyok nang arye Yesus opnamak’ tenen, Yesus dobuka anang ati akunum talye areplume. Akunum areplumopura, Pilatus bira, ‘Yesus talye lopdeipnamne’ tenen, akunum tenebuk bukni anggunce, ‘Kume opdeipsilyame,’ nyaplumce, Yesus dobuka Pilatus damak delilbilumce bataklume.
14Yesus ara, Diksukum Ululnye#3:14a Diksukum Ululnye nyalamik ning ara, Yesus ara, pia telebuk ulamukce, malye ning tonok babye ton kum winilamuk ati, ‘Diksukum Ululnye,’ nyabuka, Yesus ati nyalamik. Laka nyana yupu nomor 6 ap, Kisah Para Rasul 22:14 ap dipdelulume. atia. Allah el yupu pia teleb kibuka kekebuka dolamuk akarye, malye una pia kum arye, Allah piluk dolamuk bukni, anggunce elti, bataklum akarye, “Ninye onanye Barsabas#3:14b Barsabas ara, Yesus wanwanun yo deice opnuyik talak ara, elda kum lopdeipnamik bukni, morobikba ninye omuknye Barabas lopdeibuk bukni, Yesus ara, “Opdeiplulume,” nyabukba, obik. Tonda Lukas 23:18 dipdelulume. lobuka arepsilyame,” nyabuka moroplume. 15Anggunce yupu nyapdeiplumura, kam una deiyok teleb ning arisulula deiyoknye, sik malye nang arye dobuka obik. Sik obik bukni, Allah arye anye Yesus el kam bukeibuk. Nunda, anirya dilamubu nang unmabe.
16Ara, minop arye anye bira kel bikamlum akarye, winiryuk eipmalumnye bira, Yesus el si dib tenenarye kwetepmala anyak mikip upmale. Ara, Yesus el si mikip tenena ap, Yesus arye nunti dib tenena deiyok ning arisilya deice arye, anye bira el nong nirya kwetepmal anyak, anggun nirya eipmalume. 17Na kayapu, na kele. Anggun ap, anggun du yapu ap, ‘Deiyok anye’ tenen, kel bikna kum arye, anggun nirya walwal arye malye winiplume. 18Walwal arye winiplum bukni, Allah arye nyabukura, aminyan winipnamuk ning lak nyalamik nang, nabi nang nirya arye, ‘Allah el Mesias dopkwetepnamla ara, kanye talima imun ning weik wininamle,’ nyabuka lak nyalamik. Anggun winipluma deice arye, Allah yupu nyalilamuk touk akunum winipsuke.
19Aning ati ara, anggun malye ulamlum ning ap, anggun kanye talima malye tenelulum ning ap, batakmunye akarye, Allah el tam kipropmunyeura, elce anggun malye winilamlum ning nirya kum daneipnamsile. 20Anggun malye winimunye ning nirya batakmunce, Allah el tam tonap tamubuka kipropmunyeura, Allah weik arye melinamsile. Ara, tukak mutuku noutamak nirya arye, ninye weik lyeplirye, talinamlanye bira Mesias, Allah arye anggun lyena ati akunum weipdeipsuknye, dopreipnamsile. Ara Yesus ati nyapsine.
21Minop talak arye, Allah el aminyan winipnamuk ning laka nyalamik nang, el yupu uk kekebuka, el piluk dobuka, pia teleb-teleb kibuka dolamik nang ara, sik nabi nang arye nyalamik yupu deice Allah arye, ‘Aning-aning minop ning nirya ati, tuba punubukapnirye, winiryuk ninguk kintinipnirye arepnamsine,’ nyalilamuk. Anyalilamuk ning min kum winipmalye talak ara, Yesus im deiceuk pia ulamlya ani, anyalilamuk ning kintinibuka delin talak akunum uplyopura, Allah arye Yesus dopkwetepnamle. 22Aning atouk, Musa babye, nyabuke.
‘Nara, Allah el yupu laka nyananye nabi ulamse touk, Allah el yupu laka nyanamsilnye anggun yala nang kan-kan arye, anggunti erepdeipnamsile. Yata yupu do nirya, elce anggunti nyanamsil yupu nirya ara, moubuka kekenamlulume. 23Yatanye do, yata kil do nirya, el nyalye yupu kum kekebuka doprobiceura, Allah el mapu sik kan-kan arye el yupu kum kekenyak ninye dobuka onamake.’ (Ulangan 18:15, 18, 19)
24Dipkoprop Allah el yupu laka nyalamuknye nabi Samuel dipdongobuka, Allah el aminyan arye winipnamuk ning laka nyalamik nang arye, nyapdanin yangalamika ani, laka nyalamik nang, nabi nang nirya arye, Allah elce kintinip deiyamuknye, Mesias#3:24 Mesias nyalamik ning ara, Ninye Lyena Deiyoknye biti nyalamik. Ara Yesus atia, yuknye kume. Tonda, laka nyan yupu nomor 3 dipdelulume. ara, Yesus eluk unamuk talak ati, ‘Winipnamle,’ nyabuka lak nyalilamsik. 25Tonda, Allah arye, nun apu yapu ap, el yupu laka nyalilamik nabi nang ap ati, el mapu kipdeibuk akarye, “Winipnamsine,” nyalilamuk yupu ara, nun apu yapu ap, tonda anggun wini talak umunye ninye ap ati, nyalilamuk. Allah arye el nyalilamuk ning wini talak akunum pil donmal anyak elinmalume. Allah arye Abraham ati anyapnusin yupu nyabuk.#3:25 Allah arye Abraham ati nyalilamuk yupu ara, Kejadian 22:18, tonda Kejadian 26:4 aupmale. Allah arye Abraham ayupu nyalilamuk ning ara, weik awamuk bukni, tonok nyabuk ning ara ani. Ara, ‘Abraham arye deibukura, dadeipdanin yangalamica ani, ninye weik upnamake. Sirya talak ara, Abraham el yala nang arye danerye Yesus deipnamake’ tenen, nyalilamuk. ‘Ninye mutuku-mutuku nirya teleb ning arepnamne,’ nyabuk ning ara, ‘Yesus ining deice arye ninye mutuku-mutuku nirya lyepnamle’ tenen, nyapdeiyamuk. Allah arye Abraham ati nyabuk yupu ara, nyapnusine.
‘Ance deipminyeura, dadeipdanin balamikca ani, deibice mapu deice arye, ninye mutuku-mutuku nirya ati, teleb ning nirya kintinibuka dipse ara, arepnamsine.’ (Kejadian 22:18; 26:4)
Peterus arye Musa sekamuk yupu dobuka nyabuk.
26Peterus ayupu nyabuk akarye ayupu tonap, nyabuk. “Allah arye el Melinanye#3:26 Melinanye nyabuka deiyok ara, ‘Yesus arye Ninye Lyena Deiyoknye unamle’ tenen, nyabuk. Tonda, lak len yupu nomor 7 dipdelulume. kunum kintinipdeibukura, ‘Yahudi yala nang ara, weik melipnamle’ tenen, anggun dam minop dopkwetepsuke. Ara ‘Sik yuk arye, malye wininyak ning batakuka, balye tamubuka teleb bisik binamakce, Yesus ati dib tenepnamak’ tenen, dopkwetepsuke. Tonda, ‘Yesus arye aninye dobuka, Allah el tam tamulinamsil’ tenen, dopkwetepsuke,” Peterus arye nyabuk.
© 2023, Wycliffe Bible Translators, Inc. All rights reserved.